Atongi
15 Pidapita ndzidzi ungasi, mu ntsiku zakubvuna tirigu, Samisoni akwata mwanambuzi, mbaenda kaona nkazace. Iye akhalonga muntima mwace: “Ndisafuna ndikapite nkwartu mwa nkazanga.” Mbwenye tebzwalace nee antawirisa kupita. 2 Pontho ampanga: “Ndikhanyerezera kuti iwe usamuida.+ Na thangwi ineyi, ndampereka kuna mʼbodzi mwa aphale akhali na iwe.+ Kodi ngʼono wace nee ndi wakubalika kakamwe kupiringana iye? Kwata iye toera akhale nkazako.” 3 Mbwenye Samisoni alonga: “Ulendo uno Afilisti nee anandipasa mulando ndingaacita pinthu pyakuipa.”
4 Natenepa, Samisoni aenda kaphata anambwa a ntsanga 300. Buluka penepo, akwata anambwa a ntsanga anewa mbaamanga micira awiri-awiri, pontho amangirira nkhuni pa micira ineyi. 5 Penepo iye aphatisa moto pa nkhuni zidamangirira iye anambwa a ntsanga, mbaasiya toera aende mʼminda ya pyakudya ya Afilisti. Iye apisa pyakudya pyonsene, pidabvunwa na pidakhonda kubvunwa, kuphatanizambo minda ya mauva na ya milivera.
6 Afilisti abvundza: “Mbani adacita pyenepi?” Iwo apangwa: “Ndi Samisoni nkamwene wa mamuna wa ku Timina, thangwi iye akwata nkazi wa Samisoni mbampereka kuna mʼbodzi mwa aphale akhali na Samisoni.”+ Natenepa, Afilisti aenda kapisa na moto+ nkazi unoyu pabodzi na babace. 7 Buluka penepo, Samisoni aapanga: “Nakuti mwacita tenepo, ine nee ndinapuma mpaka kukubwezerani pyakuipa pidacita imwe.”+ 8 Penepo apha anthu azinji kakamwe, pidamala iye aenda kakhala mʼmphako ya mwala wa Etami.
9 Mukupita kwa ndzidzi, Afilisti aenda kamanga misasa ku Yuda, mbatoma kufamba-famba ku Lei.+ 10 Amuna a ku Yuda aabvundza: “Thangwi yanji mwabwera kuna ife?” Penepo iwo aatawira: “Tabwera kudzamanga Samisoni toera timʼbwezere pidaticitira iye.” 11 Natenepa amuna 3.000 a ku Yuda aenda ku mphako ya mwala wa Etami, mbabvundza Samisoni: “Iwe nee usadziwa kuti ife tisatongwa na Afilisti?+ Thangwi yanji wacita pyenepi kuna ife?” Iye aatawira: “Ine ndacita kuna iwo mwakubverana na pidandicitira iwo.” 12 Mbwenye iwo ampanga: “Ife tabwera kudzakuphata toera tikupereke mʼmanja mwa Afilisti.” Samisoni alonga: “Dumbirani kuna ine kuti nee munandipha.” 13 Iwo ampanga: “Ife nee tinakupha, basi ene tinakumanga mbatikupereka kuna iwo.”
Natenepa, iwo amʼmanga na nkhambala ziwiri zipswa, mbamʼbulusa mʼmphako. 14 Pidafika iye ku Lei, Afilisti akhuwa mwakutsandzaya kakamwe pidamuona iwo. Penepo nzimu wa Yahova wampasa mphambvu,+ mbathumula mwakukhonda nentsa nkhambala zidamangwa na iye ninga akuthumula usalu wadidi udawambizwa pa moto, natenepa izo zagwandika mbazigwa pantsi.+ 15 Samisoni aona ntsaya za buru imuna; azikwata mbapha nazo amuna 1.000.+ 16 Natenepa, Samisoni alonga:
“Na ntsaya za buru ibodzi ndaphata anyamalwa mbandiagumanya nkuku ubodzi, mikuku miwiri!
Na ntsaya za buru ibodzi ndapha amuna 1.000.”+
17 Pidamala iye kulonga, ataya ntsaya, mbacemera mbuto ineyi Ramati-Lei.*+ 18 Buluka penepo, Samisoni aphatwa na nyota kakamwe, natenepa aphemba Yahova: “Ndimwe adaphedza ntumiki wanu toera kuwina. Kodi munandisiya ndife na nyota, pontho munandisiya mʼmanja mwa anthu akukhonda kusidzwa?” 19 Natenepa, Mulungu apandula mataka ku Lei, mbabuluka madzi pa mataka anewa.+ Samisoni pidamwa iye madzi, akhala pontho na mphambvu, mbakhala mwadidi. Na thangwi ineyi, iye acemera mbuto ineyi Eni-Akore,* pontho mbuto ineyi isagumanika ku Lei mpaka lero.
20 Natenepa, iye akhala nyakutonga miseru wa Izraeli mu pyaka 20 mu ntsiku za Afilisti.+