Samweli Waciwiri
11 Pakutoma kwa caka,* mu ndzidzi ukhaenda amambo kunkhondo, Dhavidhi atuma Yoabhe, atumiki ace pabodzi na nsoka onsene wa anyankhondo a Izraeli toera akafudze Aamoni, pontho iwo azungulira nzinda wa Rabha.+ Mbwenye Dhavidhi akhadasala ku Yerusalemu.+
2 Ntsiku inango namaulo,* Dhavidhi alamuka patalimba pace mbatoma kufamba-famba padzulu panyumba ya mambo. Pikhali iye padzulu panyumba aona nkazi mbakasamba, pontho nkazi unoyu akhali wakubalika kakamwe. 3 Dhavidhi atuma munthu toera akasake kudziwa kuti nkazi unoyu mbani. Iye apangwa: “Ndi Bhatisebha+ mwana wankazi wa Eliyamu,+ nkazi wa Uriya,+ Mueti.”+ 4 Buluka penepo Dhavidhi atuma anthu toera akancemere.+ Natenepa Bhatisebha abwera kuna Dhavidhi, iye mbapita naye m’mabonde.+ (Pyenepi pyacitika mu ndzidzi ukhaceneseka Bhatisebha.)*+ Buluka penepo, Bhatisebha abwerera kunyumba kwace.
5 Bhatisebha adzakhala na mimba mbatumiza mphangwa izi kuna Dhavidhi: “Ine ndiri na mimba.” 6 Penepo Dhavidhi atumiza mphangwa kuna Yoabhe mbati: “Nditumizire Uriya, Mueti.” Natenepa Yoabhe atumiza Uriya kuna Dhavidhi. 7 Pidafika Uriya, Dhavidhi ambvundza kuti Yoabhe ali tani, anyankhondo ali tani, pontho nkhondo ikufamba tani. 8 Buluka penepo Dhavidhi apanga Uriya: “Ndoko kunyumba kwako toera ukapume pang’ono.”* Uriya pidabuluka iye n’nyumba mwa mambo, mambo antumizira muoni.* 9 Mbwenye Uriya nee aenda kunyumba kwace, iye agona pansuwo wa nyumba ya mambo pabodzi na anyabasa anango a mambo. 10 Natenepa Dhavidhi apangwa: “Uriya nee aenda kunyumba kwace.” Penepo Dhavidhi abvundza Uriya: “Kodi iwe nee ukufika kwene buluka paulendo? Thangwi yanji nee waenda kunyumba kwako?” 11 Uriya atawira Dhavidhi: “Bokosi+ iri mu nsasa, misoka ya anyankhondo a Izraeli na misoka ya anyankhondo a Yuda iri m’misasa, pontho mbuyanga Yoabhe pabodzi na atumiki anu mbuyanga ali m’misasa kunja kwa nzinda. Mphapo pinacitika tani kuti ine ndiende kunyumba kwanga, ndidye, ndimwe mbandigona na nkazanga?+ Ndiri kudumbira mu dzina yanu imwe wakuti muli m’maso, ine nkhabe kucita pyenepi!”
12 Buluka penepo Dhavidhi apanga Uriya: “Lero khala pontho pano, mangwana ndinakutawirisa kuti ubwerere.” Natenepa ntsiku ineyi na mangwana mwace Uriya akhala mu Yerusalemu. 13 Dhavidhi ancemeresa toera adye na kumwa naye pabodzi, pontho iye amuledzeresa. Mbwenye pikhadoka dzuwa, iye aenda kagona patalimba pace pabodzi na anyabasa ambuyace, iye nee aenda kunyumba kwace. 14 Mangwana mwace namacibese, Dhavidhi alembera tsamba Yoabhe mbaitumiza na Uriya. 15 Mu tsamba ineyi, iye alemba tenepa: “Ikha Uriya pa nzera wakutsogolo, kule kunawitha* nkhondo, buluka penepo bwererani nduli toera aphekeswe mbafa.”+
16 Yoabhe akhadamala kale kuona mwadidi nzinda, natenepa iye aikha Uriya pa mbuto ikhadziwa iye kuti iri na anyankhondo amphambvu. 17 Pidabuluka amuna mu nzinda mbamenyana na Yoabhe, atumiki anango a Dhavidhi aphiwa, pontho Uriya wakuti ndi Mueti, akhali m’bodzi wa ale adaphiwa.+ 18 Natenepa Yoabhe adziwisa Dhavidhi pyonsene pidacitika kunkhondo. 19 Iye apanga munthu adatuma iye: “Ungamala kupanga mambo pinthu pyonsene pidacitika kunkhondo, 20 panango mambo anaipirwa kakamwe mbakubvundza: ‘Thangwi yanji mwaenda kamenya nkhondo dhuzi kakamwe na nzinda? Kodi imwe nee mukhadziwa kuti iwo mbadakuponyerani mapswimo na padzulu pa mpanda? 21 Mbani adapha Abhimeleki+ mwana wa Yerubheseti?+ Kodi si nkazi tayu adamponyera mwala wa libwe na padzulu pa mpanda, iye mbafa ku Tebhezi? Thangwi yanji imwe mwaenda dhuzi kakamwe na mpanda?’ Buluka penepo longa: ‘Ntumiki wanu Uriya wakuti ndi Mueti, aphiwambo.’”
22 Natenepa munthu unoyu aenda, pidafika iye kuna Dhavidhi ampanga pinthu pyonsene pidapangwa iye na Yoabhe. 23 Buluka penepo munthu adabweresa mphangwa apanga Dhavidhi: “Anyamalwa akhali amphambvu kakamwe kupiringana ife, pontho iwo abuluka mbabwera kudzamenyana na ife kunja; mbwenye ife taabweza mpaka pansuwo ukulu wa nzinda. 24 Anyamauta akhaponyera atumiki anu mapswimo na padzulu pa mpanda, pontho atumiki anango a mambo aphiwa; ntumiki wanu Uriya wakuti ndi Mueti aphiwambo.”+ 25 Natenepa Dhavidhi apanga munthu unoyu adabweresa mphangwa: “Kapange tenepa Yoabhe: ‘Leka dzudzumika na pyenepi, thangwi supada isapha anthu onsene. Wangisira kumenya nkhondo mu nzinda toera uukunde.’+ Pontho muwangise.”
26 Nkazi wa Uriya pidabva iye kuti mamunace afa, iye atoma kumulira. 27 Pidamala ndzidzi wakulira mamunace, mwakukhonda dembuka Dhavidhi atuma anthu toera akakwate Bhatisebha mbabwera naye panyumba pace, pontho iye akhala nkazace+ mbabala naye mwana wamamuna. Mbwenye pidacita Dhavidhi pyatsukwalisa kakamwe* Yahova.+