Dhanyeli
10 Mu caka cacitatu ca Siro Mambo+ wa ku Persya, Dhanyeli wakuti akhacemerwa Bheltisezari+ atambira mphangwa zakubuluka kuna Mulungu. Mphangwa zenezi zikhali zandimomwene, pontho zikhalonga thangwi ya nkhondo ikulu. Dhanyeli abvesesa mphangwa zidapangwa iye na pinthu pidaona iye.
2 Mu ntsiku zenezi, ine Dhanyeli ndalira+ mʼmasumana matatu amumphu. 3 Mʼmasumana anewa matatu, ine nee ndadya cakudya cadidi, nee ndadya nyama, nee ndamwa vinyu peno kudzola mafuta. 4 Pa ntsiku 24 ya mwezi wakutoma, mu ndzidzi ukhali ine nʼkhundu mwa nkulo ukulu wa Tigre,*+ 5 ine ndayangʼana mbindiona munthu wakuti akhadabvala nguwo za linyu,+ pontho ncunu mwace akhadabvala sintu ya ouro ya ku Ufazi. 6 Manungo ace akhali ninga mwala wa krizolito,+ nkhope yace ikhacetuma ninga njazi, maso ace akhali ninga ntsakali za moto,* mikono yace na miyendo yace ikhayetimira ninga nkuwa,+ pontho fala yace ikhabveka ninga mwinji wa anthu. 7 Ndine basi Dhanyeli adaona masomphenya anewa, mbwenye anthu akakhala na ine nee aona masomphenya anewa.+ Natenepa iwo agopa kakamwe, pontho athawa mbaenda kabisala.
8 Natenepa ine ndasala ndekha, pontho pidaona ine masomphenya anewa makulu nee ndakhalabve na mphambvu, nkhope yanga ikhadacinja kakamwe, mphambvu zanga mbizimaliratu.+ 9 Buluka penepo ndabva iye mbakalonga; mbwenye mu ndzidzi ukhabvesera ine pikhalonga iye, ndaphatwa na citulo cikulu kakamwe mbandigona na pfufu ya mimba.+ 10 Penepo djanja yandiphata+ mbinditekenyesa pangʼono-pangʼono toera kundilamusa. Natenepa ine ndalamuka mbandigodama, mbandiphata pantsi na manja anga. 11 Adzamale iye andipanga:
“Iwe Dhanyeli, munthu wakufunika kakamwe,+ bvesera pinafuna kukupanga ine. Limira, thangwi ine ndatumwa toera kulonga na iwe.”
Pidandipanga iye pyenepi, ine ndalimira, mbwenye ndikhatetemera.
12 Buluka penepo iye andipanga: “Iwe Dhanyeli, leka kugopa.+ Kutomera pa ntsiku ikhafuna iwe kubvesesa mabvekero a pinthu pyenepi, pontho mbukhala wakucepeseka pamaso pa Mulungu wako, phembero yako yabviwa,+ pontho ine ndabwera thangwi ya pyenepi. 13 Mbwenye ntsogoleri+ wa umambo wa Persya andipingiza mu ntsiku 21. Natenepa Migeli,*+ mʼbodzi wa atsogoleri akufunika kakamwe abwera kudzandiphedza; pontho ine ndapitiriza penepo na amambo a ku Persya. 14 Ine ndabwera toera kudzakuphedza kubvesesa pinafuna kucitikira mbumba yako kunkhomo kwa ntsiku zakumalisa,+ thangwi masomphenya anewa asalonga thangwi ya pinthu pinafuna kucitika ntsogolo.”+
15 Mu ndzidzi ukhandipanga iye mafala anewa, ine ndakotamisa nkhope yanga pantsi, mbandicimwana kulonga. 16 Buluka penepo, ule akhaoneka ninga munthu akhuya mulomo wanga,+ pontho ine ndafungula mulomo wanga mbanditoma kulonga na ule akhadalimira patsogolo panga kuti: “Mbuyanga, ine ndikutetemera thangwi ya masomphenya adaona ine, pontho nkhabebve mphambvu.+ 17 Cincino ine nkhabe mphambvu, pontho nee ndikukwanisa kupuma mwadidi,+ mphapo ndinakwanisa tani ine ntumiki wanu kulonga na imwe mbuyanga?”+
18 Ule akhaoneka ninga munthu andiphata pontho mbandicitisa kukhala na mphambvu.+ 19 Penepo iye alonga: “Leka kugopa+ iwe munthu wakufunika kakamwe.+ Ntendere mbukhale na iwe.+ Khala wamphambvu, inde, khala wamphambvu.” Mu ndzidzi ukhalonga iye na ine, ndakhala na mphambvu mbandilonga: “Longani mbuyanga, thangwi imwe mwandicitisa kukhala na mphambvu.”
20 Penepo iye alonga: “Usadziwa thangwi yanji ndabwera kuna iwe? Cincino ndiri kuenda kamenyana na ntsogoleri wa ku Persya.+ Ndingabuluka, anafika ntsogoleri wa ku Gresya. 21 Mbwenye ine ndinakupanga pinthu pidalembwa mʼbukhu ya undimomwene. Nkhabepo unango anandiphedza kakamwe mu pinthu pyenepi, kusiyapo ntsogoleri wanu+ Migeli.+