Kronika Waciwiri
14 Pakumalisa, Abhiya afa ninga pidacita ambuyace, mbaikhwa munthumbi mu Nzinda wa Dhavidhi;+ mwanace akhacemerwa Aza adzakhala mambo pa mbuto yace. Pakutoma kwa utongi wace, dziko yakhala muntendere mu pyaka khumi.
2 Aza acita pinthu pyadidi na pyakulungama pamaso pa Yahova Mulungu wace. 3 Iye abulusa maguwa a alungu a madziko akunja,+ agwisa mbuto zaulambiri, agwanda-gwanda miti ikhalambirwa,+ mbagwisa mizati ikhalambirwa.+ 4 Kusiyapo pyenepi, iye apanga anthu a ku Yuda toera asake Yahova Mulungu wa ambuyawo, pontho toera abvere Mwambo na mitemo yonsene. 5 Natenepa, Aza afudza mbuto zaulambiri na maguwa akhaperekwa insenso+ m’mizinda yonsene ya ku Yuda; mu ndzidzi ukhatonga iye, dziko ikhapitiriza kukhala muntendere. 6 Iye amanga mizinda yakutsidzikizwa na mipanda ku Yuda,+ thangwi dziko ikhali muntendere, pontho nkhabe adabwera kudzamenya nkhondo na iye mu pyaka pyenepi, thangwi Yahova akhadampasa ntendere.*+ 7 Iye apanga anthu a ku Yuda: “Tendeni timange mizinda ineyi, tiizungulire na mipanda, pontho timange mbuto zakuonera za ndzulu,+ tiikhe misuwo mikulu na mipiringanyo. Thangwi dziko iciri m’manja mwathu, thangwi ife tasaka Yahova Mulungu wathu. Ife tansaka, iye mbaticitisa kuti tikhale muntendere na anyamalwa athu onsene n’khundu mwathu.” Natenepa, basa yawo yakumanga yafamba mwadidi.+
8 Aza akhali na nsoka wa anyankhondo akukwana 300.000 a ku Yuda, akuti akhali na maxango makulu na madipa. Ku Bhenjamini iye akhali na anyankhondo amphambvu akukwana 280.000 akuti akhali na maxango mang’ono, pontho akhali na mauta.*+
9 Mukupita kwa ndzidzi, Zera wa ku Etiopya abwera toera kumenyana na iwo, iye akhali na nsoka wa anyankhondo akukwana 1.000.000 pabodzi na ngolo 300 za nkhondo.+ Pidafika iye ku Maresa,+ 10 Aza aenda toera kumenyana naye, iwo apakana toera kumenya nkhondo mu Gowa ya Zefata ku Maresa. 11 Penepo Aza adembetera Yahova Mulungu wace,+ mbalonga: “Yahova, kuna imwe nkhabe siyana khala ale anaphedza imwe ndi azinji* peno akusowa mphambvu.+ Tiphedzeni Yahova Mulungu wathu, thangwi ife tisanyindira imwe,+ pontho ife tabwera mu dzina yanu toera kumenyana na nsoka ukulu+ wa anyankhondo awa. Yahova, imwe ndimwe Mulungu wathu. Lekani kutawirisa kuti munthu,* apangize kukhala wamphambvu kupiringana imwe.”+
12 Natenepa, Yahova akunda anyankhondo a ku Etiopya pamaso pa Aza na anthu a ku Yuda; penepo anyankhondo a ku Etiopya athawa.+ 13 Aza na anyankhondo akhali na iye, aatowerera mpaka ku Jerari,+ iwo apha anyankhondo a ku Etiopya mpaka kuamalisa, thangwi iwo akundwa kakamwe pamaso pa Yahova na pamaso pa anyankhondo ace. Buluka penepo, anthu a ku Yuda atapata pinthu pizinji kakamwe. 14 Kusiyapo pyenepi, nakuti Yahova acitisa kuti anthu a mizinda ikhali n’khundu mwa Jerari aphatwe na kugopa, Ayuda akwanisa kukunda mizinda ineyi. Iwo atapata mizinda yonsene, thangwi kweneko kukhali na pinthu pizinji toera kupitapata. 15 Iwo afudzambo misasa ya ale akuti akhali na pifuyo, mbakwata mabira mazinji na makamelo mazinji, buluka penepo iwo abwerera ku Yerusalemu.