Samweli Waciwiri

14 Yoabhe mwana wa Zeruya+ adzindikira kuti mambo akhadatsuwa Abhisaloni.+ 2 Natenepa Yoabhe acemeresa nkazi wakucenjera wa ku Tekoa+ mbampanga: “Ndaphata miyendo, sangizira ninga waferwa, bvala nguwo zinabvala anthu adaferwa, pontho leka dzola mafuta.+ Usafunika kukhala ninga watoma kale kakamwe kulira munthu adafa. 3 Buluka penepo ndoko kalonge na mambo mbumpanga tenepa.” Natenepa Yoabhe ampanga pikhafunika iye kuenda kalonga.*

4 Nkazi wa ku Tekoa aenda kuna mambo, agodama, akotamisa nkhope yace mpaka pantsi mbalonga: “Mambo, ndiphedzeni!” 5 Mambo ambvundza: “Ninji pidacitika?” Iye atawira: “Ndine nzice; mamunanga afa. 6 Ine ntumiki wanu ndikhali na ana awiri amuna. Iwo amenyana kumunda, kweneko nee kukhali na munthu toera kuabvunulira. Natenepa m’bodzi amenya ndzace mbamupha. 7 Cincino abale athu onsene asandukira ine ntumiki wanu, maseze iwo asadziwa kuti mwana unoyu ndi nyakutambira unthaka, iwo asalonga: ‘Tipase mwana adapha m’bale wace, toera timuphe thangwi iye apha m’bale wace.’+ Iwo asafuna kuthimisa khala ya moto idasala na ine,* mbacitisa kuti dzina ya mamunanga ifudzike, mbasowa mwana pa dziko yapantsi.”

8 Buluka penepo mambo apanga nkazi unoyu: “Ndoko kunyumba kwako, ine ndinatsalakana nseru wako.” 9 Penepo nkazi wa ku Tekoa apanga mambo: “Mbuyanga mambo, mulando mbukhale kuna ine na kuna nyumba ya babanga, mbwenye imwe mambo pabodzi na utongi wanu nee muli na mulando.” 10 Penepo mambo ampanga: “Munthu unango angalonga pontho na iwe thangwi ya pyenepi, bwera naye kuna ine, iye nee anakunentsabve.” 11 Mbwenye iye atawira: “Ndaphata miyendo, dumbirani mu dzina ya Yahova Mulungu wanu toera ule anafuna kupha+ mwananga thangwi ya pidacita iye akhonde kucita pyenepi.” Natenepa mambo alonga: “Ndiri kudumbira mu dzina ya Yahova Mulungu wa m’maso+ kuti nee tsisi ibodzi ya mwanako inadzagwa pantsi.” 12 Buluka penepo nkazi alonga: “Ndaphata miyendo mambo, tawirisani kuti ntumiki wanu alonge pontho cinthu cibodzi kuna imwe.” Mambo ampanga: “Longa!”

13 Nkazi alonga: “Mambo, thangwi yanji imwe mwacita pinthu pyakuipa kuna mbumba ya Mulungu?+ Nakuti imwe mwathamangisa+ mwananu mbamucimwana kum’bweza, natenepa imwe muli na mulando thangwi ya pidalonga imwe. 14 Mwandimomwene ife tinafa, mbatikhala ninga madzi akubhomeka akuti nkhabe kuoleka. Mbwenye Mulungu nkhabe kupha munthu, pontho iye asasaka mathangwi toera munthu adathamangiswa akhonde kupitiriza kukhala kutali na iye. 15 Mambo, ine ndabwera pano toera ndikupangeni pyenepi, thangwi mbumba yandicitisa kugopa. Natenepa ine ntumiki wanu ndanyerezera: ‘Ndisafunika kuenda kalonga na mambo, panango iye anacita pidam’phemba ine ntumiki wace. 16 Panango mambo anabvesera mbapulumusa ine ntumiki wace m’manja mwa anthu anafuna kundipha pabodzi na mwananga m’bodzi basi mbaticimwanisa kutambira unthaka udatipasa Mulungu.’+ 17 Ine ndanyerezera pontho: ‘Mafala a mbuyanga mambo anandibalangaza,’ thangwi imwe mbuyanga mambo ndimwe ninga anju wa Mulungu wandimomwene pakudzindikira pyadidi na pyakuipa. Yahova Mulungu wanu mbakhale na imwe.”

18 Natenepa mambo apanga nkazi: “Mu pinthu pyonsene pinafuna ine kukubvundza, leka kundibisira cinthu.” Nkazi atawira: “Ndaphata miyendo, longani mbuyanga mambo.” 19 Buluka penepo Mambo abvundza: “Kodi ndi Yoabhe adakutuma toera udzalonge mafala anewa onsene?”+ Nkazi atawira: “Ndiri kudumbira mu dzina yanu imwe wakuti muli m’maso, mbuyanga mambo, kuti pyacitikadi ninga* mudapilongera imwe, thangwi ndi ntumiki wanu Yoabhe adandituma mbapanga ine ntumiki wanu pikhafunika ine kulonga.* 20 Ntumiki wanu Yoabhe acita pyenepi toera kucinja pinthu, mbwenye imwe mbuyanga mambo muli na ndzeru ninga za anju wa Mulungu wandimomwene, pontho musadziwa pyonsene pinacitika pa dziko yapantsi.”

21 Penepo mambo apanga Yoabhe: “Nkhabe pinthu, ndinacita pyenepi.+ Ndoko kakwate Abhisaloni ubwere naye.”+ 22 Natenepa Yoabhe agodama, akotamisa nkhope yace mpaka pantsi mbasimba mambo. Yoabhe alonga: “Mbuyanga mambo, lero ine ntumiki wanu ndadzindikira kuti ndine wakufunika pamaso panu, thangwi imwe mambo mwacita pidakuphembani ine ntumiki wanu.” 23 Buluka penepo Yoabhe alamuka, aenda ku Jesuri+ mbabweresa Abhisaloni ku Yerusalemu. 24 Natenepa mambo alonga: “Iye mbabwerere kunyumba kwace, mbwenye nee asafunika kuonana na ine.” Penepo Abhisaloni abwerera kunyumba kwace, pontho nee aonana na mambo.

25 Mu dziko yonsene ya Izraeli nee mukhali na munthu unango wakuti akhasimbwa kakamwe thangwi yakubalika kwace kupiringana Abhisaloni. Kutomera kunsolo mpaka kumiyendo, iye nee akhali na cilema. 26 Iye akhacinga tsisi yace kunkhomo kwa caka, thangwi ikhalemera kakamwe. Tsisi yace ikhalemera masiklo* 200 ingapimwa na mwala wakupima nawo wa amambo.* 27 Abhisaloni akhadabala ana atatu amuna+ na m’bodzi wankazi, wakuti dzina yace ikhali Tamara. Iye akhali nkazi wakubalika kakamwe.

28 Abhisaloni akhala mu Yerusalemu pyaka piwiri pyamumphu, mbwenye iye nee aonana na mambo.+ 29 Natenepa Abhisaloni acemeresa Yoabhe toera antume kuti aende kuna mambo, mbwenye Yoabhe akhonda. Buluka penepo ancemeresa pontho kaciwiri, mbwenye iye akhonda pontho. 30 Pakumalisa iye apanga anyabasa ace: “Munda wa Yoabhe uli dhuzi na wanga, pontho m’munda mwace muna sevadha. Ndokoni kaupise na moto.” Natenepa anyabasa a Abhisaloni aenda kaupisa na moto. 31 Penepo Yoabhe aenda kuna Abhisaloni mbambvundza: “Thangwi yanji anyabasa ako apisa munda wanga?” 32 Abhisaloni atawira Yoabhe: “Ine ndakutumizira mphangwa izi: ‘Bwera kuno toera ndikutume kuti uende kuna mambo ukambvundze: “Thangwi yanji ine ndabwera buluka ku Jesuri?+ Mbipidakhala pyadidi kuna ine kukhala pyanga kweneko. Cincino ndisiye ndikaonane na mambo, khala ndiri na mulando iye mbandiphe.”’”

33 Natenepa Yoabhe aenda kuna mambo mbampanga pyenepi. Buluka penepo mambo acemeresa Abhisaloni, iye aenda pana mambo, agodama, mbakotamisa nkhope yace mpaka pantsi. Penepo mambo ampswompswona Abhisaloni.+