Tsamba Kuna Akristu a ku Kolose
1 Ine Paulu, mpostolo wa Kristu Yezu mwakubverana na pinafuna Mulungu, pabodzi na mʼbale wathu Timoti,+ 2 ndiri kulembera anthu akucena na abale akukhulupirika akuti ali akuphatana na Kristu ku Kolose:
Mulungu Babathu mbapangize kukoma ntima kukulu kuna imwe, pontho akupaseni ntendere.
3 Ndzidzi onsene ife tisapereka takhuta kuna Mulungu, Baba wa Mbuyathu Yezu Kristu tingacita phembero thangwi ya imwe, 4 thangwi ife tabva kulonga pya cikhulupiro canu mwa Kristu Yezu na ufuni unapangiza imwe kuna anthu akucena onsene, 5 thangwi ya cidikhiro cinakoyerwa imwe kudzulu.+ Imwe mwabva kale pya cidikhiro ceneci kubulukira mu mphangwa za undimomwene, zakuti ndi mphangwa zadidi 6 zidafika kuna imwe. Mphangwa zadidi zenezi ziri kubala misapo mbazithimizirika pa dziko yonsene.+ Pyenepi piri kucitikambo pakati panu kubulukira pa ntsiku idabva imwe mbamudziwa mwadidi undimomwene wa kukoma ntima kukulu kwa Mulungu. 7 Imwe mwapfundza pyenepi kubulukira kuna Epafra,+ nyabasa ndzathu wakufunika, wakuti ndi ntumiki wakukhulupirika wa Kristu, anatumikira pa mbuto yathu. 8 Iye atidziwisambo pya ufuni unapangiza imwe na ciphedzo ca nzimu wa Mulungu.
9 Na thangwi ineyi, kutomera pa ntsiku idabva ife pyenepi, ife cipo tasiya kuphembera thangwi ya imwe+ mbatiphemba toera mudzale na cidziwiso candimomwene+ ca cifuno cace, na udziwisi onsene; pontho mubvesese pinthu pyauzimu,+ 10 toera mufambe mwakuthema ninga munafunira Yahova,* na cifuno cakunkomeresa kakamwe mu ndzidzi unapitiriza imwe kubala misapo mʼmabasa adidi onsene, mbamuthimizira cidziwiso canu candimomwene thangwi ya Mulungu.+ 11 Tisaphembambo toera imwe muwangiswe na mphambvu zonsene, mwakubverana na mphambvu za mbiri yace,+ toera mukwanise kupirira mwadidi, mwakukhurudzika na mwakukomerwa, 12 mu ndzidzi unapereka imwe takhuta kuna Baba, adakuphedzani kuti mukhale akuthema toera mutambirembo unthaka wa anthu akucena+ akuti ali mu ceza.
13 Iye atiombola mu mphambvu za cidima,+ mbatiendesa mu umambo wa Mwanace wakufunika, 14 wakuti mwa iye, ife tasudzulwa kubulukira mu ciomboli, pyenepi pisabveka kulekererwa madawo athu.+ 15 Iye ndi cipangizo* ca Mulungu wakukhonda kuoneka,+ mwana wautombo* mu pinthu pyonsene pidacitwa;+ 16 thangwi kubulukira mwa iye pyacitwa pinthu pyonsene kudzulu na pa dziko yapantsi, pinthu pyakuoneka na pyakukhonda kuoneka,+ mipando yaumambo, atsogoleri, mphambvu za utongi na mautongi. Pinthu pinango pyonsene pyacitwa kubulukira mwa iye,+ pontho pyacitirwa iye. 17 Kusiyapo pyenepi, iye akhalipo mbapidzati kucitwa pinthu pyonsene,+ pontho kubulukira mwa iye pyacitwa pinthu pinango pyonsene; 18 iyembo ndi nsolo wa manungo, akuti ndi mpingo.+ Iye ndi wakutoma, mwana wautombo wakuti ndi adatoma kulamuswa muli akufa,+ toera akhale wakutoma mu pinthu pyonsene; 19 thangwi Mulungu akomerwa kuti pinthu pyonsene pikhale pyakukwana muna iye,+ 20 toera kubulukira mwa iye, pinthu pyonsene+ piri kudzulu na pa dziko yapantsi pikhale pontho mwakuphatana na Mulungu, mbakhazikisa ntendere kubulukira mu ciropa+ cace cidacololeka pamuti wakusikimizira.*
21 Mwandimomwene, imwe akuti kale mukhali kutali na Mulungu, imwe mukhali anyamalwa ace thangwi mukhaikha manyerezero anu mʼmabasa akuipa, 22 cincino iye akhazikisa pontho ntendere na imwe thangwi yakuphatisira manungo a ule adaperekeka toera kufa, toera iye akuoneni ninga anthu akucena, akusowa midonthi na akusowa mulando pamaso pace,+ 23 iye anadzacitadi pyenepi mungapitiriza mu cikhulupiro,+ mbamukhazikika padamangirirwa cikhulupiro canu,+ mukhale akuwanga,+ mbamukhonda kupeuswa pa cidikhiro ca mphangwa zadidi zidabva imwe, zakuti zamwazwa kuna anthu onsene pa dziko yapantsi.*+ Ine Paulu, ndadzakhala ntumiki wa mphangwa zadidi zenezi.+
24 Cincino ine ndisakomerwa na nyatwa zinaona ine thangwi ya imwe,+ ine ndiri kupirira mʼmanungo mwanga pire pidasalikira pa nyatwa za Kristu toera kuphedza manungo ace,+ akuti ndi mpingo.+ 25 Ine ndadzakhala ntumiki wa mpingo unoyu mwakubverana na basa idapaswa ine+ na Mulungu, yakumwaza mwakukwana mafala a Mulungu toera kukuphedzani. 26 Mafala anewa ndi cibisobiso cakucena+ cakuti cikhali cakubisika kubulukira mʼmidzidzi yakale+ na kuna anthu a mʼmidzidzi yakale. Mbwenye cincino ico cisapangizwa kuna anthu ace akucena,+ 27 akuti Mulungu akomerwa kuadziwisa mbiri ya mpfuma za cibisobiso ceneci cakucena pakati pa anthu a madzindza anango. Cibisobiso ceneci cakucena+ ndi Kristu wakuti ali wakuphatana na imwe, pyenepi pisabveka kuti imwe muli na cidikhiro cakupaswa mbiri pabodzi na iye.+ 28 Ife tisamwaza mphangwa thangwi ya iye, pontho na udziwisi onsene ife tisacenjeza anthu onsene mbatipfundzisa anthu onsene, toera tipereke anthu onsene kuna Mulungu ninga akukola mwauzimu mwakuphatana na Kristu.+ 29 Na cifuno ceneci, mwandimomwene ine ndisaphata basa mwakuwanga, mbandiwangisira na mphambvu zace, zakuti ziri kuphata basa muna ine.+