Samweli Wakutoma
12 Pakumalisa Samweli apanga Aizraeli onsene: “Ndacita pyonsene pidandipanga imwe, pontho ndakhazikisa mambo toera akutongeni.+ 2 Cincino mambo anafuna kukutsogolerani* ndi uyu!+ Ine ndakalamba, pontho ndiri na imbvi. Ananga ali pano pabodzi na imwe,+ pontho ine ndakutsogolerani kutomera uphale wanga mpaka lero.+ 3 Ine ndiri pano. Citani umboni thangwi ya ine pamaso pa Yahova na pamaso pa nyakudzodzwa wace:+ Alipo adakwatira ine ngʼombe peno buru?+ Alipo adabera ine peno kumponderera? Kodi ndatawira kudyekerwa na munthu toera ndikhonde kutonga mwaulungami?+ Khala ine ndapicita, ndinakubwezerani.”+ 4 Iwo atawira: “Imwe nee mwatibera peno kutiponderera, pontho nee mwatawira kudyekerwa.” 5 Natenepa iye aapanga: “Lero, Yahova na nyakudzodzwa wace ndi amboni kuti ine nee ndakukwatirani cinthu.”* Penepo iwo alonga: “Inde, iye ndi mboni.”
6 Samweli apanga mbumba: “Yahova, ule adaphatisira Mose na Aroni, pontho adabulusa ambuyanu mu Ejitu,+ ndi mboni. 7 Pontho pitirizani dzololo, ine ndinadzakutongani pamaso pa Yahova mwakubverana na pinthu pyonsene pyakulungama pidacita Yahova kuna imwe na kuna ambuyanu.
8 “Pidapita Yakobe mu Ejitu,+ ambuyanu mbaphemba ciphedzo kuna Yahova,+ Yahova atuma Mose+ na Aroni toera aabuluse mu Ejitu mbaapasa dziko ino toera akhale.+ 9 Mbwenye iwo aduwala Yahova Mulungu wawo, natenepa iye aapereka+ mʼmanja mwa Sizera+ nkulu wa anyankhondo a Azori, mʼmanja mwa Afilisti+ na mʼmanja mwa mambo wa ku Moabhe,+ pontho anewa onsene apitiriza kumenyana nawo. 10 Iwo aphemba ciphedzo kuna Yahova,+ mbalonga: ‘Ife tadawa,+ thangwi tasiya Yahova mbatitumikira Abhaale+ na madzimunthu a Astoreti;+ cincino tipulumuseni mʼmanja mwa anyamalwa athu toera tikutumikireni.’ 11 Buluka penepo, Yahova atuma Yerubhaali,+ Bhedhani, Yefite+ na Samweli+ mbakupulumusani mʼmanja mwa anyamalwa anu toera mukhale akutsidzikizika.+ 12 Pidaona imwe kuti Naasi+ mambo wa Aamoni abwera kudzamenyana na imwe, mwatoma kundipanga kuti: ‘Ife tisafunambo tikhale na mambo wathu!’+ maseze Yahova Mulungu wanu ndi Mambo wanu.+ 13 Mambo akhafuna imwe ndi uyu, ule adaphemba imwe. Yahova anʼkhazikisa toera akhale mambo wanu.+ 14 Imwe mungagopa Yahova+ mbamuntumikira,+ mungabvera fala yace+ mbamukhonda kupwaza mitemo ya Yahova, Yahova Mulungu wanu anadzakhala na imwe pabodzi na mambo anakutongani. 15 Mbwenye mungakhonda kubvera fala ya Yahova mbamupwaza mitemo ya Yahova, Yahova anadzatcunyusa imwe pabodzi na ababanu.+ 16 Cincino pitirizani dzololo toera muone cinthu cakudzumisa cinafuna kucita Yahova pamaso panu. 17 Kodi nee tiri mu ndzidzi wakubvuna tirigu? Ndinadzacemera Yahova toera acitise kudzulu kudhima, mbabvumbisa madzi; penepo munadzindikira kuti mwacita pinthu pyakuipa pamaso pa Yahova thangwi yakuphemba mambo.”+
18 Buluka penepo, Samweli acemera Yahova, pontho Yahova acitisa kudzulu kudhima, mbabvumbisa madzi pa ntsiku ineyi, natenepa anthu onsene agopa kakamwe Yahova na Samweli. 19 Pontho anthu onsene apanga Samweli: “Taphata miyendo, ticitireni phembero kuna Yahova Mulungu wanu,+ thangwi ife nee tisafuna kufa, ife tathimizira madawo athu thangwi yakuphemba mambo.”
20 Natenepa Samweli apanga anthu: “Lekani kugopa. Imwe mwacitadi pinthu pyenepi pyakuipa. Mbwenye cincino lekani kusiya kutumikira Yahova,+ tumikirani Yahova na ntima wanu onsene.+ 21 Lekani kunsiya mbamutowera pinthu pyakusowa basa,+ pyakuti nkhabe phedza,+ pontho nkhabe pulumusa, thangwi ndi pyakusowa basa. 22 Thangwi ya dzina yace ikulu,+ Yahova nee anadzasiya mbumba yace,+ thangwi Yahova akusankhulani toera mukhale mbumba yace.+ 23 Ine nkhabe siya kukucitirani phembero, thangwi ndingasiya kukucitirani phembero ndinadawira Yahova, mbwenye ndinapitiriza kukupfundzisani munjira yadidi na yakulungama. 24 Basi ene gopani Yahova,+ mbamuntumikira mwakukhulupirika na ntima wanu onsene, pontho kumbukani pinthu pyakudzumatirisa pidacita iye kuna imwe.+ 25 Mbwenye mungacita pinthu pyakuipa mwakufuna, imwe pabodzi na mambo wanu+ munadzaphiwa.”+