Masomphenya Adaoneswa Juwau
7 Pidamala pyenepi, ine ndaona aanju anai akhali dzololo mu nkhomo zinai za dziko yapantsi, iwo akhaphatirira mwakuwanga mphepo zikhabuluka mʼmakhundu manai a dziko yapantsi, toera zikhonde kupepesa dziko yapantsi, bara peno muti. 2 Ine ndaonambo anju unango akhakwira kumabulukiro a dzuwa, wakuti akhali na cidzindikiro ca Mulungu wa mʼmaso; iye akhuwa mwakugaluza kuna aanju anai adapaswa mphambvu zakucita pyakuipa kuna dziko na bara, 3 mbalonga: “Lekani kucita pyakuipa dziko, bara na miti, mpaka tingamala kuikha cidzindikiro*+ pa nkhope za atumiki a Mulungu wathu.”+
4 Ine ndabva numero ya ale adaikhwa cidzindikiro, anthu akukwana 144.000+ a madzindza onsene a Izraeli akuti aikhwa cidzindikiro:+
5 Mu dzindza ya Yuda, adaikhwa cidzindikiro ndi anthu 12.000;
mu dzindza ya Rubheni, 12.000;
mu dzindza ya Gadhi, 12.000;
6 mu dzindza ya Azeri, 12.000;
mu dzindza ya Nafitali, 12.000;
mu dzindza ya Manase,+ 12.000;
7 mu dzindza ya Simeoni, 12.000;
mu dzindza ya Levi 12.000;
mu dzindza ya Isakari, 12.000;
8 mu dzindza ya Zebhuloni, 12.000;
mu dzindza ya Zuze, 12.000;
mu dzindza ya Bhenjamini adaikhwa cidzindikiro ndi anthu 12.000.
9 Buluka penepo, ine ndaona mwinji ukulu wa anthu wakuti nee mʼbodzi mbadakwanisa kuulengesa, iwo akhali a madziko onsene, a madzindza onsene, a mbumba zonsene na a pilongero pyonsene.+ Iwo akhali dzololo patsogolo pa mpando waumambo na patsogolo pa Mwanabira, akhadabvala nguwo zakucena zakulapha;+ pontho akhali na matsandzo a micindu mʼmanja mwawo.+ 10 Iwo akhapitiriza kukhuwa mwakugaluza, mbalonga: “Cipulumuso cathu cisabuluka kuna Mulungu wathu, wakuti ali pa mpando waumambo+ na kuna Mwanabira.”+
11 Aanju onsene akhali dzololo nʼkhundu mwa mpando waumambo, akulu a mpingo+ na aanju anai, onsene agodama, mbakotamisa misolo yawo mpaka pantsi patsogolo pa mpando waumambo, iwo alambira Mulungu, 12 mbalonga: “Ameni! Kusimbwa, mbiri, udziwisi, kupereka takhuta, cilemedzo, utongi na mphambvu mbapipaswe Mulungu wathu kwenda na kwenda.+ Ameni.”
13 Penepo, mʼbodzi wa akulu a mpingo andibvundza: “Mbani awa adabvala nguwo zakucena zakulapha,+ pontho abuluka kupi?” 14 Penepo pene ine ndantawira: “Mbuyanga, imwe ndimwe anapidziwa.” Iye andipanga: “Awa ndiwo adabuluka mu nyatwa ikulu,+ iwo afula nguwo zawo zakulapha, mbazicenesa mu ciropa ca Mwanabira.+ 15 Na thangwi ineyi, iwo ali patsogolo pa mpando waumambo wa Mulungu, pontho asantumikira masiku na masikati mu templo yace; Ule adakhala pa mpando waumambo+ anadzafuthula nsasa wace mbaatsidzikiza.+ 16 Iwo cipo anadzakhala pontho na njala, nee nyota; iwo cipo anadzathabuswa pontho na dzuwa peno kupisa kakamwe,+ 17 thangwi Mwanabira,+ wakuti ali pakati-nakati pa mbuto inagumanika mpando waumambo, anadzaakumbiza,+ mbaatsogolera ku mphuno za* madzi akupasa umaso.+ Pontho Mulungu anadzapukuta misozi yonsene mʼmaso mwawo.”+