Tsamba Kuna Akristu a ku Galasya
4 Ine ndinakupangani kuti, mwanaciro unthaka mbaciri mwanangʼono, iye nee ndi wakusiyana na bitcu, maseze pinthu pyonsene mphyace, 2 mbwenye iye asakhala pantsi pa ale anamuonera na ale anayangʼanira pinthu pya panyumba, mpaka pa ndzidzi udakhazikiswa mwanyapantsi na babace. 3 Munjira ibodzi ene, pikhali ife anangʼono, tikhali mabitcu a pinthu pyakusowa basa pya dziko.+ 4 Mbwenye pidakwana ndzidzi, Mulungu atuma Mwanace, ule adabalwa na nkazi,+ mbakhala pantsi pa mwambo,+ 5 toera iye alipe ntengo wakuombola nawo ale ali pantsi pa mwambo,+ toera ife tikwanise kukhala ana a Mulungu.+
6 Nakuti ndimwe ana, Mulungu aikha mʼmitima yathu+ nzimu wakucena+ udapaswa Mwanace, iwo usaticitisa kukhuwa: “Abha,* Baba!”+ 7 Natenepa, nee ndimwebve mabitcu, mbwenye ndimwe ana a Mulungu; mphapo khala ndimwe ana a Mulungu, iye anadzakupasanimbo unthaka.+
8 Mbwenye mbamudzati kudziwa Mulungu, imwe mukhali mabitcu a alungu authambi.* 9 Cincino, nakuti imwe musadziwa Mulungu, peno tilonge kuti, Mulungu asakudziwani, thangwi yanji musabwerera pontho ku pinthu pyaciwana,+ pyakusowa basa, pyakuti nkhabe phedza, mbamufuna pontho kukhala mabitcu a pinthu pyenepi?+ 10 Imwe musawangisira kakamwe toera kukumbuka ntsiku, miyezi,+ midzidzi na pyaka. 11 Ine ndisadzudzumika kuti panango ndawangisira papezi toera kukuphedzani.
12 Abale anga, ine ndisakudembeterani: Khalani ninga ine, thangwi ine ndikhalimbo ninga imwe.+ Imwe nee mwandicitira cinthu cakuipa. 13 Mbwenye imwe musadziwa kuti ine ndakwanisa kukumwazirani mphangwa zadidi paulendo wakutoma thangwi ya utenda wanga. 14 Maseze utenda wanga ukhali ninga ntolo wakulemera* kuna imwe, imwe nee mwandipwaza peno kunyanyasirwa na ine;* mbwenye mwanditambira ninga anju wa Mulungu, ninga Kristu Yezu. 15 Mphapo kutsandzaya kukhali na imwe kuli kupi? Thangwi ine ndiri na cinyindiro cakuti, mbapidakwanisika, imwe mbamudabulusa* maso anu toera kundipasa.+ 16 Mphapo cincino ndadzakhala nyamalwa wanu thangwi ndakupangani undimomwene? 17 Iwo asawangisira kakamwe toera kukuwinani, mbwenye nee asacita pyenepi na cifuno cadidi; iwo asafuna kuti mukhale kutali na ine, toera imwe muatowere na ntima onsene. 18 Mwandimomwene, ndzidzi onsene mphyadidi munthu angasaka kukuwinani na cifuno cadidi, tayu basi ndingakhala pakati panu, 19 imwe ananga akufunika,+ thangwi ya imwe, ine ndiri kubva pontho kupha ninga kunabva nkazi anafuna kubala, mpaka imwe mupangize makhaliro a Kristu. 20 Ine ndikhafuna kuti pa ndzidzi uno ndikhale pakati panu, mbandilonga na imwe munjira yakusiyana, thangwi ndisadzudzumika na imwe.
21 Ndipangeni imwe anthu anafuna kubvera Mwambo, kodi imwe nkhabe dziwa pinalonga Mwambo? 22 Kodi nee pyalembwa kuti Abhrahamu abala ana awiri amuna? Mʼbodzi amʼbala na nkazi wakuti akhali bitcu,+ unango amʼbala na nkazi waufulu;+ 23 mwana adabalwa na bitcu, abalwa ninga munabalwa anthu onsene,+ mbwenye ule adabalwa na nkazi waufulu, abalwa thangwi ya pikiro ya Mulungu.+ 24 Pinthu pyenepi piri na mabvekero, thangwi akazi anewa asaimirira pibverano piwiri, cibodzi cacitwa Paphiri ya Sinai,+ cakuti cisabala ana toera kukhala mu ubitcu, cibverano ceneci ndi Agari. 25 Agari asaimirira Phiri ya Sinai+ inagumanika ku Arabhya, pontho cincino iye asaimirira Yerusalemu, thangwi iye ali mu ubitcu pabodzi na anace. 26 Mbwenye Yerusalemu wakudzulu ndi waufulu, pontho iye ndi mai wathu.
27 Thangwi pyalembwa kuti: “Tsandzaya pyako iwe nkazi wakukhonda kubala, wakuti udzati kubala mwana; khuwa pyako mwakukomerwa, iwe nkazi wakuti udzati kuona nyatwa zakubala; thangwi ana a nkazi adasiyiwa ndi azinji kakamwe kupiringana ana a nkazi wakuti ali na mamuna.”+ 28 Abale anga, cincino imwe ndimwe ana a pikiro ninga Izaki.+ 29 Mbwenye ninga pidacitika mu ndzidzi unoyu, mwana adabalwa ninga munabalwa anthu onsene, atoma kutcinga mwana adabalwa na ciphedzo ca nzimu wakucena,+ pyenepi piri kucitikambo cincino.+ 30 Mphapo Malemba asalonganji? “Thamangisa bitcu na mwanace ene, thangwi mwana wa bitcu nee anadzatambira unthaka pabodzi na mwana wa nkazi waufulu.”+ 31 Natenepa abale anga, ife nee ndife ana a nkazi wakuti ndi bitcu, mbwenye ndife ana a nkazi waufulu.