Atongi
14 Buluka penepo, Samisoni aenda ku Timina, kweneko iye aona nkazi wa ku Filisti.* 2 Natenepa iye abwerera mbapanga pai wace na mai wace: “Ku Timina ine ndasirira nkazi wakuti ndi Nfilisti, ndisafuna kuti mukankwate toera akhale nkazanga.” 3 Mbwenye pai wace na mai wace ampanga: “Kodi nee unakwanisa kugumana nkazi pakati pa abale ako na pakati pa mbumba yathu?+ Usafunika kuenda kakwata nkazi kuna Afilisti akukhonda kusidzwa?” Mbwenye Samisoni apanga babace: “Ndokoni kandikwatire, thangwi iye ndi wadidi kuna ine.”* 4 Pai wace na mai wace nee adzindikira kuti adacitisa pyenepi ndi Yahova, thangwi Iye akhasaka njira toera amenyane na Afilisti, nakuti ndiwo akhatonga Aizraeli mu ndzidzi unoyu.+
5 Natenepa, Samisoni aenda ku Timina pabodzi na pai wace na mai wace. Pidafika iye dhuzi na minda ya mauva ya ku Timina, nkhalamu yabwera kuna iye mbikalira. 6 Buluka penepo, nzimu wa Yahova wampasa mphambvu+ mbapandula nkhalamu mapindi mawiri na manja ace ninga akupandula mwanambuzi. Mbwenye pyenepi nee apilonga kuna pai wace na mai wace. 7 Buluka penepo, iye aenda ku Timina kalonga na nkazi, pontho nkazi unoyu apitiriza kukhala wadidi kuna Samisoni.+
8 Mukupita kwa ndzidzi Samisoni abwerera pontho ku Timina kakwata nkazi unoyu toera aende naye kunyumba kwawo.+ Pikhali iye nʼnjira apambuka mbaenda kaona nkhalamu idapha iye, mbwenye iye agumana khana* ya nyuci na uci mʼmanungo mwa nkhalamu ineyi. 9 Natenepa iye akwata uci mʼmanja mwace mbadya mu ndzidzi ukhafamba iye. Pidagumanikana iye na pai wace na mai wace, aapasambo pangʼono toera adye. Mbwenye iye nee aapanga kuti uci unoyu aukwata mʼmanungo mwa nkhalamu yakufa.
10 Samisoni na babace aenda kaonana na ntsikana, pontho Samisoni acita phwando kweneko, thangwi ukhali nsambo wa aphale azinji. 11 Anthu a kweneko pidamuona iwo, amʼbweresera aphale 30 toera akhale pabodzi na iye. 12 Buluka penepo Samisoni aapanga: “Ndisafuna kukupangani nsangani ubodzi. Mungakwanisa kundipanga mabvekero awo mu ntsiku zinomwe za phwando, ine ndinakupasani nguwo 30 zakucitwa na linyu na nguwo zinango 30. 13 Mbwenye imwe mungacimwana kundipanga mabvekero a nsangani unoyu, munandipasa nguwo 30 zakucitwa na linyu na nguwo zinango 30.” Iwo alonga: “Tipange nsangani wako; tisafuna kuubva.” 14 Natenepa iye aapanga:
“Nkati mwa cinthu cinadya mwabuluka cakudya,
Pontho nkati mwa cinthu camphambvu mwabuluka pyakutapira.”+
Iwo acimwana kulonga mabvekero a nsangani unoyu mu ntsiku zitatu. 15 Pa ntsiku yacinai iwo apanga nkazi wa Samisoni kuti: “Nyengerera mamunako+ toera atipange mabvekero a nsangani unoyu. Angakhonda kutipanga, ife tinapisa na moto iwe pabodzi na anthu a panyumba ya babako. Imwe mwaticemera toera kutikwatira pinthu pyathu?” 16 Natenepa nkazi wa Samisoni amulirira mbampanga: “Iwe usandiida, pontho nee usandifuna.+ Walonga nsangani kuna mbumba yanga, mbwenye nee wandipanga mabvekero a nsangani unoyu.” Penepo Samisoni ampanga: “Baba na mama nee ndaapanga mabvekero a nsangani unoyu, thangwi yanji ndisafunika kupanga iwe?” 17 Mbwenye iye apitiriza kumulirira mu ntsiku zonsene zinomwe za phwando. Pa ntsiku yacinomwe, Samisoni ampanga mabvekero a nsangani thangwi iye akhankakamiza. Buluka penepo, nkazi apanga mbumba yace mabvekero a nsangani unoyu.+ 18 Natenepa, pa ntsiku yacinomwe dzuwa mbidzati kudoka,* amuna a mu nzinda ambvundza:
“Ninji cinatapira kakamwe kupiringana uci,
Pontho ndi cinthu cipi camphambvu kakamwe kupiringana nkhalamu?”+
Iye aatawira:
“Mbamudakhonda kuphatisira mwanangʼombe wanga wankazi,+
Nee mbamudakwanisa kundipanga mabvekero a nsangani wanga.”
19 Penepo nzimu wa Yahova wampasa mphambvu,+ mbaenda ku Asikaloni.+ Kweneko iye apha amuna 30, aakwatira nguwo zawo mbazipereka kuna ale adalonga mabvekero a nsangani wace.+ Iye akhadaipirwa kakamwe mu ndzidzi ukhabwerera iye kunyumba kwa babace.
20 Mbwenye nkazi wa Samisoni+ adzaperekwa kuna mʼbodzi mwa aphale akhali na Samisoni.+