Dhanyeli

7 Mu caka cakutoma ca Mambo Bhelsazari+ wa ku Bhabhilonya, Dhanyeli alota mbaona masomphenya mu ndzidzi ukhali iye patalimba pace.+ Buluka penepo iye alemba pidalota iye;+ iye alemba pyonsene ninga mudacitikira ipyo. 2 Dhanyeli alonga:

“Mʼmasomphenya adaona ine namasiku, ndaona mphepo zinai zakudzulu zakuti zikhabvundula bara ikulu.+ 3 Penepo mʼbara mwabuluka pikala pinai pikulu,+ cibodzi na cibodzi cikhali cakusiyana na cindzace.

4 “Cikala cakutoma cikhali ninga nkhalamu,+ pontho ico cikhali na maphapido ninga a capungu.+ Ine ndapitiriza kuciyangʼana mpaka mu ndzidzi udakhwedzulwa maphapido aco. Ico cawambuswa pantunda mbacilimiriswa na miyendo miwiri ninga munthu, pontho capaswa ntima wa munthu.

5 “Buluka penepo ndaona cikala caciwiri cakulandana na ursu.*+ Cikala ceneci cathukula ndzulu mwendo waco ubodzi, pontho cikhadaluma mbabvu zitatu na madzino aco; ico capangwa: ‘Dya nyama izinji.’+

6 “Penepo ine ndapitiriza kuyangʼana, mbandiona cikala cinango cakulandana na nyalugwe,+ mbwenye kunsana kwaco kukhali na maphapido manai ninga a mbalame. Pontho cikala ceneci cikhali na misolo minai,+ ico capaswa mphambvu toera kutonga.

7 “Buluka penepo, mʼmasomphenya adaona ine namasiku, ndapitiriza kuyangʼana mbandiona cikala cacinai, cakugopswa, cakugopesa, pontho camphambvu kakamwe. Pontho ico cikhali na madzino makulu a utale. Ico cikhadya, pontho cikhafudza pinthu pyonsene pikhali nʼkhundu mwaco, pire pikhasala, ico cikhaponda-ponda na manyalo aco.+ Ico cikhadasiyana na pinyama pinango pyonsene pidaona ine pakutoma, pontho cikhali na nyanga khumi. 8 Mu ndzidzi ukhayangʼana ine mwadidi nyanga zenezi, ndaona kuti pamera nyanga inango ingʼono+ pakati pa nyanga zenezi, pontho nyanga zitatu zagwa mu ndzidzi ukhamera nyanga ingʼono. Nyanga ineyi ikhali na maso ninga a munthu, pontho ikhali na mulomo wakuti ukhalonga mafala akudzikuza.*+

9 “Ndapitiriza kuyangʼana mpaka kuona mipando yaumambo kuikhwa pa mbuto payo, pontho Ule Wakuti Alipo Kutomera Kale Kakamwe+ akhala pa mpando wace waumambo.+ Nguwo zace zikhali zakucena ninga matalala,+ pontho tsisi yace ikhali ninga maweya akucena. Mpando wace waumambo ukhali ninga malirimi a moto, pontho maroda ace akhagaka moto.+ 10 Nkulo wa moto ukhakuka buluka kuna iye.+ Aanju pikwi pizinji* akhantumikira, pontho aanju mamiliyau mazinji* akhali dzololo pamaso pace.+ Nyakutonga*+ akhala pa mpando wace, mbafungulwa mabukhu.

11 “Ine ndapitiriza kuyangʼana mu ndzidzi ukhalonga nyanga ineyi mafala akudzikuza;+ ine ndapitiriza kuyangʼana mpaka cikala ceneci kuphiwa, manungo aco akwatwa mbaponywa pa moto wakugaka, mbacifudzika. 12 Mbwenye pikala pinango pyonsene,+ pyapokoserwa utongi wawo, pontho pyathimizirwa umaso wawo mu ndzidzi ungasi.

13 “Pikhapitiriza ine kuyangʼana mʼmasomphenya a masiku, ndaona unango wakulandana na mwana wa munthu+ mbakabwera mʼmitambo yakudzulu; pontho iye atawiriswa kufika pana Ule Wakuti Alipo Kutomera Kale Kakamwe,+ mbaendeswa dhuzi kakamwe na Iye. 14 Iye apaswa utongi,+ cilemedzo+ na umambo toera mbumba, madzindza na misoka ya pilongero intumikire.+ Utongi wace ndi utongi wakukhonda mala, iwo nee unadzakhala na madire, pontho umambo wace nee unadzafudzwa.+

15 “Mbwenye ine Dhanyeli ndanentseka kakamwe thangwi masomphenya adaona ine andigopesa kakamwe.+ 16 Ine ndaenda dhuzi na mʼbodzi wa ale adalimira mbandimbvundza mabvekero andimomwene a pinthu pyenepi. Natenepa iye atawira mbandipanga mabvekero a pinthu pyenepi.

17 “‘Pikala pyenepi pinai pikulu,+ ndi amambo anai akuti anadzaoneka pa dziko yapantsi.+ 18 Mbwenye akucena a Wankulu Kakamwe,+ anadzatambira umambo,+ pontho iwo anadzapaswa umambo+ kwenda na kwenda, inde, kwenda na kwenda.’

19 “Buluka penepo ine ndikhafuna kakamwe kudziwa pya cikala cacinai, cakuti cikhali cakusiyana na pikala pinango pyonsene; ico cikhali cakugopswa, cikhali na madzino a utale, pontho cikhali na ngole za nkuwa. Ico cikhadya, pontho cikhafudza pinthu pyonsene pikhali nʼkhundu mwaco, pire pikhasala ico cikhaponda-ponda na manyalo aco.+ 20 Pontho ndikhafunambo kudziwa pya nyanga khumi+ zikhali pa nsolo pa cikala ceneci na nyanga inango idabuluka mbigwisa nyanga zitatu,+ nyanga yakuti ikhali na maso na mulomo wakuti ukhalonga mafala akudzikuza,* pontho yakuti ikhaoneka ninga ikulu kupiringana nyanga zinango.

21 “Ine ndapitiriza kuyangʼana mbandiona nyanga ineyi ikhamenyana na akucena, pontho iyo ikhaakunda,+ 22 mpaka mu ndzidzi udabwera Ule Wakuti Alipo Kutomera Kale Kakamwe,+ mbatonga miseru toera kuphedza akucena a Wankulu Kakamwe,+ pontho ndzidzi udakhazikiswa wafika toera akucena apaswe umambo.+

23 “Iye andipanga: ‘Cikala cacinai, cisaimirira umambo wacinai unafuna kudzaoneka pa dziko yapantsi. Iwo unadzakhala wakusiyana na maumambo anango onsene, iwo unadzadya dziko yonsene yapantsi, unadzaiponda-ponda na kuinyedza.+ 24 Nyanga khumi, zisaimirira amambo khumi anafuna kudzaoneka mu umambo unoyu; amambo anewa angamala panadzaoneka mambo unango, pontho iye anadzakhala wakusiyana na amambo akutoma. Iye anadzakunda amambo atatu.+ 25 Iye anadzalonga mafala akuxola Mulungu Wakudzulu Kakamwe,+ pontho anadzapitiriza kuthabusa akucena a Wankulu Kakamwe. Iye anadzafuna kucinja midzidzi na mwambo, pontho akucena anadzaperekwa mʼmanja mwace mu ndzidzi ubodzi, midzidzi miwiri* na hafu ya ndzidzi ubodzi.*+ 26 Mbwenye Nyakutonga* akhala pa mpando wace, mbampokosera utongi wace toera kunfudziratu.+

27 “‘Umambo, utongi na cilemedzo ca maumambo a pa dziko yonsene yapantsi, pyaperekwa kuna anthu akuti ndi akucena a Wankulu Kakamwe.+ Umambo wawo ndi umambo wakwenda na kwenda,+ pontho mautongi onsene anadzaatumikira na kuabvera.’

28 “Anewa ndi mamalisiro a pinthu pyenepi. Ine Dhanyeli ndagopa kakamwe, natenepa nkhope yanga yacinja; mbwenye ine ndakoya pinthu pyenepi muntima mwanga.”