Dhanyeli

12 “Mu ndzidzi unoyu, Migeli,*+ wakuti ndi ntsogoleri wankulu+ anaphedza mbumba yako,* anadzacita pinthu. Panadzaoneka ndzidzi wa nyatwa wakuti cipo waoneka kale kutomera mu ndzidzi udatoma madzindza mpaka mu ndzidzi unoyu. Mu ndzidzi unoyu, mbumba yako inadzapulumuka,+ onsene ale akuti madzina awo alembwa mʼbukhu.+ 2 Anthu azinji adafa* anadzalamuka, anango toera akhale mʼmaso kwenda na kwenda, anango toera apaswe manyadzo, anango toera aidiwe kwenda na kwenda.

3 “Anthu andzeru anadzayetimira ninga kudzulu, pontho ale anacitisa azinji kukhala akulungama, anadzayetimira ninga nyenyezi kwenda na kwenda.

4 “Mbwenye iwe Dhanyeli, koya mafala anewa ncibisobiso, pontho funga bukhu ineyi mpaka mu ndzidzi wakumalisa.+ Anthu azinji anadzasaka,* pontho udziwisi wandimomwene unadzanjipa.”+

5 Buluka penepo, ine Dhanyeli ndaona aanju anango awiri akuti akhali dzololo, mʼbodzi akhali ntunda uno wa nkulo, unango akhali ntunda ule.+ 6 Buluka penepo, mʼbodzi wa aanju abvundza munthu adabvala nguwo za linyu,+ wakuti akhali padzulu pa madzi a mu nkulo unoyu: “Panapita ndzidzi ungasi toera pinthu pyenepi pyakudzumisa picitike?” 7 Penepo ine ndabva mafala a munthu ule adabvala nguwo za linyu, wakuti akhadalimira padzulu pa madzi mbakatawira. Pikhatawira iye athukula ndzulu nkono wace wamadyo na wabzwere, mbadumbira kuna Ule wakuti ali mʼmaso kwenda na kwenda.+ Iye alonga: “Panadzapita ndzidzi ubodzi udakhazikiswa, midzidzi miwiri idakhazikiswa* na hafu ya ndzidzi ubodzi.* Angadzamala kugwanda-gwanda mphambvu za mbumba yakucena,+ pinthu pyenepi pyonsene pinadzafika kunkhomo.”

8 Ine ndabva pidalonga iye, mbwenye nee ndapibvesesa;+ natenepa ndabvundza: “Mbuyanga, ninji pinafuna kucitika pyenepi pingamala?”

9 Penepo iye atawira: “Dhanyeli, ndoko, thangwi mafala anewa asafunika kukoyiwa ncibisobiso na kufungwa mpaka mu ndzidzi wakumalisa.+ 10 Azinji anadzatsukika, mbaceneseka, pontho anadzasungulwa.+ Anthu akuipa anadzacita pyakuipa, pontho nee mʼbodzi wakucita pyakuipa anadzabvesesa pyenepi; mbwenye ale ali na udziwisi, anadzapibvesesa.+

11 “Bulukira mu ndzidzi unafuna anthu kusiya ntsembe zinaperekwa ndzidzi onsene+ na mu ndzidzi unafuna kuikhwa cinthu cakunyanyasa cakuti cisacitisa kufudzwa,+ panadzapita ntsiku 1.290.

12 “Nyakutsandzaya ndi ule anapitiriza kudikhira,* mbafika kunkhomo kwa ntsiku 1.335.

13 “Mbwenye iwe ndoko mpaka kunkhomo. Iwe unadzafa,* mbwenye kunkhomo kwa ntsiku zenezi unadzalamuswa toera kutambira unthaka wako.”+