Samweli Wakutoma
24 Sauli pidafika iye kwene buluka kathamangisa Afilisti, apangwa: “Dhavidhi ali kuthando ya Eni-Jedhi.”+
2 Natenepa Sauli akwata amuna 3.000 adasankhulwa mu Izraeli monsene, mbaenda kasaka Dhavidhi pabodzi na amuna akhali na iye mʼmbuto za miyala zinakhala mbuzi za mʼmapiri. 3 Sauli afika pa mbuto yakuti ikhali na mathanga a mabira adamangwa na miyala dhuzi na nseu. Pa mbuto ineyi pakhali na mphako, natenepa iye apita mwenemu mbaiphatisira ninga cimbuzi.* Mu ndzidzi unoyu Dhavidhi pabodzi na amuna akhali na iye akhali nkati kakamwe mwa mphako ineyi.+ 4 Amuna akhali na Dhavidhi ampanga: “Lero ndi ntsiku inakupangani Yahova kuti: ‘Ndiri kupereka nyamalwa wako mʼmanja mwako,+ pontho ncite pyonsene pinafuna iwe.’” Natenepa Dhavidhi aenda pangʼono-pangʼono mbagwanda nkhomo ya tunika yakusowa mikono ya Sauli. 5 Mbwenye pidamala iye kucita pyenepi, ntima wace* watoma kumpasa mulando+ thangwi ya kugwanda nkhomo ya tunika yakusowa mikono ya Sauli. 6 Dhavidhi apanga amuna akhali na iye: “Ine nkhabe funika kucita pyenepi kuna mbuyanga thangwi iye ndi nyakudzodzwa wa Yahova. Nakuti iye ndi nyakudzodzwa wa Yahova,+ Yahova nkhabe komerwa ndingacita pyakuipa kuna iye.” 7 Na mafala anewa Dhavidhi akhurudza* amuna akhali na iye, pontho nee aatawirisa kucita pyakuipa kuna Sauli. Natenepa Sauli abuluka mʼmphako mbapitiriza na ulendo wace.
8 Buluka penepo Dhavidhi abuluka mʼmphako mbacemera Sauli: “Mbuyanga mambo!”+ Sauli pidayangʼana iye nduli, Dhavidhi agodama mbakotamisa nkhope yace mpaka pantsi. 9 Dhavidhi apanga Sauli: “Thangwi yanji imwe musabvesera amuna analonga kuti: ‘Dhavidhi asafuna kukucitani pyakuipa’?+ 10 Lero imwe mwaona na maso anu kuti Yahova akhadakuperekani mʼmanja mwanga mʼmphako. Munthu unango pidandipanga iye toera ndikupheni,+ ine ndakubverani ntsisi mbandilonga: ‘Ine nkhabe kucita pyakuipa kuna mbuyanga thangwi iye ndi nyakudzodzwa wa Yahova.’+ 11 Mbuyanga* onani nkhomo ya tunika yanu yakusowa mikono iri mʼmanja mwanga; mu ndzidzi udagwanda ine nkhomo ya tunika yanu yakusowa mikono, nee ndakuphani. Cincino imwe munakwanisa kuona na kubvesesa kuti ine nee ndisafuna kukucitani pyakuipa peno kukusandukirani, pontho nee ndakudawirani,+ ngakhale tenepo imwe mukundisaka toera kundipha.+ 12 Yahova mbakhale ntongi kuna imwe na ine,+ pontho Yahova mbakutcunyuseni thangwi ya pinthu pidandicitira imwe.+ Mbwenye ine nee ndinakucitani pinthu pyakuipa.+ 13 Nsangani wakale usalonga: ‘Pinthu pyakuipa pisabulukira kuna munthu wakuipa,’ mbwenye ine nee ndinakucitani pinthu pyakuipa. 14 Kodi mambo wa Izraeli akuthamangisa ine? Ndine ani ine? Ine ndine ninga mwanambwa wakufa, pontho ndine ninga nkhulukupa.* + 15 Yahova mbakhale ntongi, iye anadzatonga imwe na ine, iye anadzatonga nseru unoyu mbanditsidzikiza,+ pontho anadzandipulumusa mʼmanja mwanu.”
16 Dhavidhi pidamala iye kulonga mafala anewa, Sauli abvundza: “Mwananga Dhavidhi,+ fala ineyi ndi yako?” Penepo Sauli atoma kulira mwakugaluza. 17 Iye apanga Dhavidhi: “Iwe ndiwe wakulungama kakamwe kupiringana ine, thangwi wanditsalakana mwadidi, mbwenye ine ndakutsalakana mwakuipa.+ 18 Lero wandipanga pinthu pyadidi pidandicitira iwe thangwi yakukhonda kundipha mu ndzidzi udandipereka Yahova mʼmanja mwako.+ 19 Ndi munthu upi anagumana nyamalwa wace mbansiya toera aende nee kuncita pinthu pyakuipa? Yahova anadzakupasa pinthu pyadidi+ thangwi ya pidandicitira iwe lero. 20 Ine ndisadziwa kuti iwe unadzatongadi ninga mambo,+ pontho umambo wa Izraeli unadzapitiriza mʼmanja mwako. 21 Cincino dumbira mu dzina ya Yahova+ kuti ine ndingafa nee unadzapha ananga,* pontho nee unadzafudza dzina yanga mʼbanja ya babanga.”+ 22 Natenepa Dhavidhi adumbira kuna Sauli, buluka penepo Sauli aenda kunyumba kwace,+ mbwenye Dhavidhi pabodzi na amuna akhali na iye aenda ku mbuto yakubisalira.+