Ezekiyeli
13 Yahova alonga pontho na ine, mbandipanga: 2 “Iwe mwana wa munthu, longa maprofesiya thangwi ya aprofeta a Izraeli,+ pontho panga ale analonga maprofesiya a munsolo mwawo+ kuti: ‘Bveserani mafala a Yahova. 3 Ipi ndi pinalonga Yahova, Mbuya Wankulu Kakamwe: “Dzedze kuna aprofeta akusowa ndzeru, akuti asacita pinanyerezera iwo, maseze nee aona pinthu!+ 4 Imwe mbumba ya Izraeli, aprofeta anu adzakhala ninga anambwa a ntsanga anakhala mʼmadembe. 5 Iwo nee anadzaenda ku mbuto zidagomoka mpanda wa miyala toera kuumangira mbumba ya Izraeli,+ toera Aizraeli akhale akuwanga pakumenya nkhondo pa ntsiku ya Yahova.”+ 6 “Iwo asaona masomphenya authambi, mbalonga maprofesiya authambi; iwo ali kulonga: ‘Awa ndi mafala a Yahova,’ maseze Yahova nee aatuma; ngakhale tenepo iwo asadikhira kuti pinthu pidalonga iwo picitike.+ 7 Kodi nee ndi masomphenya authambi anaona imwe, pontho nee ndi maprofesiya authambi analonga imwe? Iwo asalonga: ‘Awa ndi mafala a Yahova,’ maseze ine nee ndaapanga cinthu.”’
8 “‘Natenepa ipi ndi pidalonga Yahova, Mbuya Wankulu Kakamwe: “‘Nakuti imwe musalonga uthambi, pontho masomphenya anu ndi authambi, ine ndine nyamalwa wanu,’ alonga Yahova, Mbuya Wankulu Kakamwe.”+ 9 Ine ndinafuthula nkono wanga mbanditcunyusa aprofeta anaona masomphenya authambi,+ mbalonga maprofesiya authambi. Iwo nee anadzakhala pakati pa mbumba inanyindira ine; madzina awo nee anadzalembwa mʼbukhu ya mbumba ya Izraeli; pontho nee anadzabwerera ku dziko ya Izraeli; penepo imwe munadzadziwa kuti ine ndine Yahova, Mbuya Wankulu Kakamwe.+ 10 Pyonsene ipi pinadzacitika thangwi iwo asapeusa mbumba yanga, mbalonga: “Pali na ntendere!”,+ mu ndzidzi wakuti nkhabe ntendere. Munthu angamanga pfufu yakukhonda wanga, iwo asaikhwaza ntoto.’*+
11 “Panga ale anakhwaza ntoto pa pfufu ineyi kuti iyo inadzagwa. Anadzabvumba madzi makulu, anadzagwa matalala, pontho mphepo zikulu zinadzaigwisa.+ 12 Pfufu ingagwa, anthu anadzakubvundzani: ‘Uli kupi ntoto udakhwaza imwe?’+
13 “Natenepa ipi ndi pidalonga Yahova, Mbuya Wankulu Kakamwe: ‘Thangwi yakuipirwa kwanga, ine ndinadzabweresa mphepo zamphambvu, thangwi ya ukali wanga, ndinadzabvumbisa madzi makulu. Ndinadzagwisa matalala toera kufudza pfufu ineyi thangwi ine ndinadzaipirwa kakamwe. 14 Ine ndinadzagwisa pfufu idakhwaza imwe ntoto; ine ndinadzaigwisa pantsi, pontho pantsi pa pfufu ineyi panadzaoneka pakweca. Nzinda ungadzafudzwa, imwe munafera mwenemu; penepo imwe munadzadziwa kuti ine ndine Yahova.’
15 “‘Ine ndingapangiza ukali wanga onsene kuna pfufu ineyi na kuna ale adaikhwaza ntoto, ine ndinadzakupangani: “Pfufu nee iripobve, pontho ale adaikhwaza ntoto nee alipobve.+ 16 Aprofeta a mu Izraeli, ale akhalonga maprofesiya thangwi ya Yerusalemu, mbaona mʼmasomphenya kuti nzinda unoyu uli muntendere, mu ndzidzi wakuti nee ukhali muntendere,+ nee alipobve,”’ alonga Yahova, Mbuya Wankulu Kakamwe.
17 “Mbwenye iwe mwana wa munthu, yangʼana akazi a mbumba yako analonga maprofesiya a munsolo mwawo, pontho longa maprofesiya thangwi ya iwo. 18 Apange kuti: ‘Ipi ndi pidalonga Yahova, Mbuya Wankulu Kakamwe: “Dzedze kuna akazi anasona mithambo ya mʼmikono,* mbacita nguwo zakuphimbira misolo ya anthu a cimo cakusiyana-siyana, toera kupha anthu! Kodi imwe muli kusaka kupha mbumba yanga, mbamunyerezera kuti munapulumusa umaso wanu? 19 Imwe musandipswipisa pakati pa mbumba yanga thangwi yakupaswa sevadha pangʼono na manyedzwa a nkate,+ pontho musapha ale akuti nee athema kuphiwa, mbamusiya ale akuti athema kuphiwa. Imwe musacita pyenepi mungalonga uthambi kuna mbumba yanga inabvesera uthambi wanu.”’+
20 “Natenepa, ipi ndi pidalonga Yahova, Mbuya Wankulu Kakamwe: ‘Imwe akazi, ine ndinabulusa mʼmikono yanu mithambo inabvala imwe toera kusaka anthu kuti muaphe ninga mbalame, ine ndinaibulusa mʼmikono yanu, mbandisudzula anthu anasaka imwe ninga mbalame. 21 Ndinadzakukwatirani nguwo zanu zakuphimbira nazo nsolo mbandipulumusa mbumba yanga mʼmanja mwanu. Iwo cipo anadzasakwa pontho ninga mbalame; penepo imwe munadzadziwa kuti ine ndine Yahova.+ 22 Thangwi ya uthambi wanu,+ imwe mwafewesa manungo munthu wakulungama, maseze ine nee ndamuonesa nyatwa, pontho imwe mwawangisa munthu wakuipa,+ natenepa, iye nee asasiya njira zace zakuipa toera apitirize kukhala na umaso.+ 23 Na thangwi ineyi, imwe nee munadzaonabve masomphenya authambi, pontho nee munadzalotera.+ Ine ndinadzapulumusa mbumba yanga mʼmanja mwanu, penepo imwe munadzadziwa kuti ine ndine Yahova.’”