Atongi

6 Mbwenye Aizraeli acita pontho pinthu pyakuipa pamaso pa Yahova.+ Natenepa Yahova aapereka mʼmanja mwa Amidhiyani mu pyaka pinomwe.+ 2 Amidhiyani atoma kuponderera Aizraeli.+ Thangwi ya kupondererwa kweneku na Amidhiyani, Aizraeli asasanya mbuto zakubisalira* mʼmapiri, mʼmadzimba na mʼmbuto zakunentsa kufikako.+ 3 Aizraeli angalima minda, Amidhiyani, Amaleki+ na anthu a Kumabulukiro a Dzuwa+ akhabwera kudzaapomokera. 4 Iwo akhamanga misasa toera kupomokera Aizraeli, pontho akhafudza pinthu pidalima iwo mpaka ku Gaza. Iwo nee akhasiya cinthu toera Aizraeli adye, pontho nee akhasiya mabira, ngʼombe nee maburu.+ 5 Thangwi iwo akhabwera na pifuyo pyawo na misasa yawo, akhali azinji kakamwe ninga anyadzombe.+ Iwo na makamelo awo nee akhalengeseka thangwi yakunjipa,+ pontho akhapita mu dziko toera kuifudza. 6 Aizraeli atcerenga kakamwe thangwi ya Amidhiyani; natenepa Aizraeli aphemba ciphedzo+ kuna Yahova.

7 Aizraeli pidaphemba iwo ciphedzo kuna Yahova thangwi ya Amidhiyani,+ 8 Yahova atuma mprofeta kuna Aizraeli, mbaapanga kuti: “Yahova Mulungu wa Aizraeli alonga tenepa: ‘Ine ndakubulusani ku Ejitu, mu dziko ikhali imwe mu ubitcu.+ 9 Natenepa ine ndakupulumusani mʼmanja mwa Aejitu na mwa anthu onsene akhakupondererani; ine ndaathamangisa pamaso panu, mbandikupasani dziko+ yawo. 10 Pontho ndakupangani kuti: “Ine ndine Yahova Mulungu+ wanu. Lekani kugopa alungu Aamori a mu dziko inakhala imwe.”+ Mbwenye imwe nee mwandibvera.’”*+

11 Mukupita kwa ndzidzi, anju wa Yahova abwera,+ mbakhala pantsi pamuti ukulu ku Ofra, wakuti ukhali wa Yowasi Muabhiezeri.+ Mwanace anacemerwa Jidhiyoni+ akhabubuda tirigu pa mbuto yakukamulira mauva toera kuibisira Amidhiyani. 12 Anju wa Yahova aonekera pana iye mbampanga: “Yahova ali na iwe,+ nyankhondo wamphambvu.” 13 Natenepa Jidhiyoni antawira: “Ndilekerereni mbuyanga, khala Yahova ali na ife, thangwi yanji pinthu pyenepi pyacitika kuna ife?+ Ali kupi mabasace onsene akudzumisa adatipanga+ ababathu kuti: ‘Yahova atibulusa mu Ejitu?’+ Cincino Yahova atisiya,+ pontho atipereka mʼmanja mwa Amidhiyani.” 14 Yahova amuyangʼana mbampanga: “Ndoko na mphambvu ziri na iwe, pontho iwe unadzapulumusa Aizraeli mʼmanja mwa Amidhiyani,+ thangwi anakutuma ndine.” 15 Jidhiyoni antawira: “Ndilekerereni Yahova. Ndinakwanisa tani kupulumusa Aizraeli? Onani basi! Banja yathu* ndi yakupwazika kakamwe mu dzindza ya Manase, pontho ine ndine wakupwazika kakamwe panyumba ya babanga.” 16 Mbwenye Yahova ampanga: “Nakuti ine ndinadzakhala na iwe,+ unadzafudza Amidhiyani ninga ukufudza munthu mʼbodzi.”

17 Penepo Jidhiyoni alonga kuna iye: “Khala munandiphedza, ndipangizeni cidzindikiro cinapangiza kuti ndimwe analonga na ine. 18 Ndaphata miyendo, lekani kubuluka pano mpaka ine kubwerera na muoni wanga mbandiuikha patsogolo panu.”+ Natenepa iye antawira: “Ine ndinakhala pano mpaka kubwerera kwako.” 19 Jidhiyoni apita nʼnyumba, mbaphika nyama ya mbuzi. Pontho akwata ufa wakukwana efa* ibodzi mbacita mikate yakusowa pyakutupisa.+ Iye akwata nyama mbaiikha ncitundu, nsuzi mbauikha ncikalango; buluka penepo apikwata mbaenda kapipereka kuna iye pamuti ukulu.

20 Anju wa Mulungu wandimomwene ampanga: “Kwata nyama na mikate yakusowa pyakutupisa, upiikhe pamwala ukulu, mbukhutula nsuzi padzulu pace.” Jidhiyoni acita pyenepi. 21 Natenepa anju wa Yahova afuthula nkono wace, mbakhuya nyama na mikate yakusowa pyakutupisa+ na ntsonga ya ndodo ikhali mʼmanja mwace. Penepo moto wagaka mbupisa nyama na mikate yakusowa pyakutupisa. Buluka penepo anju wa Yahova azambazika. 22 Natenepa Jidhiyoni adzindikira kuti akhali anju wa Yahova.+

Mu ndzidzi ubodzi ene Jidhiyoni alonga: “Mama ine, Mbuya Wamphambvu Zonsene Yahova, thangwi ndaona anju wa Yahova na maso anga!”+ 23 Mbwenye Yahova ampanga: “Ntendere mbukhale na iwe. Leka gopa;+ iwe nee unadzafa.” 24 Natenepa Jidhiyoni amangira guwa Yahova pa mbuto ineyi, yakuti isacemerwa Yahova-Salomi*+ mpaka lero. Guwa ineyi isapitiriza ku Ofra, nzinda wa Aabhiezeri.

25 Masiku anewa, Yahova ampanga: “Kwata mwanangʼombe wa babako, mwanangʼombe waciwiri wa pyaka pinomwe, pontho fudza guwa ya Bhaale yakuti ndi ya babako, mbugwanda nzati wa Asera* uli dhuzi na guwa ineyi.+ 26 Mangira Yahova Mulungu wako guwa na miyala yakupakwa pa mbuto yakutsidzikizika, kwata mwanangʼombe unoyu mbumpereka ninga ntsembe yakupiswa padzulu pa mapindi a matabwa a nzati wa Asera* udagwanda iwe.” 27 Natenepa Jidhiyoni akwata amuna khumi mwa atumiki ace mbacita pidapangwa iye na Yahova. Mbwenye thangwi yakugopa anthu a panyumba ya babace na amuna a mu nzinda, iye acita pyenepi namasiku, tayu namasikati.

28 Amuna a mu nzinda pidalamuka iwo namacibese kakamwe, aona kuti guwa ya ntsembe ya Bhaale yafudzwa, nzati wa Asera* ukhali dhuzi na guwa ineyi ukhadagwandwa, pontho mwanangʼombe waciwiri akhadaperekwa ninga ntsembe pa guwa ipswa idamangwa. 29 Iwo abvundzana unango na ndzace: “Mbani adacita pyenepi?” Pidamala iwo kusaka kudziwa, alonga: “Adacita pyenepi ndi Jidhiyoni mwana wa Yowasi.” 30 Natenepa amuna a mu nzinda apanga Yowasi: “Bulusa kunja mwanako toera aphiwe, thangwi iye afudza guwa ya ntsembe ya Bhaale mbagwanda nzati wa Asera* ukhali dhuzi na guwa ineyi.” 31 Yowasi+ apanga onsene adalimira nʼkhundu mwace: “Thangwi yanji mukutsidzikiza Bhaale? Thangwi yanji musafuna kumpulumusa? Munthu anantsidzikiza anaphiwa macibese ano.+ Khala iye ndi mulungu, nsiyeni atsidzikizike ekhene,+ thangwi alipo adafudza guwa yace.” 32 Pa ntsiku ineyi, iye apasa Jidhiyoni dzina ya Yerubhaali, mbalonga: “Bhaale mbatsidzikizike ekhene, thangwi alipo adafudza guwa yace.”

33 Amidhiyani+ onsene, Amaleki+ na anthu Akumabulukiro a Dzuwa agumanya anyankhondo;+ iwo awambuka nkulo mbamanga misasa yawo mu Gowa ya Yezrieli. 34 Nzimu wa Yahova wabwera kuna Jidhiyoni,+ natenepa iye aliza nyanga,+ mbatowerwa na Aabhiezeri.+ 35 Iye atumiza mphangwa kuna anthu anango a dzindza ya Manase, iwo agumanyikana mbantowerambo. Iye atumiza pontho mphangwa kuna Azeri, Zebhuloni na Nafitali, iwo abwera mbagumanikana na iye.

36 Buluka penepo Jidhiyoni apanga Mulungu wandimomwene: “Khala imwe munaphatisira ine toera kupulumusa Aizraeli, ninga mudapikira imwe,+ 37 ndiri kuikha uweya* wa bira pa mbuwa.* Uweya unoyu ungatota na bume nʼkhundu mwace mbamukhonda kutota, penepo ndinadziwa kuti munaphatisira ine toera kupulumusa Aizraeli, ninga mudapikira imwe.” 38 Ndi pyenepi pidacitika. Pidalamuka iye mangwana mwace namacibese kakamwe, akamula uweya, iwo wabuluka madzi akuti adzadza khomitco ikulu inaphatisirwa pa phwando. 39 Natenepa, Jidhiyoni alonga kuna Mulungu wandimomwene: “Lekani kuipirwa na ine, nditawiriseni toera ndiphembe pontho kabodzi basi. Ndaphata miyendo, nditawiriseni kuti ndiphatisire pontho kabodzi uweya toera ndione khala imwe munadzakhala na ine. Citisani kuti pantsi ponsene patote na bume, mbwenye uweya ukhonde kutota.” 40 Pyenepi ndipyo pidacita Mulungu masiku anewa; pantsi ponsene pakhadatota na bume, mbwenye uweya nee ukhadatota.