Kronika Waciwiri
13 Pa caka 18 ca utongi wa Mambo Yerobhoamu, Abhiya adzakhala mambo wa ku Yuda.+ 2 Iye atonga mu Yerusalemu mu pyaka pitatu. Mai wace akhacemerwa Maaka+ mwana wa Urieli wa ku Jibheya.+ Pontho paoneka nkhondo pakati pa Abhiya na Yerobhoamu.+
3 Abhiya aenda kunkhondo na nsoka wa anyankhondo amphambvu na aluso+ akukwana 400.000. Yerobhoamu andandalisa anyankhondo ace akukwana 800.000 toera kumenyana na iye, iwo akhali amuna aluso na anyankhondo amphambvu. 4 Abhiya alimira Paphiri ya Zemaraimu inagumanika mucisa ca mapiri ku Efraimu, mbalonga: “Ndibvesereni, iwe Yerobhoamu na Aizraeli onsene. 5 Kodi imwe nkhabe dziwa kuti Yahova Mulungu wa Izraeli apereka umambo kuna Dhavidhi toera atonge Izraeli kwenda na kwenda?+ Pontho kuti aupereka kuna iye na anace+ kubulukira mu cibverano cakukhonda mala?*+ 6 Mbwenye Yerobhoamu+ mwana wa Nebhati ntumiki wa Salomoni mwana wa Dhavidhi, asandukira mbuyace.+ 7 Pontho anthu akuipa na akusowa basa aenda kukhundu yace. Iwo adzakhala amphambvu kupiringana Robhoamu mwana wa Salomoni, thangwi Robhoamu akhali m’phale, pontho akhagopa, natenepa iye nee akwanisa kuakunda.
8 “Cincino imwe musanyerezera kuti munakwanisa kumenyana na umambo wa Yahova uli m’manja mwa ana a Dhavidhi, basi ene thangwi ndimwe nsoka ukulu, pontho muli na anang’ombe a ouro adacitwa na Yerobhoamu toera akhale alungu anu.+ 9 Kodi simwe tayu adathamangisa anyantsembe a Yahova,+ a dzindza ya Aroni na Alevi, mbamusankhula anyantsembe anu ninga pinacita mbumba za madziko anango?+ Khala munthu unango abweresa mwanang’ombe na mabira manomwe, mbadakwanisa kukhala nyantsembe wa madzimunthu akuti nee ndi alungu. 10 Mbwenye ife, Mulungu wathu ndi Yahova,+ ife nee tansiya; anyantsembe athu a dzindza ya Aroni asatumikira Yahova, pontho Alevi asaaphedza m’basa yawo. 11 Ntsiku zonsene namacibese, pontho namaulo,+ iwo asapereka kuna Yahova ntsembe zakupiswa pabodzi na insenso yakununkhira.+ Mikate+ ya ntsembe iri pameza ya ouro yadidi kakamwe, pontho ndzidzi onsene ncidodo+ iwo asagasa nyale zakuti ziri pa cakuikhira nyale ca ouro+ yadidi kakamwe. Thangwi ife tisacita pinatiphemba Yahova Mulungu wathu; mbwenye imwe mwansiya. 12 Cincino onani! Mulungu wandimomwene ali na ife, iye asatitsogolera, pontho anyantsembe ace ali na matuluka toera kualiza ninga cidzindikiro ca nkhondo toera kumenyana na imwe. Imwe amuna a ku Izraeli, lekani kumenyana na Yahova Mulungu wa ambuyanu, thangwi pinthu nee pinakufambirani mwadidi.”+
13 Mbwenye Yerobhoamu apanga anyankhondo ace anango toera aende kaabisalira nduli mwawo, natenepa nsoka ukulu wa anyankhondo a Yerobhoamu ukhali kutsogolo kwa amuna a ku Yuda, amuna adaabisalira akhali nduli mwawo. 14 Amuna a ku Yuda pidayang’ana iwo nduli aona kuti akhafunika kumenyana na anyankhondo akhabwera kutsogolo kwawo na nduli mwene. Natenepa iwo atoma kukhuwa kuna Yahova,+ mu ndzidzi wakuti anyantsembe akhaliza matuluka mwakugaluza. 15 Amuna a ku Yuda akhuwa toera kupangiza kuti akhafunika kumenya nkhondo. Pidakhuwa amuna a ku Yuda toera kumenya nkhondo, Mulungu wandimomwene akunda Yerobhoamu na Izraeli onsene pamaso pa Abhiya na amuna a ku Yuda. 16 Aizraeli athawa amuna a ku Yuda, mbwenye Mulungu aapereka m’manja mwawo. 17 Abhiya na anthu ace apha anthu azinji kakamwe, natenepa aphiwa anyankhondo aluso akukwana 500.000 a Izraeli. 18 Natenepa amuna a Izraeli apasika manyadzo* pa ndzidzi unoyu, mbwenye amuna a ku Yuda awina thangwi iwo anyindira Yahova Mulungu wa ambuyawo.+ 19 Abhiya apitiriza kutowerera Yerobhoamu mbankwatira mizinda iyi: Bheteli+ na pisa pya n’khundu mwace, Yesana na pisa pya n’khundu mwace, Efraimu+ na pisa pya n’khundu mwace. 20 Yerobhoamu cipo akhala pontho na mphambvu mu ntsiku za Abhiya; buluka penepo Yahova acitisa kuti iye afe.+
21 Mbwenye Abhiya adzakhala wamphambvu kakamwe. Mukupita kwa ndzidzi, iye asemba akazi 14,+ mbabala ana amuna 22 na ana akazi 16. 22 Mphangwa zinango zinalonga pya Abhiya, pinthu pidacita iye na mafalace, pyalembwa m’mabukhu a mprofeta Idho.+