Masalmo
Kuna nyakutsogolera nyimbo; inalonga pya “Maluwa.” Nyimbo ya ana a Kora.+ Masikili.* Nyimbo ya ufuni.
45 Muntima mwanga mwadzala na pinthu pyadidi.
Ine ndalonga: “Nyimbo yanga isalonga* pya mambo.”+
Lirimi yanga mbikhale ninga cakulemba naco+ ca nyakulemba* waluso.+
2 Imwe mambo, ndimwe wakubalika kakamwe pakati pa ana a anthu.
Nkanwa mwanu musabuluka mafala adidi.+
Na thangwi ineyi, Mulungu anadzakupasani nkhombo kwenda na kwenda.+
4 Na ukulu wanu ndokoni kakunda* anyamalwa anu;+
Kwirani kavalo yanu mbamumenya nkhondo thangwi ya anthu akucepeseka, undimomwene na ulungami.+
Djanja yanu yamadyo inadzacita* pinthu pyakudzumisa.
5 Mambo, mapswimo anu ndi akutwa, asacitisa anthu kugwa pamaso panu;+
Iwo asalasa mitima ya anyamalwa a mambo.+
6 Mulungu ndiye anakupasani mphambvu* toera mutonge kwenda na kwenda;+
Ndodo ya umambo wanu ndi yaulungami.+
7 Imwe mwafuna ulungami,+ mbamuida pyakuipa.+
Na thangwi ineyi, Mulungu akudzodzani+ na mafuta, mbakucitisani kukhala wakutsandzaya+ kakamwe kupiringana andzanu.
8 Nguwo zanu zisanunkhira mafuta a mira, alowe na kasiya;
Kubulukira panyumba yanu ikulu yakubalikiswa na nyanga za ndzou, nyimbo zisakucitisani* kukhala wakutsandzaya.
9 Ana akazi a amambo ali pakati pa akazi analemedza imwe.
Nyanyi alimira kunkono wanu wamadyo uku abalikiswa na ouro ya Ofire.+
10 Iwe mwananga wankazi, bvesera mbubvesesa mafala anga;
Duwala mbumba yako na nyumba ya babako.
11 Mambo anadzakufuna kakamwe thangwi ya kubalika kwako,
Thangwi iye ndi mbuyako,
Natenepa godama pamaso pace.
12 Mwana wankazi wa ku Tiro anabwera na muoni;
Anthu akupfuma kakamwe anadzakusaka toera uaphedze.
13 Mwana wankazi wa mambo ali na cidzo cikulu nʼnyumba mwa mambo;*
Nguwo zace zabalikiswa na ouro.
14 Iye anaendeswa kuna mambo uku adabvala nguwo zakubalika kakamwe.
Amiyali akhamperekera akuti ndi andzace anaendeswambo kuna iye.*
15 Iwo anadzaendeswa mwakutsandzaya na mwakukomerwa;
Iwo anadzapita nʼnyumba mwa mambo.
16 Ananu anadzakhala pa mbuto za ambuyanu.
Imwe munadzaakhazikisa ninga atsogoleri pa dziko yonsene yapantsi.+
17 Ndinadzadziwisa dzina yanu kwenda na kwenda.+
Na thangwi ineyi, anthu anadzakusimbani kwenda na kwenda.