Ezekiyeli
11 Nzimu wa Mulungu wandithukula mbundiendesa mpaka pansuwo ukulu wa templo ya Yahova, wa kukhundu yakumabulukiro a dzuwa.+ Pansuwo unoyu ine ndaona akulu-akulu a mbumba+ akukwana 25, iwo akhali na Yazaniya mwana wa Azuri pabodzi na Pelatiya mwana wa Bhenaya. 2 Penepo iye andipanga: “Iwe mwana wa munthu, awa ndi amuna anabverana toera kucita pinthu pyakuipa, pontho iwo asapereka uphungu wakuipa mu nzinda uno. 3 Iwo asalonga: ‘Uno ndi ndzidzi wakumanga nyumba.+ Nzinda* uno ndi cikalango,+ mbwenye ife ndife nyama.’
4 “Natenepa, iwe mwana wa munthu, longa maprofesiya thangwi ya iwo, longa maprofesiya.”+
5 Buluka penepo, nzimu wa Yahova wapita muna ine,+ pontho iye andipanga: “Longa kuti: ‘Ipi ndi pidalonga Yahova: “Imwe mbumba ya Izraeli, pinalonga imwe mphyandimomwene, pontho ine ndisadziwa pinanyerezera imwe. 6 Imwe mwaphesa anthu azinji mu nzinda uno, pontho miseu ya nzinda mwaidzadza na manungo a anthu akufa.”’”+ 7 “Natenepa, ipi ndi pidalonga Yahova, Mbuya Wankulu Kakamwe: ‘Manungo a anthu akufa adasiya imwe phwataku-phwataku mu nzinda ndi nyama, pontho nzinda uno ndi cikalango.+ Mbwenye imwe munadzabuluswa mu nzinda uno.’”
8 “‘Imwe musagopa supada,+ mbwenye ndi supada inafuna ine kubweresa kuna imwe,’ alonga Yahova, Mbuya Wankulu Kakamwe. 9 ‘Ine ndinadzakubulusani mu nzinda, mbandikuperekani mʼmanja mwa anthu a madziko anango, pontho ine ndinadzakutcunyusani.+ 10 Imwe munadzaphiwa na supada,+ pontho imwe munadzaphiwa mʼmadire a Izraeli,+ penepo imwe munadzadziwa kuti ine ndine Yahova.+ 11 Nzinda nee unadzakhala cikalango kuna imwe, pontho imwe nee munadzakhala nyama nkati mwa cikalango; ine ndinadzakutongani mʼmadire a Izraeli, 12 penepo imwe munadzadziwa kuti ine ndine Yahova. Thangwi imwe nee mwatoweza mitemo yanga, mbamukhonda kubvera matongero anga,+ mbwenye mwatoweza matongero a madzindza ali nʼkhundu mwanu.’”+
13 Pidamala ine kwene kulonga maprofesiya, Pelatiya mwana wa Bhenaya afa, penepo ine ndagodama, mbandikotamisa nsolo wanga mpaka pantsi, mbandikhuwa mwakugaluza: “Mama ine pano Yahova, Mbuya Wankulu Kakamwe! Kodi musafuna kupha anthu onsene adasalikira mu Izraeli?”+
14 Yahova alonga pontho na ine, mbandipanga: 15 “Iwe mwana wa munthu, anthu anakhala mu Yerusalemu apanga abale ako; inde, abale ako akuti ali na ufulu wakuombola dziko, pabodzi na mbumba yonsene ya Izraeli kuti: ‘Khalani kutali na Yahova. Dziko ino ndi yathu; ife taipaswa ninga unthaka.’ 16 Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “Maseze ine ndaaendesa kutali pakati pa madzindza anango, mbandiabalalisa mʼmadziko anango,+ mu ndzidzi wakucepa ine ndinadzakhala templo* kuna iwo mʼmadziko adaenda iwo.”’+
17 “Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “Ine ndinadzakugumanyani buluka kuna mbumba zinango na mʼmadziko adabalaliswa imwe, buluka penepo, ine ndinakupasani dziko ya Izraeli.+ 18 Iwo anadzabwerera kweneko, pontho anadzabulusa mwenemu pinthu pyawo pyonsene pyakunyanyasa na macitiro awo onsene akuipa.+ 19 Ine ndinadzacitisa kuti onsene akhale akuphatana,+ mbandiikha muna iwo mphambvu zipswa;+ pontho ndinadzabulusa+ ntima wawo wakuuma ninga mwala, mbandiapasa ntima wakufewa ninga nyama.*+ 20 Toera iwo atoweze mitemo yanga, akoye matongero anga mbaabvera. Natenepa, iwo anadzakhala mbumba yanga, pontho ine ndinadzakhala Mulungu wawo.”’
21 “‘“Mbwenye ale akuti mitima yawo isafuna kupitiriza kucita pinthu pyakuipa na pyakunyanyasa, ine ndinadzacitisa kuti iwo athabuke thangwi ya pinthu pyakuipa pidacita iwo,” alonga Yahova, Mbuya Wankulu Kakamwe.’”
22 Penepo akerubhi afuthula maphapido awo, maroda akhali dhuzi na iwo,+ pontho mbiri ya Mulungu wa Izraeli ikhali padzulu pawo.+ 23 Mbiri ya Yahova+ yabuluka mu nzinda mbilimira padzulu paphiri, kukhundu yakumabulukiro a dzuwa a nzinda.+ 24 Penepo nzimu wa Mulungu wandikwata mʼmasomphenya akhaoneswa ine na nzimu wa Mulungu, mbundiendesa kuna mbumba yakuti ikhali mu ubitcu ku Kaldheya. Buluka penepo, masomphenya akhaona ine amala. 25 Pontho ine ndatoma kupanga mbumba ikhali ku ubitcu pinthu pyonsene pidandionesa Yahova.