Atongi
11 Yefite+ wa ku Jiliyadhi akhali nyankhondo wamphambvu; mai wace akhali puta, pontho babace akhali Jiliyadhi. 2 Mbwenye nkazi wa Jiliyadhi abalambo naye ana. Pidakula ana anewa, iwo athamangisa Yefite mbampanga: “Iwe nee unatambira unthaka wa babathu thangwi ndiwe mwana wa nkazi unango.” 3 Natenepa Yefite athawa abale ace mbaenda kakhala ku dziko ya Tobhi. Pontho amuna akusowa basa agumanyikana na Yefite, mbaenda pabodzi na iye kamenyana na anyamalwa awo.
4 Pidapita ndzidzi ungasi, Aamoni amenyana na Aizraeli.+ 5 Pikhamenyana Aamoni na Aizraeli, akulu a ku Jiliyadhi aenda mwakucimbiza kakwata Yefite ku dziko ya Tobhi. 6 Iwo apanga Yefite: “Bwera udzakhale ntsogoleri wathu wa nkhondo toera tikwanise kumenyana na Aamoni.” 7 Mbwenye Yefite apanga akulu a ku Jiliyadhi: “Simwe tayu adandiida mbamundithamangisa panyumba pa babanga?+ Mphapo thangwi yanji lero mukubwera kuna ine pinaona imwe nyatwa?” 8 Penepo akulu a ku Jiliyadhi apanga Yefite: “Ndimomwene, mbwenye lero tabwera kuna iwe. Ungaenda pabodzi na ife mbatimenyana na Aamoni, iwe unadzakhala ntsogoleri wa anthu onsene a ku Jiliyadhi.”+ 9 Natenepa Yefite apanga akulu a ku Jiliyadhi: “Mungandikwata mbatienda kamenyana na Aamoni, pontho Yahova mbandiphedza toera kuakunda, penepo ndinadzakhala ntsogoleri wanu!” 10 Akulu a ku Jiliyadhi apanga Yefite: “Yahova mbakhale mboni pakati pa iwe na ife, pontho iye mbatitonge tingakhonda kucita pidakupanga ife.” 11 Natenepa Yefite aenda pabodzi na akulu a ku Jiliyadhi, pontho anthu anʼkhazikisa ninga ntsogoleri wawo na ntsogoleri wa anyankhondo. Pontho Yefite abwerezera mafalace onsene kuna Yahova ku Mispa.+
12 Buluka penepo, Yefite atuma anthu toera kapanga mambo wa Aamoni+ kuti: “Thangwi yanji musafuna kubwera kudzamenyana na ine mu dziko yanga?” 13 Natenepa mambo wa Aamoni apanga anthu adatuma Yefite: “Ndi thangwi yakuti Aizraeli akwata dziko yanga pikhabuluka iwo ku Ejitu,+ kutomera Arnoni,+ Yaboki, mpaka ku Yordani.+ Cincino ndibwezereni muntendere.” 14 Mbwenye Yefite atuma pontho anthu toera aende kuna mambo wa Aamoni 15 kuti ampange:
“Yefite alonga tenepa: ‘Aizraeli nee akwata dziko ya Amoabhe,+ nee dziko ya Aamoni,+ 16 thangwi pikhabuluka iwo ku Ejitu, Aizraeli apita na nʼthando mpaka ku Bara Yakufuira+ mbafika ku Kadhesi.+ 17 Buluka penepo Aizraeli atuma anthu toera akapange mambo wa ku Edhomi+ kuti: “Taphata miyendo, titawiriseni toera tipite na mu dziko mwanu,” mbwenye mambo wa ku Edhomi nee aatawirisa. Iwo atumizambo mphangwa kuna mambo wa ku Moabhe,+ mbwenye iye nee aatawirisambo. Natenepa Aizraeli apitiriza kukhala ku Kadhesi.+ 18 Pikhafamba iwo nʼthando, apita na nʼkhundu mwa dziko ya Edhomi+ na Moabhe. Iwo apita na kumabulukiro a dzuwa a dziko ya Moabhe+ mbamanga misasa mucisa ca Arnoni; iwo nee apita mu dziko ya Moabhe,+ thangwi cisa ca Arnoni cikhali madire a Moabhe.
19 “‘Buluka penepo, Aizraeli atuma anthu kuna Sihoni mambo wa Aamori, wakuti akhatonga ku Esibhoni. Iwo ampanga: “Taphata miyendo, titawiriseni tipite na mu dziko mwanu toera tifike kunaenda ife.”+ 20 Mbwenye Sihoni nee anyindira Aizraeli, pontho nee aatawirisa toera apite na mu dziko mwace. Natenepa Sihoni agumanyiza mbumba yace yonsene mbamanga misasa ku Yaazi toera kumenyana na Aizraeli.+ 21 Na thangwi ineyi, Yahova Mulungu wa Izraeli apereka Sihoni na mbumba yace yonsene mʼmanja mwa Aizraeli, natenepa Aizraeli aakunda mbakwata khundu yonsene ya dziko ikakhala Aamori.+ 22 Munjira ineyi, iwo akwata dziko yonsene ya Aamori kutomera ku Arnoni mpaka ku Yaboki, pontho kutomera kuthando mpaka ku Yordani.+
23 “‘Ndi Yahova Mulungu wa Izraeli adathamangisa Aamori pamaso pa mbumba yace, Izraeli,+ mphapo imwe musafuna kuathamangisa? 24 Kodi imwe nee mwakwata pinthu pidakupasani mulungu wanu Kemosi?+ Natenepa anthu ale adathamangisa Yahova Mulungu wathu pakati pathu ndiwo anafuna ife kuthamangisa.+ 25 Kodi imwe ndimwe wakufunika kakamwe kupiringana Bhalaki+ mwana wa Zipori, mambo wa Moabhe? Iye athimbana kale na Aizraeli peno kumenyana nawo? 26 Pikakhala Aizraeli ku Esibhoni na pisa pya cifupi na kweneku,+ ku Aroeri na pisa pya cifupi na kweneku na mizinda yonsene ikhali nʼkhundu mwa Arnoni mu pyaka 300, thangwi yanji nee mwayesera kukwata dziko yanu mu ndzidzi unoyu?+ 27 Ine nee ndakudawirani, mbwenye anadawa ndimwe thangwi ya kumenyana na ine. Lero, Yahova mbakhale Nyakutonga Miseru+ pakati pa mbumba ya Izraeli na mbumba ya Amoni.’”
28 Mbwenye mambo wa Aamoni nee abvera mphangwa zidatumizirwa iye na Yefite.
29 Nzimu wa Yahova wabwera kuna Yefite,+ iye apita na ku Jiliyadhi, cisa ca Manase toera kuenda ku Mispe wa ku Jiliyadhi.+ Pidabuluka iye ku Mispe wa ku Jiliyadhi afika kuna Aamoni.
30 Buluka penepo, Yefite apikira+ kuna Yahova kuti: “Mungapereka Aamoni mʼmanja mwanga, 31 mbandibwerera mwadidi buluka kuna Aamoni, munthu anafuna kubuluka pansuwo wa nyumba yanga toera kudzanditambira anadzakhala wanu Yahova,+ pontho ndinadzampereka ninga ntsembe yakupiswa.”+
32 Natenepa Yefite aenda kamenyana na Aamoni, pontho Yahova aapereka mʼmanja mwace. 33 Iye apha azinji kakamwe kutomera ku Aroeri mpaka ku Miniti, mizinda 20, pontho mpaka ku Abheli-Kerami. Natenepa Aamoni akundwa pamaso pa Aizraeli.
34 Buluka penepo, Yefite abwerera kunyumba kwace ku Mispa,+ penepo mwanace wankazi abwera kudzantambira mbakaimba pandero na kubvina! Mwanace akhali unoyu basi. Kusiyapo iye, nee akhali na mwana unango wamamuna peno wankazi. 35 Pidamuona iye, Yefite apandula nguwo zace mbalonga: “Mama ine mwananga! Iwe wanditsukwalisa kakamwe, thangwi wadzakhala ule anathamangisa ine. Ine ndapikira kuna Yahova, pontho ndisafunika kucita pidapikira ine.”+
36 Mbwenye mwanace ampanga: “Baba, khala mwapikira kuna Yahova, citani kuna ine mwakubverana na pidapikira imwe,+ thangwi Yahova akuphedzani toera kukunda anyamalwa anu, Aamoni.” 37 Buluka penepo iye apanga babace: “Mbwenye ndisaphemba cinthu cibodzi: Nditawiriseni ndikhale ndekhene miyezi miwiri toera ndiende na andzanga ku mapiri, kalira umwali wanga.”*
38 Natenepa Yefite antawira: “Ndoko!” Penepo iye antawirisa toera kuenda kamala miyezi miwiri ku mapiri pabodzi na andzace toera kulira umwali wace. 39 Pidamala miyezi miwiri, iye abwerera kuna babace, buluka penepo babace akwanirisa pikiro ikhadacita iye.+ Ntsikana unoyu cipo apita mʼmabonde na mamuna. Pontho mu Izraeli mwadzaoneka nsambo* uyu: 40 Pyaka pyonsene, atsikana a mu Izraeli akhaenda kasimba mwana wa Yefite wa ku Jiliyadhi, kanai pa caka.