Tsamba Kuna Akristu a ku Galasya
1 Ine Paulu, ndine mpostolo, tayu wa anthu peno adasankhulwa na munthu, mbwenye ndasankhulwa na Yezu Kristu+ pabodzi na Mulungu Babathu+ adamulamusa muli akufa, 2 ine na abale onsene ali pabodzi na ine, tiri kulembera mipingo ya ku Galasya:
3 Mulungu Babathu pabodzi na Mbuya Yezu Kristu, mbapangize kukoma ntima kukulu kuna imwe, pontho akupaseni ntendere. 4 Iye aperekeka thangwi ya madawo athu+ toera atipulumuse mu dziko ino yakuipa,+ mwakubverana na pinafuna Mulungu Babathu,+ 5 wakuti asafunika kupaswa mbiri kwenda na kwenda. Ameni.
6 Ndisadzumatirwa thangwi imwe mwapeuswa mwakucimbiza, mbamusiya ule adakucemerani thangwi ya kukoma ntima kukulu kudapangiza Kristu, mbamutawira ntundu unango wa mphangwa zadidi.+ 7 Nee pisabveka kuti ziripo mphangwa zinango zadidi; mbwenye alipo anthu anango akuti asafuna kukupeusani,+ pontho iwo asafunambo kudodomesa mphangwa zadidi zinalonga pya Kristu. 8 Mbwenye mʼbodzi wa ife, peno anju wakudzulu angakumwazirani mphangwa zadidi zakusiyana na mphangwa zadidi zidakumwazirani ife, mbapaswe dzedze. 9 Ninga mudalongera ife kale, cincino ndiri kulonga pontho: Munthu anakumwazirani mphangwa zadidi zakusiyana na zire zidatawira imwe, mbapaswe dzedze.
10 Kodi ine ndiri kusaka kukomeresa anthu peno ndiri kusaka kukomeresa Mulungu? Mwandimomwene, mbidakhala kuti ndisapitiriza kusaka kukomeresa anthu, nee mbidakhala ntumiki* wa Kristu. 11 Thangwi cincino abale anga, ine ndisafuna kuti imwe mudziwe kuti mphangwa zadidi zidakumwazirani ine nee zabuluka kuna anthu;+ 12 thangwi ine nee ndazipaswa na anthu, pontho nee ndacita kuzipfundziswa, mbwenye ndazipangizwa na Yezu Kristu.
13 Mwandimomwene, imwe mwabva pikhacita ine kale* pikhali ine mu uphemberi Waciyuda,+ kuti ine ndikhapitiriza kutcinga kakamwe* mpingo wa Mulungu na cifuno ca kuufudza;+ 14 pontho kuti ine ndikhathambaruka kakamwe mu uphemberi Waciyuda, kupiringana anthu azinji a mu dzindza yanga akuti akhali na thunga yanga, thangwi ine ndikhali waphinga kakamwe pakubvera miyambo ya ambuyanga.+ 15 Mbwenye Mulungu, ule adandicitisa kuti ndibalwe pa dziko yapantsi, mbandicemera thangwi ya kukoma ntima kwace kukulu,+ aona kuti mphyadidi 16 kupangiza Mwanace kubulukira mwa ine, toera ndimwaze mphangwa zadidi zinalonga pya iye kuna anthu a madzindza anango.+ Pidandisankhula iye, ine nee ndaenda mwakucimbiza kabvundzisa munthu unango; 17 pontho nee ndaenda ku Yerusalemu kuna ale adakhala apostolo ine mbandidzati kukhala mpostolo, mbwenye ndaenda ku Arabhya, buluka penepo ndabwerera ku Dhamasku.+
18 Pidapita pyaka pitatu, ine ndaenda ku Yerusalemu+ kaonana na Kefa,*+ mbandikhala na iye mu ntsiku 15. 19 Mbwenye nee ndaonana na apostolo anango, basi ene ndaonana na Tiyago+ mʼbale wace Mbuya. 20 Cincino, thangwi ya pinthu pinakulemberani ine, khalani na cinyindiro pamaso pa Mulungu kuti ine nee ndiri kulonga uthambi.
21 Buluka penepo, ine ndaenda kupisa pya ku Sirya na Silisya.+ 22 Mbwenye Akristu a mipingo ya ku Yudeya nee akhandidziwa. 23 Basi ene iwo akhabva kuti: “Munthu ule wakuti kale akhatitcinga,+ cincino ali kumwaza mphangwa zadidi za cikhulupiro cikhafudza iye.”+ 24 Natenepa, iwo atoma kusimba Mulungu thangwi ya ine.