Ezekiyeli

37 Djanja ya Yahova ikhali pana ine, pontho nzimu wa Yahova wandikwata, mbuenda kandisiya pakati pa gowa+ yakuti ikhadadzala na magogodo. 2 Iye andifambisa nʼkhundu mwawo, penepo ine ndaona kuti nʼgowa ineyi mukhali na magogodo mazinji kakamwe, pontho iwo akhadauma kakamwe.+ 3 Iye andibvundza: “Iwe mwana wa munthu, kodi magogodo anewa anakwanisa kukhala pontho na umaso?” Ine ndatawira: “Yahova Mbuya Wankulu Kakamwe, imwe ndimwe anapidziwa.”+ 4 Penepo iye andipanga: “Longa profesiya thangwi ya magogodo anewa, apange kuti: ‘Imwe magogodo akuuma, bveserani mafala a Yahova:

5 “‘Ipi ndi pidalonga Yahova, Mbuya Wankulu Kakamwe kuna magogodo awa: “Ine ndinadzaikha muya muna imwe, mbamukhala pontho na umaso.+ 6 Ine ndinadzakuikhani mauzingo na nyama, ndinadzakuphimbirani na khanda, mbandiikha muya muna imwe, buluka penepo, imwe munadzakhala pontho na umaso; natenepa, imwe munadzadziwa kuti ine ndine Yahova.”’”

7 Penepo, ine ndalonga profesiya mwakubverana na pidapangwa ine. Pidamala ine kwene kulonga profesiya, ndabva dungu, ninga dungu yakulira kwa nkhoco, pontho magogodo atoma kuphatana, gogodo ibodzi na indzace. 8 Buluka penepo, ine ndaona mauzingo na nyama pa magogodo anewa, pontho iwo aphimbirwa na khanda. Ngakhale tenepo, iwo akhadzati kukhala na muya.*

9 Buluka penepo, iye andipanga: “Longa profesiya kuna mphepo. Iwe mwana wa munthu, longa profesiya, pontho panga mphepo kuti: ‘Ipi ndi pidalonga Yahova, Mbuya Wankulu Kakamwe: “Iwe mphepo, bwera buluka ku makhundu manai a mphepo, pontho pepesera anthu awa adaphiwa, toera iwo akhale pontho na umaso.”’”

10 Natenepa, ine ndalonga profesiya mwakubverana na pidandipanga iye, penepo muya wapita muna iwo, pontho iwo atoma kukhala na umaso, mbalimira.+ Natenepa, iwo adzakhala nsoka ukulu kakamwe wa anyankhondo.

11 Buluka penepo iye andipanga: “Iwe mwana wa munthu, magogodo awa, ndi mbumba yonsene ya Izraeli.+ Iwo ali kulonga: ‘Magogodo athu auma, pontho cidikhiro cathu camala.+ Tonsene tamala kufudzwa.’ 12 Natenepa, longa profesiya iyi kuna iwo: ‘Ipi ndi pidalonga Yahova, Mbuya Wankulu Kakamwe: “Imwe mbumba yanga, ine ndinadzafungula nthumbi zanu,+ mbandikulamusani munthumbi zanu, pontho ndinakuendesani ku dziko ya Izraeli.+ 13 Imwe mbumba yanga,+ ine ndingadzafungula nthumbi zanu mbandikulamusani munthumbi zanu, imwe munadzadziwa kuti ine ndine Yahova.”’ 14 ‘Ine ndinadzaikha mphambvu yanga ya umaso* muna imwe,+ penepo imwe munadzakhala pontho na umaso; natenepa, ine ndinadzakukhalisani mu dziko yanu. Penepo imwe munadzadziwa kuti ine Yahova, ndine adapilonga, mbandipicita,’ alonga Yahova.”

15 Yahova alonga pontho na ine, mbandipanga: 16 “Iwe mwana wa munthu, kwata phindi ya cimuti, pontho lemba penepo: ‘Kuna Yuda na mbumba ya Izraeli yakuti iri pabodzi na iye.’*+ Buluka penepo, kwata phindi inango ya cimuti, pontho lemba penepo: ‘Kuna Zuze, cimuti ca Efraimu na mbumba yonsene ya Izraeli yakuti iri pabodzi na iye.’*+ 17 Buluka penepo, gumanya pimiti piwiri pyene toera pikhale cimuti cibodzi basi mʼmanja mwako.+ 18 Mbumba yako ingakubvundza kuti: ‘Kodi iwe nee unatipanga kuti pyenepi pisabvekanji?’ 19 Atawire kuti: ‘Ipi ndi pidalonga Yahova, Mbuya Wankulu Kakamwe: “Ine ndinadzakwata cimuti ca Zuze cakuti ciri mʼmanja mwa Efraimu pabodzi na madzindza a Izraeli akuti ali na iye, pontho ine ndinadzaagumanya pabodzi na cimuti ca Yuda; ndinadzaacitisa kuti akhale cimuti cibodzi basi.+ Iwo anadzakhala cimuti cibodzi basi mʼmanja mwanga.”’ 20 Pimiti pinafuna iwe kulemba, pisafunika pikhale mʼmanja mwako toera iwo apione.

21 “Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “Ine ndinadzabulusa Aizraeli mʼmadzindza anango mudaenda iwo, ndinadzaagumanya mʼmakhundu onsene, mbandiabweresa mu dziko yawo.+ 22 Ine ndinadzacitisa kuti iwo akhale dzindza ibodzi basi mu dziko ineyi,+ mʼmapiri a Izraeli; pontho onsene anadzatongwa na mambo mʼbodzi basi.+ Cipo anadzakhala pontho madzindza mawiri, iwo nee anadzakhala akugawika mʼmaumambo mawiri.+ 23 Iwo cipo anadzapswipisika pontho na madzimunthu awo akunyanyasa,* nee na macitiro awo akunyanyasa, nee na madawo awo.+ Ine ndinadzaaphedza toera asiye makhaliro awo onsene akukhonda kukhulupirika adaadawisa, pontho ine ndinadzaacenesa. Iwo anadzakhala mbumba yanga, pontho ine ndinadzakhala Mulungu wawo.+

24 “‘“Ntumiki wanga Dhavidhi anadzakhala mambo wawo,+ pontho onsene anadzakhala na nkumbizi mʼbodzi basi.+ Iwo anadzatoweza matongero anga, mbabvera mwadidi mitemo yanga.+ 25 Iwo anadzakhala mu dziko idapasa ine ntumiki wanga Yakobe, yakuti ndi dziko ikakhala ambuyawo.+ Iwo, anawo pabodzi na adzukulu awo,+ anadzakhala mwenemu kwenda na kwenda;+ pontho ntumiki wanga Dhavidhi anadzakhala ntsogoleri wawo kwenda na kwenda.+

26 “‘“Ine ndinadzacita nawo cibverano ca ntendere,+ pontho ceneci cinadzakhala cibverano cakwenda na kwenda. Ine ndinadzaakhalisa mu dziko yawo, mbandianjipisa.+ Ndinadzaikha mbuto yanga yakucena pakati pawo, mbikhala kwenda na kwenda. 27 Nsasa wanga unadzakhala pakati pawo, iwo anadzakhala mbumba yanga, pontho ine ndinadzakhala Mulungu wawo.+ 28 Mbuto yanga yakucena ingadzakhala pakati pawo, anthu a madzindza anango anadzadziwa kuti ine Yahova, ndiri kucenesa Izraeli.”’”+