Masomphenya Adaoneswa Juwau
19 Buluka penepo, ndabva fala yakugaluza ninga ya mwinji ukulu wa anthu kudzulu. Iyo ikhalonga: “Simbani Yahova!*+ Cipulumuso, mbiri na mphambvu mphya Mulungu wathu, 2 thangwi kutonga kwace ndi kwakunyindirika* na kwandimomwene.+ Thangwi iye atonga puta wankulu, wakuti akhaipisa dziko yapantsi na ulukwali* wace, pontho iye atcunyusa nkazi unoyu thangwi ya ciropa ca atumiki Ace cidacucisa iye.*+ 3 Penepo pene iwo alonga pontho kaciwiri: “Simbani Yahova!*+ Pontho utci wa kupya kwace unapitiriza kubuluka kwenda na kwenda.”+
4 Akulu a mpingo 24+ na aanju anai agodama mbalambira Mulungu+ wakuti akhala pa mpando waumambo, mbalonga: “Ameni! Simbani Yahova!”*+
5 Pontho, yabuluka fala pa mpando waumambo, mbilonga: “Simbani Mulungu wathu, imwe atumiki ace onsene,+ akuti musanʼgopa, akulu na angʼono ene.”+
6 Penepo ine ndabva fala ninga ya mwinji ukulu wa anthu, ikhabveka ninga kutitima kwa madzi mazinji, pontho ninga kudhima kwa njazi za mphambvu. Iwo akhalonga: “Simbani Yahova,*+ thangwi Yahova* Mulungu wathu Wamphambvu Zonsene+ atoma kutonga!+ 7 Tendeni tikomerwe mbatitsandzaya kakamwe, pontho timpase mbiri, thangwi wafika ndzidzi wakumanga banja kwa Mwanabira, pontho mankhadzi* wace amala kukhunganyika. 8 Inde, iye atawiriswa kubvala nguwo zadidi kakamwe, zakuyetimira na zakucena, thangwi nguwo zadidi kakamwe zisaimirira macitiro akulungama a anthu akucena.”+
9 Iye andipanga: “Lemba: Anyakutsandzaya ndi ale adacemerwa kuphwando yakumanga banja ya Mwanabira.”+ Pontho iye andipanga: “Awa ndi mafala andimomwene a Mulungu.” 10 Penepo pene ine ndagodama patsogolo pace, toera kumulambira. Mbwenye iye andipanga: “Cita mphole-mphole! Leka kucita pyenepi!+ Inembo ndine bitcu ninga iwe na abale ako, akuti ali na basa yakupereka umboni unalonga pya Yezu.+ Lambira Mulungu!+ Thangwi kupereka umboni unalonga pya Yezu ndi cifuniro ca maprofesiya.”+
11 Ine ndaona kudzulu kwafunguka, penepo yaoneka kavalo yakucena.+ Ule adakwira kavalo ineyi asacemerwa Wakukhulupirika+ na Wandimomwene,+ pontho iye asatonga, mbamenya nkhondo mwakulungama.+ 12 Maso ace ndi ninga malirimi a moto,+ pontho munsolo mwace muli na nthimba zizinji.* Iye ali na dzina idalembwa, yakuti nkhabe unango anaidziwa, kusiyapo iye basi, 13 iye abvala nguwo idakhwazika* ciropa, pontho iye asacemerwa Fala+ ya Mulungu. 14 Kusiyapo pyenepi, anyankhondo kudzulu akhantowera pa makavalo akucena, iwo akhadabvala nguwo zadidi kakamwe, zakuyetimira na zakucena. 15 Pamulomo pace pakhali na supada yakulapha,+ yakutwa, toera kufudza nayo madzindza a anthu. Iye anadzaakumbiza* na ndodo ya utale.+ Kusiyapo pyenepi, iye asaponda mbuto yakukamulira mauva ya ukali wa Mulungu Wamphambvu Zonsene.+ 16 Pa nguwo yace, inde, pa ntcafu yace, palembwa dzina: Mambo wa amambo na Mbuya wa ambuya.+
17 Ine ndaonambo anju mʼbodzi akhali dzololo pa dzuwa, iye akhuwa mwakugaluza, mbapanga mbalame zonsene zinamburuka kudzulu: “Bwerani kuno, gumanyikanani pa phwando ikulu ya Mulungu,+ 18 toera mudye manungo a amambo, manungo a akadamu a anyankhondo, manungo a amuna akuwanga,+ nyama za makavalo, manungo a anyamakavalo,+ manungo a onsene, anthu aufulu, mabitcu, akulu na angʼono ene.”
19 Ine ndaona cikala, amambo a pa dziko yapantsi na misoka ya anyankhondo awo, agumanyikana toera kumenya nkhondo na ule adakhala pa kavalo pabodzi na anyankhondo ace.+ 20 Cikala caphatwa pabodzi na mprofeta wauthambi,+ ule akhacita pirengo pamaso pa cikala, mbanyengeza napyo ale adaikhwa cidzindikiro ca cikala+ na ale akhalambira dzimunthu ya cikala.+ Mbaciri mʼmaso, uwiri wawo aponywa nʼdjenje yakugaka moto na enxofre.*+ 21 Mbwenye anango aphiwa na supada yakulapha ikhali pamulomo wa ule adakwira pa kavalo.+ Mbalame zonsene zakhuta na manungo a anthu anewa.+