Tsamba Kuna Akristu a ku Galasya
3 Imwe Agalata akusowa ndzeru! Imwe mwatambira cipfundziso cakubveka mwadidi cinalonga pya kufa kwa Yezu Kristu adakhomerwa pamuti,+ mphapo mbani adakunyengezani toera mukhale na maonero anewa akuipa?+ 2 Ine ndisafuna ndidziwe* cinthu cibodzi basi kuna imwe: Kodi imwe mwatambira nzimu wakucena thangwi musacita pinalonga mwambo peno thangwi musakhulupira mphangwa zadidi zidabva imwe?+ 3 Kodi imwe nee musabvesesa? Pakutoma imwe mukhanyindira nzimu wakucena, mphapo thangwi yanji cincino musatowezera manyerezero a anthu?+ 4 Kodi mwaona nyatwa zizinji papezi? Ine ndisanyindira kuti nee mwaona nyatwa papezi. 5 Kodi ule anakupasani nzimu wakucena mbacita pinthu pyakudzumisa pakati panu,+ asacita pyenepi thangwi imwe musacita pinalonga mwambo, peno thangwi musakhulupira mphangwa zadidi zidabva imwe? 6 Ninga pidacitika kuna Abhrahamu: Iye “akhulupira Yahova;* pyenepi pyancitisa kuoniwa ninga munthu wakulungama.”+
7 Mwandimomwene imwe musadziwa kuti ana a Abhrahamu ndi ale akuti ali na cikhulupiro.+ 8 Malemba apangiza mwanyapantsi kuti Mulungu mbadaona anthu a madzindza anango kukhala akulungama thangwi ya cikhulupiro, mbadziwisa mwanyapantsi mphangwa zadidi kuna Abhrahamu kuti: “Kubulukira mwa iwe, anthu a madzindza onsene anadzapaswa nkhombo.”+ 9 Natenepa, ale ali na cikhulupiro asapaswa nkhombo pabodzi na Abhrahamu, wakuti akhali na cikhulupiro.+
10 Anthu onsene ananyindira mabasa anaphembwa na mwambo ali na dzedze, thangwi pyalembwa kuti: “Mbapaswe dzedze munthu anakhonda kupitiriza kubvera pinthu pyonsene pidalembwa mʼbukhu ya Mwambo.”+ 11 Kusiyapo pyenepi, pisaoneka pakweca kuti nkhabe munthu anaoniwa kukhala wakulungama pamaso pa Mulungu thangwi ya mwambo,+ thangwi “munthu wakulungama anadzakhala na umaso thangwi ya cikhulupiro cace.”+ 12 Mwambo nee usaphemba kuti munthu akhale na cikhulupiro. Mbwenye iwo usalonga kuti: “Ule anabvera pinalonga Mwambo, anadzakhala na umaso thangwi yakucita pyenepi.”+ 13 Kristu atigula,+ pontho atiombola+ mu dzedze ya Mwambo mbatawira kukhala na dzedze pa mbuto yathu, thangwi pyalembwa kuti: “Dzedze kuna munthu anamanikwa pamuti.”+ 14 Pyenepi pyacitika toera anthu a madzindza anango atambirembo nkhombo idapikirwa Abhrahamu kubulukira mwa Kristu Yezu,+ toera titambire nzimu wakucena udapikirwa ife+ thangwi ya cikhulupiro cathu.
15 Abale anga, ndisalonga ninga pinacitika kuna anthu: Cibverano cingamala kucitwa, ngakhale kuti ndi cibverano ca anthu, nkhabe munthu anakwanisa kucifudza peno kuthimizira pinango pa cibverano ceneci. 16 Onani, mapikiro acitirwa Abhrahamu na dzindza* yace.+ Malemba nkhabe kulonga kuti: “Kuna madzindza* ako,” ninga kuti ndi mazinji. Mbwenye asalonga: “Kuna dzindza yako,” pyenepi pisapangiza kuti ndi munthu mʼbodzi basi, wakuti ndi Kristu.+ 17 Kusiyapo pyenepi, ine ndinakupangani: Pakutoma Mulungu acita cibverano, pidapita pyaka 430,+ iye apereka Mwambo, mbwenye pyenepi nkhabe kufudza cibverano cidacitwa kale na Mulungu, pabodzi na pikiro idacita iye. 18 Khala unthaka unapereka Mulungu usabulukira mu mwambo, nee usabulukirabve mu pikiro; mbwenye Mulungu aupereka mwakukoma ntima kuna Abhrahamu kubulukira mu pikiro.+
19 Mphapo thangwi yanji mwambo waperekwa? Iwo waperekwa toera kupangiza pakweca madawo,+ mpaka kufika dzindza*+ idacitirwa pikiro ineyi; pikiro ineyi yadziwiswa na aanju+ na ciphedzo ca muimiriri wa cibverano.+ 20 Mbwenye cibverano cingacitwa na munthu mʼbodzi basi, nkhabe funika muimiriri wa cibverano. Pyenepi ndi sawasawa na pidacita Mulungu pidapereka iye pikiro ineyi. 21 Kodi pyenepi pisabveka kuti Mwambo usaphonyana na mapikiro a Mulungu? Nee pangʼono pene! Thangwi mbudaperekwa mwambo wakuti mbudakwanisa kupasa umaso, mwandimomwene ulungami mbudabwera kubulukira mu mwambo. 22 Mbwenye Malemba apangiza kuti anthu onsene ali* pantsi pa madawo, toera ale ali na cikhulupiro akwanise kutambira pinthu pyadidi pidapikirwa ale anakhulupira Yezu Kristu.
23 Mbwenye cikhulupiro mbacidzati kufika, ife tikhakoyiwa na mwambo wakuti ukhationera ninga mabitcu, mu ndzidzi ukhadikhira ife cikhulupiro cikhafuna kupangizwa.+ 24 Munjira ineyi, Mwambo wadzakhala ntsogoleri* wathu adatifikisa kuna Kristu,+ toera ife tioniwe ninga anthu akulungama kubulukira mu cikhulupiro.+ 25 Mbwenye cincino nakuti cikhulupiro cafika,+ nee tisaonerwabve na ntsogoleri unoyu.+
26 Mwandimomwene, monsene ndimwe ana a Mulungu+ thangwi ya kukhulupira kwanu Kristu Yezu.+ 27 Thangwi monsene mudabatizwa muna Kristu muli na makhaliro ninga a Kristu.*+ 28 Natenepa, nkhabepo Muyuda nee Nʼgerego,+ nkhabepo bitcu nee munthu waufulu,+ nkhabepo mamuna nee nkazi,+ thangwi monsene ndimwe mʼbodzi basi ninga anyakupfundza a Kristu Yezu.+ 29 Mbwenye khala imwe ndimwe atumiki a Kristu, mwandimomwene ndimwe a dzindza* ya Abhrahamu,+ ale anafuna kutambira unthaka+ wa pikiro idacitirwa Abhrahamu.+