Samweli Wakutoma
19 Mukupita kwa ndzidzi, Sauli apanga mwanace anacemerwa Yonatani na anyabasa ace onsene kuti iye asafuna kupha Dhavidhi.+ 2 Nakuti Yonatani mwana wa Sauli akhafuna kakamwe Dhavidhi,+ iye ampanga: “Babanga Sauli asafuna kukupha. Ndaphata miyendo, cita mphole-mphole mangwana namacibese, pontho ndoko kasake mbuto toera ubisale mbukhala kweneko. 3 Ndinabwera na babanga dhuzi na mbuto inafuna bisala iwe. Ndinacedza naye thangwi ya iwe, pinafuna iye kulonga, ine ndinakupanga.”+
4 Natenepa Yonatani alonga pinthu pyadidi pidacita Dhavidhi+ kuna Sauli. Iye ampanga: “Mambo nee musafunika kucita cinthu cakuipa* kuna ntumiki wanu Dhavidhi, thangwi iye nee akudawirani, mbwenye iye acita pinthu pyakuti pyakuphedzani. 5 Iye aikha umaso wace pangozwi toera kupha Nfilisti,+ natenepa Yahova acitisa Aizraeli onsene kuwina.* Imwe mwaona pyenepi mbamukomerwa napyo kakamwe. Mphapo thangwi yanji musafuna kupha Dhavidhi mwakusowa mathangwi? Thangwi yanji musafuna kudawira munthu wakusowa mulando?”+ 6 Sauli abvesera mafala adalonga Yonatani, mbadumbira: “Mu dzina ya Yahova Mulungu wa mʼmaso, ine nee ndinamupha.” 7 Buluka penepo, Yonatani acemera Dhavidhi mbampanga pinthu pyenepi pyonsene. Natenepa Yonatani aenda na Dhavidhi kuna Sauli, pontho Dhavidhi atoma kutumikira Sauli ninga pikhacita iye kale.+
8 Mukupita kwa ndzidzi yatoma pontho nkhondo. Dhavidhi aenda kamenyana na Afilisti mbapha azinji kakamwe, mbwenye Afilisti anango anʼthawa.
9 Sauli+ pikhali iye nawa nʼnyumba mwace na dipa mʼmanja mwace, Yahova atawirisa kuti iye athabuswe na manyerezero akuipa,* mu ndzidzi unoyu Dhavidhi akhaimba arpa.+ 10 Sauli ayesera kukhomera Dhavidhi pa pfufu na dipa, mbwenye Dhavidhi aimbzwenga mbilasa pfufu. Namasiku anewa Dhavidhi athawa. 11 Sauli atuma anthu toera aende kaonera nyumba ya Dhavidhi, pontho mangwana mwace namacibese amuphe,+ mbwenye Mikale nkazi wa Dhavidhi ampanga: “Ungakhonda kuthawa masiku ano, mangwana unacerwa wafa.” 12 Mwakukhonda dembuka, Mikale abulusa Dhavidhi na pa janela toera akwanise kuthawa. 13 Mikale akwata dzimunthu ya panyumba* mbaigonesa patalimba, pontho iye aikha nguwo ya mabenga-mabenga yakucitwa na maweya a mbuzi pa mbuto ikhatsamisa Dhavidhi nsolo wace, mbaifinikiza na nguwo.
14 Buluka penepo, Sauli atuma anthu toera akakwate Dhavidhi, mbwenye Mikale aapanga: “Iye ali kubva kupha.” 15 Natenepa Sauli atuma anthu toera akaone Dhavidhi, pontho aapanga kuti: “Mʼbwereseni uku mbali patalimba pace toera adzaphiwe kuno.”+ 16 Anthu adatumwa pidapita iwo nʼnyumba, aona dzimunthu ya panyumba* ikhali patalimba, pontho nguwo ya mabenga-mabenga yakucitwa na maweya a mbuzi ikhali pa mbuto ikhatsamisa Dhavidhi nsolo wace. 17 Sauli apanga Mikale: “Thangwi yanji wandinyengeza mbuthawisa nyamalwa wanga?”+ Mikale antawira: “Iye andipanga kuti: ‘Ndisiye ndiende, ungakhonda ndinakupha!’”
18 Pidathawa Dhavidhi aenda kuna Samweli ku Rama.+ Iye ampanga pyonsene pidancitira Sauli. Buluka penepo, iye na Samweli aenda kakhala ku Nayoti.+ 19 Mukupita kwa ndzidzi, Sauli apangwa: “Dhavidhi ali ku Nayoti ku Rama.” 20 Mwakukhonda dembuka, Sauli atuma anthu toera akaphate Dhavidhi. Pidaona iwo aprofeta akugwesera akulonga maprofesiya mbakatsogolerwa na Samweli, iwo aphatwa na nzimu wa Mulungu mbatomambo kucita pinthu ninga aprofeta.
21 Sauli pidapangwa iye pyenepi, mwakukhonda dembuka atuma anthu anango, iwo atomambo kucita pinthu ninga aprofeta. Natenepa Sauli atuma pontho anthu anango, nsoka wacitatu, mbwenye iwo atomambo kucita pinthu ninga aprofeta. 22 Pakumalisa Sauli aendambo ku Rama. Pidafika iye pa ncera ukulu wa ku Seku, iye abvundza: “Ali kupi Samweli na Dhavidhi?” Anthu antawira: “Ali ku Nayoti+ ku Rama.” 23 Pikhali iye nʼnjira yakuenda ku Nayoti ku Rama, iye aphatwambo na nzimu wa Mulungu, pontho apitiriza kufamba mbakacita pinthu ninga mprofeta mpaka kufika ku Nayoti ku Rama. 24 Sauli adula nguwo zace, mbacitambo pinthu ninga mprofeta pamaso pa Samweli, pontho iye agona cipezipezi* masikati onsene na masiku onsene a ntsiku ineyi. Na thangwi ineyi anthu asabvundza: “Kodi Sauli ndi mprofetambo?”+