Ezekiyeli

36 “Iwe mwana wa munthu, longa profesiya iyi kuna mapiri a Izraeli: ‘Imwe mapiri a Izraeli, bveserani mafala a Yahova. 2 Ipi ndi pidalonga Yahova, Mbuya Wankulu Kakamwe: “Nyamalwa akusingirirani, mbalonga: ‘Aha, pyakoma! Na mapiri ene akale adzakhala athu!’”’+

3 “Natenepa, longa profesiya iyi: ‘Ipi ndi pidalonga Yahova, Mbuya Wankulu Kakamwe: “Nakuti iwo akufudzani, mbakuonesani nyatwa mʼmakhundu onsene, toera mukhale pinthu pya ale adapulumuka pakati pa madzindza anango, pontho nakuti anthu asapitiriza kulonga thangwi ya imwe na kukulongani mwakuipa,+ 4 natenepa, imwe mapiri a Izraeli, bveserani mafala a Yahova, Mbuya Wankulu Kakamwe! Ipi ndi pidalonga Yahova, Mbuya Wankulu Kakamwe kuna mapiri na nthunda, kuna mikulo na magowa, kuna madembe adasala akusowa anthu+ na mizinda idathawiwa, yakuti yatapatwa mbisingirirwa na anthu adapulumuka pakati pa madzindza ali nʼkhundu mwayo;+ 5 kuna ipyo, ipi ndi pidalonga Yahova, Mbuya Wankulu Kakamwe: ‘Ine ndinadzasandika mwakuipirwa kakamwe+ anthu adapulumuka pakati pa madzindza anango na dziko yonsene ya Edhomi, ale akuti mwakukomerwa kakamwe na mwakupwaza kakamwe+ asalonga kuti dziko yanga ndi yawo, toera akwate mbuto zace zakudyesera pifuyo, pontho toera aitapate.’”’+

6 “Natenepa, longa profesiya thangwi ya dziko ya Izraeli, pontho panga mapiri, nthunda, mikulo na magowa kuti: ‘Ipi ndi pidalonga Yahova, Mbuya Wankulu Kakamwe: “Bveserani! Ine ndinadzalonga mwakuipirwa kakamwe na mwaukali, thangwi ya kuthabuswa kudacitwa imwe na madzindza anango.”’+

7 “Na thangwi ineyi, ipi ndi pidalonga Yahova, Mbuya Wankulu Kakamwe: ‘Ine ndiri kuthukula manja anga mbandidumbira kuti madzindza anango anakhala cifupi na imwe anadzapasikambo manyadzo.+ 8 Mbwenye imwe mapiri a Izraeli, imwe munadzakhala na nthawi mbamubalira misapo mbumba yanga ya Izraeli,+ thangwi mwakukhonda dembuka, iwo anabwerera. 9 Thangwi ine ndiri na imwe, ine ndinadzatawirisa kuti mukhale pontho akutawirika kuna ine, imwe munadzalimwa mbamubzwalwa mbeu. 10 Ine ndinadzanjipisa mbumba yako, yakuti ndi dzindza yonsene ya Izraeli, inde, dzindza yonsene. Mizinda inadzakhala pontho na anthu,+ pinthu pyonsene pidafudzwa pinadzamangwa pontho.+ 11 Inde, ine ndi­nadzanjipisa mbumba yako na pifuyo pyako;+ ipyo pinadzathimizirika mbapikhala pizinji. Ndinadzakucitisani kuti ­mukhale na anthu ninga ­mwakale,+ pontho ndinadzakucitisani kuti mukhale mwadidi kakamwe kupiringana kale;+ natenepa, imwe munadzadziwa kuti ine ndine Yahova.+ 12 Ine ndinadzacitisa kuti anthu akuti ndi mbumba yanga ya Izraeli afambe muna imwe, iwo anadzakukwatani mbamukhala awo.+ Imwe munadzakhala unthaka wawo, anawo cipo anadzafa pontho thangwi ya imwe.’”+

13 “Ipi ndi pidalonga Yahova, Mbuya Wankulu Kakamwe: ‘Nakuti iwo asakupangani kuti: “Iwe ndiwe dziko yakuti isadya anthu, pontho usapha ana a madzindza ako,” 14 na thangwi ineyi, iwe nee unadzadyabve anthu, pontho nee unadzaphabve ana a madzindza ako,’ alonga Yahova, Mbuya Wankulu Kakamwe. 15 ‘Ine nee ndinadzatawirisabve kuti utikanwe na anthu a madzindza anango, pontho nee ndinatawirisa kuti upirire kutikanwa na anthu anango,+ iwe cipo unadzabweresa pontho nyatwa kuna madzindza ako,’ alonga Yahova, Mbuya Wankulu Kakamwe.”

16 Yahova alonga pontho na ine, mbandipanga: 17 “Iwe mwana wa munthu, mbumba ya Izraeli pikakhala iyo mu dziko yawo, iwo aipswipisa thangwi ya makhaliro awo na macitiro awo.+ Kuna ine, makhaliro awo akhali akukhonda cena ninga nkazi wakuti ali kumwezi.+ 18 Natenepa, ine ndapangiza ukali wanga kuna iwo thangwi ya anthu adapha iwo mu dziko ineyi,+ pontho thangwi ya kuipswipisa na madzimunthu awo akunyanyasa.*+ 19 Na thangwi ineyi, ine ndaamwaza mʼmadzindza anango, mbandiaabalalisa mʼmadziko anango.+ Ndaatonga mwakubverana na makhaliro awo, pontho na macitiro awo. 20 Mbwenye pidafika iwo kuna madzindza anewa, anthu apswipisa dzina yanga yakucena,+ mbalonga tenepa thangwi ya iwo: ‘Iyi ndi mbumba ya Yahova, mbwenye iwo abuluka mu dziko yace.’ 21 Na thangwi ineyi, ine ndinadzapangiza kuti ine ndisadzudzumika na dzina yanga yakucena, yakuti mbumba ya Izraeli aipswipisa mʼmadzindza anango adaenda iwo.”+

22 “Natenepa, panga mbumba ya Izraeli kuti: ‘Ipi ndi pidalonga Yahova, Mbuya Wankulu Kakamwe: “Imwe mbumba ya Izraeli, ine ndinadzakupulumusani, tayu thangwi ya imwe, mbwenye thangwi ya dzina yanga yakucena, idapswipisa imwe mʼmadzindza adaenda imwe.”’+ 23 ‘Mwandimomwene ine ndinadzacenesa dzina yanga ikulu,+ idapswipiswa pakati pa anthu a madzindza anango, yakuti imwe mwaipswipisa pakati pawo. Ine ndingadzaceneswa pakati panu pamaso pa anthu a madzindza anango; penepo, anthu a madzindza anango anadzadziwa kuti ine ndine Yahova,’+ alonga Yahova, Mbuya Wankulu Kakamwe. 24 Ine ndinakubulusani mʼmadzindza anango mbandikugumanyani buluka mʼmadziko onsene; buluka penepo, ine ndinadzakubwezani ku dziko yanu.+ 25 Ine ndinadzakuwazirani madzi akucena;+ natenepa, imwe munadzakhala akucena; ndinadzacenesa makhaliro anu akukhonda cena,+ pontho ndinadzabulusa madzimunthu anu onsene akunyanyasa.+ 26 Ine ndinadzakupasani ntima upswa+ mbandiikha muna imwe mphambvu zipswa.+ Ndinadzabulusa mʼmanungo mwanu ntima wakuuma ninga mwala,+ mbandikupasani ntima wakufewa ninga nyama.* 27 Ine ndinadzaikha nzimu wanga wakucena muna imwe, mbandicitisa kuti mutoweze mitemo yanga,+ pontho imwe munadzabvera matongero anga, mbamuatoweza. 28 Natenepa, imwe munadzakhala mu dziko idapasa ine ambuyanu, imwe munadzakhala mbumba yanga, pontho ine ndinadzakhala Mulungu wanu.’+

29 “‘Ine ndinadzakupulumusani mu pinthu pyanu pyonsene pyakukhonda cena. Ndinadzacitisa kuti pyakudya pibuluke kakamwe, pontho ine nee ndinadzabweresabve njala kuna imwe.+ 30 Ine ndinadzacitisa kuti miti ibale misapo mizinji, pyakudya pibuluke kakamwe mʼminda, toera mukhonde kupasika manyadzo pakati pa madzindza anango+ thangwi ya kuthabuka na njala. 31 Penepo imwe munadzakumbuka makhaliro anu akuipa na macitiro anu akuipa; imwe munadzapasika manyadzo thangwi ya mulando* wanu, pontho thangwi ya pinthu pyakunyanyasa pidacita imwe.+ 32 Ngakhale tenepo, dziwani kuti ine nee ndinadzacita pyenepi thangwi ya imwe,’+ alonga Yahova, Mbuya Wankulu Kakamwe. ‘Mbwenye imwe mbumba ya Izraeli, imwe musafunika kupasika manyadzo thangwi ya makhaliro anu.’

33 “Ipi ndi pidalonga Yahova, Mbuya Wankulu Kakamwe: ‘Pa ntsiku inafuna kukucenesani ine mulando wanu onsene, ndinadzacitisa kuti mizinda ikhale na anthu,+ nyumba zidafudzwa zinadzamangwa pontho.+ 34 Dziko idamala kufudzwa, yakuti anthu a­khapita na njira akhaiona ninga yamala kufudzwa, inadzalimwa pontho. 35 Anthu anadzalonga ku­ti: “Dziko yakuti ikhadamala kufudzwa yadzakhala ninga munda wa Edheni,+ pontho mizinda yakuti ikhadamala kufudzwa mbikhala yakusowa anthu, yakuti nyumba zace zikhadamala kugomolwa, cincino yazungulirwa na mipanda yakuwanga, pontho musakhala anthu.”+ 36 Anthu a madzindza anango anafuna kusalikira nʼkhundu mwanu anadzadziwa kuti ine Yahova, ndine adamanga pontho mbuto zikhadamala kufudzwa, mbanditceka miti mu dziko yakuti ikhali madembe. Ine Yahova ndine adapilonga, pontho ndine adapicita.’+

37 “Ipi ndi pidalonga Yahova, Mbuya Wankulu Kakamwe: ‘Kusiyapo pyenepi, ine ndinadzatawirisa kuti mbumba ya Izraeli indiphembe toera ndiacitire ipi: Ndinadzanjipisa mbumba yawo ninga nkumbi wa mabira. 38 Ninga mwinji wa anthu udaceneswa, ninga mwinji wa anthu a ku Yerusalemu mʼmaphwando awo,+ mizinda yakuti ikhali madembe inadzadzala pontho na misoka ya anthu;+ natenepa, iwo anadzadziwa kuti ine ndine Yahova.’”