Amambo Waciwiri
2 Yahova pikhafuna iye kukwata Eliya+ na mphepo ikulu+ toera kuenda naye kudzulu,* Eliya na Elizeu+ abuluka ku Jiligale.+ 2 Eliya apanga Elizeu: “Ndaphata miyendo, sala pano, thangwi Yahova andituma toera ndiende ku Bheteli.” Mbwenye Elizeu alonga: “Ndiri kudumbira mu dzina ya Yahova Mulungu wa m’maso na mu dzina yanu kuti nee ndinakusiyani.” Natenepa iwo aenda mpaka ku Bheteli.+ 3 Buluka penepo ana a aprofeta* ku Bheteli aenda kuna Elizeu, mbambvundza: “Kodi imwe musadziwa kuti lero Yahova anakwata mbuyanu toera akhonde kukhala pontho ntsogoleri wanu?”+ Penepo iye atawira: “Ine ndisapidziwa kale. Matamani.”
4 Eliya ampanga: “Ndaphata miyendo Elizeu, sala pano, thangwi Yahova andituma toera ndiende ku Yeriko.”+ Mbwenye iye alonga: “Ndiri kudumbira mu dzina ya Yahova Mulungu wa m’maso na mu dzina yanu kuti nee ndinakusiyani.” Natenepa iwo aenda ku Yeriko. 5 Buluka penepo, ana a aprofeta akuti akhali ku Yeriko afendedzera Elizeu mbambvundza: “Kodi imwe musadziwa kuti lero Yahova anakwata mbuyanu toera akhonde kukhala pontho ntsogoleri wanu?” Penepo iye atawira: “Ine ndisapidziwa kale. Matamani.”
6 Eliya ampanga: “Ndaphata miyendo, sala pano, thangwi Yahova andituma toera ndiende ku Yordani.” Mbwenye iye alonga: “Ndiri kudumbira mu dzina ya Yahova Mulungu wa m’maso na mu dzina yanu kuti nee ndinakusiyani.” Natenepa, uwiri wawo apitiriza na ulendo. 7 Ana 50 a aprofeta aatowera, iwo alimira mbaayang’ana nakutali, mu ndzidzi wakuti Eliya na Elizeu akhadalimira dhuzi na Yordani. 8 Buluka penepo Eliya akwata nguwo yace,+ aifunya mbamenya nayo madzi. Penepo madzi agawika, awa kunkono wabzwere, anango kunkono wamadyo, natenepa uwiri wawo awambuka pa mataka akuuma.+
9 Pidawambuka iwo, Eliya apanga Elizeu: “Phemba cinafuna iwe toera ndikucitire mbandidzati kukwatwa.” Natenepa Elizeu alonga: “Ndaphata miyendo, ndipaseni makhundu mawiri+ a mphambvu ninga ziri na imwe.”+ 10 Iye atawira: “Waphemba cinthu cakunentsa kakamwe. Iwe ungandiona mu ndzidzi unafuna ine kukwatwa, pinadzacitika pidaphemba iwe; mbwenye ungakhonda kundiona, nee pinadzacitika.”
11 Mu ndzidzi ukhafamba iwo mbakacedza, mwakukhonda dikhira, ngolo ya nkhondo yakuoneka ninga moto yakuti ikhakweyiwa na makavalo akuoneka ninga moto,+ yapita pakati pawo mbiamwaza; penepo Eliya akwatwa na mphepo ikulu mbaenda kudzulu.*+ 12 Elizeu pidaona iye pyenepi akhuwa: “Mbuyanga, mbuyanga!* Onani ngolo ya nkhondo ya Izraeli na anyankhondo ace!”+ Mu ndzidzi wakuti iye nee akhakwanisabve kumuona, aphata nguwo zace mbazipandula.+ 13 Buluka penepo iye alokota nguwo+ idagwisa Eliya, abwerera mbaenda kalimira n’khundu mwa nkulo wa Yordani. 14 Penepo iye akwata nguwo idagwisa Eliya, amenya nayo madzi mbalonga: “Ali kupi Yahova Mulungu wa Eliya?” Pidamenya iye madzi, iwo agawika, awa kunkono wabzwere, anango kunkono wamadyo, natenepa Elizeu awambuka.+
15 Ana a aprofeta a ku Yeriko pidamuona iwo nakutali, alonga: “Cincino mphambvu za Eliya ziri na Elizeu.”+ Natenepa iwo aenda kaonana naye mbagodama pamaso pace. 16 Iwo ampanga: “Pakati pa atumiki anu pana amuna 50 amphambvu. Taphata miyendo, asiyeni aende kasake mbuyanu. Panango nzimu wa* Yahova wankwata, mbumponya paphiri inango, peno n’gowa.”+ Mbwenye iye alonga: “Lekani kuatuma.” 17 Natenepa iwo apitiriza kunkakamiza mpaka iye kukhala na manyadzo, mbaapanga: “Atumeni.” Iwo atuma amuna anewa 50, akuti apitiriza kunsaka mu ntsiku zitatu, mbwenye nee an’gumana. 18 Pidabwerera iwo ku Yeriko,+ kukakhala Elizeu, iye alonga: “Ine nee ndakupangani kuti lekani kuenda?”
19 Mukupita kwa ndzidzi amuna a mu nzinda apanga Elizeu: “Mbuyathu, imwe musaona kuti nzinda wathu uli pa mbuto yadidi;+ mbwenye madzi nee ali mwadidi, pontho mataka nkhabe kubala.”* 20 Penepo iye alonga: “Ikhani munyu mu mbale ing’ono ipswa, mbamuibweresa kuna ine.” Natenepa iwo aibweresa mbampasa. 21 Buluka penepo iye aenda padatoma kubuluka madzi anewa, aponya munyu m’madzi+ mbalonga: “Yahova alonga tenepa: ‘Ine ndacenesa madzi awa. Iwo nkhabe kudzaphabve anthu peno kucitisa akazi kukhonda kubala.’”* 22 Kutomera ntsiku ineyi mpaka lero, madzi adzakhala mwadidi mwakubverana na mafala adalonga Elizeu.
23 Iye abuluka kweneku mbaenda ku Bheteli. Pikhafamba iye n’njira aphale anango ang’ono abuluka mu nzinda mbatoma kunsingirira:+ “Iwe nyamphandza, buluka muno! Iwe nyamphandza, buluka muno!” 24 Pakumalisa, iye azungunuka kuna iwo mbaayang’ana, pontho aapasa dzedze mu dzina ya Yahova. Buluka penepo, maursu*+ mawiri abuluka mu nsitu mbakhatsula-khatsula aphale 42 mwa aphale anewa.+ 25 Iye apitiriza na ulendo wace mpaka Kuphiri ya Karmelo,+ pidabuluka iye kweneku abwerera ku Samariya.