Samweli Wakutoma
20 Buluka penepo, Dhavidhi athawa ku Nayoti ku Rama, agumanikana na Yonatani mbambvundza: “Ndacitanji ine?+ Ndi nseru upi udasosa ine, pontho ndanʼdawiranji babanu toera afune kundipha?” 2 Yonatani antawira: “Pyenepi nkhabe citika!+ Iwe nee unadzaphiwa. Babanga nkhabe kucita cinthu cikulu peno cingʼono mbakhonda kundipanga. Thangwi yanji babanga anandibisira pinthu ninga pyenepi? Pyenepi nkhabe citika.” 3 Mbwenye Dhavidhi athimiza kulonga: “Babanu asadziwa mwadidi kuti imwe na ine ndife axamwali,+ panango iye alonga: ‘Yonatani mbaleke kudziwa pyenepi gopa anatsukwala.’ Ndiri kudumbira mu dzina ya Yahova Mulungu wa mʼmaso na mu dzina yanu kuti ndasala pangʼono basi toera kuphiwa!”+
4 Yonatani apanga Dhavidhi: “Ine ndinacita pyonsene pinafuna iwe kulonga.” 5 Dhavidhi apanga Yonatani: “Mangwana ndi ntsiku ya phwando yakubalwa kwa mwezi,+ pontho ndisadikhirwa kuti ndidye pabodzi na mambo; nditawiriseni toera ndiende kabisala kunja kwa nzinda mpaka maulo a ntsiku yacitatu. 6 Babanu angandibvundzisa mpangeni tenepa: ‘Dhavidhi andiphemba toera aende mwakucimbiza kunyumba kwawo ku Bhetelehemu,+ thangwi banja yawo yonsene isafuna kupereka ntsembe ya pa caka.’+ 7 Iye angalonga kuti: ‘Nkhabe pinthu,’ natenepa ine ntumiki wanu nee ndinagopabve cinthu. Mbwenye angaipirwa, dziwani kuti iye ali dzololo toera kundicita pinthu pyakuipa. 8 Pangizani ufuni kuna ine ntumiki wanu,+ thangwi imwe mwacita cibverano na ine ntumiki wanu pamaso pa Yahova.+ Mbwenye khala ciripo cidadawisa ine,+ ndipheni imwe ene, mʼmbuto mwakundipereka kuna babanu.”
9 Natenepa Yonatani alonga: “Leka kunyerezera pyenepi! Kodi ndingadzindikira kuti babanga asafuna kukucita pyakuipa nee ndinakudziwisa?”+ 10 Dhavidhi apanga Yonatani: “Khala babanu aipirwa na ine, mbani anafuna kundipanga?” 11 Yonatani apanga Dhavidhi: “Tende kunja kwa nzinda.” Natenepa uwiri wawo aenda kunja kwa nzinda. 12 Yonatani apanga pontho Dhavidhi: “Yahova Mulungu wa Izraeli akhale mboni kuti mangwana peno nkucauno ine ndinacedza na babanga pa ndzidzi ninga uno. Ndingadzindikira kuti nee asafuna kukucita pinthu pyakuipa, ndinakudziwisa. 13 Yahova mbanditcunyuse kakamwe, babanga angafuna kukupha, ine mbindikhonda kukudziwisa, iwe mbucimwana kuthawa. Yahova mbakhale na iwe+ ninga mudakhala iye na babanga.+ 14 Kodi iwe nee unadzapangiza ufuni wakukhonda mala wa Yahova kuna ine ndingafa peno ndingakhala maso?+ 15 Leka siya kupangiza ufuni wakukhonda mala kuna anthu a panyumba panga,+ maseze Yahova aphe anyamalwa onsene a Dhavidhi pa dziko yapantsi.” 16 Natenepa, Yonatani acita cibverano na anthu a mʼbanja ya Dhavidhi mbalonga: “Yahova anadzatcunyusa anyamalwa a Dhavidhi.” 17 Natenepa Yonatani acitisa Dhavidhi kudumbira pontho thangwi ya ufuni wace wakukhonda mala kuna iye, thangwi iye akhanfuna kakamwe ninga munafunira iye manungo ace.+
18 Buluka penepo Yonatani ampanga: “Mangwana ndi ntsiku ya phwando yakubalwa kwa mwezi,+ babanga anadzakusaka, thangwi pa mbuto pako nee panadzakhala munthu. 19 Nkucauno, iye anadzabvundza kuti iwe uli kupi, natenepa iwe usafunika kubwera pa mbuto ino idabisala iwe ntsiku inango* mbukhala pano dhuzi na mwala uyu. 20 Ine ndinadzaponya mapswimo matatu kukhundu ibodzi ya mwala uyu ninga ndisafuna kulasa cinthu. 21 Ndinadzatuma nyabasa wanga mbindimpanga: ‘Ndoko ukalokote mapswimo.’ Ndiri kudumbira mu dzina ya Yahova Mulungu wa mʼmaso kuti ndingapanga nyabasa wanga: ‘Mapswimo ali kukhundu ya kuno, alokote,’ iwe usafunika kubwerera thangwi pyenepi pinapangiza kuti pyonsene piri mwadidi, pontho iwe nee uli pangozwi. 22 Mbwenye ndingapanga mʼphale kuti: ‘Mapswimo ali kutsogolo kwako,’ penepo iwe usafunika kuenda thangwi ndi Yahova anakupanga toera uende. 23 Yahova mbakhale mboni wathu kwenda na kwenda+ thangwi ya cibverano cidacita ife.”+
24 Natenepa, Dhavidhi abisala kunja kwa nzinda. Pidafika ntsiku ya phwando yakubalwa kwa mwezi, mambo akhala pa mpando wace toera kudya.+ 25 Mambo akhali nawa pa mbuto inakhala iye ndzidzi onsene dhuzi na pfufu. Yonatani akhali kutsogolo kwace, Abhineri+ akhali nawa nʼkhundu mwa Sauli, mbwenye mbuto ya Dhavidhi nee ikhali na munthu. 26 Ntsiku ineyi Sauli nee alonga cinthu, iye akhanyerezera muntima mwace: ‘Panango ciripo cidacitika cakuti cancitisa kukhala wakukhonda cena.+ Inde, panango iye nee ali wakucena.’ 27 Mangwana mwace,* mbuto ya Dhavidhi ikhapitiriza kukhala yakusowa munthu. Buluka penepo Sauli abvundza mwanace anacemerwa Yonatani: “Thangwi yanji dzulo na lero mwana wa Yese+ nee abwera kudzadya?” 28 Yonatani atawira Sauli: “Dhavidhi andiphemba toera ndintawirise kuenda ku Bhetelehemu.+ 29 Iye alonga: ‘Ndaphata miyendo, nditawiriseni toera ndiende ku nzinda wathu, thangwi banja yathu isafuna kupereka ntsembe, pontho mʼbale wanga andicemeresa. Natenepa munganditawirisa ndisiyeni ndiende kaona abale anga.’ Na thangwi ineyi, iye nee abwera kudzadya na mambo.” 30 Penepo Sauli aipirwa kakamwe na Yonatani mbampanga: “Iwe mwana wa nkazi wakukhonda bvera! Kodi usanyerezera kuti ine nee ndisadziwa kuti iwe wasankhula kukhala kukhundu ya mwana wa Yese? Pyenepi pinapasa manyadzo iwe pabodzi na mai wako. 31 Mwana wa Yese angapitiriza kukhala mʼmaso, iwe na umambo wako nee unakhazikika.+ Natenepa tuma munthu toera akankwate, thangwi iye asafunika kuphiwa.”*+
32 Mbwenye Yonatani abvundza babace: “Thangwi yanji iye asafunika kuphiwa?+ Ninji pidacita iye?” 33 Penepo Sauli amponyera dipa toera kumulasa.+ Natenepa Yonatani adzindikira kuti babace akhafuna kakamwe kupha Dhavidhi.+ 34 Yonatani aipirwa kakamwe, mbabuluka mwakucimbiza pa meza, pontho Yonatani nee adya cinthu ntsiku ineyi, iye akhadatsukwala kakamwe thangwi ya pinthu pikhacitirwa Dhavidhi,+ nakuti babace akhadampasa manyadzo.
35 Mangwana mwace namacibese, Yonatani aenda kaonana na Dhavidhi kunja kwa nzinda, iye akhali pabodzi na nyabasa wace wa mʼphale.+ 36 Iye apanga nyabasa wace: “Thamanga, ndoko kalokote mapswimo anafuna ine kuponya.” Nyabasa athamanga, Yonatani mbaponya pswimo kutsogolo kwace. 37 Nyabasa pidafika iye pa mbuto idagwa pswimo idaponya Yonatani, Yonatani akhuwa mbambvundza: “Kodi pswimo nee yagwa kutsogolo kwako?” 38 Yonatani apanga nyabasa wace: “Cimbiza! Ndoko mwakucimbiza! Leka dembuka!” Nyabasa wa Yonatani alokota mapswimo mbabwerera kuna iye. 39 Nyabasa wa Yonatani nee akhadziwa pikhacitika; basi ene Yonatani na Dhavidhi ndiwo akhapidziwa. 40 Buluka penepo, Yonatani apasa nyabasa wace pida pyace pya nkhondo, mbampanga: “Kwata, ndoko napyo ku nzinda.”
41 Pidaenda nyabasa, Dhavidhi abuluka pa mbuto ikhadabisala iye yakuti ikhali dhuzi na penepo kukhundu yakunterero. Iye agodama katatu mbakotamisa nsolo wace mpaka pantsi, pontho ampswompswonana mbalira, mbwenye Dhavidhi alira kakamwe kupiringana Yonatani. 42 Yonatani apanga Dhavidhi: “Ndoko muntendere, thangwi uwiri wathu tadumbira+ mu dzina ya Yahova mbatilonga kuti: ‘Yahova mbakhale mboni kwenda na kwenda kuna iwe na ine, kuna anako na kuna ananga.’”+
Buluka penepo Dhavidhi alamuka mbaenda, mbwenye Yonatani abwerera mu nzinda.