Samweli Waciwiri
13 Abhisaloni mwana wa Dhavidhi akhali na mwanankaziace wakubalika kakamwe akhacemerwa Tamara,+ pontho Aminoni+ mwana unango wa Dhavidhi akhanfuna kakamwe. 2 Aminoni akhadzudzumika, thangwi akhafuna kakamwe mwanankaziace, Tamara. Nakuti Tamara akhali mwali, Aminoni akhaona kuti nee anakwanisa kucita naye pinafuna iye. 3 Aminoni akhali na xamwali wace akhacemerwa Yeonadhabhe,+ mwana wa Simeya,+ m’bale wace Dhavidhi; pontho Yeonadhabhe akhali wakucenjera kakamwe. 4 Natenepa iye ambvundza: “Thangwi yanji iwe mwana wa mambo ndzidzi onsene usakhala wakutsukwala? Ndipange.” Aminoni antawira: “Ndisafuna kakamwe Tamara, mwanankazi+ wa m’bale wanga Abhisaloni.” 5 Yeonadhabhe ampanga: “Gona patalimba pako, mbusangizira ninga waferuka. Babako angabwera kudzakuona mpange: ‘Ndaphata miyendo, tawirisani kuti mwanankazianga Tamara abwere kudzandipasa cakudya. Iye angaphika cakudya cinaphikirwa atenda,* ine ndinadzadya bulukira m’manja mwace.’”
6 Natenepa Aminoni agona mbasangizira ninga aferuka, pontho mambo aenda kamuona. Penepo Aminoni apanga mambo: “Ndaphata miyendo, tawirisani kuti mwanankazianga Tamara abwere kudzandicitira mikate miwiri yakulandana na ntima ine mbandikaona toera ndidye mikate ineyi bulukira m’manja mwace.” 7 Penepo Dhavidhi atumiza mphangwa izi kuna Tamara wakuti akhali panyumba: “Ndaphata miyendo, ndoko kunyumba kwa m’bale wako Aminoni toera ukam’phikire cakudya.”* 8 Natenepa Tamara aenda kunyumba kwa m’bale wace Aminoni, wakuti akhagona. Iye akwata ufa, aumunya, asasanya mikate mbaiphika Aminoni mbakaona. 9 Buluka penepo akwata mikate mbaipereka kuna Aminoni. Mbwenye iye akhonda kudya, mbalonga: “Panga anthu onsene toera abuluke muno!” Natenepa anthu onsene abuluka.
10 Aminoni apanga Tamara: “Bweresa cakudya* nkwartu mwanga, toera ine ndicidyere m’manja mwako.” Penepo Tamara akwata mikate yakulandana na ntima idacita iye mbaenda nayo nkwartu mwa m’bale wace Aminoni. 11 Tamara pidaenda iye kampasa mikate toera adye, Aminoni am’phata mbampanga: “Mwanankazianga, pita m’mabonde na ine.” 12 Mbwenye iye ampanga: “Nkhabe m’bale wanga! Leka kundipasa manyadzo, thangwi pinthu pyenepi nkhabe kucitwa mu Izraeli.+ Leka kucita pinthu pyenepi pyakupasa manyadzo.+ 13 Ndinayang’ana tani anthu thangwi ya pinthu pyenepi pyakupasa manyadzo? Pontho iwe unadzakhala m’bodzi wa amuna akupwazwa mu Izraeli. Ndaphata miyendo, longa na mambo, thangwi iye nee anakhonda kundipereka kuna iwe.” 14 Mbwenye Aminoni nee abvera pidalonga Tamara. Nakuti iye akhali na mphambvu kakamwe, ankunda mbapita naye m’mabonde. 15 Buluka penepo Aminoni atoma kumuida kakamwe, iye akhamuida kakamwe kupiringana ufuni ukhali na iye pakutoma. Aminoni ampanga: “Lamuka, buluka pano!” 16 Penepo iye atawira: “Nkhabe m’bale wanga, thangwi kundithamangisa ndi kwakuipa kakamwe kupiringana pidandicita iwe!” Mbwenye Aminoni nee ambvera.
17 Natenepa iye acemera nyabasa wace mbampanga: “Bulusa munthu uyu pamaso panga, pontho iye angabuluka funga nsuwo.” 18 (Tamara akhadabvala tunika yakupambulika,* thangwi ana akazi a mambo akuti akhali amiyali akhabvala ntundu unoyu wa nguwo.) Natenepa nyabasa wa Aminoni am’bulusa kunja mbafunga nsuwo. 19 Penepo Tamara aikha dotha munsolo mwace,+ mbapandula tunika yadidi ikhadabvala iye; aikha manjace pa nsolo, mbaenda na kulira.
20 Buluka penepo Abhisaloni+ abvundza: “Adakucita pyenepi ndi m’bale wako Aminoni? Mwanankazianga, leka kupanga munthu. Iye ndi m’bale wako.+ Leka nentseka thangwi ya pyenepi.” Natenepa Tamara akhala panyumba pa m’bale wace Abhisaloni, pontho iye nee akhaonana na anthu. 21 Mambo Dhavidhi pidabva iye pinthu pyenepi pyonsene, aipirwa kakamwe.+ Mbwenye nee akhafuna kutsukwalisa mwanace anacemerwa Aminoni, thangwi akhanfuna, pontho akhali mwanace wakutoma.* 22 Abhisaloni nee alonga cinthu kuna Aminoni, nee cadidi nee cakuipa; Abhisaloni akhaida+ Aminoni thangwi iye akhadapasisa manyadzo mwanankaziace, Tamara.+
23 Pidapita pyaka piwiri, anyakukwedza maweya a mabira a Abhisaloni akhali ku Bhaale-Azori dhuzi na Efraimu,+ pontho Abhisaloni acemeresa ana onsene amuna a mambo.+ 24 Natenepa Abhisaloni aenda kuna mambo mbampanga: “Ine ntumiki wanu ndiri kukwedza maweya a mabira. Ndaphata miyendo mambo, tendeni na ine pabodzi na atumiki anu.” 25 Mbwenye mambo apanga Abhisaloni: “Nkhabe mwananga, tonsene tingaenda tinakhala ninga ntolo kuna iwe.” Maseze Abhisaloni apitiriza kun’dembetera, iye akhonda kuenda, basi ene ampasa nkhombo. 26 Penepo Abhisaloni alonga: “Imwe mungakhonda kuenda, tawirisani kuti m’bale wanga Aminoni aende na ife.”+ Mambo ambvundza: “Thangwi yanji iye asafunika kuenda na iwe?” 27 Mbwenye Abhisaloni ankakamiza, na thangwi ineyi, iye atawirisa kuti Aminoni na ana onsene amuna a mambo aende na Abhisaloni.
28 Buluka penepo Abhisaloni apanga anyabasa ace: “Onani mwadidi Aminoni, ntima wace ungatsandzaya na vinyu, penepo ine ndinakupangani toera mumuphe. Lekani kugopa thangwi anakupangani ndine. Khalani amphambvu na acipapo.” 29 Natenepa anyabasa a Abhisaloni acita kuna Aminoni mwakubverana na pidapangwa iwo na Abhisaloni. Penepo ana anango onsene a mambo alamuka, akwira maburu awo mbathawa. 30 Pikhali iwo n’njira, Dhavidhi apangwa kuti: “Abhisaloni apha ana onsene amuna a mambo, nkhabepo adapulumuka.” 31 Penepo mambo alamuka, apandula nguwo zace, mbagona pantsi. Pontho atumiki onsene a mambo akuti akhali penepo, apandulambo nguwo zawo.
32 Mbwenye Yeonadhabhe+ mwana wa Simeya,+ m’bale wace Dhavidhi alonga: “Mbuyanga, lekani kunyerezera kuti ana amuna onsene a mambo aphiwa, basi ene ndi Aminoni adafa.+ Ndi Abhisaloni adacitisa kuti iye aphiwe, iye akhanyerezera kucita pyenepi+ kutomera pa ntsiku idapita m’mabonde Aminoni na mwanankaziace,+ Tamara.+ 33 Natenepa mbuyanga mambo, lekani kubvesera* pinalonga anthu kuti ana onsene a mambo afa; adafa ndi Aminoni basi.”
34 Mu ndzidzi unoyu, Abhisaloni akhadathawa.+ Buluka penepo nyakuonera nzinda aona anthu azinji mbakabwera mu nseu wakuti ukhali n’khundu mwa phiri. 35 Penepo Yeonadhabhe+ apanga mambo: “Onani, ana a mambo akubwera. Pyenepi pyacitika mwakubverana na pidalonga ntumiki wanu.” 36 Pidamalisa iye kulonga, ana a mambo apita mbakalira mwakugaluza; mambo pabodzi na atumiki ace onsene atomambo kulira kakamwe. 37 Mbwenye Abhisaloni athawa, mbaenda kuna Talimai+ mambo wa ku Jesuri, mwana wa Amiyudhi. Dhavidhi alira mwanace mu ntsiku zizinji. 38 Pidathawa Abhisaloni mbaenda ku Jesuri,+ akhala kweneko pyaka pitatu.
39 Pakumalisa, Mambo Dhavidhi akhafuna kakamwe kuenda kaona Abhisaloni, nakuti kutsukwala kwace thangwi yakufa kwa Aminoni kukhadapunguka.