EKSODHO

1 Pidaenda Izraeli ku Ejitu, mwanace mʼbodzi na mʼbodzi aendambo pabodzi na anthu a panyumba+ pace. Awa ndi madzina a ana a Yakobe: 2 Rubheni, Simeoni, Levi na Yuda;+ 3 Isakari, Zebhuloni na Bhenjamini; 4 Dhani, Nafitali, Gadhi na Azeri.+ 5 Anthu onsene a dzindza ya Yakobe akhali 70, mbwenye Zuze akhali kale ku Ejitu.+ 6 Pakumalisa, Zuze afa,+ abale ace onsene na anthu onsene a mu ndzidzi wace afambo. 7 Aizraeli* abala ana azinji mbatoma kuthimizirika kakamwe, iwo akhapitiriza kunjipa mbakhala amphambvu kakamwe munjira yakudzumisa, natenepa iwo adzadza dziko ya Ejitu.+

8 Mukupita kwa ndzidzi, mambo mupswa wakuti nee akhadziwa Zuze atoma kutonga dziko ya Ejitu. 9 Natenepa iye apanga mbumba yace: “Onani basi! Aizraeli ndi azinji kakamwe, pontho ndi amphambvu kakamwe kupiringana ife.+ 10 Tendeni tiacenjerere. Tingakhonda kucita pyenepi, iwo anapitiriza kunjipa, pontho ingaoneka nkhondo, iwo anaenda kukhundu ya anyamalwa athu, anamenyana na ife mbabuluka mu dziko ino.”

11 Na thangwi ineyi, asankhula atsogoleri toera kuaphatisa basa mwakukakamiza, toera kuathabusa na mabasa akuwanga;+ Aizraeli amanga mizinda ya Pitomi na Ramese+ toera kukoyera pyakudya na pinthu pya Farau. 12 Mbwenye pikhathimiza iwo kuathabusa kakamwe, iwo akhathimizirika kakamwe, mbapitiriza kumwazika kakamwe; natenepa Aejitu akhagopa kakamwe Aizraeli.+ 13 Na thangwi ineyi, Aejitu athabusa Aizraeli na ubitcu wakuwanga kakamwe.+ 14 Iwo acitisa umaso wa Aizraeli kukhala wakunentsa kakamwe, thangwi ya basa yakuwanga yakumunya* matope na kuumba mabhuloko,* iwo aathabusa na ntundu onsene wa ubitcu mʼmunda. Inde, iwo aakakamiza toera kuphata basa yakuwanga mʼmakhaliro akunentsa, mbaasikimiza na ntundu onsene wa ubitcu.+

15 Mukupita kwa ndzidzi, mambo wa ku Ejitu alonga na Sifra na Puwa, akuti akhali akazi Acihebheri akhaphata basa yakubazika. 16 Iye aapanga: “Mungaphedza akazi Acihebheri toera kubala,+ angabala mwana wamamuna musafunika kumupha; mbwenye angabala mwana wankazi, lekani kumupha.” 17 Mbwenye anyakubazika akhagopa Mulungu wandimomwene, pontho iwo nee acita pidalonga mambo wa ku Ejitu. Natenepa, iwo nee apha+ ana amuna. 18 Mukupita kwa ndzidzi, mambo wa ku Ejitu acemera anyakubazika mbaabvundza: “Thangwi yanji nee mwapha ana amuna?” 19 Anyakubazika atawira Farau: “Akazi Acihebheri asiyana na akazi a mu Ejitu. Iwo ali na mphambvu kakamwe, pontho anyakubazika angafika, asaagumana amala kubala.”

20 Natenepa, Mulungu atsalakana mwadidi anyakubazika anewa, pontho mbumba ikhathimizirika mbikhala yamphambvu kakamwe. 21 Nakuti anyakubazika akhagopa Mulungu wandimomwene, mukupita kwa ndzidzi, Mulungu acitisa kuti iwo abale ana. 22 Pakumalisa Farau apanga mbumba yace yonsene: “Musafunika kuponya mu Nkulo wa Nilo ana amuna onsene Acihebheri adabalwa kwene cincino, mbwenye ana onsene akazi asiyeni mʼmaso.”+

2 Mu ndzidzi unoyu, mamuna mʼbodzi wa dzindza ya Levi asemba nkazi wa dzindza ya Levi.+ 2 Nkazi unoyu akhala na mimba* mbabala mwana wamamuna. Pidaona iye kuti mwana akhali wakubalika kakamwe, iye amʼbisa mʼmiyezi mitatu.+ 3 Pidaona iye kuti nee akhakwanisabve kumʼbisa,+ iye akwata bokosi* mbaikhwaza pinthu pyakulandana na sakatraya. Buluka penepo, aikha mwana mʼbokosi ineyi mbaisiya padzulu pa mabande nʼkhundu mwa Nkulo wa Nilo. 4 Mbwenye mwanankaziace+ mwana unoyu, alimira kutali pangʼono toera kuona pikhafuna kucitikira mʼbale wace.

5 Mwana wankazi wa Farau pidaenda iye kasamba mu nkulo wa Nilo, atumiki ace a akazi akhafamba nʼkhundu mwa Nilo. Iye aona bokosi pakati pa mitete, penepo pene iye apanga nyabasa wace toera aende kakwate bokosi ineyi.+ 6 Pidaifungula iye aona mwana wamamuna, pontho mwana unoyu akhalira. Iye ambvera ntsisi, mbwenye alonga: “Uyu ndi mʼbodzi wa ana a Ahebheri.” 7 Penepo mwanankazi wa Mose abvundza mwana wankazi wa Farau: “Ndiende kacemere nkazi Wacihebheri toera akuyamwisireni mwana?” 8 Mwana wankazi wa Farau ampanga: “Ndoko!” Mwakucimbiza ntsikana aenda kacemera mai wace mwana.+ 9 Mwana wankazi wa Farau apanga mai wace mwana: “Kwata mwana uyu undiyamwisire, ine ndinakulipa.” Penepo nkazi akwata mwana unoyu mbamuyamwisa. 10 Pidakula mwana, iye ankwata mbaenda kampereka kuna mwana wa Farau, natenepa mwana unoyu adzakhala wace.+ Iye ampasa dzina ya Mose,* mbalonga: “Thangwi ndamʼbulusa mʼmadzi.”+

11 Pidakula Mose,* aenda kuna abale ace toera aone basa yakuwanga ikhaphata iwo,+ iye aona Muejitu mbakamenya mʼbale wace mʼbodzi Wacihebheri. 12 Penepo iye ayangʼana uku na uku mbakhonda kuona munthu, apha Muejitu mbanfikira mʼmatcetca.+

13 Mangwana mwace, iye aona Ahebheri awiri mbakamenyana. Natenepa iye abvundza ule adadawisa: “Thangwi yanji uli kumenya mʼbale wako?”+ 14 Penepo iye atawira: “Mbani adakusankhula toera ukhale ntsogoleri na nyakutonga miseru yathu? Kodi usafuna undiphe ninga mudapha iwe Muejitu?”+ Natenepa Mose agopa, mbalonga: “Mwakukhonda penula, pidacita ine pyadziwika!”

15 Buluka penepo, Farau abva pyenepi mbayesera kupha Mose; mbwenye Mose athawa pamaso pa Farau mbaenda kakhala ku dziko ya Midhiyani.+ Kweneko iye akhala pantsi cifupi na ncera. 16 Nyantsembe wa dziko ya Midhiyani+ akhali na ana anomwe akazi, iwo abwera toera kutunga madzi na kudzadza pyombo pinamwera pifuyo toera kumwesa mabira a pai wawo. 17 Ninga mwandzolowero, akumbizi abwera mbathamangisa mabira na atsikana ene. Mbwenye Mose alamuka mbaphedza* atsikana anewa, pontho apasa madzi mabira awo. 18 Pidafika iwo kunyumba, Reuweli*+ pai wawo aabvundza mwakudzumatirwa: “Pyakwanisika tani toera lero mufike nakweru panyumba?” 19 Iwo atawira: “Muejitu+ atiombola mʼmanja mwa akumbizi, pontho atitungira madzi mbamwesa mabira.” 20 Iye abvundza anace: “Mphapo iye ali kupi? Thangwi yanji mwansiya kweneko? Ndokoni kancemere toera abwere kudzadya pabodzi na ife.” 21 Buluka penepo, Mose atawira kukhala panyumba pa mamuna unoyu, pontho iye apereka mwanace Zipora+ kuna Mose toera akhale nkazace. 22 Mukupita kwa ndzidzi, Zipora abala mwana wamamuna, Mose mbampasa dzina ya Jersoni,*+ thangwi iye alonga: “Ine ndine mulendo mu dziko ino.”+

23 Mudapita pyaka pizinji,* mambo wa ku Ejitu afa,+ mbwenye Aizraeli akhapitiriza kubulira thangwi ya ubitcu mbalira mwakudungunya. Pontho kulira kwawo toera kuphemba ciphedzo thangwi ya ubitcu, kukhafika kuna Mulungu wandimomwene.+ 24 Penepo Mulungu abva kubulira kwawo,+ mbakumbuka cibverano cidacita iye na Abhrahamu, Izaki na Yakobe.+ 25 Natenepa Mulungu ayangʼana Aizraeli, mbaona kuthabuka kwawo.

3 Mose adzakhala nkumbizi wa mabira a Jetro,+ nyantsembe wa dziko ya Midhiyani; Jetro akhali tebzwalace. Pikhakumbiza iye mabira kumabulukiro a dzuwa a thando, iye afika ku Orebhi,+ kuphiri ya Mulungu wandimomwene. 2 Penepo anju wa Yahova aonekera kuna iye pakati pa thendere ya minga+ yakuti ikhagaka moto. Pikhapitiriza Mose kuyangʼana thendere ineyi, iye aona kuti ikhagaka moto, mbwenye nee ikhapya. 3 Na thangwi ineyi Mose alonga: “Pyenepi ndi pyakudzumatirisa! Thangwi yanji thendere ineyi nkhabe kupya? Ndinaifendedzera cifupi toera ndione.” 4 Pidaona Yahova kuti Mose akhafendedza toera kuona pyenepi, ancemera pakati pa thendere mbalonga: “Mose! Mose!” iye atawira: “Ndiri pano.” 5 Penepo Mulungu ampanga: “Leka kufendedzera pontho. Dula masandalya ako, thangwi mbuto idalimira* iwe ndi yakucena.”

6 Iye athimiza: “Ine ndine Mulungu wa pai wako, Mulungu wa Abhrahamu,+ Mulungu wa Izaki+ na Mulungu wa Yakobe.”+ Penepo Mose aphimbira nkhope yace, thangwi akhagopa kuyangʼana Mulungu wandimomwene. 7 Yahova athimiza: “Mwandimomwene, ine ndaona nyatwa inatamba mbumba yanga ku Ejitu, pontho ndabva kulira kwawo thangwi ya ale anaakakamiza toera kuphata basa; ine ndisadziwa mwadidi nyatwa inatamba iwo.+ 8 Ndinatcita toera kuaombola mʼmanja mwa Aejitu+ mbandiabulusa mu dziko ineyi, mbandiaendesa ku dziko yadidi na ikulu, yakuti iri na nkaka na uci.+ Ndinaaendesa ku dziko ya Akanani, Aeti, Aamori, Aperesi, Aeveu na Ayebusi.+ 9 Mwandimomwene, ine ndabva kulira kwa mbumba ya Izraeli, pontho ndaona kuthabuswa*+ kunacitwa iwo na Aejitu. 10 Cincino ine ndinakutuma toera uende kuna Farau, pontho iwe unadzabulusa mbumba yanga ya Izraeli mu Ejitu.”+

11 Mbwenye Mose alonga kuna Mulungu wandimomwene: “Ndine ani ine toera ndiende kuna Farau kabulusa Aizraeli mu Ejitu?” 12 Natenepa iye alonga: “Ine ndinadzakhala na iwe,+ ici ndi cidzindikiro cinafuna kupangiza kuti adakutuma ndine: Ungamala kubulusa mbumba ya Izraeli mu Ejitu, imwe munadzatumikira* ine Mulungu wandimomwene paphiri ino.”+

13 Mbwenye Mose alonga kuna Mulungu wandimomwene: “Ndingaenda kuna Aizraeli mbandiapanga: ‘Mulungu wa ambuyanu andituma kuna imwe,’ iwo angandibvundza, ‘Dzina yace mbani?’+ Ndinaatawira tani?” 14 Penepo Mulungu apanga Mose: “Ndinadzakhala* Pinafuna Ine Kukhala.”*+ Pontho iye athimiza: “Ipi ndipyo pinafunika iwe kuenda kapanga Aizraeli: ‘Ndinadzakhala Pinafuna Ine Kukhala, ndiye adandituma kuna imwe.’”+ 15 Penepo Mulungu apanga pontho Mose:

“Ipi ndipyo pinafunika iwe kuenda kapanga Aizraeli: ‘Yahova Mulungu wa ambuyanu, Mulungu wa Abhrahamu,+ Mulungu wa Izaki+ na Mulungu wa Yakobe+ andituma kuna imwe.’ Ineyi ndi dzina yanga kwenda na kwenda,+ pontho ndinadzadziwika* na dzina ineyi ndzidzi onsene. 16 Cincino ndoko kagumanye akulu onsene a Izraeli mbuapanga: ‘Yahova Mulungu wa ambuyanu, Mulungu wa Abhrahamu, Mulungu wa Izaki na Mulungu wa Yakobe aonekera kuna ine mbalonga: “Mwandimomwene ine ndiri kukuonani,+ pontho ndisaona pinacitirwa imwe mu Ejitu. 17 Natenepa, ine ndiri kulonga kuti: Ndinadzakubulusani mu nyatwa+ zinakuonesani Aejitu mbandikuendesani ku dziko ya Akanani, Aeti, Aamori,+ Aperesi, Aeveu na Ayebusi,+ yakuti ndi dziko ya nkaka na uci.”’+

18 “Mwandimomwene, iwo anadzabvesera mafalako,+ pontho iwe pabodzi na akulu a mu Izraeli munadzaenda kuna mambo wa ku Ejitu. Imwe musafunika kumpanga tenepa: ‘Yahova Mulungu wa Ahebheri+ alonga na ife. Natenepa, taphata miyendo, tisiyeni ticite ulendo wa ntsiku zitatu nʼthando toera tikapereke ntsembe kuna Yahova Mulungu wathu.’+ 19 Mbwenye ine ndisadziwa kuti mambo wa ku Ejitu angakhonda kukakamizwa na djanja yamphambvu+ nee anakutawirisani kuti muende. 20 Ndinadzafuthula djanja yanga mbandithabusa Aejitu thangwi ya pinthu pyakudzumisa pinafuna kucita ine mu dziko yawo, buluka penepo Farau anadzakutawirisani toera mubuluke.+ 21 Ine ndinadzacitisa kuti Aejitu apangize kukoma ntima kuna Aizraeli, pontho mungadzabuluka, nee munabuluka cimanja-manja.+ 22 Nkazi mʼbodzi na mʼbodzi asafunika kuphemba nkazi ndzace anakhala cifupi na iye* peno nkazi adafikira panyumba pace* toera apaswe pinthu pya parata, pya ouro na nguwo, munadzapereka pinthu pyenepi kuna ananu amuna na akazi; natenepa munadzatapata mpfuma za Aejitu.”+

4 Mbwenye Mose atawira: “Mphapo ndiye tani iwo angakhonda kundikhulupira mbakhonda kubvera pinalonga ine?+ Thangwi iwo anadzalonga: ‘Yahova nee aonekera kuna iwe.’” 2 Penepo Yahova ambvundza: “Ninji ciri na iwe mʼmanja mwako?” Iye atawira: “Ndi ndodo.” 3 Iye alonga: “Iponye pantsi.” Natenepa iye aiponya pantsi, iyo mbisanduka kudza nyoka;+ penepo Mose aithawa. 4 Yahova apanga pontho Mose: “Futhula djanja yako uiphate ncira.” Iye afuthula djanja yace mbaiphata, iyo yasanduka pontho kudza ndodo mʼmanja mwace. 5 Buluka penepo Mulungu alonga: “Pyenepi ndi toera iwo akhulupire kuti Yahova Mulungu wa ambuyako, Mulungu wa Abhrahamu, Mulungu wa Izaki na Mulungu wa Yakobe+ aonekera kuna iwe.”+

6 Yahova ampanga pontho: “Ndaphata miyendo, pitisa djanja yako mu nguwo ya paditi* pako.” Natenepa iye apitisa djanja yace mu nguwo yace. Pidabulusa iye djanja yace, iyo ikhali na matanya akucena ninga matalala!+ 7 Penepo iye ampanga: “Pitisa pontho djanja yako mu nguwo ya paditi pako.” Natenepa iye apitisa djanja yace mu nguwo yace. Pidabulusa iye djanja yace, ikhali pontho mwadidi ninga manungo ace onsene! 8 Mulungu alonga: “Iwo angakhonda kukukhulupira, peno angakhonda kutawira cidzindikiro cakutoma, mwandimomwene iwo anadzatawira cidzindikiro caciwiri.+ 9 Iwo angapitiriza kukhonda kukhulupira pidzindikiro pyenepi piwiri mbakhonda kubvesera pinalonga iwe, unadzatunga pangʼono madzi a mu Nkulo wa Nilo mbuathirira pa mataka akuuma. Natenepa madzi anafuna kutunga iwe mu nkulo wa Nilo anadzakhala ninga ciropa pa mataka akuuma.”+

10 Mose alonga kuna Yahova: “Ndilekerereni Yahova, ine nkhabe kwanisa kulonga mwadidi, kutomera kale, peno mu ndzidzi udasankhula imwe ntumiki wanu, thangwi ndisanentseka pakulonga,* pontho lirimi yanga isamangika.”*+ 11 Yahova ampanga: “Mbani adapasa munthu mulomo? Mbani anasankhula munthu wakukhonda longa peno wakukhonda kubva, wakukhonda kuona mwadidi peno boliboli? Kodi anacita pyenepi sine tayu, Yahova? 12 Natenepa ndoko, ine ndinadzakhala na iwe mu ndzidzi unalonga iwe, pontho ndinadzakupfundzisa pinafunika iwe kulonga.”+ 13 Mbwenye iye alonga: “Ndilekerereni Yahova. Ndaphata miyendo, tumizani munthu unango anafuna imwe.” 14 Penepo Yahova aipirwa na Mose, mbampanga: “Ndiye tani mʼbale wako Aroni+ wa dzindza ya Levi? Ine ndisadziwa kuti iye asakwanisa kulonga mwadidi. Pontho pa ndzidzi uno iye ali kubwera kudzaonana na iwe. Angakuona, iye anadzakomerwa.*+ 15 Natenepa usafunika kulonga naye mbumpanga pinthu pinafunika iye kulonga.*+ Ine ndinadzakhala na imwe mu ndzidzi unafuna imwe kulonga,+ pontho ndinadzakupfundzisani pinafunika imwe kucita. 16 Iye anadzalonga kuna mbumba mu dzina yako, pontho anadzakhala mulomo wako,* iwe unadzakhala ninga Mulungu kuna iye.*+ 17 Unadzakwata ndodo ineyi iri mʼmanja mwako, pontho na ndodo ineyi unadzacita pirengo.”*+

18 Natenepa Mose abwerera kuna Jetro tebzwalace,+ mbampanga: “Ndaphata miyendo, ndisafuna ndibwerere kuna abale anga ku Ejitu toera ndiaone khala ali mwadidi.” Jetro apanga Mose: “Ndoko muntendere.” 19 Buluka penepo Yahova apanga Mose ku Midhiyani: “Ndoko, bwerera ku Ejitu thangwi anthu onsene akhafuna kukupha amala kufa.”+

20 Natenepa Mose akwata nkazace na anace, aakwiza pa buru mbabwerera ku dziko ya Ejitu. Kusiyapo pyenepi, Mose akwata ndodo ya Mulungu wandimomwene mʼmanja mwace. 21 Buluka penepo, Yahova apanga Mose: “Ungafika ku Ejitu, cita pirengo pyonsene pyakuti ine ndakupasa mphambvu toera upicite pamaso pa Farau.+ Mbwenye ine ndinatawirisa kuti Farau aumise ntima wace,+ natenepa nee anadzatawirisa kuti mbumba ibuluke.+ 22 Longa tenepa kuna Farau: ‘Ipi ndi pidalonga Yahova: “Izraeli ndi mwananga, mwananga wautombo.*+ 23 Ine ndiri kukupanga kuti: Siya mwananga aende kanditumikira. Mbwenye ungakhonda kuntawirisa kuti aende, ine ndinadzapha mwanako wamamuna, wakuti ndi mwanako wautombo.”’”+

24 Pikhapitiriza iwo na ulendo, pa mbuto yakupuma, Yahova+ aonana naye mbafuna kumupha.*+ 25 Pakumalisa, Zipora+ akwata mwala wakutwa mbasidza mwanace, mbacitisa kuti khanda ya mwana idagwanda iye, igwe pa miyendo pace,* mbalonga: “Ndacita pyenepi thangwi ndimwe mankhadzi wa ciropa kuna ine.” 26 Penepo Iye ansiya toera aende. Zipora alonga kuti: “Ndimwe mankhadzi wa ciropa,” thangwi ine ndasidza mwananga.

27 Buluka penepo Yahova apanga Aroni: “Ndoko kuthando ukaonane na Mose.”+ Natenepa iye aenda mbaonana naye paphiri ya Mulungu wandimomwene,+ mbamʼmwanyika na mpswompswono. 28 Mose apanga Aroni mafala onsene a Yahova, ule adantuma,+ Mose ampangambo pirengo* pyonsene pidapangwa iye toera kupicita.+ 29 Buluka penepo, Mose na Aroni aenda mbagumanyiza akulu onsene a mbumba ya Izraeli.+ 30 Aroni aapanga mafala onsene adalonga Yahova kuna Mose, pontho acita pirengo*+ pamaso pa mbumba. 31 Natenepa Aizraeli pidaona iwo pyenepi akhulupira.+ Pidaona iwo kuti Yahova atoma kutsalakana Aizraeli,+ pontho kuti iye aona nyatwa zikhatamba iwo,+ agodama mbakotamisa misolo yawo mpaka pantsi.

5 Buluka penepo Mose na Aroni aenda kuna Farau mbampanga: “Ipi ndi pidalonga Yahova Mulungu wa Izraeli: ‘Siya mbumba yanga iende toera indicitire phwando nʼthando.’” 2 Mbwenye Farau alonga: “Mbani Yahova+ toera ine ndibvere fala yace mbandisiya Aizraeli toera aende?+ Ine nkhabe kundziwa Yahova, pontho nee ndinasiya Aizraeli toera aende.”+ 3 Mbwenye iwo ampanga: “Mulungu wa Aizraeli alonga na ife. Taphata miyendo, tisafuna ticite ulendo wa ntsiku zitatu nʼthando toera tikapereke ntsembe kuna Yahova Mulungu wathu;+ tingakhonda kucita pyenepi, iye anadzatipha na mautenda peno na supada.” 4 Mambo wa ku Ejitu aatawira: “Mose na Aroni, thangwi yanji musafuna kuti mbumba isiye kuphata mabasa awo? Bwererani mukaphate mabasa anu!”+ 5 Farau apitiriza kulonga: “Cincino mbumba ineyi ndi ikulu kakamwe, mphapo musafuna kuti iwo asiye mabasa awo?”

6 Pa ntsiku ineyi, Farau apanga ale akhacitisa anthu kuphata basa mwakuwanga na ale akhaonera mabasa kuti: 7 “Lekani kupereka pontho maudzu* kuna mbumba toera kuumba mabhuloko.*+ Asiyeni asake okhene maudzu. 8 Mbwenye apangeni toera aumbe ntsama ibodzi ene ya mabhuloko* ninga ikhaumba iwo kale. Lekani kupungula mabhuloko,* thangwi iwo ali kupolola. Na thangwi ineyi iwo asadungunya: ‘Tisafuna tiende, tisafuna tiende kapereka ntsembe kuna Mulungu wathu!’ 9 Apaseni basa izinji toera akhonde kuona ndzidzi wakubvesera mapsweda.”

10 Natenepa, ale akhacitisa anthu kuphata basa mwakuwanga+ na ale akhaonera mabasa, aenda kapanga mbumba: “Ipi ndi pidalonga Farau: ‘Ine nkhabe kukupasani pontho maudzu.* 11 Ndokoni kasake mwekhene maudzu* konsene kunafuna imwe, mbwenye basa yanu nee inadzapungulwa.’” 12 Natenepa, mbumba yamwazika mu dziko yonsene ya Ejitu toera kusaka maudzu* mʼminda idamala kubvunwa. 13 Pontho ale akhacitisa anthu kuphata basa mwakuwanga akhapitiriza kuapanga: “Ntsiku zonsene, mʼbodzi na mʼbodzi wa imwe asafunika kumalisa basa yace, ninga pikhacita imwe mu ndzidzi ukhabwereserwa imwe maudzu.”* 14 Kusiyapo pyenepi, atsogoleri adasankhulwa na anyakuonera a Farau pakati pa Aizraeli toera kuonera mbumba, akhamenywa.+ Iwo aabvundza: “Thangwi yanji dzulo na lero imwe nee mwakwanisa kuumba mabhuloko* ninga pikhacita imwe kale?”

15 Aizraeli adasankhulwa toera kuonera mabasa aenda kadungunyira Farau, mbampanga: “Thangwi yanji mukutsalakana atumiki anu munjira ineyi? 16 Ife atumiki anu nee tisapaswa maudzu,* ngakhale tenepo iwo asatipanga: ‘Umbani mabhuloko!’* Atumiki anu ali kumenywa, maseze ali na mulando ndi mbumba yanu.” 17 Mbwenye iye aapanga: “Muli kupolola, inde muli kupolola!+ Na thangwi ineyi, imwe musalonga: ‘Tisafuna tiende, tisafuna tiende kapereke ntsembe kuna Yahova.’+ 18 Cincino ndokoni, bwererani mukaphate basa! Nee munadzapaswa maudzu,* ngakhale tenepo musafunika kuumba ntsama ibodzi ene ya mabhuloko* ninga ikhaumba imwe kale.”

19 Penepo Aizraeli akhaonera mabasa aona kuti akhali mu nyatwa thangwi ya ntemo udapangwa iwo kuti: “Ntsiku zonsene musafunika kuumba ntsama ibodzi ene ya mabhuloko* ninga ikhaumba imwe kale.” 20 Pidabuluka iwo pamaso pa Farau, aonana na Mose pabodzi na Aroni akuti akhaadikhira. 21 Penepo pene iwo aapanga: “Yahova mbaone pidacita imwe, pontho akutongeni, thangwi mwacitisa kuti tiidiwe na Farau pabodzi na atumiki ace, natenepa imwe mwaikha supada mʼmanja mwawo toera atiphe.”+ 22 Penepo Mose ayangʼana kuna Yahova, mbalonga: “Yahova, thangwi yanji mukuonesa nyatwa mbumba iyi? Thangwi yanji mwandituma? 23 Kutomera pa ntsiku idaenda ine kalonga na Farau mu dzina yanu,+ iye asatsalakana mbumba iyi+ mwakuipa kakamwe kupiringana kale, pontho imwe nee mwaombola mbumba yanu.”+

6 Natenepa Yahova apanga Mose: “Cincino unaona pinafuna kucita ine kuna Farau.+ Djanja yanga yamphambvu inankakamiza toera aasiye aende; pontho angamala kuona mphambvu ya djanja yanga, ndinankakamiza toera aathamangise mu dziko yace.”+

2 Buluka penepo, Mulungu apanga Mose: “Ine ndine Yahova. 3 Ine ndikhaonekera kuna Abhrahamu, Izaki na Yakobe ninga Mulungu Wamphambvu Zonsene,+ mbwenye nee ndaadziwisa+ dzina yanga ya Yahova.+ 4 Ine ndakhazikisambo cibverano na iwo, toera kuapasa dziko ya Kanani, dziko idakhala iwo ninga alendo.+ 5 Cincino ine ndabva kubulira kwa mbumba ya Izraeli, yakuti ikuphatiswa basa ya ubitcu na Aejitu, pontho ndakumbuka cibverano+ canga.

6 “Natenepa, panga Aizraeli kuti: ‘Ine ndine Yahova, ndinakubulusani mu nyatwa zinakuonesani Aejitu mbandikubulusani mu ubitcu;+ ndinadzaphatisira mphambvu+ zanga, mbandiatcunyusa kakamwe toera kukupulumusani. 7 Ine ndinadzakukwatani ninga mbumba yanga, pontho ine ndinadzakhala Mulungu wanu,+ natenepa imwe munadzadziwa kuti ndine Yahova Mulungu wanu anakubulusani mu nyatwa zinakuonesani Aejitu. 8 Pontho ndinakuendesani ku dziko idadumbira ine* toera kupasa Abhrahamu, Izaki na Yakobe; ndinakupasani dziko ineyi toera ikhale unthaka wanu.+ Ine ndine Yahova.’”+

9 Buluka penepo, Mose aenda kalonga mphangwa zenezi kuna Aizraeli, mbwenye thangwi yakutsukwala, na ubitcu wakuwanga+ ukhaoneswa iwo, Aizraeli nee abvesera Mose.

10 Penepo Yahova apanga Mose: 11 “Ndoko kapange Farau mambo wa ku Ejitu kuti asafunika asiye Aizraeli abuluke mu dziko yace.” 12 Mbwenye Mose alonga kuna Yahova: “Aizraeli nee andibvesera, mphapo Farau anandibvesera+ tani, thangwi ine nkhabe kwanisa kulonga mwadidi!”+ 13 Mbwenye Yahova alonga pontho kuna Mose na Aroni mitemo ikhafunika iwo kupanga Aizraeli na Farau mambo wa ku Ejitu, toera abuluse Aizraeli mu dziko ya Ejitu.

14 Awa ndi atsogoleri a madzindza a Aizraeli: Ana a Rubheni, wakuti ndi mwana wakutoma*+ wa Izraeli akhali: Anoki, Palu, Ezironi na Karmi.+ Anewa ndi atsogoleri a dzindza ya Rubheni.

15 Ana a Simeoni akhali Yemuweli, Yamini, Oadhi, Yakini, Zoari na Sauli mwana adabalwa na nkazi wa dzindza ya Kanani.+ Anewa ndi atsogoleri a dzindza ya Simeoni.

16 Awa ndi ana a Levi,+ mwakubverana na madzina awo: Jersoni, Kowati na Merari.+ Levi afa pikhali iye na pyaka 137 pyakubalwa.

17 Ana a Jersoni akhali Libhini na Simei, mwakubverana na madzindza awo.+

18 Ana a Kowati akhali Amiramu, Izari, Ebhroni na Uzieli.+ Kowati afa pikhali iye na pyaka 133 pyakubalwa.

19 Ana a Merari akhali Mali na Musi.

Anewa akhali atsogoleri a Alevi, mwakubverana na madzindza awo.+

20 Amiramu asemba+ Yokebhedhi, mʼbale wa pai wace. Iye amʼbalira ana awa: Aroni na Mose.+ Amiramu afa pikhali iye na pyaka 137 pyakubalwa.

21 Ana a Izari akhali Kora,+ Nefeji na Zikri.

22 Ana a Uzieli akhali Mizaeli, Elizafani+ na Sitiri.

23 Aroni asemba Elisebha mwana wa Aminadhabhu, wakuti akhali mwanankaziace Nasoni.+ Iye amʼbalira ana awa: Nadhabhe, Abhiyu, Eleazare na Itamari.+

24 Ana a Kora akhali Asiri, Elikana na Abhiazafe.+ Anewa akhali atsogoleri a dzindza ya Kora.+

25 Eleazare+ mwana wa Aroni asemba mʼbodzi wa ana a Putieli. Iye amʼbalira Fineya.+

Anewa ndi atsogoleri a dzindza ya Levi, mwakubverana na mabanja awo.+

26 Yahova akhadapanga Aroni na Mose: “Bulusani mbumba ya Izraeli mu dziko ya Ejitu mwakubverana na misoka yawo.”*+ 27 Mose na Aroni+ ndiwo adalonga na Farau mambo wa ku Ejitu toera kubulusa mbumba ya Izraeli mu Ejitu.

28 Pa ntsiku ineyi, Yahova pidalonga iye na Mose mu dziko ya Ejitu, 29 Yahova apanga Mose: “Ine ndine Yahova. Panga Farau mambo wa ku Ejitu pinthu pyonsene pinakupanga ine.” 30 Penepo Mose alonga kuna Yahova: “Ine ndisanentseka pakulonga;* mphapo Farau anandibvesera tani?”+

7 Yahova apanga Mose: “Bvesera, ine ndakucitisa kukhala ninga Mulungu* kuna Farau, pontho Aroni mʼbale wako anadzalonga ninga mprofeta+ wako. 2 Usafunika kulonga kuna mʼbale wako Aroni mafala onsene anafuna kukupanga ine, pontho iye anadzalonga na Farau, penepo Farau anadzabulusa Aizraeli mu dziko yace. 3 Ine ndinatawirisa kuti Farau aumise ntima wace,+ pontho ine ndinadzacita pidzindikiro pizinji na pirengo pizinji mu dziko ya Ejitu.+ 4 Mbwenye Farau nee anadzakubveserani, natenepa ine ndinadzaphatisira mphambvu zanga mu dziko ya Ejitu, mbandibulusa mwenemu mbumba yanga ikulu,* yakuti ndi Aizraeli, pakumala kutcunyusa*+ kakamwe Aejitu. 5 Mwandimomwene Aejitu anadzadziwa kuti ine ndine Yahova,+ ndingapangiza mphambvu zanga kuna Ejitu mbandibulusa Aizraeli pakati pawo.” 6 Mose na Aroni acita pidapangwa iwo na Yahova; iwo acita sawasawa ninga mukhadapangwa iwo. 7 Pidaenda iwo kalonga na Farau,+ Mose akhali na pyaka 80 pyakubalwa, Aroni akhali na pyaka 83 pyakubalwa.

8 Yahova apanga Mose na Aroni: 9 “Farau angakupangani kuti: ‘Citani cirengo,’ penepo iwe panga Aroni: ‘Ponya pantsi ndodo yako pamaso pa Farau.’ Ndodo inadzasanduka kudza nyoka ikulu.”+ 10 Natenepa Mose na Aroni aenda kuna Farau mbacita pidapangwa iwo na Yahova. Aroni aponya ndodo yace pantsi pamaso pa Farau na atumiki ace, penepo ndodo yasanduka kudza nyoka ikulu. 11 Mbwenye Farau acemeresa amuna ace audziwisi na mangʼanga; pontho anyantsembe akulotera a mu Ejitu+ acitambo pibodzi pyene na mphambvu za ungʼanga+ wawo. 12 Mʼbodzi na mʼbodzi wa iwo aponya ndodo yace pantsi, ndodo zenezi zasanduka kudza nyoka zikulu; mbwenye nyoka* ya Aroni yameza nyoka zawo. 13 Ngakhale tenepo, Farau aumisa ntima wace+ mbakhonda kuabvesera, ninga mukhadalonga Yahova.

14 Buluka penepo Yahova apanga Mose: “Ntima wa Farau ndi wakuuma.+ Iye akhonda kutawirisa mbumba toera iende. 15 Mangwana namacibese ndoko kuna Farau. Mu ndzidzi unabuluka iye toera kuenda ku Nkulo wa Nilo, iwe usafunika kuenda kuna iye mbulimira nʼkhundu mwa madzi toera uonane naye; pontho ndoko na ndodo yako ikhadasanduka kudza nyoka.+ 16 Iwe usafunika kumpanga kuti: ‘Yahova Mulungu wa Ahebheri, andituma toera ndionane na iwe.+ Iye alonga: “Siya mbumba yanga iende toera inditumikire nʼthando,” mbwenye mpaka pano iwe nee wabvera pyenepi. 17 Ipi ndi pidalonga Yahova: “Iwe unadzadzindikira kuti ndine Yahova+ kubulukira mu pinthu pinafuna ine kucita. Ndinamenya madzi a nkulo wa Nilo na ndodo iri mʼmanja mwanga, natenepa madzi anewa anadzacinja kudza ciropa. 18 Penepo ntsomba* ziri mu nkulo wa Nilo zinadzafa, pontho nkulo wa Nilo unadzanunkha, natenepa Aejitu nee anakwanisa kumwa madzi a mu nkulo wa Nilo.”’”

19 Buluka penepo Yahova apanga Mose: “Panga Aroni kuti: ‘Kwata ndodo yako mbuithonyeza madzi a mu dziko ya Ejitu,+ mikulo yonsene, magowa onsene,* mathawala+ onsene na mbuto zonsene zinakoyerwa madzi, toera acinje kudza ciropa.’ Pontho munadzaoneka ciropa mu dziko yonsene ya Ejitu, ngakhale mu pyombo pya matabwa na pya miyala.” 20 Mwakukhonda dembuka Mose na Aroni acita pidapangwa iwo na Yahova. Iye athukula ndodo yace mbamenya madzi a mu Nkulo wa Nilo pamaso pa Farau na atumiki ace. Natenepa madzi onsene a mu nkulo unoyu acinjika kudza ciropa.+ 21 Ntsomba zikhali mu nkulo zafa,+ nkulo mbutoma kununkha. Aejitu nee akhakwanisabve kumwa madzi a mu nkulo wa Nilo,+ pontho madzi a mu dziko yonsene ya Ejitu acinjika kudza ciropa.

22 Mbwenye anyantsembe akulotera a mu Ejitu acitambo pibodzi pyene na mphambvu za ungʼanga+ wawo, natenepa Farau apitiriza kuumisa ntima wace, mbakhonda kubvesera pidalonga Mose na Aroni, mwakubverana na pidalonga+ Yahova. 23 Buluka penepo Farau abwerera kunyumba kwace, mbapwaza pinthu pidaona iye. 24 Natenepa Aejitu onsene akhakumba micera nʼkhundu mwa nkulo wa Nilo toera kusaka madzi akumwa, thangwi nee akhakwanisa kumwa madzi a mu nkulo wa Nilo. 25 Kubulukira pa ntsiku idacinja Yahova madzi a mu Nkulo wa Nilo kudza ciropa, papita ntsiku zinomwe.

8 Buluka penepo Yahova apanga Mose: “Ndoko kuna Farau mbumpanga kuti: ‘Ipi ndi pidalonga Yahova: “Siya mbumba yanga iende toera inditumikire.+ 2 Ungapitiriza kukhonda kuasiya toera aende, ndinabweresa muliri wa matesi+ mu dziko yako. 3 Nkulo wa Nilo unadzala na matesi, mbapita nʼnyumba mwako, nkwartu mwako, patalimba pako, nʼnyumba za atumiki ako na za mbumba yako, munaotcera imwe mikate na mu pyombo pinakanyira* imwe mikate.+ 4 Matesi anewa anabwera kuna iwe, kuna mbumba yako na kuna atumiki ako onsene.”’”

5 Buluka penepo Yahova apanga Mose: “Panga Aroni kuti: ‘Kwata ndodo yako mbuithonyeza ku mikulo, ku magowa a nkulo wa Nilo na ku mathawala, toera matesi abuluke mwenemu abwere mu dziko ya Ejitu.’” 6 Penepo Aroni akwata ndodo yace mbaithonyeza ku madzi a mu Ejitu, natenepa matesi atoma kubuluka, mbadzadza dziko ya Ejitu. 7 Mbwenye anyantsembe akulotera acitambo pibodzi pyene na mphambvu za ungʼanga wawo, mbabweresambo matesi mu dziko ya Ejitu.+ 8 Penepo Farau acemera Mose na Aroni mbaapanga: “Dembeterani Yahova toera abuluse matesi kuna ine na kuna mbumba yanga,+ thangwi ine ndisafuna ndisiye mbumba toera iende kapereke ntsembe kuna Yahova.” 9 Penepo Mose apanga Farau: “Longani ndimwe kuti ndisafunika kudembetera lini kuna Mulungu toera abuluse matesi kuna imwe, kuna atumiki anu, kuna mbumba yanu na nʼnyumba zanu. Mbwenye matesi anapitiriza mu Nkulo wa Nilo.” 10 Penepo Farau atawira: “Mangwana.” Natenepa Mose alonga: “Pinacitika mwakubverana na pidalonga imwe toera mudziwe kuti nkhabepo unango ninga Yahova Mulungu wathu.+ 11 Matesi anadzabuluka kuna imwe, nʼnyumba zanu, kuna atumiki anu na kuna mbumba yanu. Mbwenye matesi anapitiriza mu nkulo wa Nilo.”+

12 Natenepa Mose na Aroni abuluka pana Farau, pontho Mose adembetera kuna Yahova toera abuluse matesi adabweresa iye kuna Farau.+ 13 Penepo Yahova acita ninga pidaphemba Mose, matesi mbatoma kufa mʼmanyumba, mʼmathando a* nyumba na mʼminda. 14 Aejitu agumanya matesi anewa mʼmikuku mizinji, dziko mbitoma kununkha. 15 Pidaona Farau kuti muliri wa matesi wamala, iye aumisa ntima wace+ mbakhonda kubvesera Mose na Aroni, ninga pikhadalonga Yahova.

16 Buluka penepo, Yahova apanga Mose: “Panga Aroni kuti: ‘Kwata ndodo yako mbumenya pfumbi ya mataka, pfumbi ineyi inadzasanduka kudza imbu mu dziko yonsene ya Ejitu.’” 17 Natenepa iwo acita pyenepi. Aroni alamusa ndodo yace mbamenya pfumbi ya mataka, penepo imbu zabwera kuna anthu na pinyama. Pfumbi yonsene ya mu dziko ya Ejitu+ yacinja kudza imbu. 18 Anyantsembe akulotera ayeserambo kucita pibodzi pyene toera kucita imbu na mphambvu za ungʼanga+ wawo, mbwenye iwo nee akwanisa. Imbu zapitiriza kuluma anthu na pinyama. 19 Penepo anyantsembe akulotera apanga Farau: “Pyenepi pyacitika na mphambvu za Mulungu!”*+ Mbwenye Farau apitiriza kuumisa ntima wace mbakhonda kubvesera Mose na Aroni, ninga pidalonga Yahova.

20 Penepo Yahova apanga Mose: “Mangwana namacibese kakamwe, lamuka uende kaonane na Farau. Mu ndzidzi unabuluka iye toera kuenda ku nkulo, mpange kuti: ‘Ipi ndi pidalonga Yahova: “Siya mbumba yanga iende toera inditumikire. 21 Mbwenye ungakhonda kusiya kuti mbumba yanga iende, ndinatumiza ntcentce zikulu* kuna iwe, kuna atumiki ako, kuna mbumba yako na nʼnyumba zanu. Ntcentce zenezi zinadzala nʼnyumba za mu Ejitu, pontho izo zinadzala pantsi ponsene panaponda iwo.* 22 Pa ntsiku ineyi, ndinadzapambula cisa ca Gozeni, kule kunakhala mbumba yanga. Kweneko+ nee kunaoneka ntcentce zenezi, natenepa iwe unadzadziwa kuti ine Yahova ndiri mu dziko ino.+ 23 Pontho ndinadzasiyanisa mbumba yanga na mbumba yako. Pyenepi pinadzacitika mangwana.”’”

24 Natenepa Yahova acitadi pyenepi. Ntcentce zizinji zapita nʼnyumba ya Farau, nʼnyumba za atumiki ace na mu dziko yonsene ya Ejitu.+ Dziko yonsene ikhadadzala na ntcentce+ zenezi. 25 Pakumalisa, Farau acemera Mose na Aroni mbaapanga: “Ndokoni kapereke ntsembe kuna Mulungu wanu mu dziko ino.” 26 Mbwenye Mose alonga: “Si pyadidi tayu kucita pyenepi thangwi ntsembe zinafuna kupereka ife kuna Yahova Mulungu wathu, ndi zakunyanyasa kuna Aejitu.+ Tingapereka ntsembe zakuti ndi zakunyanyasa pamaso pa Aejitu, kodi iwo nee anatiponyera miyala? 27 Ife tinacita ulendo wa ntsiku zitatu nʼthando, kweneko tinadzapereka ntsembe kuna Yahova Mulungu wathu, ninga mudatipangira iye.”+

28 Mbwenye Farau alonga: “Ndinakusiyani toera muende kapereka ntsembe kuna Yahova Mulungu wanu nʼthando. Mbwenye lekani kuenda kutali. Dembeterani kuna Mulungu wanu toera ndibverwe ntsisi.”+ 29 Penepo Mose alonga: “Cincino ndiri kubuluka pamaso panu, ndinadembetera kuna Yahova, pontho mangwana ntcentce zinabuluka pana imwe Farau, pana atumiki anu na mbumba yanu. Mbwenye imwe Farau lekani kutinyengeza pontho,* mbamukhonda kusiya mbumba toera iende kapereke ntsembe kuna Yahova.”+ 30 Mose abuluka pana Farau mbaenda kadembetera Yahova.+ 31 Natenepa Yahova acita mwakubverana na mafala a Mose, pontho ntcentce zabuluka kuna Farau, kuna atumiki ace na kuna mbumba yace. Nee ntcentce ibodzi ikhadasala. 32 Mbwenye Farau aumisa pontho ntima wace mbakhonda kusiya mbumba toera iende.

9 Natenepa Yahova apanga Mose: “Ndoko kuna Farau mbumpanga tenepa: ‘Ipi ndi pidalonga Yahova Mulungu wa Ahebheri: “Siya mbumba yanga iende toera inditumikire.+ 2 Mbwenye iwe ungakhonda kuisiya toera iende, mbupitiriza kuipingiza, 3 dziwa kuti djanja ya Yahova+ inadzapha pifuyo pyako. Panadzaoneka muliri+ unafuna kuthabusa makavalo ako, maburu ako, makamelo ako, ngʼombe zako na mabira ako. 4 Mbwenye Yahova anadzasiyanisa pifuyo pya Aizraeli na pya Aejitu, nee cifuyo cibodzi ca Aizraeli cinadzafa.”’”+ 5 Kusiyapo pyenepi, Yahova akhazikisa ndzidzi, mbalonga: “Mangwana Yahova anacita pyenepi mu dziko ino.”

6 Mangwana mwace Yahova acitadi pyenepi, ntundu onsene wa pifuyo pya Aejitu pyatoma kufa,+ mbwenye nee cifuyo cibodzi ca Aizraeli cafa. 7 Farau pidatuma iye atumiki ace toera kuenda kaona, iwo aona kuti nee cifuyo cibodzi ca Aizraeli cafa. Ngakhale tenepo, Farau apitiriza kuumisa ntima wace, mbakhonda kusiya mbumba toera iende.+

8 Yahova apanga Mose na Aroni: “Dzadzani manja anu na dotha ya pa mbuto inapisirwa mabhuloko,* pontho Mose asafunika kuiponya kudzulu pamaso pa Farau. 9 Dotha ineyi inadzakhala pfumbi mu dziko yonsene ya Ejitu, pontho inabweresa mapute autosi mʼmanungo mwa anthu na pinyama mu dziko yonsene ya Ejitu.”

10 Natenepa iwo akwata dotha pa mbuto inapisirwa mabhuloko,* mbalimira pamaso pa Farau, penepo Mose aiponya kudzulu mbibweresa mapute autosi mʼmanungo mwa anthu na mwa pinyama. 11 Anyantsembe akulotera akhacimwana kuenda kaonana na Mose thangwi iwo pabodzi na Aejitu+ onsene akhali na mapute. 12 Mbwenye Yahova atawirisa kuti Farau aumise pontho ntima wace, natenepa iye nee abvesera Mose na Aroni, mwakubverana na pikhadalonga Yahova kuna Mose.+

13 Yahova apanga Mose: “Lamuka mangwana namacibese kakamwe toera uende kuna Farau, pontho mpange kuti: ‘Ipi ndi pidalonga Yahova Mulungu wa Ahebheri: “Siya mbumba yanga toera iende kanditumikire. 14 Cincino ndiri kuponya miliri yanga yonsene kuna iwe, kuna atumiki ako na mbumba yako, toera iwe udziwe kuti nkhabepo unango wakulandana na ine pa dziko yonsene yapantsi.+ 15 Ine mbidafuthula kale djanja yanga toera kukutcunyusa na muliri, iwe na mbumba yako; pontho iwe mbudafudzwa kale pa dziko yapantsi. 16 Mbwenye ine ndakusiya mpaka lero toera ndikupangize mphambvu zanga, pontho toera dzina yanga idziwiswe pa dziko yonsene yapantsi.+ 17 Mbwenye iwe usapitiriza kucita pinthu mwakudzikuza kuna mbumba yanga, mbukhonda kuitawirisa toera iende. 18 Mangwana pa ndzidzi ninga uno, ndinabvumbisa matalala makulu kakamwe akuti cipo aoneka kale mu dziko ya Ejitu. 19 Natenepa, tuma anthu toera aende kabuluse pifuyo na pinthu pyako pyonsene piri kumunda. Anthu onsene na pinyama pyonsene pinafuna kugumanika kumunda, pingakhonda kupitiswa nʼnyumba, pinaphiwa na matalala angabvumba.”’”

20 Pakati pa atumiki a Farau, onsene akuti akhagopa mafala a Yahova, mwakucimbiza abweresa anyabasa awo na pifuyo pyawo mbapipitisa nʼnyumba, 21 mbwenye onsene adakhonda kubvera mafala a Yahova, asiya anyabasa awo na pifuyo pyawo kumunda.

22 Penepo Yahova apanga Mose: “Thukula djanja yako kudzulu toera matalala abvumbe mu dziko yonsene ya Ejitu,+ kuna anthu, pinyama na pinthu pyonsene piri mʼminda mu dziko ya Ejitu.”+ 23 Natenepa, Mose athukula ndodo yace kudzulu, penepo Yahova acitisa kuti kuoneke njazi na matalala; moto* watcita pa dziko yapantsi, pontho Yahova abvumbisa matalala mu dziko ya Ejitu. 24 Matalala agwa na kucetuma, pontho madzi a matalala anewa akhali amphambvu kakamwe. Cipo aoneka kale matalala ninga anewa mu dziko ya Ejitu.+ 25 Matalala anewa apha pinthu pyonsene pikhali mʼminda mu dziko ya Ejitu, kutomera anthu mpaka pinyama, pontho matalala afudza mbeu zonsene zikhali mʼminda na miti yonsene.+ 26 Basi ene kucisa ca Gozeni, kule kukhali Aizraeli, ndiko kudakhonda kugwa matalala.+

27 Penepo Farau acemeresa Mose na Aroni mbaapanga: “Cincino ndisatawira kuti ndadawa. Yahova ndi wakulungama, ine na mbumba yanga tadawa. 28 Dembeterani kuna Yahova toera njazi na matalala pimale. Buluka penepo ndinakusiyani kuti muende, pontho nee munadzakhalabve muno.” 29 Natenepa Mose ampanga: “Ndingabuluka mu nzinda, ndinathukula manja anga kuna Yahova. Penepo njazi zinamala, pontho matalala nee anagwabve, toera imwe mudziwe kuti dziko yapantsi ndi ya Yahova.+ 30 Ngakhale tenepo, ine ndisadziwa kuti imwe na atumiki anu nee munadzagopa Yahova Mulungu.”

31 Linyu* na sevadha pyamala kufudzwa, thangwi sevadha akhali na ndzeti, pontho linyu ikhali na maluwa. 32 Mbwenye tirigu na espelta* nee pyafudzwa thangwi pisatokota mwakudembuka. 33 Mose abuluka pamaso pa Farau, pontho abuluka mu nzinda; iye athukula djanja yace kuna Yahova, penepo njazi na matalala pyamala, pontho madzi alimira kubvumba.+ 34 Farau pidaona iye kuti madzi, matalala na njazi pyamala, adawa pontho mbaumisa ntima wace,+ iye pabodzi na atumiki ace. 35 Farau apitiriza kuumisa ntima wace, pontho iye nee asiya Aizraeli toera aende, ninga pikhadalonga Yahova kuna Mose.+

10 Natenepa Yahova apanga Mose: “Ndoko kuna Farau, thangwi ine ndatawirisa kuti iye na atumiki ace aumise mitima yawo,+ toera ndikwanise kumpangiza pirengo* pyanga pamaso pace.+ 2 Pontho toera imwe mukwanise kulonga kuna ananu na adzukulu anu kutcunyusa kudacita ine Aejitu na pirengo* pidacita ine pakati pawo.+ Mwandimomwene imwe munadzadziwa kuti ine ndine Yahova.”

3 Natenepa, Mose na Aroni aenda kuna Farau mbampanga kuti: “Ipi ndi pidalonga Yahova Mulungu wa Ahebheri: ‘Unakhonda kundibvera mpaka lini?+ Siya mbumba yanga iende toera inditumikire. 4 Thangwi ungakhonda kusiya mbumba yanga toera iende, mangwana ndinabweresa anyadzombe* mu dziko yako. 5 Anyadzombe anadzaphimbira dziko yonsene, natenepa nee munakwanisa kuona mataka. Iwo anadzadya pyonsene pidakhonda kufudzwa na matalala, pontho anadzadya miti yonsene iri mʼmunda+ mwako. 6 Anyadzombe anadzala nʼnyumba zako, nʼnyumba za atumiki ako na nʼnyumba za Aejitu onsene, munjira yakuti anyakubalako na ayavu ako cipo aona kale pyenepi, kutomera ntsiku idabalwa iwo mu dziko ino mpaka lero.’”+ Penepo Mose azungunuka mbabuluka pamaso pa Farau.

7 Penepo Farau apangwa na atumiki ace: “Mamuna unoyu anatinentsa* mpaka lini? Siyani anthu anewa toera aende katumikira Yahova Mulungu wawo. Kodi nee mukuona kuti dziko ya Ejitu yamala kufudzwa?” 8 Natenepa Mose na Aroni aendeswa pontho kuna Farau, penepo iye aapanga: “Ndokoni, katumikireni Yahova Mulungu wanu. Makamaka mbani anafuna kuenda?” 9 Mose atawira: “Tinaenda na aphale athu, atsikana athu, ankhalamba athu, anathu amuna na akazi, mabira athu na ngʼombe zathu,+ thangwi tinadzacita phwando toera kusimba Yahova.”+ 10 Iye aapanga: “Ndingakusiyani toera muende pabodzi na ananu, mwandimomwene Yahova ali na imwe!+ Pisaoneka pakweca kuti imwe musafuna kucita pinthu pyakuipa. 11 Nkhabe! Basi ene amuna ndiwo anafunika kuenda toera atumikire Yahova, thangwi ndi pyenepi pidaphemba imwe.” Natenepa iwo athamangiswa pamaso pa Farau.

12 Yahova apanga Mose: “Lamusa djanja yako mbuthonya dziko ya Ejitu toera kucemera anyadzombe, abwere mu dziko yonsene ya Ejitu toera adye tsanga na mbeu za mu dziko ineyi, pyonsene pidakhonda kufudzwa na matalala.” 13 Mwakucimbiza Mose athonyeza ndodo yace ku dziko ya Ejitu, Yahova asosesa mphepo yakumabulukiro a dzuwa, mbipepesa dziko ya Ejitu pa ntsiku ineyi, masiku na masikati. Pidaca kunja, mphepo yakumabulukiro a dzuwa yabweresa anyadzombe. 14 Anyadzombe abwera mu dziko yonsene ya Ejitu mbaenda mupisa pyonsene pya Ejitu.+ Ukhali muliri wakugopswa kakamwe;+ cipo aoneka kale anyadzombe azinji kakamwe ninga anewa, pontho nkhabe kudzaonekabve azinji kakamwe ninga anewa. 15 Iwo aphimbira dziko yonsene, pontho dziko yonsene ikhali na cidima thangwi ya anyadzombe anewa. Iwo adya tsanga, mbeu na misapo yonsene ya mʼmiti idakhonda kufudzwa na matalala. Pontho mu dziko yonsene ya Ejitu, nee tsamba ibodzi iwisi yasalikira mʼmiti, nee tsanga iwisi.

16 Natenepa, mwakucimbiza Farau acemera Mose na Aroni mbaapanga: “Ndadawa kuna Yahova Mulungu wanu, pontho ndadawirambo imwe. 17 Cincino ndaphata miyendo, ndilekerereni madawo anga kabodzi basi, pontho dembeterani Yahova Mulungu wanu toera andibulusire muliri unoyu wakugopswa.” 18 Natenepa Mose abuluka pamaso pa Farau mbaenda kadembetera Yahova.+ 19 Penepo Yahova acinja khundu ikhapepesa mphepo, mbatomesa mphepo yakuwanga ikhabuluka kumadokero a dzuwa, mphepo ineyi yakwata anyadzombe mbaaponya mʼBara Yakufuira. Nee nyadzombe mʼbodzi adasala mupisa pyonsene pya Ejitu. 20 Mbwenye Yahova atawirisa kuti Farau aumise ntima wace,+ pontho iye nee asiya Aizraeli toera aende.

21 Penepo Yahova apanga Mose: “Lamusa djanja yako uthonye kudzulu toera cioneke cidima mu dziko ya Ejitu, cidima cikulu kakamwe cakuti bwerani mudzaone.” 22 Mwakucimbiza Mose alamusa djanja yace mbathonya kudzulu, penepo kwaoneka cidima cikulu kakamwe mu dziko yonsene ya Ejitu mu ntsiku zitatu.+ 23 Iwo nee akhakwanisa kuonana unango na ndzace, pontho mu ntsiku zitatu nee mʼbodzi adabuluka pa mbuto ikakhala iye; mbwenye Aizraeli onsene akhali na ceza mu mbuto zikakhala iwo.+ 24 Penepo Farau acemera Mose mbampanga: “Ndokoni, katumikireni Yahova.+ Ndokoni pabodzi na ananu, mbwenye mabira anu na ngʼombe zanu zinasala.” 25 Mbwenye Mose antawira: “Imwe musafunikambo kutipasa* pinyama toera tipipereke ninga miyoni na ntsembe zakupiswa kuna Yahova Mulungu wathu.+ 26 Pifuyo pyathu pinaenda pabodzi na ife. Nee cinyama cibodzi cinafuna kusala,* thangwi ife tinadzapereka pinango toera kulambira Yahova Mulungu wathu, pontho ife nee tisadziwa kuti ndi pinyama pipi pinafuna kupereka ife toera kulambira Yahova mpaka tingafika kweneko.” 27 Mbwenye Yahova atawirisa kuti Farau aumise ntima wace, pontho iye nee aatawirisa kuti aende.+ 28 Farau ampanga: “Buluka pamaso panga! Leka kuyesera kuona pontho nkhope yanga,* thangwi pa ntsiku inafuna kuona iwe nkhope yanga,* unadzafa.” 29 Penepo Mose antawira: “Ndinacita pidalonga imwe. Nee ndinayesera kuona pontho nkhope yanu.”

11 Yahova apanga Mose: “Ndiri kubweresa muliri unango kuna Farau na dziko ya Ejitu. Buluka penepo iye anadzakusiyani toera mubuluke mu dziko ino.+ Farau angakusiyani toera mubuluke mu dziko ino, anacita kukuthamangisani.+ 2 Cincino panga mbumba, amuna na akazi ene kuti asafunika kuphemba pinthu pya parata na pya ouro+ kuna andzawo anakhala na iwo pacisa.” 3 Yahova acitisa kuti mbumba itsalakanwe mwadidi na Aejitu. Kusiyapo pyenepi, Mose akhalemedzwa kakamwe mu dziko ya Ejitu, na atumiki a Farau pabodzi na Aejitu onsene.

4 Buluka penepo Mose alonga: “Ipi ndi pidalonga Yahova: ‘Pa tcititciti ndinadzapita pakati pa Aejitu,+ 5 penepo ana onsene autombo a dziko ya Ejitu anadzafa,+ kutomera mwana wautombo wa Farau wakuti ali pa mpando waumambo, mpaka mwana wautombo wa nyabasa wankazi anapeya pa libwe, pontho ana onsene autombo a pifuyo+ anadzafambo. 6 Mu dziko yonsene ya Ejitu anthu anadzalira kakamwe, munjira yakuti cipo alira kale tenepo, pontho nee anadzalira pontho tenepo.+ 7 Mbwenye nee cinthu cibodzi cakuipa cinafuna kucitikira Aizraeli, nee mwanambwa mʼbodzi anafuna kuutira iwo na pifuyo pyawo, toera imwe mudziwe kuti Yahova asakwanisa kusiyanisa Aejitu na Aizraeli.’+ 8 Pontho mwakukhonda penula atumiki anu onsene anabwera kuna ine, anandigodamira mbalonga: ‘Ndoko, iwe pabodzi na mbumba yako yonsene.’+ Pyenepi pingamala kucitika ine ndinadzabuluka.” Natenepa Mose abuluka pamaso pa Farau mwakuipirwa kakamwe.

9 Yahova apanga Mose: “Farau nee anadzakubveserani,+ toera pirengo pyanga pithimizirike mu dziko ya Ejitu.”+ 10 Mose na Aroni akhadacita kale pirengo pizinji pamaso pa Farau,+ mbwenye Yahova atawirisa kuti Farau aumise ntima wace, natenepa iye nee asiya Aizraeli toera abuluke mu dziko yace.+

12 Buluka penepo Yahova apanga Mose na Aroni mu dziko ya Ejitu: 2 “Mwezi uno unadzakhala kutoma kwa miyezi kuna imwe. Unadzakhala mwezi wanu wakutoma wa caka.+ 3 Panga mbumba yonsene ya Izraeli: ‘Pa ntsiku khumi ya mwezi uno, mʼbodzi na mʼbodzi wa iwo asafunika asankhulire banja yace mwanabira,+ mwanabira mʼbodzi panyumba ibodzi. 4 Mbwenye khala anthu a pabanja ndi akucepa kakamwe toera kudya okhene mwanabira onsene, iwo asafunika kumudya pabodzi na anthu anakhala dhuzi kakamwe na iwo pacisa, mwakubverana na kunjipa kwa anthu. Musafunika kulengesa anthu toera mugawe mwanabira mwakubverana na numero ya anthu anafuna kumudya. 5 Mwanabira unoyu asafunika kukhala wakusowa cilema,*+ wamamuna, pontho wa caka cibodzi. Munakwanisa kusankhula mwanabira peno mbuzi. 6 Musafunika kukoya cinyama ceneci mpaka pa ntsiku 14 ya mwezi uno,+ pontho banja ibodzi na ibodzi ya mbumba ya Izraeli isafunika kupha mwanabira wawo ncidodo cidima mbacidzati kutoma.*+ 7 Iwo asafunika kukwata ciropa cinango mbacikhwaza pa maaro mawiri a nʼkhundu mwa nsuwo na pa aro ya padzulu pansuwo wa nyumba zinafuna kudyera iwo mwanabira unoyu.+

8 “‘Pa masiku anewa,+ iwo asafunika kudya nyama ineyi. Asafunika kuiotca pa moto, mbaidya na mikate yakusowa pyakutupisa,+ pabodzi na masamba akuwawa.+ 9 Nyama ineyi lekani kuidya iwisi peno yakuphikwa na madzi. Musafunika kuiotca yamumphu pa moto, kuphatanizambo nsolo wace, miyendo yace na pya mʼmimba mwace. 10 Nee musafunika kukoya khundu inango ya nyama ineyi mpaka mangwana mwace, mbwenye ingasala khundu inango mpaka mangwana mwace, musafunika kuipisa pa moto.+ 11 Musafunika kuidya mu ndzidzi wakuti mwamanga sintu yanu ncunu, mwabvala masandalya anu, mbamuphatirira ndodo mʼmanja mwanu; pontho musafunika kuidya mwakucimbiza. Ineyi ndi Paskwa ya Yahova. 12 Thangwi masiku ano ndinadzapita na mu dziko ya Ejitu, ndinadzapha ana autombo onsene a mu dziko ya Ejitu, kutomera anthu mpaka pinyama;+ pontho ndinadzatonga alungu onsene a dziko ya Ejitu.+ Ine ndine Yahova. 13 Ciropa cinadzakhala cidzindikiro mʼmanyumba mwanu munagumanika imwe; ine ndinadzaona ciropa, mbandipita na padzulu panu, natenepa muliri nee unakugwerani toera kukufudzani ndingadzatcunyusa dziko ya Ejitu.+

14 “‘Ntsiku ineyi inadzakhala ya cikumbuso kuna imwe. Kumbukani ntsiku ineyi ninga phwando toera kusimba Yahova ndzidzi onsene mʼmadzindza mwanu. Musafunika kuikumbuka, thangwi unoyu ndi ntemo wakwenda na kwenda. 15 Mu ntsiku zinomwe musafunika kudya mikate yakusowa pyakutupisa.+ Pa ntsiku yakutoma, musafunika kubulusa pyakutupisa pyonsene mʼmanyumba mwanu, thangwi kutomera pa ntsiku yakutoma mpaka pa ntsiku yacinomwe, munthu anafuna kudya cinthu cakutupiswa, asafunika kuphiwa pakati pa Aizraeli. 16 Pa ntsiku yakutoma musafunika kusonkhana* toera kulambira Mulungu, pa ntsiku yacinomwe musafunika kusonkhana pontho. Nee basa ibodzi isafunika kuphatwa mu ntsiku zenezi.+ Basi ene munakwanisa kukhunganya pire pyakuti munthu asafuna kupidya.

17 “‘Musafunika kukumbuka Phwando ya Mikate Yakusowa Pyakutupisa,+ thangwi pa ntsiku ineyi, ine ndinadzabulusa mbumba yanu mu dziko ya Ejitu. Musafunika kukoya ntsiku ineyi ndzidzi onsene mʼmadzindza mwanu ninga ntemo wakwenda na kwenda. 18 Pa ntsiku 14 ya mwezi wakutoma, ncidodo ca ntsiku ineyi, musafunika kudya mikate yakusowa pyakutupisa, mpaka ncidodo+ ca ntsiku 21 ya mwezi unoyu. 19 Mu ntsiku zinomwe, mʼmanyumba mwanu nkhabe funika kuoneka pinthu pyakutupisa, thangwi munthu anafuna kudya pinthu pyakutupiswa, mwakukhonda tsalakana khala iye ndi mulendo peno ndi wa dzindza ya Izraeli,+ asafunika kuphiwa pakati pa mbumba ya Izraeli.+ 20 Nee musafunika kudya pinthu pyakutupiswa. Mʼmanyumba mwanu monsene musafunika kudya mikate yakusowa pyakutupisa.’”

21 Mwakucimbiza, Mose acemera akulu onsene a Izraeli,+ mbaapanga: “Ndokoni, sankhulani cinyama* cibodzi pabanja ibodzi na ibodzi, buluka penepo muciphe ninga ntsembe ya Paskwa. 22 Mungamala musafunika kubvika matsandzo a muti wa isopo mu ciropa ciri mʼbasiya, mukhwaze ciropa pa aro ya padzulu pansuwo na mʼmaaro a nʼkhundu mwa nsuwo wa nyumba; pontho nee mʼbodzi asafunika kubuluka nʼnyumba, mpaka kuca kunja. 23 Penepo Yahova angadzapita toera kupha Aejitu, angaona ciropa pa aro ya padzulu pansuwo na mʼmaaro a nʼkhundu mwa nsuwo, mwandimomwene Yahova anadzapita na padzulu panyumba ineyi, iye nee anadzatawirisa kuti muliri unafuna kupha anthu upite mʼmanyumba mwanu.+

24 “Musafunika kukumbuka ntsiku ineyi; unoyu ndi ntemo wakwenda na kwenda kuna imwe na ananu.+ 25 Mungapita mu dziko inafuna kukupasani Yahova, ninga mudalongera iye, musafunika kupitiriza kukumbuka+ ntsiku ineyi. 26 Pontho ananu angakubvundzani kuti: ‘Thangwi yanji tisacita phwando ineyi?’* + 27 Atawireni kuti: ‘Ineyi ndi ntsembe ya Paskwa inacitira ife Yahova, adapita na padzulu panyumba za Aizraeli ku Ejitu pa ntsiku idapha iye Aejitu, mbwenye nee apha anthu a mʼmanyumba mwathu.’”

Penepo mbumba yagodama mbikotamisa misolo mpaka pantsi. 28 Natenepa, Aizraeli aenda kacita ninga mudalonga Yahova kuna Mose na Aroni.+ Iwo acita sawasawa ninga mudapangirwa iwo.

29 Pa tcititciti, Yahova apha ana autombo onsene mu dziko ya Ejitu,+ kutomera mwana wautombo wa mambo Farau mpaka mwana wautombo wa bitcu wakuti ali nkaidi, pabodzi na ana autombo onsene a pinyama.+ 30 Farau alamuka pa ntsiku ineyi namasiku pabodzi na atumiki ace onsene, kuphatanizambo anthu anango a mu Ejitu, Aejitu akhalira kakamwe, thangwi nee pakhali na nyumba idasowa munthu wakufa.+ 31 Penepo pene Farau acemera Mose na Aroni+ namasiku, mbaapanga: “Lamukani, bulukani pakati pa mbumba yanga, imwe pabodzi na Aizraeli anango. Ndokoni, katumikireni Yahova ninga mudalongera imwe.+ 32 Kwatanimbo mabira anu na mbuzi zanu, ninga mudalongera imwe.+ Mbwenye ndipasenimbo nkhombo.”

33 Pontho Aejitu atoma kukakamiza Aizraeli toera abuluke mwakucimbiza+ mu dziko ya Ejitu, thangwi iwo akhalonga: “Mwandimomwene, tonsene tamala kufa!”+ 34 Natenepa Aizraeli akwata ufa udamala iwo kumunya wakuti ukhadzati kuikhwa pyakutupisa, mabasiya awo akumunyira ufa aapyangirira na nguwo zawo mbaathukula mʼmapewa mwawo. 35 Aizraeli acita pidapangwa iwo na Mose, mbaphemba Aejitu toera aapase pinthu pya parata, pya ouro na nguwo.+ 36 Yahova acitisa kuti Aejitu apangize kukoma ntima kuna Aizraeli, natenepa iwo aapasa pinthu pidaphemba iwo, munjira ineyi iwo atapata Aejitu.+

37 Penepo Aizraeli abuluka ku Ramese+ mbaenda ku Sukoti,+ akhalipo amuna akukwana 600.000 akuti akhafamba na miyendo, nee kulengesa anangʼono.+ 38 Pontho mwinji ukulu wa anthu* akuti nee akhali Aizraeli+ aenda pabodzi na iwo, kuphatanizambo mikumbi mikulu ya mabira, mbuzi na ngʼombe. 39 Na ufa wakumunywa udakwata iwo ku Ejitu, iwo atoma kuotca mikate yakusowa pyakutupisa. Ufa wakumunywa nee ukhali na pyakutupisa thangwi iwo abuluswa mwakucimbiza kakamwe, natenepa nee aona ndzidzi toera kukhunganya pikhafuna iwo kudya nʼnjira.+

40 Ndzidzi udakhala Aizraeli mu dziko ya Ejitu+ ndi pyaka 430.+ 41 Pa ntsiku idafikisa iwo pyaka 430, mbumba yonsene ya Yahova yabuluka mu dziko ya Ejitu. 42 Anewa ndi masiku akuti iwo anadzakumbuka kuabulusa kudacita Yahova mu dziko ya Ejitu. Pa masiku anewa, mbumba yonsene ya Izraeli isafunika kukumbukira Yahova, ndzidzi onsene mʼmadzindza mwawo.+

43 Yahova apanga Mose na Aroni: “Uyu ndi ntemo unalonga pya Paskwa: Nee munthu mʼbodzi wa dziko inango* asafunika kudya Paskwa.+ 44 Mbwenye khala munthu ali na bitcu wamamuna adagulwa na kobiri, musafunika kunsidza.+ Basi ene angamala kusidzwa anakwanisambo kudya Paskwa. 45 Munthu wakudza na nyakucita ganyo-ganyo nee asafunika kuidya. 46 Mwanabira mʼbodzi asafunika kudyiwa panyumba ibodzi basi. Nee musafunika kukwata khundu inango mbamuenda nayo kunja kwa nyumba, pontho lekani kuswa nee gogodo+ ibodzi ya mwanabira unoyu. 47 Mbumba yonsene ya Izraeli isafunika kukumbuka Paskwa. 48 Khala munthu wa dziko inango anakhala pakati panu asafuna kukumbuka Paskwa toera kusimba Yahova, amuna onsene a panyumba pace asafunika kusidzwa. Buluka penepo anakwanisa kufendedzera toera kukumbuka Paskwa, pontho iye anadzakhala ninga munthu adabalwa mu dzindza ya Izraeli. Mbwenye nee munthu mʼbodzi wakukhonda kusidzwa asafunika kudya Paskwa.+ 49 Ntemo ubodzi ene usafunika kuphatisirwa kuna Aizraeli pabodzi na anthu a dziko inango anakhala pakati panu.”+

50 Natenepa, Aizraeli onsene acita ninga mudalonga Yahova kuna Mose na Aroni. Iwo acita sawasawa ninga mudapangirwa iwo. 51 Pa ntsiku ineyi, Yahova abulusa Aizraeli pabodzi na mbumba zawo mu dziko ya Ejitu.

13 Yahova alonga pontho na Mose, mbampanga: 2 “Pereka kuna ine* ana amuna onsene autombo pakati pa Aizraeli. Mwana wakutoma wa munthu peno wa cinyama, ndi wanga.”+

3 Buluka penepo Mose apanga mbumba: “Kumbukani ntsiku ya lero idabuluka imwe mu Ejitu,+ kukakhala imwe mabitcu,* thangwi Yahova akubulusani muno+ na djanja yace yamphambvu. Natenepa lekani kudya cinthu cidaikhwa pyakutupisa. 4 Lero imwe muli kubuluka mu Ejitu, pa mwezi uno wa Abhibhe.*+ 5 Yahova angakupitisani mu dziko ya Akanani, Aeti, Aamori, Aeveu na Ayebusi,+ dziko ya nkaka na uci,+ idapikira iye kuna ambuyanu kuti mbadaipereka kuna imwe,+ penepo munadzakumbuka ntsiku ya lero pa mwezi ninga uno. 6 Mu ntsiku zinomwe musafunika kudya mikate yakusowa pyakutupisa,+ pa ntsiku yacinomwe musafunika kucita phwando toera kusimba Yahova. 7 Musafunika kudya mikate yakusowa pyakutupisa mu ntsiku zinomwe;+ pakati panu+ nkhabe funika kugumanika cinthu cidaikhwa pyakutupisa, pontho mucisa canu consene* nee musafunika kugumanika pinthu pyakutupisa mikate. 8 Pa ntsiku ineyi, musafunika kupanga ananu kuti: ‘Ine ndiri kucita pyenepi thangwi ya pinthu pidandicitira Yahova mu ndzidzi udabuluka ine mu dziko ya Ejitu.’+ 9 Pyenepi pinadzakhala ninga cidzindikiro cidalembwa pa djanja yanu, pontho ninga cikumbuso pa nkhope*+ panu, toera mwambo wa Yahova ukhale pamulomo panu, thangwi Yahova akubulusani mu dziko ya Ejitu na djanja yace yamphambvu. 10 Pyaka pyonsene+ musafunika kucita pinalonga mwambo unoyu pa ndzidzi udakhazikiswa.

11 “Yahova angakupitisani mu dziko ya Akanani, dziko idapikira iye kuna imwe na ambuyanu+ kuti mbadakupasani, 12 musafunika kupereka kuna Yahova ana amuna onsene autombo, kuphatanizambo cinyama canu cimuna cinafuna kutoma kubalwa, pyonsene ndi pya Yahova.+ 13 Musafunika kupereka bira toera kuombola mwanaburu wautombo, mbwenye khala nee musafuna kumuombola, musafunika kukhumula khosi yace. Pontho musafunika kuombola ananu amuna onsene autombo.+

14 “Ananu angakubvundzani kuti: ‘Thangwi yanji tisacita pyenepi?’* Apangeni kuti: ‘Na djanja yace yamphambvu, Yahova atibulusa mu dziko ya Ejitu, kukhali ife mabitcu.*+ 15 Farau pidaumisa iye ntima wace mbakhonda kutisiya toera tibuluke,+ Yahova apha ana autombo onsene mu dziko ya Ejitu, kutomera ana autombo a anthu mpaka ana autombo a pinyama.+ Na thangwi ineyi, pinyama pyautombo pyonsene pyacimuna tisapipereka ninga ntsembe kuna Yahova, pontho tisaombola anathu onsene autombo.’ 16 Pyenepi pinadzakhala ninga cidzindikiro cidalembwa pa djanja yanu na pa nkhope+ panu, thangwi Yahova atibulusa na djanja yace yamphambvu mu dziko ya Ejitu.”

17 Pidatawirisa Farau kuti mbumba iende, Mulungu nee aiendesa na njira ya dziko ya Afilisti, maseze ikhali njira yacigwagwa. Thangwi Mulungu alonga: “Kungaoneka nkhondo, panango mbumba inacinja manyerezero, mbibwerera ku Ejitu.” 18 Natenepa Mulungu acitisa kuti mbumba ipite na njira yakulapha ya kuthando ya Bara Yakufuira.+ Mbwenye Aizraeli abuluka mu dziko ya Ejitu mbafamba mwakupakika mwadidi ninga nsoka wa anyankhondo. 19 Mose akwatambo magogodo a Zuze, thangwi Zuze akhadadumbirisa Aizraeli kuti: “Mwakukhonda penula Mulungu anadzakuphedzani, pontho imwe musafunika kukwata magogodo anga mbamubuluka nawo muno.”+ 20 Iwo abuluka ku Sukoti mbamanga nsasa wawo kucisa ca Etamu kunkhomo kwa thando.

21 Yahova akhaenda patsogolo pawo: Namasikati iye akhaphatisira khole toera kuatsogolera munjira,+ namasiku iye akhaphatisira khole ya moto toera kuamwanikira, natenepa iwo mbadakwanisa kucita ulendo masiku na masikati.+ 22 Khole nee ikhabuluka patsogolo pa mbumba namasikati, pontho khole ya moto nee ikhabulukambo namasiku.+

14 Yahova apanga Mose: 2 “Panga Aizraeli toera abwerere, amange nsasa wawo patsogolo pa Pi-Airoti, pakati pa Migidholi na bara. Musafunika kumanga nsasa wanu cifupi na bara, kutsogolo kwa Bhaale-Zefoni.+ 3 Buluka penepo Farau anadzalonga ipi thangwi ya Aizraeli: ‘Iwo akundzendza-ndzendza mbasowa cakucita mu dziko. Iwo afungirika nʼthando.’ 4 Ine ndinadzatawirisa kuti Farau aumise ntima wace,+ pontho iye anadzakutowererani. Ine ndinadzapasika mbiri ndingakunda Farau na nsoka onsene wa anyankhondo ace;+ mwandimomwene Aejitu anadzadziwa kuti ine ndine Yahova.”+ Natenepa Aizraeli acita pyenepi.

5 Mukupita kwa ndzidzi, Farau mambo wa ku Ejitu apangwa kuti mbumba yathawa. Mwakucimbiza Farau na atumiki ace acinja manyerezero awo thangwi ya Aizraeli,+ mbalonga: “Thangwi yanji tacita pyenepi? Thangwi yanji tatawirisa kuti Aizraeli, mabitcu athu ale aende pyawo?” 6 Natenepa iye akhunganya ngolo zace za nkhondo, mbakwata anyankhondo ace.+ 7 Iye akwata ngolo zadidi kakamwe zakukwana 600 na ngolo zinango zonsene za mu Ejitu, na anyankhondo pa ngolo ibodzi na ibodzi. 8 Natenepa Yahova atawirisa kuti Farau mambo wa ku Ejitu aumise ntima wace, iye atowerera Aizraeli, mu ndzidzi ukhabuluka Aizraeli mwakukhonda gopa.*+ 9 Aejitu aatowerera,+ pontho makavalo onsene akhakwewa ngolo za Farau, anyamakavalo na anyankhondo ace afendedzera Aizraeli pikhali iwo mʼmisasa mwawo cifupi na bara, dhuzi na Pi-Airoti, kutsogolo kwa Bhaale-Zefoni.

10 Pidafendedzera Farau, Aizraeli aona kuti akhatowererwa na Aejitu. Aizraeli agopa kakamwe mbatoma kulira kuna Yahova+ toera kuphemba ciphedzo. 11 Iwo apanga Mose: “Kodi watibweresa kuno toera tifere nʼthando+ muno thangwi ku Ejitu nkhabeko masiye? Ninji pyenepi pidaticitira iwe? Thangwi yanji watibulusa ku Ejitu? 12 Kodi si pyenepi tayu pidakupanga ife ku Ejitu kuti: ‘Tisiye pyathu titumikire Aejitu’? Thangwi mphyadidi kakamwe kwa ife kutumikira Aejitu kupiringana kufera nʼthando muno.”+ 13 Penepo Mose apanga mbumba: “Lekani kugopa.+ Khalani na cinyindiro, pontho onani cipulumuso cinafuna kukupasani Yahova lero.+ Thangwi Aejitu anewa anaona imwe lero, cipo munadzaaona pontho.+ 14 Yahova ndiye anafuna kudzakumenyerani nkhondo,+ imwe munadzamatama mbamukhonda kucita cinthu.”

15 Yahova apanga Mose: “Thangwi yanji usapitiriza kukhuwa kuna ine? Panga Aizraeli kuti alamuke aende. 16 Mbwenye iwe kwata ndodo yako uthonye bara toera igawike, toera Aizraeli akwanise kupita na pa mataka akuuma pakati pa bara. 17 Ine ndinatawirisa kuti Aejitu aumise mitima yawo, natenepa iwo anadzaatowerera; munjira ineyi ndinadzapasika mbiri ndingadzakunda Farau na anyankhondo ace onsene, ngolo zace za nkhondo na anyamakavalo+ ace. 18 Mwandimomwene Aejitu anadzadziwa kuti ine ndine Yahova ndingapasika mbiri pakumala kukunda Farau, ngolo zace za nkhondo na anyamakavalo+ ace.”

19 Buluka penepo, anju adatumwa na Mulungu wandimomwene+ toera kuenda patsogolo pa Aizraeli abuluka mbaenda nduli mwawo, pontho khole yakuti ikhali patsogolo pawo yabwerera nduli, mbilimira nduli mwawo.+ 20 Natenepa khole yalimira pakati, uku anyankhondo a Ejitu uku mbumba ya Izraeli.+ Khole yacitisa kuti kukhundu ya Aejitu kukhale na cidima, mbwenye kukhundu ya Aizraeli kuoneke ceza namasiku.+ Na thangwi ineyi, nsoka ubodzi nee wakwanisa kufendedzera nsoka unango masiku anewa onsene.

21 Mose athonya bara+ na ndodo yace; Yahova asosesa mphepo yakuwanga yakumabulukiro a dzuwa yakuti yaphuphudza na kupepesa, madzi a mʼbara agawika+ mʼmakhundu mawiri, pakati mbapasala mataka akuuma.+ 22 Natenepa Aizraeli apita na pakati pa bara pa mataka akuuma,+ madzi akhali ninga mpanda kukhundu yawo yamadyo na yabzwere.+ 23 Aejitu aatowerera, pontho makavalo onsene a Farau, ngolo zace za nkhondo na anyamakavalo ace atoma kuatowerera nduli mwawo mʼbara.+ 24 Pa ndzidzi unalira madzongwe akumalisa,* Yahova ayangʼana Aejitu kubulukira pa khole+ na pa khole ya moto, mbadzudzumisa anyankhondo a Ejitu. 25 Iye apitiriza kuleresa maroda a ngolo zawo, natenepa iwo akhanentseka toera kuzifambisa, pontho Aejitu akhalonga: “Tendeni tithawe Aizraeli, thangwi Yahova ali kumenya nkhondo na ife Aejitu+ toera kuphedza Aizraeli.”

26 Yahova apanga Mose: “Lamusa djanja yako uthonye bara toera madzi aphatane, abize Aejitu, ngolo zawo za nkhondo na anyamakavalo awo.” 27 Mwakucimbiza Mose alamusa djanja yace mbathonya bara, mukhaca kunja madzi abwerera pontho ninga mukhali iwo kale. Aejitu ayesera kuthawa madzi, mbwenye Yahova aabiza mʼmadzi pakati pa bara.+ 28 Madzi anewa abwerera mbabiza ngolo za nkhondo, anyamakavalo na anyankhondo onsene a Farau adatowerera+ Aizraeli pakati pa bara. Nkhabepo adapulumuka,+ nee mʼbodzi wa iwo.

29 Mbwenye Aizraeli awambuka na pa mataka akuuma pakati pa bara,+ madzi akhali ninga mpanda kukhundu yawo yamadyo na yabzwere.+ 30 Natenepa, pa ntsiku ineyi Yahova apulumusa Aizraeli mʼmanja mwa Aejitu,+ Aizraeli aona Aejitu adafa pagombe ya bara. 31 Aizraeli aonambo mphambvu zikulu zidaphatisira Yahova toera kukunda Aejitu, natenepa mbumba yatoma kugopa Yahova, mbakhulupira Yahova pabodzi na Mose,+ ntumiki wace.

15 Pa ndzidzi unoyu, Mose na Aizraeli aimbira Yahova nyimbo iyi:+

“Ndinaimbira Yahova, thangwi iye akuzwa kakamwe.+

Iye abiza mʼbara+ makavalo na anyamakavalo.

 2 Yahova* ndi kuwanga kwanga na mphambvu yanga, thangwi iye ndi mpulumusi+ wanga.*

Iye ndi Mulungu wanga, ine ndinansimba;+ iye ndi Mulungu wa pai wanga,+ ine ndinampasa mbiri.*+

 3 Yahova ndi nyankhondo wamphambvu.+ Dzina yace ndi Yahova.+

 5 Iwo abizwa na mabimbi a mʼbara; iwo alirima ninga mwala+ mpaka pantsi.

 9 Nyamalwa alonga: ‘Ndinaatowerera, mbandiaphata!

Ndinatapata pinthu pyawo mbandipigawa mpaka ndingakwana* napyo!

Ndinabulusa supada yanga! Djanja yanga inadzaafudza!’+

11 Yahova, ndi mulungu upi unango adalandana na imwe?+

Mbani unango wakucena kakamwe+ ninga imwe?

Imwe, wakuti mwathema kuimbirwa nyimbo toera kulemedzwa na kusimbwa, imwe wakuti musacita pinthu pyakudzumisa.*+

12 Imwe mwalamusa djanja yanu, iwo mbamezwa+ na mataka.

Anthu onsene a ku Kanani anadzafewa manungo.+

16 Iwo anadzaphatwa na kugopa, mbatetemera.+

18 Yahova anadzatonga ninga mambo kwenda na kwenda.+

20 Penepo Miriya mprofeta wankazi, wakuti akhali mʼbale wace Aroni, akwata pandero* mʼmanja mwace, iye na akazi onsene atoma kuimba pabodzi pene, mbabvina. 21 Miriya apitiriza kutawira nyimbo ya amuna, mbaimba:

“Imbirani Yahova, thangwi iye akuzwa kakamwe.+

Iye abiza mʼbara makavalo na anyamakavalo.”+

22 Mukupita kwa ndzidzi, Mose atsogolera Aizraeli mbabuluka pa Bara Yakufuira; iwo aenda kuthando ya Suri, afamba nʼthando ineyi mu ntsiku zitatu, mbwenye nee agumana madzi. 23 Iwo afika kucisa cinacemerwa Mara,*+ mbwenye nee akwanisa kumwa madzi a ku Mara, thangwi akhawawa. Na thangwi ineyi, mbuto ineyi iye aithula Mara. 24 Natenepa, mbumba yatoma kudungunyira Mose,+ mbilonga: “Tinamwanji?” 25 Mose aphemba ciphedzo kuna Yahova,+ penepo Yahova ampangiza muti. Pidauponya iye mʼmadzi, madzi adzakhala adidi toera kumwa.

Kweneko Mulungu akhazikisa ntemo kuna iwo na pitsogolero toera kuphatisirwa pakutonga, pontho ndi kweneko kudaayesera iye.+ 26 Iye aapanga: “Mungabvera na ntima onsene fala ya Yahova Mulungu wanu, mbamucita pinthu pyadidi pamaso panga, pontho mungabvesesa mwadidi matongero anga, mbamubvera mitemo yanga,+ ine nee ndinadzakutcunyusani na mautenda adatcunyusa na ine Aejitu,+ thangwi ine Yahova, ndine anakuwangisani.”+

27 Buluka penepo iwo afika ku Elimu, kweneko kukhali micera 12 ya madzi na miti 70 ya micindu. Kweneko iwo amanga misasa yawo cifupi na madzi.

16 Pidabuluka iwo ku Elimu, pa ntsiku 15 ya mwezi waciwiri pakumala kubuluka mu dziko ya Ejitu, mbumba yonsene ya Aizraeli yafika kuthando ya Sini+ inagumanika pakati pa Elimu na Sinai.

2 Penepo mbumba yonsene yatoma kudungunyira Mose na Aroni nʼthando.+ 3 Aizraeli akhaapanga: “Mbapidakhala mwadidi khala taphiwa na djanja ya Yahova mu dziko ya Ejitu, pikhali ife nawa dhuzi na pa pikalango pya nyama,+ pikhadya ife mikate mbatikhuta nayo. Mbwenye imwe mwatibweresa nʼthando ino toera muphese mbumba yonsene* na njala.”+

4 Penepo Yahova apanga Mose: “Ndinakutumizirani mikate buluka kudzulu,+ mʼbodzi na mʼbodzi pakati pa mbumba asafunika aende kagumanye pinafuna iye kudya pa ntsiku.+ Ndiri kucita pyenepi toera ndione khala iwo anabvera* mitemo yanga peno nkhabe.+ 5 Mbwenye pa ntsiku yacitanthatu,+ asafunika akhunganye pidagumanya iwo, pontho pisafunika kunjipa kawiri kupiringana pinagumanya iwo pa ntsiku zinango.”+

6 Natenepa, Mose na Aroni apanga Aizraeli onsene: “Mwandimomwene maulo ano munadzadziwa kuti ndi Yahova adakubulusani mu dziko ya Ejitu.+ 7 Mangwana namacibese imwe munadzaona mbiri ya Yahova, thangwi Yahova abva kudungunya kudacita imwe kuna iye. Ife ndife ani toera mutidungunyire?” 8 Mose athimiza kulonga: “Yahova angakupasani nyama toera mudye maulo ano, mangwana namacibese mbakupasani nkate toera mudye mbamukhuta, imwe munadzaona kuti Yahova abva kudungunya kudacita imwe kuna iye. Mbwenye ife ndife ani? Imwe nee muli kudungunyira ife, mbwenye muli kudungunyira Yahova.”+

9 Penepo Mose apanga Aroni: “Panga mbumba yonsene ya Izraeli kuti: ‘Bwerani pamaso pa Yahova, thangwi iye abva kudungunya kwanu.’”+ 10 Aroni pidamala iye kwene kulonga na mbumba yonsene ya Izraeli, iwo azungunuka mbayangʼana kuthando, penepo mbiri ya Yahova yaonekera pa khole.+

11 Yahova alonga pontho na Mose, mbampanga: 12 “Ine ndabva kudungunya kwa Aizraeli.+ Natenepa apange: ‘Ncidodo imwe munadzadya nyama, mangwana namacibese munadya mikate mbamukhuta nayo,+ mwandimomwene imwe munadzadziwa kuti ine ndine Yahova Mulungu wanu.’”+

13 Pikhadoka dzuwa, abwera makwerekwece* mbadzala pa nsasa onsene,+ mangwana mwace namacibese, nsasa onsene ukhadazungulirwa na bume. 14 Pidauma bume, pa mataka a nʼthando pakhali na pinthu pingʼono ninga mbeu,+ pyakucena ninga matalala. 15 Aizraeli pidaona iwo pyenepi, atoma kubvundzana unango na ndzace: “Ninji ipi?” Thangwi iwo nee akhapidziwa. Mose aapanga: “Ceneci ndi cakudya cidakupasani Yahova.+ 16 Ipi ndi pidalonga Yahova: ‘Mʼbodzi na mʼbodzi mbagumanye mwakubverana na pinafuna iye kudya. Musafunika kugumanya pinthu pyakuti pinakwana mu combo ca malitru mawiri*+ toera kupasa mʼbodzi na mʼbodzi mwakubverana na numero ya anthu ali pa nsasa pace.’” 17 Aizraeli atoma kucita pyenepi; anango agumanya pizinji, anango agumanya pangʼono. 18 Pikhapima iwo na nʼdida wa malitru mawiri,* ale adagumanya pizinji nee pyasala, alembo adagumanya pangʼono nee pikhaacepera.+ Mʼbodzi na mʼbodzi agumanya mwakubverana na pikhadya iye.

19 Penepo Mose aapanga: “Nee mʼbodzi asafunika kusiya pinango mpaka mangwana namacibese.”+ 20 Mbwenye iwo nee abvera pidalonga Mose. Anthu anango pidapikoya iwo mpaka mangwana mwace namacibese, pire pidakoya iwo pyabuluka mpfunye mbapinunkha; natenepa Mose aipirwa na iwo. 21 Iwo akhapilokota ntsiku zonsene namacibese, mʼbodzi na mʼbodzi mwakubverana na pikhadya iye. Dzuwa ingapisa, pikhanyunguluka.

22 Pa ntsiku yacitanthatu, mʼbodzi na mʼbodzi wa iwo agumanya pinthu pyakuti mbapidadzala kawiri+ mu combo ca malitru mawiri. Natenepa, atsogoleri onsene a mbumba aenda kalonga pyenepi kuna Mose. 23 Penepo Mose aapanga: “Ndi pyenepi pidalonga Yahova. Mangwana inadzakhala ntsiku yakupuma,* yakuti ndi Sabudu ya Yahova.+ Otcani pinafuna imwe kuotca, phikani pire pinafuna imwe kuphika;+ pinafuna kusala, pikoyeni mpaka mangwana namacibese.” 24 Natenepa iwo apikoya mpaka mangwana mwace namacibese, ninga mudapangirwa iwo na Mose, pidakoya iwo nee pyanunkha, pontho nee pyabuluka mpfunye. 25 Penepo Mose aapanga: “Dyani pyenepi lero, thangwi lero ndi Sabudu ya Yahova. Lero imwe nee munapigumana kunja kwa nsasa. 26 Imwe munakwanisa kupigumanya mu ntsiku zitanthatu, mbwenye pa ntsiku yacinomwe, yakuti ndi ntsiku ya Sabudu,+ imwe nee munapigumana.” 27 Ngakhale tenepo, anango pakati pa mbumba aenda kunja pa ntsiku yacinomwe toera kupilokota, mbwenye nee agumana cinthu.

28 Natenepa, Yahova apanga Mose: “Mpaka lini munapitiriza kukhonda kubvera mitemo yanga?+ 29 Lekani kuduwala kuti Yahova akupasani ntsiku ya Sabudu.+ Na thangwi ineyi, pa ntsiku yacitanthatu iye asakupasani cakudya ca ntsiku ziwiri. Pa ntsiku yacinomwe, mʼbodzi na mʼbodzi asafunika kukhala pa mbuto yace; nee mʼbodzi asafunika kubuluka pa mbuto yace.” 30 Natenepa, mbumba yakoya ntsiku ya Sabudu* pa ntsiku yacinomwe.+

31 Cakudya ceneci, Aizraeli acipasa dzina ya “mana.”* Cikhadalandana na mbeu ya mapira, cikhali cakucena, pontho cikhakoma ninga mikate yakuikhwa uci.+ 32 Mose aapanga: “Ipi ndi pidalonga Yahova: ‘Dzadzani mana mu combo ca malitru mawiri* toera akoyiwe ndzidzi onsene mʼmadzindza anu,+ toera iwo akwanise kuona cakudya cidakupasani ine nʼthando pa ndzidzi udakubulusani ine mu dziko ya Ejitu.’” 33 Natenepa, Mose apanga Aroni: “Kwata khomitco ikulu, ikha mwenemu mana akuti anakwana mu combo ca malitru mawiri,* aikhe pamaso pa Yahova toera akoyiwe ndzidzi onsene mʼmadzindza anu.”+ 34 Aroni aikha khomitco ikulu patsogolo pa bokosi ya Umboni+ toera ikoyiwe, ninga mukhadapangirwa Mose na Yahova. 35 Aizraeli adya mana mu pyaka 40,+ mpaka pidafika iwo mu dziko yakuti ikhali na anthu.+ Iwo adya mana mpaka pidafika iwo mʼmadire a dziko ya Kanani.+ 36 Pyombo khumi pya malitru mawiri* pikhakwana mu efa* ibodzi.

17 Mbumba yonsene ya Izraeli yabuluka nʼthando ya Sini,+ mbifamba nsindzo ubodzi na ubodzi wa ulendo wawo mwakubverana na pikhaapanga Yahova,+ penepo iwo amanga nsasa wawo ku Refidhimu.+ Mbwenye kweneko nee kukhali na madzi toera mbumba imwe.

2 Natenepa, mbumba yatoma kulongezana na Mose,+ mbilonga: “Tipase madzi toera timwe.” Mbwenye Mose aapanga: “Thangwi yanji muli kulongezana na ine? Thangwi yanji musapitiriza kuyesera+ Yahova?” 3 Mbwenye mbumba ikhali na nyota kakamwe, pontho iyo ikhapitiriza kudungunyira Mose+ mbalonga: “Thangwi yanji watibulusa ku Ejitu toera utiphe na nyota, ife, anathu na pifuyo pyathu?” 4 Pakumalisa Mose alonga kuna Yahova: “Ndinacitanji na mbumba iyi? Thimize pano iwo anandiponyera miyala!”

5 Penepo Yahova apanga Mose: “Ndoko kutsogolo kwa mbumba, kwata akulu angasi a mbumba ya Izraeli na ndodo idamenya na iwe Nkulo wa Nilo.+ Kwata ndodo mʼmanja mwako, ndoko. 6 Ona! Ine ndinadzakhala patsogolo pako, pamwala wa ku Orebhi. Menya mwala, madzi anabuluka pamwala unoyu toera mbumba imwe.”+ Mose acita pyenepi pamaso pa akulu a mbumba ya Izraeli. 7 Natenepa, mbuto ineyi Mose aipasa dzina ya Masa*+ na Meribha,*+ thangwi Aizraeli alongezana na Mose, pontho thangwi iwo ayesera+ Yahova pidalonga iwo kuti: “Kodi Yahova ali pakati pathu peno nkhabe?”

8 Buluka penepo Amaleki+ abwera kudzamenyana na Izraeli ku Refidhimu.+ 9 Na thangwi ineyi Mose apanga Yoswa:+ “Sankhula amuna angasi pakati pathu, ndoko kamenyana na Amaleki. Mangwana ine ndinadzalimira pa ntsonga ya phiri mbandiphatirira ndodo ya Mulungu wandimomwene mʼmanja mwanga.” 10 Penepo Yoswa aenda kamenyana na Amaleki ninga mudapangirwa iye na Mose.+ Mbwenye Mose, Aroni na Uri+ akwira pa ntsonga ya phiri.

11 Mukhapitiriza Mose kulamusa manja ace Aizraeli akhakunda Amaleki, mbwenye pikhatereza Mose manja ace Amaleki akhakunda Aizraeli. 12 Pikhafeweserwa mikono ya Mose, Aroni na Uri akwata mwala mbauikha pantsi pace, Mose mbaukhalira. Buluka penepo iwo aphatirira mikono yace uku mʼbodzi uku mʼbodzi, natenepa mikono yace yapitiriza ndzulu mpaka kudoka kwa dzuwa. 13 Munjira ineyi, Yoswa akunda na supada mbumba yonsene ya Amaleki.+

14 Penepo Yahova apanga Mose: “Lemba pyenepi mʼbukhu toera pikhonde kuduwalika.* Panga Yoswa kuti: ‘Ine ndinadzafudza Amaleki onsene pa dziko yapantsi+ mbakhonda kukumbukirwa pontho.’” 15 Buluka penepo Mose amanga guwa mbaithula Yahova-Nisi,* 16 mbalonga: “Nakuti djanja yace ikuthimbana na mpando waumambo wa Yahova,+ Yahova anadzamenya nkhondo na Amaleki kwenda na kwenda.”+

18 Jetro tebzwalace+ Mose, nyantsembe wa ku Midhiyani, abva pinthu pyonsene pidacita Mulungu kuna Mose na kuna mbumba yace, Aizraeli; kuti Yahova abulusa tani Aizraeli ku Ejitu.+ 2 Jetro tebzwalace Mose akhadatambira Zipora nkazace Mose mbakhala naye, thangwi Mose akhadantumiza kunyumba kwa tebzwalace, 3 pabodzi na anace awiri.+ Mwanace mʼbodzi akhacemerwa Jersoni,*+ thangwi Mose alonga: “Ine ndine mulendo mu dziko ino.” 4 Unango akhacemerwa Eliezeri,* thangwi iye alonga: “Mulungu wa pai wanga ndi mʼphedzi wanga, adandipulumusa toera ndikhonde kuphiwa na supada ya Farau.”+

5 Natenepa, Jetro tebzwalace Mose, nkazace Mose pabodzi na anace aenda kaonana na Mose nʼthando, kudamanga iye nsasa wace cifupi na phiri ya Mulungu wandimomwene.+ 6 Iye atumiza mafala awa kuna Mose: “Ine tebzwalako Jetro,+ ndiri kubwera kudzaonana na iwe. Ndiri pabodzi na nkazako na anako awiri.” 7 Penepo pene Mose abuluka mbaenda kaonana na tebzwalace, iye akotama, buluka penepo ampswompswona. Iwo amutsana unango na ndzace,* pidamala iwo aenda mu nsasa.

8 Mose afokotozera tebzwalace pinthu pyonsene pidacita Yahova kuna Farau na Ejitu toera kuphedza Aizraeli,+ ampangambo nyatwa zonsene zidathimbana na iwo paulendo wawo,+ pontho kuti Yahova aapulumusa tani. 9 Jetro akomerwa kakamwe na pinthu pyonsene pidacita Yahova kuna Aizraeli, mbaapulumusa mʼmanja mwa Aejitu. 10 Penepo Jetro alonga: “Mbasimbwe Yahova, adakupulumusani mʼmanja mwa Aejitu na Farau, adaombola mbumba ineyi pantsi pa utongi wa Ejitu. 11 Cincino ndisadziwa kuti Yahova ndi nkulu kupiringana alungu+ onsene, thangwi ya pidacitira iye Aejitu akuti mwakudzikuza athabusa mbumba yace.” 12 Buluka penepo Jetro abweresa ntsembe toera zipiswe, na ntsembe zinango toera kuzipereka kuna Mulungu; Aroni na akulu onsene a Aizraeli aenda kadya na tebzwalace Mose, pamaso pa Mulungu wandimomwene.

13 Mangwana mwace, Mose akhala pantsi ninga mwandzolowero toera atumikire mbumba ninga nyakutonga miseru, anthu akhapitiriza kubwera, mbalimira patsogolo pa Mose kutomera namacibese mpaka namaulo. 14 Tebzwalace Mose pidaona iye pinthu pyonsene pikhacita iye kuna mbumba, ampanga: “Ninji pyenepi pinacita iwe kuna mbumba? Thangwi yanji usakhala pantsi toera kutonga wekhene, mbumba mbipitiriza kukudikhira kutomera namacibese mpaka namaulo?” 15 Mose atawira tebzwalace: “Ndisacita pyenepi thangwi mbumba isapitiriza kubwera kuna ine toera kusaka citsogolero ca Mulungu. 16 Pangaoneka nkandzo pakati pa anthu awiri, iwo asabwera kuna ine mbandipanga nkandzo unoyu. Penepo ndisafunika kuutonga mbandidziwisa pisankhulo pya Mulungu wandimomwene na mitemo yace.”+

17 Tebzwalace Mose ampanga: “Pinacita iwe si pyadidi tayu. 18 Mwakukhonda penula iwe unadzaneta, iwe pabodzi na mbumba iri na iwe, thangwi unoyu ndi ntolo ukulu kakamwe toera kuuthukula wekhene. 19 Cincino ndibvesere. Ine ndinakupasa uphungu, pontho Mulungu anadzakhala na iwe.*+ Iwe usafunika kutumikira ninga muimiriri wa mbumba pamaso pa Mulungu wandimomwene,+ pontho miseru yonsene usafunika kuidziwisa kuna Mulungu wandimomwene.+ 20 Usafunika kuapfundzisa matongero a Mulungu na mitemo yace,+ pontho usafunika kuadziwisa njira inafunika iwo kufamba na mabasa anafunika iwo kuphata. 21 Mbwenye usafunika kusankhula amuna akuthema+ pakati pa mbumba, akuti asagopa Mulungu, amuna akunyindirika akuti asaida kuwina pinthu mwakukhonda kulungama;+ khazikisa amuna anewa toera akhale atsogoleri a anthu 1.000, atsogoleri a anthu 100, atsogoleri a anthu 50, na atsogoleri a anthu khumi.+ 22 Pangaoneka mikandzo iwo asafunika kutonga mbumba, mikandzo yonsene yakunentsa iwo anaibweresa kuna iwe,+ mbwenye iwo anadzatonga mikandzo mingʼono yonsene. Gawana nawo basa ineyi toera ululupise ntolo wako.+ 23 Ungacita pyenepi, pontho Mulungu mbakomerwa napyo, iwe unakwanisa kuthukula ntolo unoyu, natenepa onsene anabwerera kunyumba mwakutsandzaya.”

24 Mwakucimbiza Mose abvera tebzwalace, mbacita pyonsene pidalonga iye. 25 Mose asankhula amuna akuthema pakati pa Aizraeli onsene, mbaakhazikisa toera kutsogolera mbumba, ninga atsogoleri a anthu 1.000, atsogoleri a anthu 100, atsogoleri a anthu 50, na atsogoleri a anthu khumi. 26 Natenepa, iwo akhatonga mbumba pangaoneka nseru. Miseru yonsene yakunentsa iwo akhaenda nayo kuna Mose,+ mbwenye miseru mingʼono yonsene ndiwo akhaitonga. 27 Buluka penepo Mose apangana tebzwalace,+ natenepa Jetro abwerera ku dziko yace.

19 Pa mwezi wacitatu pidamala kubuluka Aizraeli mu dziko ya Ejitu, pa ntsiku ineyi,* iwo afika kuthando ya Sinai. 2 Iwo abuluka ku Refidhimu,+ afika kuthando ya Sinai mbamanga misasa nʼthando. Aizraeli amanga misasa yawo kweneko cifupi na phiri ya Sinai.+

3 Penepo Mose akwira paphiri toera kuonana na Mulungu wandimomwene. Yahova ancemera paphiri,+ mbalonga: “Ipi ndipyo pinafunika iwe kupanga dzindza ya Yakobe, mbudziwisa Aizraeli kuti: 4 ‘Imwe mwaona mwekhene na maso anu pidacita ine kuna Aejitu,+ pontho kuti ndakuthukulani tani ninga munathukula capungu anace padzulu pa maphapido ace, mbandikubweresani kuna ine.+ 5 Cincino, imwe mungabvera fala yanga mu pinthu pyonsene, mbamutoweza cibverano canga, mwandimomwene imwe munadzakhala mbumba yanga yakusankhulwa* pakati pa mbumba zonsene,+ thangwi dziko yonsene ndi yanga.+ 6 Kwa ine, imwe munadzakhala umambo wa anyantsembe* na dzindza yakucena.’+ Anewa ndi mafala anafunika iwe kupanga Aizraeli.”

7 Natenepa Mose aenda, acemeresa akulu a mbumba mbaapanga mafala onsene adapangwa iye+ na Yahova. 8 Mbumba yonsene yatawira pabodzi pene: “Tiri dzololo toera kucita pyonsene pidalonga Yahova.”+ Mwakucimbiza Mose aenda kadziwisa Yahova mafala adalonga mbumba. 9 Penepo Yahova apanga Mose: “Bvesera, ine ndinabwera kuna iwe, mbandilonga na iwe kubulukira pa khole yakupswipa, toera anthu abve ndingalonga na iwe, pontho toera akukhulupire.” Natenepa Mose apanga Yahova mafala adalonga mbumba.

10 Yahova apanga Mose: “Ndoko kuna mbumba, icenese lero na mangwana, pontho iwo asafunika afule nguwo zawo. 11 Pa ntsiku yacitatu iwo asafunika akhale akukhunganyika, thangwi pa ntsiku ineyi Yahova anatcita Paphiri ya Sinai pamaso pa mbumba yonsene. 12 Khazikisa madire kuna mbumba nʼkhundu mwa phiri yonsene, mbuapanga: ‘Citani mphole-mphole toera mukhonde kukwira paphiri peno kukhuya tsinde yace. Ule anafuna kukhuya phiri, mwakukhonda penula anaphiwa. 13 Nkhabe anafunika kuphata munthu wakuti ali na mulando, iye asafunika kuponyerwa miyala peno kulaswa.* Munthu unoyu asafunika kuphiwa,+ mwakukhonda tsalakana khala ndi cinyama peno munthu.’ Mbwenye nyanga ya bira ingalizwa,+ iwo anakwanisa kufendedzera phiri.”

14 Natenepa Mose atcita paphiri, aenda kuna mbumba mbatoma kuicenesa, pontho iwo afula nguwo zawo.+ 15 Iye apanga mbumba: “Pa ntsiku yacitatu musafunika kukhala akukhunganyika. Lekani kupita mʼmabonde na akazanu.”*

16 Pa ntsiku yacitatu namacibese, kwabveka njazi kunja mbakucetuma, penepo khole ikulu+ yaphimbira phiri yonsene, pontho kwabvekambo kulira kwa nyanga mwamphambvu, natenepa mbumba yonsene pa nsasa yatoma kutetemera.+ 17 Mose abulusa mbumba kunja kwa nsasa toera iende kaonana na Mulungu wandimomwene, iwo alimira pa tsinde ya phiri. 18 Phiri yonsene ya Sinai ikhabuluka utci, thangwi Yahova akhadatcita paphiri ninga malirimi a moto;+ utci ukhakwira ninga utci unabuluka pa forno,* phiri yonsene ikhatekenyeka kakamwe.+ 19 Nyanga pikhathimizirika iyo kulira kakamwe, Mose alonga, pontho Mulungu wandimomwene antawira.

20 Yahova atcita Paphiri ya Sinai, pa ntsonga ya phiri. Yahova acemera Mose pa ntsonga ya phiri, Mose mbakwira.+ 21 Yahova apanga Mose: “Tcita, ndoko kacenjeze mbumba toera ikhonde kunumpha madire toera kuona Yahova; thangwi iwo angacita pyenepi azinji a iwo anadzafa. 22 Pontho anyantsembe akuti ndzidzi onsene asafendedzera Yahova, asafunika aceneseke toera Yahova akhonde kuapha.”* + 23 Penepo Mose apanga Yahova: “Mbumba nee inakwanisa kukwira Paphiri ya Sinai thangwi imwe mwaticenjeza kale kuti: ‘Khazikisa madire nʼkhundu mwa phiri mbuicenesa.’”+ 24 Mbwenye Yahova ampanga: “Ndoko, tcita, ungamala, kwira paphiri pabodzi na Aroni, mbwenye leka kutawirisa kuti mbumba na anyantsembe anumphe madire kuenda kuna Yahova, toera iye akhonde kuapha.”+ 25 Natenepa Mose atcita mpaka kuna mbumba mbaapanga pyenepi.

20 Buluka penepo Mulungu alonga mafala awa onsene:+

2 “Ine ndine Yahova Mulungu wako, adakubulusa mu dziko ya Ejitu, kukhali iwe mu ubitcu.*+ 3 Usafunika kulambira ine basi, leka kulambira alungu anango.+

4 “Leka kucita dzimunthu peno kusasanya cinthu cinango* cakulandana na cinthu ciri kudzulu, ciri pa dziko yapantsi, peno mʼmadzi.+ 5 Leka kuagodamira, nee kuatumikira,+ thangwi ine Yahova Mulungu wako, ndine Mulungu wakuti ndisafuna kuti atumiki anga alambire ine basi,*+ wakuti thangwi ya madawo a ababa anandiida, ndisatcunyusa ana, adzukulu mpaka ana a adzukulu, 6 mbwenye kuna ale anandifuna mbakoya matongero anga,+ ine ndisapangiza kukoma ntima kwakukhonda mala mpaka pa ubalwi 1.000.

7 “Leka kulonga papezi+ dzina ya Yahova Mulungu wako,* thangwi Yahova nee anadzasiya kutcunyusa ale analonga dzina yace papezi.*+

8 “Kumbuka kuti ntsiku ya Sabudu ndi ntsiku yakucena.+ 9 Phata basa, mbucita pinthu pyako pyonsene mu ntsiku zitanthatu,+ 10 mbwenye ntsiku yacinomwe ndi Sabudu ya Yahova Mulungu wako. Leka kuphata basa pa ntsiku ineyi, nee iwe, nee mwanako wamamuna peno mwanako wankazi, nee bitcu wako wamamuna peno bitcu wako wankazi, nee cifuyo cako, nee mulendo wakuti ali mu nzinda mwako.*+ 11 Thangwi mu ntsiku zitanthatu, Yahova acita kudzulu na dziko yapantsi, bara na pinthu pyonsene piri mwenemu, buluka penepo iye atoma kupuma pa ntsiku yacinomwe.+ Na thangwi ineyi, Yahova apasa nkhombo ntsiku ya Sabudu, mbaicenesa.

12 “Lemedza pai wako na mai wako,+ toera ukhale na umaso mu ntsiku zizinji pa dziko inakupasa Yahova Mulungu wako.+

13 “Leka kupha munthu.+

14 “Leka kucita upombo.+

15 “Leka kuba.+

16 “Leka kulongera ndzako umboni wauthambi.*+

17 “Leka kusirira nyumba ya ndzako. Leka kusirira nkazi wa ndzako,+ leka kusirira bitcu wace wamamuna peno wankazi, nee ngʼombe yace, nee buru yace, peno cinthu cinango cakuti ndi ca ndzako.”+

18 Mbumba yonsene yabva kulira kwa njazi na kwa nyanga, yaona kucetuma, pabodzi na utci ukhabuluka paphiri. Na thangwi ineyi, iwo atoma kutetemera mbalimira kutali.+ 19 Natenepa iwo apanga Mose: “Iwe longa na ife, ife tinakubvesera, mbwenye Mulungu mbaleke kulonga na ife, gopa tinafa.”+ 20 Penepo Mose apanga mbumba: “Lekani kugopa, thangwi Mulungu wandimomwene abwera kudzakudingani*+ toera mupitirize kunʼgopa, mbamukhonda kudawa.” + 21 Natenepa mbumba yapitiriza kulimira kutali, mbwenye Mose afendedzera khole yakupswipa pakhali Mulungu wandimomwene.+

22 Penepo Yahova apanga Mose: “Ipi ndipyo pinafunika iwe kupanga Aizraeli: ‘Imwe mwaona mwekhene kuti ndalonga na imwe kubulukira kudzulu.+ 23 Lekani kucita alungu a parata na alungu a ouro toera mulambire iwo na ine ene.+ 24 Usafunika kundicitira guwa ya mataka, mbupereka penepo ntsembe zako zakupiswa na ntsembe zako toera kupereka takhuta,* mabira ako na ngʼombe zako. Pa mbuto ibodzi na ibodzi inafuna ine kuti dzina yanga ikumbukirwe,+ ine ndinabwera mpaka pana iwe, mbandikupasa nkhombo. 25 Ungandimangira guwa ya miyala, leka kuimanga na miyala yakusemwa.*+ Thangwi ungaphatisira tcezu,* unapswipisa guwa. 26 Pontho leka kukwira pa guwa na pa nkwiriro,* gopa unaoneka cipezipezi.’

21 “Iyi ndi mitemo inafunika iwe kupereka kuna iwo:+

2 “Ungagula bitcu wakuti ndi Muhebheri,+ iye anakhala bitcu wako mu pyaka pitanthatu, mbwenye pa caka cacinomwe iye anadzakhala wakusudzuka mbaenda pyace nee kulipa cinthu.+ 3 Khala abwera ekhene, anaenda ekhene. Khala abwera na nkazi, asafunika aende pabodzi na nkazace. 4 Khala mbuyace ampasa nkazi mbabala naye ana amuna na akazi, nkazi na ana anadzakhala a mbuyace, iye anadzaenda ekhene.+ 5 Mbwenye bitcu angakakamira mbalonga kuti: ‘Ine ndisafuna mbuyanga, nkazanga na ananga; nee ndisafuna ndibuluke mu ubitcu,’+ 6 mbuyace asafunika aende naye pamaso pa Mulungu wandimomwene. Buluka penepo asafunika antsamise pansuwo peno padakhomerwa nsuwo, mbuyace asafunika amʼphole khutu na cakuphola naco makutu, iye anadzakhala bitcu wa mbuyace mu umaso wace onsene.

7 “Munthu angagulisa mwanace wankazi ninga bitcu, mwana unoyu nee anabuluka mu ubitcu ninga pinacita bitcu wamamuna. 8 Mbwenye mbuyace angakhonda kukomerwa naye mbakhonda kunsankhula toera akhale nkazace wangʼono, asafunika kuntawirisa toera agulwe, mbwenye nee ali na ufulu wakunʼgulisira munthu wa dzindza inango, thangwi nee apangiza kukhala wakukhulupirika kuna iye. 9 Angampereka kuna mwanace wamamuna toera akhale nkazace, asafunika ampase ufulu onsene unapaswa mwana wankazi. 10 Iye angasemba nkazi unango, nee asafunika kupungula pinthu pinapereka iye kuna nkazi wakutoma, asafunika apitirize kumpasa pyakudya, pyakubvala na ufulu wace ninga nkazi wakumanga banja.*+ 11 Angakhonda kumpasa pinthu pyenepi pitatu, nkazi ali wakusudzuka toera kuenda pyace mbakhonda bulusa kobiri.

12 “Munthu angamenya ndzace mbamupha, iye asafunika kuphiwa.+ 13 Mbwenye angacita pyenepi mwasusudeu,* pontho Mulungu wandimomwene angatawirisa kuti pyenepi picitike, ndinakusankhulirani mbuto inafunika iye kuthawira.+ 14 Munthu angaipirwa kakamwe na ndzace mbamupha mwakufuna,+ munthu unoyu asafunika kuphiwa, maseze musafunika kumʼbulusa cifupi na pa guwa yanga.+ 15 Munthu anamenya pai wace na mai wace, asafunika kuphiwa.+

16 “Munthu angaba munthu ndzace+ mbanʼgulisa peno mbaphatika naye,+ iye asafunika kuphiwa.+

17 “Ule anapasa dzedze pai wace na mai wace, asafunika kuphiwa.+

18 “Ipi ndipyo pinafunika kucitika pangaoneka nthonga kuna amuna awiri, mʼbodzi mbamenya ndzace na mwala peno xoko,* ndzace angakhonda kufa, mbwenye mbaphekeka mpaka kugona patalimba: 19 Khala iye asakwanisa kulamuka mbafamba buluka panyumba na ciphedzo ca ndodo, ule adamʼmenya nee asafunika kutcunyuswa. Basi ene iye asafunika kulipa basa ikhafunika iye kuphata mu ndzidzi udaphekeka iye mpaka angawanga.

20 “Mamuna angaphekesa bitcu wace wamamuna peno wankazi na muti, bitcu unoyu mbafera mʼmanja mwace, iye asafunika kutcunyuswa.+ 21 Mbwenye iye angapulumuka mbakhonda kufa mu ntsiku ibodzi peno ziwiri, iye nee asafunika kutcunyuswa, thangwi iye anʼgula na kobiri yace.

22 “Amuna awiri angamenyana mbaphekesa nkazi wakuti ali na mimba, nkazi unoyu mbabala mwana ntsiku yace mbidzati kufika,+ mbwenye mbapakhonda kufa munthu,* ule adamʼphekesa asafunika kulipa pinafuna kuphemba mamunace nkazi; iye asafunika kulipa pamaso pa atongi.+ 23 Mbwenye pangafa munthu,* ule adamupha asafunika aphiwembo;+ 24 angamuswa diso, asafunikambo aswiwe diso yace; anganʼkhutca dzino, asafunika akhutciwembo dzino yace; anganʼgwanda manja, asafunika agwandwembo manja ace; anganʼgwanda mwendo, asafunika agwandwembo mwendo wace;+ 25 khala ampisa, asafunika apiswembo; angamʼphekesa, asafunika aphekeswembo; khala amʼmenya, asafunika amenywembo.

26 “Munthu angamenya diso ya bitcu wace wamamuna peno wankazi, diso ya bitcu wace mbisweka, iye asafunika asiye bitcu aende mwaufulu thangwi ya diso yace idasweka.+ 27 Pontho angakhutca dzino ya bitcu wace wamamuna peno wankazi, asafunika kunsiya aende pyace mwaufulu thangwi ya dzino yace.

28 “Ngʼombe ingalasa mamuna peno nkazi na nyanga zace, iye mbafa, ngʼombe ineyi isafunika kuponyerwa miyala mpaka kufa,+ pontho nyama yace nee isafunika kudyiwa; natenepa mwanaciro ngʼombe nee asafunika kutcunyuswa. 29 Mbwenye khala ngʼombe ikhali na nsambo wakuphekesa anthu, pontho mwanaciro akhacenjezwa mbakhonda kuifungira, ngʼombe ineyi ingapha mamuna peno nkazi, iyo isafunika kuponyerwa miyala, pontho mwanaciro asafunika aphiwembo. 30 Khala mwanaciro ngʼombe aphembwa kuti asafunika abuluse kobiri toera kuombola umaso wace,* iye asafunika kubulusa ntengo wa kobiri idaphembwa iye toera kuombola umaso wace. 31 Ngʼombe ingaphekesa mʼphale peno ntsikana, ntemo ubodzi ene usafunika kuphatisirwa kuna mwanaciro ngʼombe ineyi. 32 Ngʼombe ingaphekesa bitcu wamamuna peno wankazi, mwanaciro ngʼombe asafunika kupereka kobiri 30 za parata* kuna mbuyace bitcu, mbwenye ngʼombe isafunika kuponyerwa miyala mpaka kufa.

33 “Munthu angakhonda kuphimbira ncera peno angakumba ncera mbakhonda kuuphimbira, ngʼombe peno buru mbigwera mwenemu,  34 mwanaciro ncera asafunika kulipa.+ Iye asafunika kupereka ntengo wa kobiri ineyi kuna mwanaciro wa cinyama ceneci, pontho cinyama cidafa cinakhala cace. 35 Ngʼombe ya munthu ingaphekesa ngʼombe ya ndzace, iyo mbifa, penepo iwo asafunika kugulisa ngʼombe idapha indzace, mbagawana kobiri ineyi; pontho asafunikambo agawane ngʼombe idafa. 36 Mbwenye khala ngʼombe ineyi ikhadziwika kuti iri na nsambo wakuphekesa anthu, mwanaciro mbakhonda kuifungira, iye asafunika kulipiswa. Khala yapha ngʼombe, iye asafunikambo kupereka ngʼombe, pontho ngʼombe idafa inakhala yace.

22 “Munthu angaba bira peno ngʼombe, mbaipha peno kuigulisa, khala aba ngʼombe ibodzi, iye asafunika kulipa ngʼombe zixanu, khala aba bira ibodzi, iye asafunika kulipa mabira manai.+

2 (“Mbava+ angagumanizwa kuti ali kuba nʼnyumba namasiku, angamenywa mbafa, ule adamupha nee anadzakhala na mulando wa ciropa. 3 Mbwenye pyenepi pingacitika dzuwa yamala kubuluka, ule adamupha anadzakhala na mulando wa ciropa.)

“Mwakukhonda penula, ule adaba asafunika kulipa pinthu pidaba iye.* Khala iye nkhabe cinthu, asafunika kuguliswa toera kulipa pinthu pidaba iye. 4 Khala cinthu cidaba iye cagumaniwa kuti ciri mʼmaso, mwakukhonda tsalakana khala ndi ngʼombe, buru peno bira, iye asafunika kulipa pifuyo piwiri ninga pyenepi kuna mwanaciro.

5 “Munthu angaenda kadyesa pifuyo pyace kumunda peno mʼmunda wa mauva, mbatawirisa kuti pifuyo pyace pidye mʼmunda mwa munthu unango, iye asafunika kubulusa misapo yadidi kakamwe ya mʼmunda mwace peno mauva ace adidi kakamwe toera kulipa.

6 “Munthu angagasa moto mbumwazika na pa mathendere a minga mpaka mʼmunda wa mwanaciro, mbupisa misumbu ya mbeu, mbeu zidakhonda kubvunwa peno munda onsene, munthu adatomesa moto asafunika kulipa pinthu pidapisa iye.

7 “Khala munthu apereka kobiri peno pinthu pinango kuna ndzace toera apikoye, pinthu pyenepi pingabiwa panyumba pa munthu unoyu, mbava angaphatwa asafunika kulipa kawiri pinthu pidaba iye.+ 8 Ule adaba angakhonda kuphatwa, mwanaciro nyumba asafunika kuendeswa pamaso pa Mulungu wandimomwene+ toera kudziwa khala ndiye adakwata pinthu pya ndzace. 9 Khala munthu aphatika na cinthu cakuti nee ndi cace, mwakukhonda tsalakana khala ndi ngʼombe, buru, bira, nguwo peno cinthu cinango cidatayika, munthu mbalonga kuti: ‘Cinthu ceneci ndi canga!’ Uwiri wawo asafunika kuenda pamaso pa Mulungu wandimomwene+ toera kudziwa kuti mbani mwanaciro. Ule anafuna kuoniwa na Mulungu kuti ali na mulando asafunika kulipa kawiri cinthu ninga ceneci kuna ndzace.+

10 “Khala munthu apereka buru, ngʼombe, bira peno cifuyo cinango kuna ndzace toera acikoye, ico cingafa, cingalamala peno cingabiwa mu ndzidzi wakuti nkhabe ali kuona, 11 uwiri wawo asafunika kudumbira pamaso pa Yahova kuti iye nee akwata pinthu pya ndzace; pontho mwanaciro cifuyo asafunika kutawira pyenepi. Natenepa ndzace nee asafunika kulipa.+ 12 Mbwenye khala cifuyo cabiwa kuna munthu akhacikoya, iye asafunika kulipa mwanaciro. 13 Khala cifuyo calumwa na cikala, iye asafunika aende kampangize cifuyo cidalumwa. Nkhabe funika kulipa cifuyo cidalumwa na cikala.

14 “Khala munthu abwereka cifuyo kuna ndzace, cifuyo mbacilamala peno mbacifa mu ndzidzi wakuti mwanaciro nee ali penepo, ule adacibwereka asafunika kulipa. 15 Khala mwanaciro akhali penepo, iye nee asafunika kulipa. Khala akhafunika kubulusa kobiri toera kubwereka cifuyo ceneci, asafunika kupereka ntengo wa kobiri ineyi toera kulipa nayo.

16 “Mamuna anganyengerera mwali wakuti adzati kubvundzirwa, mbapita naye mʼmabonde, asafunika kulipa kobiri yakunsemba nayo toera akhale nkazace.+ 17 Khala pai wace akhonda gomugomu kuti nkhabe funa kupereka mwanace kuna iye, mamuna unoyu asafunika kulipa kobiri yakusemba nayo.

18 “Lekani kusiya kuti mpfiti* apitirize na umaso.+

19 “Munthu anapita mʼmabonde na cinyama, mwakukhonda penula asafunika kuphiwa.+

20 “Munthu anapereka ntsembe kuna alungu anango kusiyapo kuna Yahova basi, asafunika kuphiwa.+

21 “Lekani kubvuya* munthu wa dziko inango,+ thangwi imwe mwakhalambo alendo mu dziko ya Ejitu.+

22 “Leka kubvuya* nzice* peno mwana waumphawi.*+ 23 Ungambvuya, maseze ndi pangʼono, iye mbandilirira, mwakukhonda penula, ine ndinadzabva kulira kwace;+ 24 ine ndinadzaipirwa mbandikuphani na supada, akazanu anadzakhala azice, pontho ananu anadzakhala ana aumphawi.

25 “Ungabwerekesa kobiri kuna nyakutcerenga* pakati pa mbumba yanga, munthu wakuti asakhala pakati pako, leka kucita ninga nyakufiyarisi* kobiri, leka kuphemba kuti akubwezere na juru.*+

26 “Ungaphatira nguwo ya ndzako toera akubwezere cinthu cidabwereka iye,+ usafunika kumʼbwezera nguwo yace pa kudoka kwa dzuwa, 27 thangwi ndi nguwo ineyi basi iri na iye toera kufinika, nguwo yace toera kuphimbira manungo ace. Anafinikanji angafuna kugona?+ Iye angandilirira, mwakukhonda penula, ine ndinadzabva kulira kwace, thangwi ndine wantsisi.*+

28 “Leka kupasa dzedze* Mulungu+ peno nkulu* wa mbumba yako.+

29 “Leka kulangalira toera kupereka miyoni ya pinthu pizinji pidabuluka mʼmunda mwako, pabodzi na pinthu pyako pizinji pinabuluka panakamulira iwe vinyu na mafuta.+ Mwanako wamamuna wautombo usafunika kumpereka kuna ine.+ 30 Ipi ndipyo pinafunika iwe kucita na ngʼombe yako pabodzi na bira yako:+ Ingabalwa, isafunika kukhala na mai wace mu ntsiku zinomwe. Pa ntsiku yacisere, usafunika kuipereka kuna ine.+

31 “Musafunika kukhala mbumba yakucena pamaso panga.+ Mungagumana cinyama cidalumwa na cikala ntsanga,+ lekani kucidya. Nyama ineyi musafunika kuiponyera anambwa.

23 “Leka kumwaza* mphangwa zauthambi.+ Leka kuphedzera munthu wakuipa, mbupereka umboni toera ndzako acitirwe pinthu pyakuipa.+ 2 Leka kucita pinthu pyakuipa basi ene thangwi anthu azinji asacitambo pyenepi.* Pakupereka umboni, leka kulonga uthambi basi ene toera kukomeresa mwinji, thangwi ungacita pyenepi uli kudodomesa undimomwene.* 3 Pakutonga nseru wa munthu wakutcerenga, leka kumʼphedzera basi ene thangwi iye ndi ntcerengi.+

4 “Ungagumana ngʼombe peno buru ya nyamalwa wako yakuti yataika, usafunika uende nayo mpaka kuna iye.+ 5 Ungaona kuti buru ya munthu wakuti asakuida yagwa pantsi thangwi yapfinyika na ntolo, leka kuenda pyako mbukhonda kupereka ciphedzo. Usafunika kuphedza mwanaciro toera abuluse buru yace.+

6 “Pakutonga munthu wakutcerenga anakhala pakati panu, leka kuntonga mwakuipa.*+

7 “Leka kupambizira munthu pinthu pyakuipa,* pontho leka kupha munthu wakusowa mulando na wakulungama, thangwi munthu anacita pinthu pyakuipa, nee ndinamuona ninga wakulungama.*+

8 “Leka tawira kudyekerwa, thangwi kudyekerwa kusanyengerera munthu wakuti asatonga mwaudziwisi.* Pontho kusacitisa munthu wakulungama kucinja cisankhulo cace.*+

9 “Leka kuthabusa munthu wa dziko inango anakhala pakati panu. Imwe musadziwa kuti ninji kukhala mulendo mu dziko ya anaciro, thangwi imwe mwakhalambo alendo mu dziko ya Ejitu.+

10 “Bzwala mbeu mʼmunda mwako mbubvuna mbeu zako mu pyaka pitanthatu.+ 11 Mbwenye pa caka cacinomwe, leka kuulima, usafunika kuupumisa. Natenepa, anyakutcerenga pakati pa mbumba yako anadzadya pinafuna kubuluka mwenemu, pire pinafuna kusiya anyakutcerenga pinadzadyiwa na pinyama pya ntsanga. Usafunika kucita pyenepi na munda wako wa mauva na wa milivera.

12 “Phata basa yako mu ntsiku zitanthatu; mbwenye pa ntsiku yacinomwe, nee basa ibodzi isafunika iwe kuphata, toera kupumisa ngʼombe yako na buru yako, pontho toera mwana wa bitcu wako wankazi na munthu wa dziko inango anakhala pakati panu apume.+

13 “Musafunika kucita pyonsene pidakupangani ine.+ Citani mphole-mphole toera mukhonde kulonga madzina a alungu anango, madzina awo nee asafunika kubveka pa milomo yanu.+

14 “Musafunika kundicitira maphwando matatu pa caka.+ 15 Musafunika kucita phwando ya Mikate Yakusowa Pyakutupisa.+ Mu ntsiku zinomwe munadzadya mikate yakusowa pyakutupisa, ninga mudakupangani ine, pa ndzidzi udakhazikiswa wa mwezi wa Abhibhe,*+ thangwi ndi pa mwezi unoyu udabuluka imwe mu dziko ya Ejitu. Nee mʼbodzi asafunika kubwera cimanja-manja+ pamaso panga. 16 Musafunikambo kucita Phwando Yakubvuna* pa ndzidzi unabulusa imwe mbeu zakutoma za mʼmunda mwanu;+ pontho kunkhomo kwa caka citani Phwando ya Kututa,* mu ndzidzi unatuta imwe mbeu za mʼmunda mwanu.+ 17 Katatu pa caka, amuna onsene pakati panu asafunika kuonekera pamaso pa Yahova, Mbuya wandimomwene.+

18 “Ungapereka ciropa ca ntsembe yanga, leka kucipereka pabodzi na pinthu pyakutupisa napyo mikate. Pontho ntsembe za mafuta zinaperekwa mʼmaphwando anga nkhabe funika kukoyiwa mpaka mangwana mwace.

19 “Usafunika kuendesa kunyumba ya Yahova Mulungu wako misapo yakutoma yadidi kakamwe ya mʼmunda mwako.+

“Leka kuphika mwanambuzi mu nkaka wa mai wace.+

20 “Ndinatuma anju patsogolo panu+ toera akutsidzikizeni* munjira, pontho akufikiseni ku mbuto idakukhunganyirani ine.+ 21 Mbvesereni mwadidi, pontho bverani fala yace. Lekani kunsandukira,* mungansandukira, iye nee anadzalekerera madawo anu,+ thangwi dzina yanga iri muna iye. 22 Mbwenye mungabvera fala yace na ntima onsene, mbamucita pyonsene pinakupangani ine, ndinadzakhala nyamalwa wa anyamalwa anu mbandithabusa ale anakuthabusani. 23 Thangwi anju wanga anadzaenda patsogolo panu, mbakuendesani ku dziko ya Aamori, Aeti, Aperesi, Akanani, Aeveu na Ayebusi, pontho ine ndinadzaafudza.+ 24 Leka kugodamira alungu awo peno kuatumikira, pontho leka kusangizira* macitiro awo.+ Mbwenye usafunika kufudza alungu anewa na maguwa awo analambira iwo.+ 25 Musafunika kutumikira Yahova Mulungu wanu,+ natenepa iye anadzapasa nkhombo cakudya canu* na madzi anu.+ Ine ndinadzabulusa mautenda pakati panu.+ 26 Mu dziko yanu, akazi nkhabe kudzataya mimba peno kukhonda bala,*+ pontho ndinadzakuphedzani toera mukhale na umaso mu ntsiku zizinji.*

27 “Imwe mbamudzati kufika kuna iwo, ine ndinadzaagopesa patsogolo panu,+ mbumba zonsene zinafuna kumenyana na imwe zinadzamala ndzeru,* pontho ndinadzacitisa kuti anyamalwa anu onsene akundwe, mbakuthawani.*+ 28 Imwe mbamudzati kufika kuna iwo, ine ndinadzaafewesa manungo,*+ pontho kugopa kweneku kunadzathamangisa Aeveu, Akanani na Aeti pamaso panu.+ 29 Ine nee ndinaathamangisa mu caka cibodzi basi, toera dziko ikhonde kukhala madembe, gopa pinyama pya ntsanga pinanjipa, mbapikulumani.+ 30 Ndinaathamangisa pangʼono-pangʼono pamaso panu, mpaka munganjipa kakamwe mbamutambira dziko yonsene.+

31 “Ndinadzakhazikisa madire a dziko yanu kutomera ku Bara Yakufuira mpaka ku bara ya Afilisti, pontho kutomera kuthando mpaka ku Nkulo wa Eufrate;*+ thangwi anthu anakhala mu dziko ineyi ndinadzaapereka mʼmanja mwanu, mbandiathamangisa pamaso panu.+ 32 Leka kucita cibverano na iwo peno na alungu awo.+ 33 Iwo nee asafunika kukhala mu dziko yako, toera akhonde kukudawisa pamaso panga. Ungatumikira alungu awo, mwakukhonda penula, pyenepi pinakubweresera nyatwa.”*+

24 Buluka penepo iye apanga Mose: “Kwira paphiri toera uonane na Yahova. Kwata Aroni, Nadhabhe, Abhiyu+ na akulu 70 a mbumba ya Izraeli, pontho mundigodamire* nakutali. 2 Mose asafunika akhale ekhene angafuna kufendedzera Yahova; mbwenye anango nee asafunika kufendedzera, pontho mbumba nee isafunika kukwira pabodzi na iye.”+

3 Mose abwerera kuna mbumba mbaifokotozera mafala onsene a Yahova na mitemo yace yonsene,+ penepo mbumba yonsene yatawira pabodzi pene: “Ife tiri dzololo toera kucita pyonsene pidalonga Yahova.”+ 4 Natenepa Mose alemba mafala onsene a Yahova.+ Mangwana mwace namacibese, iye alamuka, amanga guwa patsinde ya phiri, mbalimirisa miyala 12 mwakubverana na madzindza 12 a Izraeli. 5 Buluka penepo, iye atuma aphale a dzindza ya Izraeli, iwo apereka miyoni yakupiswa, mbaperekambo ngʼombe ninga ntsembe toera kupereka takhuta+ kuna* Yahova. 6 Mose akwata hafu ya ciropa mbaciikha mʼmabasiya, pontho hafu inango ya ciropa aciwazira pa guwa ya ntsembe. 7 Buluka penepo, iye akwata bukhu ya cibverano mbaileri mwakugaluza pamaso pa mbumba.+ Penepo iwo atawira: “Ife tiri dzololo toera kucita pyonsene pidalonga Yahova, mbatikhala anthu akubvera.”+ 8 Natenepa Mose akwata ciropa, aciwazira mbumba,+ mbalonga: “Ici ndi ciropa ca cibverano cidakhazikisa* Yahova na imwe mwakubverana na mafala awa onsene.”+

9 Mose, Aroni, Nadhabhe, Abhiyu na akulu 70 a mbumba ya Izraeli akwira paphiri, 10 penepo iwo aona Mulungu wa Izraeli.+ Manyalo ace akhadaponda pa cinthu cikhaoneka ninga mwala wa safira, pontho pakhali pakucena ninga kudzulu.+ 11 Iye nee afudza atsogoleri anewa a Izraeli,+ mbwenye iwo aona Mulungu wandimomwene mʼmasomphenya mu ndzidzi wakuti iwo akhadya mbamwa.

12 Penepo Yahova apanga Mose: “Kwira paphiri ubwere kuna ine, mbupitiriza penepo. Ine ndinakupasa matabwa a miyala, mitemo na matongero anafuna ine kulemba toera kuapfundzisa.”+ 13 Natenepa Mose na Yoswa+ ntumiki wace akhunganyika, Mose mbakwira paphiri ya Mulungu wandimomwene.+ 14 Mbwenye akhadapanga akulu a mbumba: “Tidikhireni pano mpaka tingabwerera.+ Aroni na Uri+ anasala na imwe. Munthu angakhala na mulando toera kuutsalakana, mbaende kalonga na iwo.”+ 15 Penepo Mose akwira paphiri mu ndzidzi wakuti khole ikhaphimbira phiri.+

16 Mbiri ya Yahova+ yapitiriza Paphiri ya Sinai,+ khole mbiphimbira phiri mu ntsiku zitanthatu. Pa ntsiku yacinomwe, Mulungu acemera Mose kubulukira pakati pa khole. 17 Aizraeli akhaona mbiri ya Yahova ninga malirimi a moto ukulu pa ntsonga ya phiri. 18 Buluka penepo Mose apita mu khole, mbakwira paphiri.+ Mose akhala paphiri mu ntsiku 40 masiku na masikati.+

25 Penepo Yahova apanga Mose: 2 “Panga mbumba ya Izraeli toera ipereke miyoni kuna ine;* musafunika kutambira pinafuna kupereka mʼbodzi na mʼbodzi mwakubverana na pinankulumiza ntima wace.+ 3 Miyoni inafunika imwe kutambira kuna iwo ndi iyi: Ouro,+ parata,+ nkuwa,+ 4 usalu wa bhurumu, maweya akufuirira a mabira, usalu wakufuira kakamwe, nguwo zadidi kakamwe, maweya a mbuzi, 5 nthembe za mabira zakukhwazwa pinthu pyakufuira, nthembe za foka,* matabwa a nkexa,+ 6 mafuta akugasa nawo nyale,+ bhalsamu toera kucita mafuta akudzodza nawo,+ na insenso yakununkhira,+ 7 miyala ya oniksi na miyala inango toera kuikhwa pa efodhi*+ na pa nguwo ya paditi.+ 8 Iwo asafunika kundimangira mbuto yaulambiri, pontho ine ndinadzakhala pakati pawo.+ 9 Musafunika kumanga tabhernakulo, mbamusasanya pyombo pyonsene pya mu tabhernakulo sawasawa na pinafuna kukupangizani ine.+

10 “Iwo asafunika kusasanya bokosi* ya matabwa a nkexa, ulaphi wace usafunika ukhale makhono* mawiri na hafu, ugugumi wace ukhale khono ibodzi na hafu, cengo cace cikhale khono ibodzi na hafu.+ 11 Ungamala, bokosi ineyi usafunika uikhwaze ouro+ yadidi kakamwe. Usafunika kuikhwaza nkati na kunja, pontho usafunika kuikha pyakubalikisa napyo pya ouro mʼmakhundu onsene cifupi na padzulu pa bokosi.+ 12 Cita mphete zinai za ouro, uziikhe padzulu pa miyendo minai ya bokosi, mphete ziwiri khundu ibodzi, mphete ziwiri khundu inango. 13 Usafunika kucita pimiti piwiri pya matabwa a nkexa, mbupikhwaza ouro.+ 14 Pimiti pyenepi usafunika kupiikha mu mphete ziri nʼkhundu mwa Bokosi, toera kuthukula napyo Bokosi. 15 Pimiti pyenepi pisafunika kukhala mu mphete ziri pa Bokosi; nee pisafunika kubuluswa mwenemu.+ 16 MʼBokosi ineyi usafunika kuikha matabwa a miyala anafuna kukupasa ine akuti ali na Umboni.+

17 “Unadzacita mphampha* ya ouro yadidi kakamwe, ulaphi wace usafunika ukhale wa makhono* mawiri na hafu, ugugumi wace ukhale khono ibodzi na hafu.+ 18 Usafunika kucita akerubhi awiri a ouro yakumenywa na martelo, mbuaikha mu nkhomo ziwiri za mphampha.+ 19 Ikha kerubhi mʼbodzi kunkhomo ibodzi ya mphampha, kerubhi unango kunkhomo inango ya mphampha. Ikha akerubhi anewa kunkhomo ziwiri zene. 20 Akerubhi asafunika alamuse kudzulu maphapido awo mawiri, aphimbire mphampha na maphapido awo,+ pontho asafunika ayangʼanisane unango na ndzace. Nkhope za akerubhi zisafunika kuyangʼana pa mphampha. 21 Mphampha+ usafunika kuiyikha padzulu pa Bokosi, pontho mʼBokosi ineyi usafunika kuikha matabwa a miyala anafuna kukupasa ine akuti ali na Umboni. 22 Ndinadzaonekera kuna iwe mbandilonga na iwe kubulukira padzulu pa mphampha.+ Kubulukira pakati pa akerubhi awiri ali padzulu pa Bokosi ya Umboni, ndinadzakupasa mitemo yanga yonsene inafunika iwe kudziwisa Aizraeli.

23 “Usafunikambo kucita meza+ ya matabwa a nkexa, ulaphi wace ukhale wa makhono* mawiri, ugugumi wace ukhale khono ibodzi, cengo cace cikhale khono ibodzi na hafu.+ 24 Usafunika kuikhwaza ouro yadidi kakamwe, pontho nʼkhundu mwace usafunika kuikha pyakubalikisa napyo pya ouro. 25 Sasanya cakubalikisa cinango ca ugugumi wa djanja* ibodzi uciikhe nʼkhundu mwa meza, pontho nʼkhundu mwaco usafunika kuikha cakubalikisa ca ouro. 26 Usafunika kucita mphete zinai za ouro toera kuziikha pameza, ungamala unaikha mphete zenezi pankhomo zinai za meza, mule mudakhomerwa miyendo ya meza. 27 Mphete zenezi zisafunika kukhala cifupi na pa cinthu cakubalikisa naco, pontho mu mphete zenezi munadzaikhwa pimiti toera kuthukula napyo meza. 28 Pimiti pyenepi pisafunika pikhale pya matabwa a nkexa mbupikhwaza ouro, meza usafunika kuithukula na pimiti pyenepi.

29 “Usafunikambo kucita mbale za pameza, ndiko zace, makhomitco makulu a pameza na mabasiya ace toera kuikhiramo ntsembe za pyakumwa. Usafunika kupicita na ouro+ yadidi kakamwe. 30 Pontho usafunika kuikha mikate ya ntsembe* pameza, ndzidzi onsene pamaso panga.+

31 “Usafunika kucita cakuikhira nyale+ ca ouro yadidi kakamwe. Cakuikhira nyale ceneci cisafunika kucitwa na ouro yakumenywa na martelo. Tsinde yace, muti wace, nthawi zace, ndiko zace, mphindo zace na maluwa ace pisafunika pikhale cinthu cibodzi cene.+ 32 Muti wa cakuikhira nyale usafunika ukhale na nthawi zitanthatu: Uku nthawi zitatu, uku nthawi zitatu. 33 Kukhundu ibodzi, nthawi ibodzi na ibodzi isafunika ikhale na ndiko zitatu zakulandana na maluwa a amendwa, mphindo na maluwa pisafunika pitowererane, ici nduli, ici patsogolo; nthawi ibodzi na ibodzi ya kukhundu inango, isafunika ikhale na ndiko zitatu zakulandana na maluwa a amendwa, mphindo na maluwa pisafunika pitowererane, ici nduli ici patsogolo. Nthawi zitanthatu za cakuikhira nyale zisafunika zikhale tenepo. 34 Muti wa cakuikhira nyale usafunika ukhale na ndiko zinai zakulandana na maluwa a amendwa, mphindo na maluwa pisafunika pitowererane, ici nduli, ici patsogolo. 35 Pantsi pa nthawi ziwiri zakutoma za cakuikhira nyale pasafunika pakhale mphindo ibodzi, mphindo inango ikhale pantsi pa nthawi ziwiri ziri pakati, mphindo inango ikhale pantsi pa nthawi ziwiri zakumalisa; nthawi zitanthatu za cakuikhira nyale zisafunika zikhale tenepo. 36 Mphindo, nthawi na cakuikhira nyale consene pisafunika pikhale cinthu cibodzi cene cakucitwa na ouro yadidi kakamwe yakumenywa na martelo.*+ 37 Usafunika kucita nyale zinomwe toera kuziikha pa cakuikhira nyale; toera nyale zenezi zingagaka zimwanikire kutsogolo kwa cakuikhira nyale.+ 38 Pyakuthimisa napyo na pyakugasa napyo nyale pisafunika pikhale pya ouro+ yadidi kakamwe. 39 Cakuikhira nyale na pyombo pyenepi pyonsene pisafunika kucitwa na talento* ibodzi ya ouro yadidi kakamwe. 40 Cita mphole-mphole toera pyonsene upicite mwakubverana na pidapangizwa iwe paphiri.+

26 “Usafunika kucita tabhernakulo+ na nguwo khumi zadidi kakamwe zakulukwa, usalu wa bhurumu, maweya a mabira akukhwazwa pinthu pyakufuirira na usalu wakufuira kakamwe. Usafunika kuluka akerubhi+ pa nguwo zenezi.+ 2 Nguwo ibodzi na ibodzi isafunika kukhala ya makhono* 28 aulaphi, na makhono manai augugumi. Nguwo khumi zenezi zisafunika zikhale na midida ibodzi ene.+ 3 Nguwo zixanu zisafunika ziphatanizwe toera ikhale nguwo ibodzi ikulu, zixanu zinango zisafunika ziphatanizwe toera zikhalembo nguwo ibodzi ikulu. 4 Sonera pinguwo pingʼono pya usalu wa bhurumu kunkhomo kwa nguwo ikulu yakutoma pyakuti piri na mabenga, cita pibodzi pyene kunkhomo kwa nguwo ikulu yaciwiri, kunafuna kuphatanizwa iyo na inango. 5 Sonera pinguwo 50 kunkhomo kwa nguwo inango pyakuti piri na mabenga, munjira yakuti cinguwo cibodzi na cibodzi cinayangʼanisana na cindzace, mule munafuna kuphatanizwa nguwo zikulu. 6 Cita pyakupana* napyo 50 pya ouro toera kuphataniza napyo nguwo zikulu, natenepa inadzakhala nguwo ikulu ibodzi basi+ ya tabhernakulo.

7 “Citambo nguwo za maweya+ a mbuzi toera kuphimbira padzulu pa tabhernakulo. Usafunika kucita nguwo 11.+ 8 Nguwo ibodzi na ibodzi isafunika kukhala ya makhono* 30 aulaphi, na makhono manai augugumi. Nguwo 11 zenezi zisafunika zikhale na midida ibodzi ene. 9 Nguwo zixanu usafunika kuziphataniza pabodzi pene, pontho uphatanizembo zitanthatu pazokha, ungamala ufunye nguwo yacitanthatu kutsogolo kwa tabhernakulo. 10 Kunkhomo kwa nguwo ikulu yakutoma usafunika usonere pinguwo 50 pyakuti piri na mabenga, pontho kunkhomo kwa nguwo ikulu yaciwiri usafunika usonere pinguwo 50 pyakuti piri na mabenga, mule munafuna kuphatanizwa nguwo zenezi. 11 Usafunika kucita pyakupana napyo 50 pya nkuwa, mbupiikha mʼmabenga a pinguwo toera kuphataniza nguwo za tabhernakulo, natenepa nguwo zenezi zinadzakhala ibodzi basi yakuphimbira nayo tabhernakulo. 12 Nguwo za pa tabhernakulo zinadzasala, zire zinafuna kusala mbazikhale tenepo mana pa tabhernakulo. Hafu ya nguwo inafuna kusala isafunika ikhale mana kuntsi kwa tabhernakulo. 13 Kukhundu ibodzi na ibodzi ya ulaphi wa nguwo zenezi inadzasala khono* ibodzi, ineyi isafunika kukhala mana toera kuphimbira tabhernakulo.

14 “Usafunikambo kucita cakuphimbira naco tabhernakulo, cikhale ca nthembe za mabira zakukhwazwa pinthu pyakufuira, padzulu pace pakhale cakuphimbira naco ca nthembe ya foka.*+

15 “Unadzaphataniza matabwa a nkexa mbucita pinthu ninga maaro+ a nsuwo* toera kumanga tabhernakulo, mbualimirisa.+ 16 Aro ibodzi na ibodzi isafunika ikhale na makhono* khumi a cengo, ugugumi usafunika ukhale khono ibodzi na hafu. 17 Aro ibodzi na ibodzi isafunika ikhale na mano mawiri cifupi inango na indzace. Maaro onsene a tabhernakulo usafunika kuacita tenepo. 18 Usafunika kucita maaro 20 ninga a panafuna kuikhwa nsuwo, uaikhe kukhundu yakunterero* kwa tabhernakulo.

19 “Usafunika kucita matsinde 40 a parata+ akuti ali na mabenga toera akhale pantsi pa maaro 20: Mano mawiri a aro ibodzi asafunika apite mʼmabenga a matsinde mawiri, pontho mano mawiri a aro ibodzi na ibodzi asafunikambo kupita mʼmabenga a matsinde mawiri-mawiri.+ 20 Cita maaro 20 toera kuaikha kukhundu yakunkwiriro* kwa tabhernakulo, 21 na matsinde ace 40 a parata akuti ali na mabenga; mano mawiri a aro ibodzi asafunika kupita mʼmabenga a matsinde mawiri, pontho mano mawiri a maaro anango asafunikambo kuikhwa mʼmatsinde mawiri-mawiri akuti ali na mabenga. 22 Cita maaro matanthatu+ toera aikhwe kuntsi kwa tabhernakulo, kwakuti ndi kukhundu yakumadokero a dzuwa. 23 Unadzacita maaro mawiri toera kutsidzikiza nkhomo ziwiri za kuntsi kwa tabhernakulo. 24 Maaro anewa asafunika akhale na matabwa mawiri, akuti anaphatana ndzulu mpaka pa mphete yakutoma. Cita pyenepi pa maaro mawiri ene toera atsidzikize nkhomo ziwiri za kuntsi kwa tabhernakulo. 25 Natenepa, anadzakhala maaro masere na matsinde ace 16 a parata akuti ali na mabenga, matsinde mawiri toera kuikha mano mawiri a aro ibodzi, mano mawiri a maaro anango asafunikambo kuikhwa mʼmatsinde mawiri-mawiri akuti ali na mabenga.

26 “Unadzacitambo mipiringanyo ya matabwa a nkexa: Mipiringanyo mixanu toera kuphataniza maaro a khundu ibodzi ya tabhernakulo,+ 27 mipiringanyo mixanu toera kuphataniza maaro a khundu inango ya tabhernakulo na mipiringanyo mixanu toera kuphataniza maaro a kuntsi kwa tabhernakulo, kukhundu yakumadokero a dzuwa. 28 Mpiringanyo wa pakati wakuti unadzakhala pakati pa maaro, usafunika ubuluke kunkhomo mpaka kunkhomo inango.

29 “Maaro anewa usafunika kuakhwaza ouro,+ pontho mʼmaaro anewa unadzaikha mphete za ouro munafuna kupita na mipiringanyo; mipiringanyo ineyi usafunika kuikhwaza ouro. 30 Cita tabhernakulo mwakubverana na pidapangizwa iwe paphiri.+

31 “Cita nguwo ikulu*+ yakulukwa na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo yadidi kakamwe yakulukwa. Pa nguwo ineyi panadzalukwa akerubhi. 32 Nguwo ineyi usafunika kuimanika pa mizati* minai ya matabwa a nkexa idamala kukhwazwa ouro. Pyakumanikira nguwo ineyi pisafunika pikhale pya ouro. Mizati isafunika kulimiriswa pa matsinde manai a parata akuti ali na mabenga. 33 Unadzamanika nguwo ikulu pantsi pa pyakupana napyo, mbuikha nkati Bokosi ya Umboni,+ kuntsi kwa nguwo ikulu ineyi. Nguwo ineyi inadzakuphedzani toera kugawa Mbuto Yakucena+ na Mbuto Yakucena Kakamwe.+ 34 Usafunika kuikha mphampha padzulu pa Bokosi ya Umboni mu Mbuto Yakucena Kakamwe.

35 “Unadzaikha meza kunja kwa nguwo ikulu, cakuikhira nyale+ unaciikha kukhundu yakunterero* kwa tabhernakulo kutsogolo kwa meza; pontho meza unadzaiikha kukhundu yakunkwiriro.* 36 Unadzacita nguwo ikulu* toera ikhale pansuwo wa tabhernakulo, yakulukwa na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo yadidi kakamwe yakulukwa.+ 37 Unadzacita mizati mixanu ya matabwa a nkexa mbuikhwaza ouro toera kumanika nguwo ikulu* ineyi. Pyakupana napyo mizati pisafunika pikhale pya ouro. Mizati ineyi unadzaicitira matsinde maxanu a nkuwa akuti ali na mabenga.

27 “Unadzacita guwa ya ntsembe ya matabwa a nkexa;+ isafunika kukhala na makhono* maxanu aulaphi na makhono maxanu augugumi, cengo cace cisafunika cikhale makhono matatu.+ 2 Usafunika kucita nyanga+ mu nkhomo zinai; nyanga na guwa pisafunika pikhale cinthu cibodzi cene, pontho guwa ineyi usafunika kuikhwaza nkuwa.+ 3 Unadzacita pyombo toera kubulusa napyo dotha,* pontho unadzacita mafoxolo, mabasiya, magarfu na pyakuikhira makala a moto; pyombo pyonsene pya pa guwa ya ntsembe usafunika kupicita na nkuwa.+ 4 Pa guwa ya ntsembe unadzacita cinthu cakulandana na sefa ya nkuwa na mphete zace zinai za nkuwa mu nkhomo zinai za guwa. 5 Ikha sefa ineyi pakati pa guwa ya ntsembe cifupi na padzulu pa guwa. 6 Usafunika kucita pimiti pya matabwa a nkexa toera kupiikha pa guwa ya ntsembe mbupikhwaza nkuwa. 7 Pimiti pyenepi pinadzaikhwa mu mphete toera pikhale mʼmakhundu mawiri ene a guwa ya ntsembe mu ndzidzi unathukulwa iyo.+ 8 Guwa ineyi unadzaicita na matabwa ninga bokosi yakusowa pinthu. Usafunika kuicita ninga mudakupangiza ine* paphiri.+

9 “Unadzacita thando*+ ya tabhernakulo. Kukhundu yakunterero,* tabhernakulo inadzakhala na mpanda wa nguwo ikulu yadidi kakamwe yakulukwa, ulaphi wace unadzakhala makhono* 100 kukhundu ineyi.+ 10 Kukhundu ineyi kunadzakhala mizati 20 na matsinde 20 a nkuwa akuti ali na mabenga. Pyakumanikira nguwo pyakuti pikhali pa mizati na pyakuphataniza napyo* pisafunika pikhale pya parata. 11 Kukhundu yakunkwiriro* kunadzakhalambo mpanda wa nguwo ikulu ya makhono 100 aulaphi, kuphatanizambo mizati 20 na matsinde 20 a nkuwa akuti ali na mabenga. Pontho pyakupana napyo mizati na pyakuphataniza napyo* pisafunika pikhale pya parata. 12 Kukhundu yakumadokero a dzuwa kunadzakhala mpanda wa nguwo wa makhono 50 augugumi wa thando* ya tabhernakulo, kunadzakhalambo mizati khumi na matsinde khumi akuti ali na mabenga. 13 Kumabulukiro a dzuwa, thando* ya tabhernakulo inadzakhala ya makhono 50 augugumi. 14 Kukhundu yamadyo ya nsuwo ukulu, mpanda wa nguwo unadzakhala wa makhono 15 na mizati* mitatu pabodzi na matsinde+ matatu akuti ali na mabenga. 15 Kukhundu yabzwere ya nsuwo ukulu, mpanda wa nguwo unadzakhala wa makhono 15 na mizati mitatu pabodzi na matsinde matatu akuti ali na mabenga.

16 “Pansuwo ukulu wa thando ya tabhernakulo pasafunika pakhale nguwo ikulu* ya makhono 20 aulaphi yakulukwa na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo yadidi kakamwe yakulukwa,+ pontho pakhale na mizati* minai na matsinde+ manai akuti ali na mabenga. 17 Mizati yonsene ya nʼkhundu mwa thando inadzakhala na pyakupana napyo pya parata na pyakuphataniza* napyo pya parata, mbwenye matsinde ace anadzakhala a nkuwa.+ 18 Mpanda wa thando ya tabhernakulo usafunika ukhale wa makhono 100 aulaphi,+ makhono 50 augugumi na makhono maxanu a cengo. Unadzacitwa na nguwo yadidi kakamwe yakulukwa, pontho usafunika ukhale na matsinde a nkuwa akuti ali na mabenga. 19 Pyombo pyonsene na pinthu pinafuna kuphatisirwa mʼbasa ya pa tabhernakulo kuphatanizambo pyakupana napyo tabhernakulo na pyakuphataniza* napyo mpanda, pisafunika pikhale pya nkuwa.+

20 “Usafunika kupanga Aizraeli toera abwerese mafuta adidi kakamwe a azeti akugasa nawo nyale, toera nyale zipitirize kugaka ndzidzi onsene.+ 21 Mu tabhernakulo,* kunja kwa mpanda wa nguwo wakuti uli cifupi na Bokosi ya Umboni,+ Aroni pabodzi na anace anadzaikha nyale pa mbuto yace toera zipitirize kugaka pamaso pa Yahova+ kutomera pa kudoka kwa dzuwa mpaka kuca kunja. Unoyu ndi ntemo wakwenda na kwenda wakuti Aizraeli asafunika kuubvera ndzidzi onsene mʼmadzindza mwawo.+

28 “Pakati pa Aizraeli, cemera mʼbale wako Aroni na anace toera iwo anditumikire ninga anyantsembe.+ Cemera Aroni+ na anace:+ Nadhabhe, Abhiyu,+ Eleazare na Itamari.+ 2 Mʼbale wako Aroni usafunika uncitire nguwo za unyantsembe toera iye akhale na mbiri,* pontho abalike.+ 3 Usafunika kupanga anthu onsene akuti ali na maluso, ale adapasa ine udziwisi,*+ toera iwo acite nguwo zinafuna kupangiza kuti Aroni ndi wakucena pamaso panga, toera iye anditumikire ninga nyantsembe.

4 “Nguwo zinafunika iwo kucita ndi izi: Nguwo ya paditi,*+ efodhi,+ tunika yakusowa mikono, tunika ya mikono,+ nguwo toera kuphimbira nsolo*+ na nʼthambo.*+ Nguwo zenezi za unyantsembe iwo anadzazicitira Aroni na anace, toera iwo anditumikire ninga anyantsembe. 5 Anyabasa aluso anadzaphatisira ouro, usalu wa bhurumu, maweya a mabira akuikhwa pinthu pyakufuirira, usalu wakufuira kakamwe na nguwo zadidi kakamwe zakulukwa.

6 “Iwo asafunika kucita efodhi yakulukwa na ouro, usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo zadidi kakamwe.+ 7 Efodhi isafunika ikhale na mithambo miwiri yakuti inapita na mʼmapewa, mbiphataniza kukhundu ya kunduli na yakutsogolo. 8 Sintu yakulukwa+ yakuti inakhala pa efodhi toera efodhi ipitirize pa mbuto payo, isafunikambo icitwe na pinthu pibodzi pyene: Ouro, usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo zadidi kakamwe zakulukwa.

9 “Usafunika kukwata miyala miwiri ya oniksi+ mbulemba penepo madzina a ana a Izraeli:*+ 10 madzina matanthatu ualembe pamwala ubodzi, madzina anango matanthatu ualembe pamwala unango, mwakubverana na mathunga awo. 11 Mesiri wakulemba pa miyala anadzalemba madzina a ana a Izraeli pa miyala miwiri, ninga munalemberwa pidzindikiro pa selo.+ Buluka penepo, usafunika kuikha miyala ineyi mu mphampha zingʼono za ouro. 12 Usafunika kuikha miyala miwiri ineyi mʼmithambo ya efodhi yakuti inapita na mʼmapewa, toera kukumbuka ana a Izraeli,+ pontho Aroni angaenda pamaso pa Yahova, asafunika aende na madzina awo mʼmapewa ace, toera akumbukirwe.* 13 Usafunika kucita mphampha zingʼono za ouro 14 na nkhambala ziwiri za ouro yadidi zakulukwa ninga nkufu,+ pontho nkhambala zenezi usafunika kuzimangirira pa mphampha zingʼono.+

15 “Usafunika kupanga nyakuluka nguwo toera acite nguwo ya paditi yakutonga nayo.+ Nguwo ya paditi isafunika kukhala ninga efodhi: Inadzacitwa na ouro, usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo zadidi kakamwe zakulukwa.+ 16 Ingafunywa na pakati isafunika ikhale na makhundu manai a midida ibodzi ene, nyakatanga mʼbodzi wa ulaphi,* nyakatanga mʼbodzi wa ugugumi. 17 Pa nguwo ineyi usafunika kuikha mizera minai ya miyala ya ntengo ukulu. Nzera wakutoma unadzakhala wa miyala ya rubhi, topazyo, na ejimeradha. 18 Nzera waciwiri unadzakhala wa miyala ya turkeza, safira na jaspe. 19 Nzera wacitatu unadzakhala wa miyala ya lesemu,* agata na ametista. 20 Nzera wacinai unadzakhala wa miyala ya krizolito, oniksi na jadhe. Miyala ineyi yonsene isafunika kuikhwa mu mphampha zingʼono za ouro. 21 Miyala ineyi inadzakhala 12 mwakubverana na ana 12 a Izraeli. Mwala ubodzi na ubodzi unadzalembwa ninga munaikhwa cidzindikiro pa selo, dzina ibodzi na ibodzi inadzaimirira ibodzi mwa madzindza 12.

22 “Usafunika kucita nkhambala zakulukwa za ouro+ yadidi ninga nkufu, mbuziikha pa nguwo ya paditi. 23 Usafunika kucita mphete ziwiri za ouro toera kuziikha pa nguwo ya paditi, ungamala mphete zenezi usafunika kuziikha kunkhomo ziwiri za nguwo ya paditi. 24 Usafunika kupitisa nkhambala ziwiri zenezi za ouro mu mphete ziwiri za ouro kunkhomo ziwiri za nguwo ya paditi. 25 Usafunika upitise nkhomo ziwiri za nkhambala mu mphampha ziwiri mbuzimangirira mʼmapewa pa mithambo ya efodhi kukhundu yakutsogolo. 26 Usafunika kucita mphete ziwiri za ouro mbuziikha mu nkhomo ziwiri za nguwo ya paditi, kukhundu yankati, cifupi na efodhi.+ 27 Usafunikambo kucita mphete zinango ziwiri za ouro mbuziikha kunja kwa efodhi, pantsi pa mithambo miwiri inapita na mʼmapewa, cifupi na panaphatana iyo, padzulu pa sintu yakulukwa ya efodhi.+ 28 Toera nguwo ya paditi ipitirize pa mbuto yace, mphete za nguwo ya paditi na mphete za pa efodhi usafunika kuzimanga na mithambo ya bhurumu. Pyenepi pinaphedza toera nguwo ya paditi ipitirize pa mbuto yace pa efodhi, padzulu pa sintu yakulukwa.

29 “Aroni angapita mu Mbuto Yakucena, asafunika akwate madzina a ana a Izraeli pa nguwo yakutonga nayo yakuti iri paditi pace, pantima pace toera ndzidzi onsene iwo akumbukirwe na Yahova. 30 Nkati mwa nguwo yakutonga nayo ya paditi unadzaikha Urimi na Tumimi,*+ ipyo pinadzakhala pantima pa Aroni angapita toera kuonekera pamaso pa Yahova. Natenepa ndzidzi onsene unaenda Aroni pamaso pa Yahova, iye anadzakhala na pinthu pyenepi pantima pace, pyakuti pinadzaphatisirwa pakutonga Aizraeli.

31 “Usafunika kucita tunika yakusowa mikono ya efodhi, yonsene isafunika ikhale ya usalu wa bhurumu.+ 32 Padzulu pa nguwo ineyi, nʼkhundu mwa khosi yace, musafunika musonerwe nguwo yakulukwa. Isafunika ikhale ninga khosi ya nguwo inabvala nyankhondo,* toera ikhonde kupanduka. 33 Khundu yapantsi ya nguwo ineyi usafunika ucite pyakubalikisa napyo pyakulandana na misapo ya romaa pizungulire nguwo yonsene, upicite na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe, citambo pingalingali pya ouro mbupiikha pakati pa pyakubalikisa napyo. 34 Usafunika kuikha cingalingali ca ouro na cakubalikisa naco cakulandana na nsapo wa romaa, ici nduli, cinango patsogolo, pizungulire tunika yonsene yakusowa mikono. 35 Aroni asafunika kubvala tunika ineyi toera kuphata basa ya unyantsembe, pontho kulira kwa pingalingali kunabveka mu ndzidzi unapita iye mu mbuto yakucena pamaso pa Yahova, na mu ndzidzi unabuluka iye mwenemu, toera iye akhonde kufa.+

36 “Usafunikambo kucita lezi yakuyetimira ya ouro yadidi kakamwe, pontho lemba penepo mafala awa ninga munalemberwa cidzindikiro pa selo: ‘Yahova ndi wakucena.’*+ 37 Usafunika uimangirire na nʼthambo wa bhurumu pa nguwo inaphimbira nsolo+ wa nyantsembe wankulu. Lezi ineyi isafunika ikhale kutsogolo kwa nguwo inaphimbira nsolo. 38 Inadzakhala pa nkhope ya Aroni, pontho munthu angakhonda kutsalakana mwadidi pinthu pyakucena pyakuti Aizraeli asapiikha pakhundu ninga pinthu pyakucena,+ Aroni anadzatawirira pyenepi. Ndzidzi onsene lezi ineyi inadzakhala pa nkhope ya Aroni, toera iwo akhale akutawirika pamaso pa Yahova.*

39 “Usafunika kuluka tunika yakucitwa na usalu wadidi kakamwe, cita nguwo yakuphimbira nayo nsolo ya usalu wadidi kakamwe, pontho citambo nʼthambo+ wakulukwa.

40 “Unadzacitambo matunika, mithambo na nguwo zakuphimbira nazo nsolo, uzipase ana a Aroni+ toera iwo akhale na mbiri,* pontho abalike.+ 41 Unadzabvazika mʼbale wako Aroni na anace, usafunika kuadzodza,+ uakhazikise+ ninga anyantsembe* mbuacenesa, pontho iwo asafunika kunditumikira ninga anyantsembe. 42 Citambo makabudula a nguwo yadidi* toera kuphimbira manungo awo.*+ Makabudula anewa asafunika kutomera ncunu mpaka kuphimbira ntcafu. 43 Aroni na anace asafunika kubvala makabudula anewa angafuna kupita mu tabhernakulo* peno angaenda pa guwa ya ntsembe toera kutumikira mu mbuto yakucena, toera iwo akhonde kukhala na mulando, gopa anafa. Unoyu ndi ntemo wakwenda na kwenda kuna iye na dzindza* yace.

29 “Ipi ndipyo pinafunika iwe kucita toera kuacenesa kuti anditumikire ninga anyantsembe: Kwata mwanangʼombe na mabira mawiri akusowa cilema,*+ 2 mikate yakusowa pyakutupisa, mikate yakulandana na mphete, yakucitwa na mafuta a azeti yakuti nee yaikhwa pyakutupisa, mikate yakuphaphatika yakusowa pyakutupisa, yakukhwazwa mafuta a azeti.+ Usafunika kuicita na ufa wadidi wa tirigu, 3 uiikhe mu sestu mbuipereka pamaso panga mbiciri mu sestu,*+ pabodzi na ngʼombe na mabira mawiri.

4 “Unadzabweresa Aroni na anace pansuwo wa tabhernakulo,*+ pontho usafunika uapange toera asambe.*+ 5 Buluka penepo, usafunika ukwate nguwo,+ ubvazike Aroni nguwo yakulapha, tunika yakusowa mikono ya efodhi, efodhi na nguwo ya paditi; pontho usafunika kumanga mwadidi ncunu mwace+ sintu yakulukwa ya pa efodhi. 6 Usafunika kumuikha nguwo ya munsolo, pontho unadzaikha pa nguwo ineyi+ cidzindikiro cakucena cakuperekeka kwace kuna Mulungu; 7 usafunika kukwata mafuta akudzodza nawo,+ uatsanulire munsolo mwace, mbunʼdzodza.+

8 “Buluka penepo, bweresa ana a Aroni mbuabvazika nguwo zakulapha.+ 9 Ikhambo mithambo pa nguwo ya Aroni na za anace, aikhembo nguwo toera kuphimbira munsolo; natenepa basa ya unyantsembe inadzakhala yawo, unoyu ndi ntemo wakwenda na kwenda.+ Pyenepi ndipyo pinafunika iwe kucita toera kukhazikisa Aroni na anace toera atumikire ninga anyantsembe.*+

10 “Buluka penepo, usafunika kupereka ngʼombe pansuwo wa tabhernakulo,* Aroni na anace anadzaikha manja awo pa nsolo wa ngʼombe.+ 11 Usafunika uphe ngʼombe pamaso pa Yahova, pansuwo wa tabhernakulo.*+ 12 Bvika cala cako mu ciropa ca ngʼombe mbucikhwaza pa nyanga za guwa ya ntsembe,+ ciropa cidasala ucikhuthule pa tsinde ya guwa ya ntsembe.+ 13 Kwata mafuta onsene+ a pa mautumbo, mafuta a pa mafafa, mpswiyo ziwiri na mafuta ali pa mpswiyo zenezi, upise pyonsene toera pibuluke utci pa guwa ya ntsembe.+ 14 Mbwenye nyama ya ngʼombe, nthembe yace na matubzwi ace usafunika kupipisa kunja kwa nsasa. Ineyi ndi ntsembe inafuna kuperekwa thangwi ya madawo.

15 “Usafunika kukwata bira ibodzi; pontho Aroni na anace asafunika kuikha manja awo pa nsolo wa bira+ ineyi. 16 Usafunika kupha bira, ukwate ciropa cace mbuciwazira makhundu onsene a guwa ya ntsembe.+ 17 Gwanda bira ineyi phindi ibodzi na ibodzi, tsuka mautumbo+ ace na miyendo yace, ndandalisa mapindi anewa pabodzi na nsolo wace. 18 Usafunika kupisa bira yonsene, ibuluke utci pa guwa ya ntsembe. Ineyi ndi ntsembe yakupiswa inafuna kuperekwa kuna Yahova, ninga khwema yadidi.*+ Ineyi ndi ntsembe yakupiswa pa moto inafuna kucitirwa Yahova.

19 “Buluka penepo kwata bira inango, Aroni na anace asafunika kuikha manja awo pa nsolo wa bira.+ 20 Usafunika kupha bira, ukwate pangʼono ciropa cace mbuciikha pankhomo ya khutu yamadyo ya Aroni na pankhomo ya khutu yamadyo ya anace, pontho ciikhembo pa cala cikulu ca djanja yawo yamadyo na cala cikulu ca miyendo yawo yamadyo, mbuwaza ciropa ceneci mʼmakhundu onsene a guwa ya ntsembe. 21 Ungamala, kwata pangʼono ciropa ciri pa guwa ya ntsembe, kwatambo pangʼono mafuta akudzodza nawo+ toera upiwazire Aroni na nguwo zace, upiwazire anace na nguwo zawo, toera iye na nguwo zace, pontho anace na nguwo zawo akhale akucena.*+

22 “Buluka penepo, bulusa mafuta a bira, mafuta ali pa ncira,* mafuta a pa mautumbo, mafuta a pa mafafa, mpswiyo ziwiri na mafuta ali pa mpswiyo zenezi+ na mwendo wamadyo, thangwi ineyi ndi bira idaperekwa toera kukhazikisa anyantsembe.+ 23 Mu sestu ya mikate yakusowa pyakutupisa yakuti iri pamaso pa Yahova, bulusa nkate ubodzi wakusowa nkhomo, nkate wakulandana na mphete, wakucitwa na mafuta a azeti na nkate ubodzi wakuphaphatika. 24 Ikha pinthu pyenepi pyonsene mʼmanja mwa Aroni na mʼmanja mwa anace, pontho usafunika kupiyendesa kutsogolo mbupibweza nduli ninga ntsembe pamaso pa Yahova. 25 Buluka penepo unadzapibulusa mʼmanja mwawo mbupipisa pa guwa ya ntsembe, padzulu pa bira yakutoma, toera pikhale khwema yakununkhira* pamaso pa Yahova. Ineyi ndi ntsembe yakupiswa pa moto inafuna kucitirwa Yahova.

26 “Buluka penepo, kwata diti* ya bira idaperekwa toera kukhazikisa+ Aroni ninga nyantsembe, pontho usafunika uiyendese kutsogolo mbuibweza nduli ninga ntsembe pamaso pa Yahova, ineyi inadzakhala khundu inafuna kutambira iwe. 27 Pa bira idaperekwa toera kukhazikisa+ Aroni na anace ninga anyantsembe, usafunika kuikha pakhundu diti* idaperekwa ninga ntsembe na mwendo udaperekwa ninga khundu yakucena. 28 Nakuti anewa ndi makhundu adaceneswa, iwo anadzakhala a Aroni na a anace ninga ntemo wakwenda na kwenda wakuti Aizraeli+ asafunika kuubvera. Ineyi inadzakhala khundu yawo yakucena toera kuperekwa kuna Yahova mu ntsembe+ zawo toera kupereka takhuta.

29 “Nguwo zinabvala+ Aroni ninga nyantsembe zinadzabvalwa na anace+ anafuna kudzapita pa mbuto yace, angadzodzwa mbakhazikiswa ninga anyantsembe. 30 Pakati pa anace, ule anafuna kudzapita pa mbuto pace ninga nyantsembe, mbapita mu tabhernakulo* toera kutumikira pa mbuto yakucena anadzabvala nguwo zenezi mu ntsiku zinomwe.+

31 “Unadzakwata nyama ya bira idaperekwa pa kukhazikiswa kwa anyantsembe, mbuiphika mu mbuto yakucena.+ 32 Aroni na anace anadzadya+ nyama ya bira ineyi na nkate uli mu sestu, iwo asafunika apidyere pansuwo wa tabhernakulo.* 33 Iwo asafunika adye pinthu pyenepi pidaphatisirwa toera kucenesa* madawo awo pidakhazikiswa iwo ninga anyantsembe,* na kuacenesa. Mbwenye munthu adakhonda tawiriswa* nkhabe funika kudya pinthu pyenepi, thangwi ndi pinthu pidaceneswa.+ 34 Nyama ya bira idaphatisirwa toera kukhazikisa anyantsembe ingasala pabodzi na nkate mpaka mangwana mwace namacibese, usafunika kupisa pyonsene pa moto.+ Nkhabe funika kudyiwa thangwi ndi pinthu pidaceneswa.

35 “Usafunika kucita pyenepi kuna Aroni na anace, mwakubverana na pyonsene pidakupanga ine. Unadzamala ntsiku zinomwe mbukacita basa ineyi ya kuakhazikisa ninga anyantsembe.*+ 36 Pa ntsiku ibodzi na ibodzi unadzapereka ngʼombe ninga ntsembe yakucenesa* madawo, pontho unadzapereka ntsembe toera kucenesa madawo a guwa; usafunika kudzodza guwa ya ntsembe toera kuicenesa.+ 37 Unadzamala ntsiku zinomwe mbukapereka ntsembe zakucenesa* madawo a guwa ya ntsembe; usafunika kuicenesa toera ikhale guwa yakucena kakamwe.+ Munthu onsene anafuna kutumikira pa guwa ya ntsembe asafunika akhale wakucena.

38 “Ntsembe zinafunika iwe kupereka pa guwa ndi izi: Anamabira awiri a caka cibodzi, cita pyenepi ntsiku zonsene.+ 39 Pereka mwanabira mʼbodzi namacibese, mwanabira unango umpereke mu ndzidzi unabira dzuwa.*+ 40 Mwanabira wakutoma unadzampereka pabodzi na khundu yacikhumi ya efa* ya ufa wadidi kakamwe mbuubvungaza na litru ibodzi ya mafuta adidi kakamwe a azeti, pontho na litru ibodzi ya vinyu ya ntsembe ya pyakumwa. 41 Mwanabira waciwiri unadzampereka mu ndzidzi unabira dzuwa,* unadzampereka pabodzi na ntsembe za pyakudya na za pyakumwa ninga pidacita iwe na ntsembe yakumacibese. Unadzaipereka ninga khwema yakununkhira,* ineyi ndi ntsembe yakupiswa pa moto inafuna kucitirwa Yahova. 42 Ineyi inadzakhala ntsembe yakupiswa yakuti inadzacitwa ndzidzi onsene mʼmadzindza mwanu pamaso pa Yahova, pansuwo wa tabhernakulo,* panafuna kuonekera ine toera kulonga na imwe penepo.+

43 “Ine ndinadzaonekera penepo kuna Aizraeli, pontho mbuto ineyi inadzaceneswa na mbiri yanga.+ 44 Ine ndinadzacenesa tabhernakulo na guwa ya ntsembe, pontho ndinadzacenesa Aroni na anace+ toera iwo anditumikire ninga anyantsembe. 45 Ndinadzakhala pakati pa mbumba ya Izraeli, pontho ine ndinadzakhala Mulungu wawo.+ 46 Mwandimomwene iwo anadzadziwa kuti ine ndine Yahova Mulungu wawo, adaabulusa mu dziko ya Ejitu toera ndikhale pakati pawo.+ Ine ndine Yahova Mulungu wawo.

30 “Usafunika kucita guwa ya ntsembe toera kupisirapo insenso;+ usafunika kuicita na matabwa a nkexa.+ 2 Isafunika ikhale na makhundu manai a midida ibodzi ene: Khono* ibodzi ya ulaphi, khono ibodzi ya ugugumi, na makhono mawiri a cengo. Nyanga na guwa pisafunika pikhale cinthu cibodzi cene.+ 3 Usafunika kuikhwaza ouro yadidi kakamwe padzulu, mʼmakhundu onsene na nyanga zene; pontho usafunika kucita pinthu pyakubalikisa nʼkhundu mwace. 4 Unadzacitambo mphete ziwiri za ouro mʼmakhundu mawiri ene pantsi pa pinthu pyakubalikisa, mu mphete zenezi ndimo munafuna kupita pimiti pyakuthukula napyo guwa ya ntsembe. 5 Cita pimiti pya matabwa a nkexa, mbupikhwaza ouro. 6 Ikha guwa ya ntsembe kutsogolo kwa nguwo ikulu yakuti iri cifupi na Bokosi ya Umboni,+ kutsogolo kwa mphampha ya Bokosi ya Umboni, panafuna kudzaonekera ine patsogolo pako.+

7 “Aroni+ anadzapisa insenso+ yakununkhira pa guwa ineyi;+ ntsiku zonsene namacibese, mu ndzidzi unakhunganya iye nyale,+ anadzapisa insenso pa guwa ya ntsembe. 8 Pontho Aroni angagasa nyale mu ndzidzi unabira dzuwa,* iye anadzapisambo insenso. Ineyi inadzakhala ntsembe ya insenso yakuti isafunika kucitwa ndzidzi onsene pamaso pa Yahova mʼmadzindza anu. 9 Pa guwa ineyi, leka kupereka ntsembe yakukhonda tawiriswa,+ nee ntsembe yakupiswa, nee za pyakudya; pontho leka kupereka* ntsembe ya pyakumwa* pa guwa ineyi. 10 Kabodzi pa caka,+ Aroni anadzapereka ntsembe yakucenesa* madawo pa nyanga za guwa ineyi. Iye anadzakwata pangʼono ciropa ca ntsembe yakulekerera madawo,+ inacitwa toera kucenesa* madawo, mbapereka ntsembe yakucenesa madawo a guwa kabodzi pa caka. Pyenepi pisafunika kucitwa ndzidzi onsene mʼmadzindza anu. Guwa inadzakhala yakucena kakamwe pamaso pa Yahova.”

11 Buluka penepo Yahova apanga Mose: 12 “Ndzidzi onsene unalengesa iwe ana amuna a Izraeli,+ mbualembera, mʼbodzi na mʼbodzi asafunika apereke ntsembe kuna Yahova toera kuombola umaso wace pa ndzidzi unalemberwa iwo. Pyenepi ndi toera akhonde kugwerwa na muliri angalemberwa. 13 Onsene anafuna kulemberwa asafunika kupereka ipi: Hafu ya siklo* mwakubverana na nʼdida unaphatisirwa pa mbuto yakucena.+ Siklo ibodzi ndi midida* 20 mingʼono. Hafu ya siklo ndi muoni toera kupereka kuna Yahova.+ 14 Anthu onsene adalemberwa, akuti ali na pyaka 20 peno apiringana pyaka pyenepi, anadzapereka muoni unoyu+ kuna Yahova. 15 Munthu wakupfuma nee asafunika kupereka pizinji, pontho nyakutcerenga nee asafunika kupereka pangʼono mbakhonda kufikisa hafu ya siklo ninga muoni toera kupereka kuna Yahova toera kuombola umaso wanu. 16 Usafunika kutambira kobiri ya parata inapereka Aizraeli toera kuombola umaso wawo, mbuipereka toera kuphedzera basa ya pa tabhernakulo.* Kobiri ineyi inadzakhala cikumbuso pamaso pa Yahova kuna Aizraeli, toera kuombola umaso wanu.”

17 Yahova apanga pontho Mose: 18 “Cita basiya ya nkuwa toera kusambira manja+ na cinthu ca nkuwa toera kuikhirapo basiya ineyi; ikha basiya pakati pa tabhernakulo na guwa ya ntsembe, mbuikha madzi mwenemu.+ 19 Aroni na anace anadzasamba manja awo mbatsuka miyendo yawo penepo.+ 20 Iwo angapita mu tabhernakulo peno angafendedzera guwa ya ntsembe toera kutumikira na kuperekera Yahova ntsembe zakupiswa na moto, asafunika asambe manja awo mbatsuka miyendo yawo toera akhonde kufa. 21 Iwo asafunika asambe manja awo, mbatsuka miyendo yawo toera akhonde kufa, unoyu unadzakhala ntemo wakwenda na kwenda kuna iye na anace mʼmadzindza mwawo.”+

22 Yahova apitiriza kulonga na Mose: 23 “Bweresambo mafuta awa akununkhira, adidi kakamwe: Makilu matanthatu a mafuta akuuma a mira, makilu matatu a mafuta akununkhira a kanela; makilu matatu a mafuta akununkhira a kalamu,* 24 bweresambo makilu matanthatu a kasiya, pyonsene pipimwe na nʼdida wa mu mbuto yakucena,+ pabodzi na malitru matatu na hafu a azeti. 25 Buluka penepo, na pinthu pyenepi, cita mafuta akuceneswa, toera kudzodza nawo; asafunika kucitwa mwaluso.+ Asafunika akhale mafuta akuceneswa, toera kudzodza nawo.

26 “Mafuta anewa usafunika kudzodza nawo tabhernakulo*+ na Bokosi ya Umboni, 27 meza na pyombo pyonsene pya pameza, cakuikhira nyale na pyombo pyace, guwa yakupisira insenso, 28 guwa yakuperekera ntsembe zakupiswa na pyombo pyace pyonsene, basiya na cakuikhira basiya ineyi. 29 Usafunika kupicenesa toera pikhale pyakucena kakamwe.+ Munthu onsene anafuna kuphata pinthu pyenepi asafunika kukhala wakucena.+ 30 Pontho usafunika kudzodza Aroni+ na anace,+ mbuacenesa toera anditumikire ninga anyantsembe.+

31 “Unadzapanga Aizraeli kuti: ‘Kwa ine anewa anapitiriza kukhala mafuta adaceneswa toera kudzodza nawo, kwenda na kwenda mʼmadzindza mwanu.+ 32 Nkhabe funika kuakhwaza mʼmanungo mwa munthu unango, pontho nkhabe funika kucita mafuta anango ninga anewa. Anadzakhala mafuta adaceneswa. Kwa imwe asafunika apitirize kukhala mafuta adaceneswa. 33 Munthu angacita mafuta ninga anewa, pontho ule anafuna kuakhwaza mʼmanungo mwa munthu adakhonda kutawiriswa,* asafunika kuphiwa.’”+

34 Buluka penepo Yahova apanga Mose: “Kwata midida ibodzi ene ya mafuta awa akununkhira:+ Mbirira za* miti ya estoraki, za miti ya onika, mafuta akununkhira a galbhano, na mafuta adidi kakamwe a olibhano. 35 Na pinthu pyenepi, khunganya insenso,+ ya pinthu pyakununkhira, pyakubvungazwa mbapikhunganywa mwaluso. Pinadzaikhwa munyu,+ pinadzakhala pyadidi kakamwe na pyakuceneswa. 36 Pinango mwa ipyo usafunika kupipeya mpaka pikhale ninga ufa wadidi kakamwe, pontho pinango usafunika kupiikha mʼBokosi ya Umboni mu tabhernakulo, munafuna kuonekera ine pana iwe. Pisafunika pikhale pyakucena kakamwe kuna imwe. 37 Insenso inafuna imwe kucita na pinthu pyenepi+ lekani kuiphatisira toera kucita pinafuna imwe. Musafunika kuitsalakana ninga cinthu cidaceneswa na Yahova. 38 Munthu angacita inango ninga ineyi toera kubva khwema yace, asafunika kuphiwa.”

31 Yahova apitiriza kulonga na Mose: 2 “Ona, ine ndasankhula Bhezaleli+ mwana wa Uri, ndzukulu* wa Huri wa dzindza ya Yuda.+ 3 Ndinadzampasa nzimu wa Mulungu kuti akhale na ndzeru, udziwisi na luso yakucita pinthu, toera iye akhale mesiri waluso pakucita pinthu pyonsene, 4 toera kulemba kuti pinthu pinacitwa tani, toera aphate basa na ouro, parata na nkuwa, 5 toera kulemba na kucita pinthu pya miyala,+ pontho toera kucita ntundu onsene wa pinthu pya matabwa.+ 6 Kusiyapo pyenepi, ine ndasankhula* Oliabhe+ mwana wa Aisamaki wa dzindza ya Dhani toera amʼphedze. Pontho ndinaikha udziwisi mʼmitima ya anthu onsene akuti ali na maluso,* toera iwo akwanise kucita pinthu pyonsene pidakupanga ine:+ 7 Tabhernakulo,*+ Bokosi ya Umboni+ na mphampha*+ yace, pyombo pyonsene pya mu tabhernakulo, 8 meza+ na pyombo pyace, cakuikhira nyale ca ouro yadidi kakamwe na pyombo pyace pyonsene,+ guwa yakupisira insenso,+ 9 guwa toera kupereka ntsembe zakupiswa+ na pyombo pyace pyonsene, basiya na cakuikhira basiya ineyi,+ 10 nguwo zakulukwa mwadidi, nguwo za unyantsembe toera kupasa Aroni, nguwo za anace toera atumikire ninga anyantsembe,+ 11 mafuta akudzodza nawo, na insenso yakununkhira toera kuphatisirwa pa mbuto yakucena.+ Iwo anadzacita pinthu pyonsene pidakupanga ine.”

12 Yahova apanga pontho Mose: 13 “Panga Aizraeli kuti: ‘Mwakukhonda penula musafunika kulemedza masabudu+ anga, thangwi ceneci ndi cidzindikiro ca cibverano cidacita ine na imwe mʼmadzindza anu onsene, toera mudziwe kuti ine Yahova, ndine anakucenesani. 14 Lemedzani ntsiku ya Sabudu, thangwi kwa imwe ineyi ndi ntsiku yakucena.+ Ule anakhonda kubvera mwambo wa ntsiku ya sabudu anadzaphiwa. Munthu angaphata basa pa ntsiku ineyi, iye* asafunika kuphiwa.+ 15 Munakwanisa kuphata basa mu ntsiku zitanthatu, mbwenye ntsiku yacinomwe inadzakhala Sabudu, ntsiku yakupuma.+ Ineyi ndi ntsiku yakucena kuna Yahova. Munthu anaphata basa pa ntsiku ya Sabudu asafunika kuphiwa. 16 Aizraeli asafunika kulemedza* ntsiku ya Sabudu; anadzakumbuka ntsiku ya Sabudu ndzidzi onsene mʼmadzindza mwawo. Ceneci ndi cibverano cakukhonda mala. 17 Ceneci ndi cidzindikiro ca kwenda na kwenda pakati pa ine na mbumba ya Izraeli,+ thangwi mu ntsiku zitanthatu Yahova acita kudzulu na dziko yapantsi, mbwenye pa ntsiku yacinomwe iye atoma kupuma.’”+

18 Pidamala iye kulonga na Mose Paphiri ya Sinai, ampasa matabwa mawiri a Umboni,+ matabwa a miyala adalembwa na cala ca Mulungu.+

32 Mbwenye mbumba pidaona iyo kuti Mose akhadembuka kutcita paphiri,+ yagumanyikana nʼkhundu mwa Aroni, mbimpanga: “Lamuka! Ticitire mulungu toera atitsogolere,*+ thangwi ife nee tisadziwa kuti ninji pidacitikira Mose, mamuna ule adatibulusa mu dziko ya Ejitu.” 2 Penepo Aroni aapanga: “Bulusani mphete za ouro+ ziri mʼmakutu mwa akazanu, mwa ananu amuna na akazi, muzibwerese kuna ine.” 3 Natenepa mbumba yonsene yatoma kubulusa mphete zikhali mʼmakutu mwawo, mbazipereka kuna Aroni. 4 Buluka penepo iye akwata ouro idabweresa iwo, aiphataniza na tcezu,* mbacita dzimunthu* ya mwanangʼombe.+ Penepo iwo atoma kulonga: “Iwe Izraeli, uyu ndi Mulungu wako adakubulusa mu dziko ya Ejitu.”+

5 Aroni pidaona iye pyenepi, amanga guwa kutsogolo kwa mwanangʼombe. Buluka penepo, iye aadziwisa: “Mangwana kunadzaoneka phwando ya Yahova.” 6 Natenepa, mangwana mwace namacibese iwo abesera kakamwe, mbapereka ntsembe zakupiswa na ntsembe zakukhazikisa nazo ntendere. Pidamala iwo, mbumba yakhala pantsi toera kudya na kumwa. Buluka penepo, iwo alamuka toera kutsandzaya.+

7 Penepo Yahova apanga Mose: “Tcita, ndoko, thangwi mbumba yako, idabulusa iwe mu Ejitu, yacita pinthu pyakuipa.+ 8 Mwakucimbiza iwo asiya kutowezera njira idaapangiza ine.+ Iwo acita dzimunthu* yakulandana na mwanangʼombe, asapitiriza kuigodamira, pontho asaiperekera ntsembe mbalonga: ‘Iwe Izraeli, uyu ndi Mulungu wako adakubulusa mu dziko ya Ejitu.’” 9 Yahova apitiriza kupanga Mose: “Ndisaona kuti mbumba iyi ndi yakuuma ntima.*+ 10 Cincino ndisiye toera ndiafudze mu ukali wanga, pontho ndinadzacita mbumba ikulu kubulukira mwa iwe.”+

11 Penepo Mose adembetera Yahova Mulungu wace,+ mbalonga: “Thangwi yanji Yahova musafuna kutawirisa kuti ukali wanu ufudze mbumba yanu pakumala kuibulusa mu dziko ya Ejitu na mphambvu zanu zikulu na djanja yanu yamphambvu?+ 12 Mungacita pyenepi Aejitu analonga kuti: ‘Iye aabulusa mu dziko ya Ejitu thangwi akhafuna kuacita pyakuipa; iye akhafuna kuaphera mʼmapiri mbaafudza pa dziko yapantsi’!+ Ndaphata miyendo, siyani kuipirwa kwanu mbamucinja cisankhulo canu cakufuna kufudza mbumba yanu. 13 Kumbukani atumiki anu Abhrahamu, Izaki na Izraeli adapikira imwe kuti: ‘Ndinadzanjipisa dzindza* yako ninga nyenyezi zakudzulu,+ pontho dziko iyi yonsene ndinadzaipereka kuna dzindza* yako toera ikhale unthaka wawo kwenda na kwenda.’”+

14 Natenepa Yahova acinja cisankhulo cace mbakhonda kufudza mbumba yace+ ninga mukhadalongera iye.

15 Buluka penepo, Mose azungunuka mbatcita paphiri na matabwa mawiri a miyala mʼmanja mwace+ akuti akhali na Umboni.+ Matabwa anewa akhadalembwa makhundu mawiri ene kutsogolo na kuntsi. 16 Matabwa anewa a miyala acitwa na Mulungu, pontho Mulungu ndiye adalemba mafalace penepo.+ 17 Yoswa pidabva iye anthu akakhuwa mu nsasa, apanga Mose: “Ndiri kubva kukhuwa ninga kwa anthu akuti ali kumenyana.” 18 Mbwenye Mose alonga:

“Kukhuwa kweneku nee ndi kukhuwa thangwi yakuwina,

Pontho nee ndi kwa kuimba nyimbo yaciliro thangwi ya kukundwa;

Kukhuwa kunabva ine ndi kwa ntundu unango wa nyimbo.”

19 Pidafika Mose cifupi na nsasa mbaona dzimunthu ya mwanangʼombe+ na anthu akhabvina, iye aipirwa mbaponya pantsi matabwa a miyala akhali mʼmanja mwace, mbasweka patsinde ya paphiri.+ 20 Iye akwata mwanangʼombe adacita iwo, ampisa pa moto mbampeya;+ buluka penepo amponya mʼmadzi mbapanga Aizraeli toera amwe madzi anewa.+ 21 Penepo Mose abvundza Aroni: “Ninji pidakucitira mbumba iyi toera uibweresere madawo makulu ninga anewa?” 22 Aroni atawira: “Lekani kuipirwa mbuyanga. Imwe musadziwa mwadidi kuti mbumba iyi ndzidzi onsene isafuna kucita pinthu pyakuipa.+ 23 Natenepa iwo andipanga kuti: ‘Ticitire mulungu toera atitsogolere,* thangwi ife nee tisadziwa kuti ninji pidacitikira Mose, mamuna ule adatibulusa mu dziko ya Ejitu.’+ 24 Na thangwi ineyi, ine ndaapanga: ‘Ule ali na pinthu pya ouro mbapibuluse toera andipase.’ Buluka penepo ine ndapiponya pa moto mbandicita dzimunthu iyi ya mwanangʼombe.”

25 Mose aona kuti mbumba ikhacita pikhafuna iyo basi, thangwi Aroni akhadaisiya toera icite pinafuna iyo, natenepa mbumba yapasika manyadzo pamaso pa anyamalwa awo. 26 Penepo Mose aenda kalimira pansuwo wa nsasa mbalonga: “Mbani ali kukhundu ya Yahova? Mbabwere kuna ine!”+ Natenepa Alevi onsene agumanyikana nʼkhundu mwace. 27 Iye aapanga: “Ipi ndi pidalonga Yahova Mulungu wa Izraeli: ‘Mʼbodzi na mʼbodzi wa imwe mbakwate supada yace* aende mu nsasa onsene, pansuwo ubodzi na ubodzi, aphe mʼbale wace, ndzace anakhala na iye cifupi na xamwali wace.’”+ 28 Alevi acita pidalonga Mose. Natenepa amuna akukwana 3.000 aphiwa pa ntsiku ineyi. 29 Penepo Mose aapanga: “Cenesekani* toera muphate basa ya Yahova, thangwi mʼbodzi na mʼbodzi wa imwe apha mwanace na mʼbale wace;+ lero iye anakupasani nkhombo.”+

30 Mangwana mwace, Mose apanga mbumba: “Imwe mwacita madawo makulu kakamwe, cincino ndinakwira paphiri toera ndidembetere Yahova, panango iye anakulekererani madawo anu.”+ 31 Natenepa Mose abwerera kuna Yahova mbalonga: “Mbumba iyi yacita madawo makulu kakamwe! Iwo acita mulungu wa* ouro!+ 32 Cincino, khala imwe musafuna, alekerereni madawo awo;+ mbwenye khala nee musafuna, ndaphata miyendo, fudzani dzina yanga mʼbukhu yanu idalemba imwe.”+ 33 Mbwenye Yahova apanga Mose: “Munthu onsene anandidawira, ine ndinadzafudza dzina yace mʼbukhu yanga. 34 Cincino, ndoko, tsogolera mbumba toera kuenda ku mbuto idakupanga ine. Ona, anju wanga anadzaenda patsogolo pako,+ pa ntsiku inafuna ine kudzaatonga, ndinadzaatcunyusa thangwi ya madawo awo.” 35 Penepo Yahova abweresa muliri mbutoma kuonesa nyatwa mbumba thangwi ya mwanangʼombe adacita iwo, wakuti ndi mwanangʼombe adacitwa na Aroni.

33 Yahova apanga pontho Mose: “Ndoko, iwe pabodzi na mbumba idabulusa iwe mu dziko ya Ejitu. Ndokoni mu dziko idapikira ine Abhrahamu, Izaki na Yakobe kuti: ‘Ndinadzapereka dziko iyi kuna dzindza* yako.’+ 2 Ndinatumiza anju patsogolo panu,+ mbandithamangisa Akanani, Aamori, Aeti, Aperesi, Aeveu na Ayebusi.+ 3 Ndokoni ku dziko ya nkaka na uci.+ Mbwenye ine nee ndinaenda pakati panu toera ndikhonde kukufudzani,+ thangwi imwe ndimwe mbumba yakuuma ntima.”*+

4 Pidabva iwo mafala anewa akutsukwalisa, mbumba yatoma kulira, pontho nee mʼbodzi wa iwo abvala pontho pinthu pyace pyakubalikisa napyo manungo. 5 Yahova apanga Mose: “Panga Aizraeli kuti: ‘Imwe ndimwe mbumba yakuuma ntima.*+ Mwakucimbiza, ine mbidakwanisa kupita pakati panu mbandikufudzani.+ Natenepa, cincino lekani kubvala pinthu pyanu pyakubalikisa napyo manungo mu ndzidzi unanyerezera ine kuti ndinacitanji kuna imwe.’” 6 Na thangwi ineyi, kutomera Paphiri ya Orebhi, Aizraeli nee abvalabve pinthu pyawo pyakubalikisa napyo manungo.

7 Mose akwata nsasa wace mbaenda kaumanga kunja, kutali pangʼono na misasa ya mbumba, mbauthula nsasa wa nsonkhano.* Munthu onsene akhafuna citsogolero ca Yahova+ akhaenda ku nsasa wa nsonkhano, wakuti ukhali kunja kwa misasa ya mbumba. 8 Mu ndzidzi ukhaenda Mose ku nsasa unoyu, anthu onsene akhalamuka, mʼbodzi na mʼbodzi mbakhala pansuwo wa nsasa wace, iwo akhayangʼana Mose mpaka angapita mu nsasa wace. 9 Mose angapita mu nsasa, khole+ ikhatcita mbilimira pansuwo wa nsasa mu ndzidzi wakuti Mulungu akhalonga na Mose.+ 10 Mbumba yonsene pidaona iyo khole mbikalimira pansuwo wa nsasa, mʼbodzi na mʼbodzi wa iwo akhagodama pansuwo wa nsasa wace. 11 Yahova akhalonga na Mose nkhope na nkhope,+ ninga pinacita munthu angalonga na ndzace. Mose angabwerera ku misasa ya mbumba, Yoswa+ mwana wa Nuni wakuti ndi ntumiki wace na mʼphedzi wace,+ nee akhabuluka mu nsasa unoyu.

12 Buluka penepo, Mose apanga Yahova: “Onani, imwe musandipanga kuti: ‘Tsogolera mbumba iyi,’ mbwenye nee mwandidziwisa kuti mbani anafuna imwe kutuma toera aende pabodzi na ine. Kusiyapo pyenepi, imwe mwalonga kuti: ‘Ine ndisakudziwa mwadidi kakamwe,* pontho ndiwe wakutawirika pamaso panga.’ 13 Ndaphata miyendo, khala ndine wakutawirika pamaso panu, ndidziwiseni njira zanu+ toera ndikudziweni, pontho toera ndipitirize kukhala wakutawirika pamaso panu. Kusiyapo pyenepi, kumbukani kuti mbumba iyi ndi anthu anu.”+ 14 Penepo iye atawira: “Ine ndinadzaenda pabodzi na iwe,+ mbandikupasa ntendere.”+ 15 Buluka penepo Mose ampanga: “Khala nee munaenda pabodzi na ife, lekani kutitawirisa kuti tibuluke pano. 16 Kodi anthu anadziwa tani kuti ine ndine wakutawirika pamaso panu, ine pabodzi na mbumba yanu? Anthu anadziwa pyenepi mungaenda pabodzi na ife,+ toera ine na mbumba yanu tioniwe kuti ndife anthu akusiyana na mbumba zinango pa dziko yapantsi.”+

17 Yahova apanga Mose: “Ndinadzacitambo pinaphemba iwe, thangwi ndiwe wakutawirika kuna ine, pontho ine ndisakudziwa mwadidi.”* 18 Penepo Mose alonga: “Ndaphata miyendo, ndipangizeni mbiri yanu.” 19 Mbwenye iye atawira: “Ndinadzakupangiza udidi wanga onsene, mbandikudziwisa dzina ya Yahova.+ Ndinadzapangiza kukoma ntima kuna ule anafuna ine kupangiza kukoma ntima, pontho ndinadzabvera ntsisi ule anafuna ine kubvera ntsisi.”+ 20 Ngakhale tenepo, iye athimiza: “Iwe nee unakwanisa kuona nkhope yanga, thangwi nkhabe munthu anakwanisa kuona nkhope yanga mbapitiriza kukhala na umaso.”

21 Yahova ampanga pontho: “Pano pali na mbuto dhuzi na ine. Limira pamwala. 22 Mu ndzidzi unapita mbiri yanga pana iwe, ndinadzakuikha mu mphako ya mwala mbandikuphimbira na djanja yanga mpaka ine ndingapita. 23 Buluka penepo, ndinadzabulusa djanja yanga, penepo unadzaona kunduli* kwanga. Mbwenye nkhope yanga nee unakwanisa kuiona.”+

34 Buluka penepo, Yahova apanga Mose: “Sema matabwa mawiri a miyala ninga akutoma,+ pa matabwa anewa ine ndinadzalemba mafala akhali pa matabwa akutoma+ adaswa iwe.+ 2 Mangwana namacibese ukhale wakukhunganyika, thangwi mangwana namacibese unadzakwira Paphiri ya Sinai, toera uonekere pamaso panga pa ntsonga ya phiri ineyi.+ 3 Mbwenye nee mʼbodzi asafunika kukwira pabodzi na iwe, pontho nee mʼbodzi asafunika kukhala pa mbuto inango paphiri. Kusiyapo pyenepi, mabira peno ngʼombe nkhabe funika kusodza patsinde ya phiri.”+

4 Natenepa, Mose asema matabwa mawiri a miyala ninga akutoma. Mangwana mwace namacibese, iye alamuka mbakwira Paphiri ya Sinai, ninga mudampangira Yahova, mbakwata matabwa mawiri a miyala mʼmanja mwace. 5 Buluka penepo, Yahova atcita+ mu khole, alimira penepo cifupi na Mose, Yahova mbadziwisa dzina yace.+ 6 Yahova apita na patsogolo pace, mbalonga: “Yahova, Yahova, Mulungu wantsisi+ na wakukoma ntima,*+ wakupirira,*+ waufuni kakamwe*+ na waundimomwene,*+ 7 iye asapangiza ufuni kuna pikwi na pikwi pya anthu,+ mbalekerera madodo na madawo,+ mbwenye iye cipo anasiya kuti nyakudawa akhonde kutcunyuswa,+ pontho thangwi ya madawo a ababa, iye asatcunyusa ana, adzukulu na ana a adzukulu.”+

8 Mwakucimbiza, Mose agodama, mbakotamisa nsolo wace mpaka pantsi. 9 Buluka penepo iye alonga: “Yahova, khala mwandimomwene ndine wakutawirika pamaso panu, ndaphata miyendo Yahova, tendeni pabodzi mbamukhala pakati pathu,+ maseze ndife anthu akuuma ntima.*+ Tilekerereni madodo athu na madawo athu,+ pontho titawireni ninga mbumba yanu.” 10 Iye antawira: “Ndiri kucita cibverano na imwe: Ndinadzacita pinthu pyakudzumisa pamaso pa mbumba yako yonsene, pinthu pyakuti cipo pyacitwa kale pa dziko yonsene yapantsi, peno pakati pa mbumba zinango,+ pontho anthu onsene a mu mbuto zinafuna kukhala imwe, anadzaona mabasa a Yahova, thangwi pinthu pinafuna kucita ine kuna imwe+ ndi pyakudzumisa kakamwe.

11 “Bveserani mwadidi pinakupangani ine lero.+ Ndinadzathamangisa pamaso panu Aamori, Akanani, Aeti, Aperesi, Aeveu na Ayebusi.+ 12 Citani mphole-mphole toera mukhonde kucita cibverano na anthu a mu dziko inafuna kuenda kakhala imwe,+ toera akhonde kukupeusani.*+ 13 Mbwenye musafunika kufudza maguwa awo, muswe miyala inalambira iwo, mbamugwisa miti inalambira iwo.+ 14 Lekani kugodamira mulungu unango,+ thangwi Yahova asadziwika ninga* ule anaphemba kuti atumiki ace alambire iye basi.* Inde, iye ndi Mulungu wakuti asaphemba atumiki ace alambire iye basi.+ 15 Citani mphole-mphole toera mukhonde kucita cibverano na anthu a mu dziko ineyi, thangwi angacita pyaulukwali pakulambira alungu awo+ mbaaperekera ntsembe, imwe munacemerwa, mbamudya ntsembe zawo.+ 16 Penepo, mwakukhonda penula, imwe munadzakwata anawo akazi toera akhale akazi a ananu,+ pontho anawo akazi anadzacita ulukwali na alungu awo, natenepa iwo anadzapeusa ananu amuna toera kucita ulukwali pakulambira alungu awo.+

17 “Lekani kusasanya alungu a utale wakunyunguluswa.+

18 “Musafunika kucita Phwando ya Mikate Yakusowa Pyakutupisa;+ munadzadya mikate yakusowa pyakutupisa, ninga mudakupangani ine. Citani pyenepi mu ntsiku zinomwe pa ndzidzi udakhazikiswa wa mwezi wa Abhibhe,+ thangwi ndi pa mwezi wa Abhibhe* udabuluka imwe mu dziko ya Ejitu.

19 “Ana amuna onsene autombo ndi anga,+ kuphatanizambo a pifuyo pyanu, mwakukhonda tsalakana khala ndi mwana wautombo wa ngʼombe peno wa bira.+ 20 Musafunika kupereka bira toera kuombola mwanaburu wautombo. Mbwenye khala nee musafuna kumuombola, musafunika kukhumula khosi yace. Pontho musafunika kuombola ananu amuna onsene autombo.+ Nee mʼbodzi asafunika kubwera cimanja-manja pamaso panga.

21 “Musafunika kuphata basa mu ntsiku zitanthatu, mbwenye pa ntsiku yacinomwe, musafunika kupuma.*+ Musafunika kupuma, mwakukhonda tsalakana khala ndi ndzidzi wakulima peno wakubvuna.

22 “Munadzacita Phwando ya Masumana mbamupereka tirigu yanu yakutoma kutokota, pontho kunkhomo kwa caka+ musafunika kucita Phwando ya Kututa.*

23 “Katatu pa caka, amuna onsene pakati panu asafunika kuonekera pamaso pa Yahova, Mbuya wandimomwene, Mulungu wa Izraeli.+ 24 Thangwi ine ndinadzathamangisa mbumba zizinji pamaso panu,+ mbandithimizira cisa canu, pontho nee munthu mʼbodzi anafuna kusirira dziko yanu mu ndzidzi unaenda imwe katatu pa caka toera kuonekera pamaso pa* Yahova Mulungu wanu.

25 “Ungapereka ciropa ca ntsembe yanga, leka kucipereka pabodzi na pinthu pyakutupisa napyo mikate.+ Ntsembe za phwando ya Paskwa nkhabe funika kukoyiwa mpaka mangwana mwace.+

26 “Musafunika kuendesa kunyumba ya Yahova Mulungu wanu+ misapo yakutoma yadidi kakamwe ya mʼmunda mwanu.

“Leka kuphika mwanambuzi mu nkaka wa mai wace.”+

27 Yahova apanga pontho Mose: “Usafunika kulemba mafala anewa,+ thangwi mwakubverana na mafala anewa, ine ndiri kucita cibverano na iwe pabodzi na Izraeli.”+ 28 Iye apitiriza paphiri ineyi pabodzi na Yahova mu ntsiku 40 masiku na masikati. Iye nee adya cinthu, pontho nee amwa madzi.+ Iye* alemba mafala a cibverano pa matabwa a miyala, Matongero Khumi.*+

29 Buluka penepo, Mose atcita Paphiri ya Sinai na matabwa mawiri a Umboni mʼmanja mwace.+ Pikhatcita iye paphiri, Mose nee akhadziwa kuti nkhope yace ikhayetimira kakamwe, thangwi iye akhadalonga na Mulungu. 30 Aroni na Aizraeli onsene pidayangʼana iwo Mose, aona kuti nkhope yace ikhayetima kakamwe, natenepa, iwo agopa kufika dhuzi na iye.+

31 Mbwenye Mose aacemera, natenepa, Aroni na atsogoleri onsene a mbumba aenda kuna iye, penepo Mose alonga na iwo. 32 Buluka penepo, Aizraeli onsene aendambo dhuzi na iye, Mose aadziwisa matongero onsene adapaswa iye na Yahova Paphiri ya Sinai.+ 33 Ndzidzi onsene, Mose angamala kulonga na mbumba, iye akhaphimbira nkhope yace+ na nguwo. 34 Mbwenye mu ndzidzi ukhapita Mose toera kulonga na Yahova, iye akhabulusa nguwo mpaka angabuluka.+ Angamala, iye akhabuluka, mbadziwisa Aizraeli matongero adapaswa iye.+ 35 Aizraeli akhaona kuti nkhope ya Mose ikhayetimira kakamwe; natenepa Mose akhaphimbira nkhope yace na nguwo, mpaka angapita toera kulonga na Mulungu.+

35 Mukupita kwa ndzidzi, Mose agumanya mbumba yonsene ya Izraeli mbaapanga: “Ipi ndi pinthu pidalonga Yahova toera picitwe:+ 2 Munakwanisa kuphata basa mu ntsiku zitanthatu, mbwenye ntsiku yacinomwe ndi yakucena kuna imwe, ndi sabudu ya Yahova,+ ntsiku yakupuma. Munthu anaphata basa pa ntsiku ineyi asafunika kuphiwa.+ 3 Nee musafunika kugasa moto mʼmanyumba mwanu pa ntsiku ya Sabudu.”

4 Mose apanga pontho mbumba yonsene ya Izraeli: “Ipi ndi pidalonga Yahova: 5 ‘Bulusani miyoni pakati panu+ toera kuipereka kuna Yahova. Ale onsene akuti asafuna na ntima wawo onsene,+ mbapereke miyoni kuna Yahova: Ouro, parata, nkuwa, 6 usalu wa bhurumu, maweya akufuirira a mabira, usalu wakufuira kakamwe, nguwo yadidi kakamwe, maweya a mbuzi,+ 7 nthembe za mabira zakukhwazwa pinthu pyakufuira, nthembe za foka, matabwa a nkexa, 8 mafuta akugasa nawo nyale, bhalsamu toera kucita mafuta akudzodza nawo, na insenso yakununkhira,+ 9 miyala ya oniksi na miyala inango toera kuikha pa efodhi+ na pa nguwo ya paditi.+

10 “‘Anthu onsene akuti ali na maluso*+ pakati panu, mbabwere toera acite pinthu pyonsene pidalonga Yahova, 11 tabhernakulo na nsasa wace, nguwo zakuphimbira nazo, pyakuphataniza napyo, matabwa ninga a aro wa nsuwo, mipiringanyo, mizati* na matsinde akuti ali na mabenga; 12 Bokosi+ na pimiti pyace,+ mphampha+ na nguwo ikulu*+ yakugawa nayo; 13 meza+ na pimiti pyace, pyombo pyace pyonsene na mikate ya ntsembe;*+ 14 cakuikhira nyale+ na pyombo pyace, nyale zace na mafuta akugasa nawo nyale;+ 15 guwa toera kupisira insenso+ na pimiti pyace; mafuta akudzodza nawo na insenso yakununkhira;+ nguwo ikulu* ya pansuwo wa tabhernakulo; 16 guwa toera kuperekapo ntsembe zakupiswa+ na sefa yace ya nkuwa, pimiti pyace na pyombo pyace pyonsene; basiya na cakuikhira basiya ineyi;+ 17 nguwo zikulu* toera kucita nazo mpanda wa thando,*+ mizati* na matsinde ace akuti ali na mabenga; nguwo toera kuikha pansuwo ukulu wa thando; 18 pyakuphataniza napyo tabhernakulo, pyakuphataniza napyo mpanda na nkhambala zace;+ 19 nguwo zakulukwa mwadidi+ toera kuphatisirwa pa mbuto yakucena, nguwo za unyantsembe toera kupasa Aroni,+ na nguwo za anace toera atumikire ninga anyantsembe.’”

20 Natenepa, mbumba yonsene ya Izraeli yabuluka pana Mose. 21 Munthu onsene wakuti ntima wace ukhankulumiza+ na onsene akuti akhafuna abwera, mbapereka miyoni yawo kuna Yahova toera iphatisirwe pakumanga tabhernakulo, mʼmabasa a pa tabhernakulo, pontho toera kucita nguwo za unyantsembe. 22 Amuna, akazi na onsene akuti mitima yawo ikhaakulumiza, apitiriza kubweresa pyakuphataniza napyo, mphete za mʼmakutu, mphete za mʼmanja, pyakubalikisa napyo na mitundu yonsene ya pinthu pya ouro. Onsene apereka kuna Yahova miyoni yawo ya ouro.+ 23 Onsene akuti akhali na usalu wa bhurumu, maweya akufuirira a mabira, usalu wakufuira kakamwe, nguwo zadidi kakamwe, maweya a mbuzi, nthembe za bira zakukhwazwa pinthu pyakufuira, nthembe za foka, abweresa pinthu pyenepi. 24 Onsene adapereka parata peno nkuwa abweresa miyoni ineyi kuna Yahova, pontho onsene akhali na matabwa a nkexa aabweresa toera aphatisirwe mʼmabasa akusiyana-siyana akumanga tabhernakulo.

25 Akazi onsene akuti akhali na maluso,+ aluka pinthu na manja awo, buluka penepo abweresa pinthu pyenepi pidaluka iwo: Usalu wa bhurumu, maweya akufuirira a mabira, usalu wakufuira kakamwe na nguwo zadidi kakamwe. 26 Akazi onsene a maluso akuti mitima yawo yaakulumiza, acita nguwo za maweya a mbuzi.

27 Atsogoleri a madzindza abweresa miyala ya oniksi na miyala inango toera iikhwe pa efodhi na pa nguwo ya paditi,*+ 28 pontho iwo abweresa bhalsamu, mafuta akugasa nawo nyale, mafuta akudzodza nawo+ na insenso yakununkhira.+ 29 Amuna na akazi onsene akuti mitima yawo yaakulumiza, abweresa pinthu toera piphatisirwe mʼbasa idalonga Yahova kubulukira kuna Mose kuti ikhafunika kucitwa; Aizraeli abweresa pinthu pyenepi ninga miyoni kuna Yahova.+

30 Buluka penepo, Mose apanga Aizraeli: “Onani, Yahova asankhula Bhezaleli mwana wa Uri, ndzukulu* wa Huri wa dzindza ya Yuda.+ 31 Iye ampasa nzimu wa Mulungu kuti akhale na ndzeru, udziwisi na luso yakucita pinthu, toera akhale mesiri waluso pakucita pinthu pyonsene, 32 toera kulemba kuti pinthu pinacitwa tani, toera aphate basa na ouro, parata na nkuwa, 33 toera kulemba na kucita pinthu pya miyala, pontho toera kucita ntundu onsene wa pinthu pya matabwa. 34 Iye aikha muntima mwa Bhezaleli na muntima mwa Oliabhe+ mwana wa Aisamaki wa dzindza ya Dhani luso yakupfundzisa anango. 35 Iye aapasa maluso*+ toera acite mitundu yonsene ya mabasa aumesiri, kulemba kuti pinthu pinacitwa tani, kuluka nguwo za usalu wa bhurumu, maweya akufuirira a mabira, usalu wakufuira kakamwe, nguwo zadidi kakamwe na maluso akuluka usalu. Amuna anewa anadzacita mitundu yonsene ya mabasa mbalemba kuti pinthu pyonsene pinacitwa tani.

36 “Bhezaleli anadzaphata basa na Oliabhe pabodzi na amuna onsene a maluso* akuti Yahova aapasa udziwisi na kubvesesa toera kudziwa kuti anaphata tani basa yonsene yakumanga tabhernakulo, mwakubverana na pidalonga Yahova.”+

2 Buluka penepo, Mose acemera Bhezaleli, Oliabhe na amuna onsene a maluso akuti Yahova aapasa udziwisi,+ onsene akuti mitima yawo yaakulumiza toera kuperekeka kuti aphate basa.+ 3 Natenepa iwo akwata kuna Mose pinthu pyonsene pidapereka+ Aizraeli toera piphatisirwe pa basa yakumanga tabhernakulo. Mbwenye Aizraeli akhapitiriza kupereka miyoni kuna Mose ntsiku zonsene namacibese.

4 Pidatoma iwo kumanga tabhernakulo, amesiri onsene a maluso akhaenda mʼbodzi na mʼbodzi 5 kuna Mose, mbampanga: “Mbumba iri kubweresa pinthu pizinji kakamwe kupiringana pire pinafunika toera kupiphatisira mʼbasa idalonga Yahova.” 6 Natenepa Mose apanga anthu toera acite cidziwiso kuna mbumba mʼmisasa yonsene kuti: “Mbumba ya Izraeli, lekani kubweresa pontho pinthu toera piphatisirwe pakumanga tabhernakulo.” Penepo mbumba nee yatawiriswabve kubweresa pinthu. 7 Pinthu pidaperekwa pikhali pizinji kakamwe kupiringana pire pikhafunika toera kuphatisirwa mʼbasa ineyi.

8 Natenepa amesiri onsene a maluso+ amanga tabhernakulo,+ acita nguwo khumi zadidi kakamwe zakulukwa na usalu wa bhurumu, maweya a mabira akukhwazwa pinthu pyakufuirira, na usalu wakufuira kakamwe; iye* aluka akerubhi pa nguwo zenezi.+ 9 Nguwo ibodzi na ibodzi ikhali na makhono* 28 aulaphi na makhono manai augugumi. Nguwo zonsene zikhali na midida ibodzi ene. 10 Buluka penepo, iye aphataniza nguwo zixanu mbikhala ibodzi, pidamala iye aphatanizambo nguwo zinango zixanu mbikhala ibodzi. 11 Iye asonerambo pinguwo pingʼono pya usalu wa bhurumu kunkhomo kwa nguwo ikulu kunafuna kuphatanizwa iyo na inango. Iye acitambo pibodzi pyene kunkhomo kwa nguwo ikulu yaciwiri, kunafuna kuphatanizwa iyo na inango. 12 Kunkhomo kwa nguwo ikulu ibodzi, iye asonera pinguwo pingʼono 50 pya mabenga, kunkhomo kwa nguwo ikulu inango asonera pinguwo pinango 50 pya mabenga toera kuphataniza nguwo zenezi. Munjira ineyi, cinguwo cibodzi na cibodzi mbacidayangʼanisana na cindzace. 13 Pakumalisa, iye acita pyakupana napyo 50 pya ouro, aphataniza napyo nguwo zenezi, natenepa yadzakhala nguwo ibodzi basi ya tabhernakulo.

14 Buluka penepo, iye acita nguwo za maweya a mbuzi toera kuphimbira padzulu pa tabhernakulo. Nguwo zenezi zikhali 11.+ 15 Nguwo ibodzi na ibodzi ikhali na makhono 30 aulaphi na makhono manai augugumi. Nguwo 11 zenezi zikhali na midida ibodzi ene. 16 Buluka penepo iye aphataniza nguwo zixanu mbikhala ibodzi, pidamala iye aphatanizambo nguwo zinango zitanthatu mbikhala ibodzi. 17 Kunkhomo kwa nguwo ibodzi, iye asonera pinguwo 50 pyakuti piri na mabenga, kunkhomo kwa nguwo inango asonera pinguwo pinango 50 pyakuti piri na mabenga toera kuphataniza nguwo zenezi. 18 Iye acita pyakuphataniza napyo 50 pya nkuwa toera kuphataniza nguwo zenezi kuti ikhale nguwo ibodzi basi.

19 Iye acita cakuphimbira naco tabhernakulo ca nthembe za mabira zakukhwazwa pinthu pyakufuira, pontho padzulu paco acitapo cakuphimbira naco cinango ca nthembe ya foka.*+

20 Buluka penepo, iye akwata matabwa a nkexa+ mbacita pinthu ninga maaro* a nsuwo, mbapilimirisa.+ 21 Aro ibodzi na ibodzi ikhali na makhono khumi a cengo na khono ibodzi na hafu yaugugumi. 22 Aro ibodzi na ibodzi ikhali na mano mawiri cifupi inango na indzace. Maaro onsene a tabhernakulo iye aacita munjira ibodzi ene. 23 Natenepa iye acita maaro 20, mbaaikha kukhundu yakunterero* kwa tabhernakulo. 24 Buluka penepo, iye acita matsinde 40 a parata toera kuaikha pantsi pa maaro 20. Mano mawiri a aro ibodzi mbadapita mʼmabenga a matsinde mawiri. Pontho mano mawiri a aro ibodzi na ibodzi mbadapitambo mʼmabenga a matsinde mawiri-mawiri.+ 25 Iye acita maaro 20 mbaaikha kukhundu yakunkwiriro* kwa tabhernakulo, 26 mbacitambo matsinde ace 40 a parata. Mano mawiri a aro ibodzi mbadapita mʼmabenga a matsinde mawiri, pontho mano mawiri a aro ibodzi na ibodzi mbadapitambo mʼmabenga a matsinde mawiri-mawiri.

27 Iye acita maaro matanthatu+ mbaaikha kuntsi kwa tabhernakulo, kwakuti ndi kukhundu yakumadokero a dzuwa. 28 Iye acitambo maaro mawiri toera kutsidzikiza nkhomo ziwiri za kuntsi kwa tabhernakulo. 29 Maaro anewa akhali na matabwa mawiri akuti aphatana ndzulu mpaka pa mphete yakutoma. Maaro mawiri akutsidzikiza nawo nkhomo aacita munjira ibodzi ene. 30 Natenepa pakhali na maaro masere na matsinde ace 16 a parata, aro ibodzi na ibodzi mbidaikhwa pa matsinde mawiri-mawiri.

31 Buluka penepo, iye acita mipiringanyo ya matabwa a nkexa, mipiringanyo mixanu toera kuphataniza maaro a kukhundu ibodzi ya tabhernakulo,+ 32 mipiringanyo mixanu toera kuphataniza maaro a kukhundu inango ya tabhernakulo, acitambo mipiringanyo mixanu toera kuphataniza maaro a kuntsi kwa tabhernakulo kwakuti ndi kumadokero a dzuwa. 33 Mpiringanyo wa pakati pa maaro aucita munjira yakuti mbudabuluka kunkhomo ibodzi mpaka kunkhomo inango. 34 Maaro anewa iye aakhwaza ouro, acita mphete za ouro mule mukhafuna kupita na mipiringanyo, pontho mipiringanyo ineyi aikhwaza ouro.+

35 Buluka penepo, iye acita nguwo ikulu*+ yakulukwa na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo yadidi kakamwe yakulukwa. Pontho pa nguwo ineyi iye alukapo+ akerubhi.+ 36 Pidamala iye, nguwo ineyi aicitira mizati* minai ya nkexa mbaikhwaza ouro, acitambo pyakumanikira napyo nguwo pya ouro. Iye acita matsinde manai a parata akuti ali na mabenga toera kuikha mizati ineyi. 37 Iye acita nguwo ikulu* toera ikhale pansuwo wa tabhernakulo, nguwo ineyi yalukwa na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo yadidi kakamwe yakulukwa,+ 38 acitambo mizati* mixanu na pyakuphataniza napyo. Iye akhwaza ouro padzulu pa mizati ineyi na pyakuphataniza napyo pyace, mbwenye matsinde maxanu a mizati ineyi akuti akhali na mabenga akhali a nkuwa.

37 Buluka penepo, Bhezaleli+ acita Bokosi*+ ya matabwa a nkexa. Bokosi ineyi ikhali na makhono* mawiri na hafu aulaphi, khono ibodzi na hafu ya ugugumi, na khono ibodzi na hafu ya cengo.+ 2 Iye aikhwaza ouro yadidi kakamwe nkati na kunja, mbaikha pinthu pyakubalikisa napyo pya ouro nʼkhundu mwace.+ 3 Pidamala iye acita mphete zinai za ouro yakunyunguluswa toera zikhale padzulu pa miyendo minai ya bokosi, mphete ziwiri khundu ibodzi, mphete ziwiri khundu inango. 4 Iye acitambo pimiti pya matabwa a nkexa mbapikhwaza ouro.+ 5 Buluka penepo, iye aikha pimiti pyenepi mu mphete ziri nʼkhundu mwa Bokosi toera kuthukula napyo Bokosi ineyi.+

6 Iye acitambo mphampha ya ouro+ yadidi kakamwe. Mphampha ineyi ikhali na makhono mawiri na hafu aulaphi, na khono ibodzi na hafu ya ugugumi.+ 7 Iye acita akerubhi+ awiri a ouro yakumenywa na martelo,* mbaaikha mu nkhomo ziwiri zene za mphampha.+ 8 Kerubhi mʼbodzi akhali kunkhomo ibodzi, kerubhi unango akhali kunkhomo inango. Iye acita akerubhi anewa mu nkhomo ziwiri zene za mphampha.* 9 Akerubhi awiri anewa maphapido awo akhadalamuswa kudzulu mbaphimbira mphampha na maphapido awo.+ Iwo akhayangʼanisana unango na ndzace, pontho nkhope zawo zikhayangʼana pa mphampha.+

10 Buluka penepo iye acita meza ya matabwa a nkexa.+ Meza ineyi ikhali na makhono mawiri aulaphi, khono ibodzi ya ugugumi na khono ibodzi na hafu ya cengo.+ 11 Iye aikhwaza ouro yadidi kakamwe mbaikha pinthu pyakubalikisa napyo pya ouro nʼkhundu mwace. 12 Penepo iye asasanya cakubalikisa naco nʼkhundu mwa meza ca ugugumi wa djanja* ibodzi, pontho nʼkhundu mwaco aikha cakubalikisa cinango ca ouro. 13 Kusiyapo pyenepi, iye acita mphete zinai za ouro yakunyunguluswa, mbaziikha pankhomo zinai, mule mudakhomerwa miyendo ya meza. 14 Mphete zenezi zikhali cifupi na cakubalikisa naco meza, pontho pimiti pyakuthukula napyo meza mbapidapita na mu mphete zenezi. 15 Buluka penepo iye acita pimiti pya matabwa a nkexa mbapikhwaza ouro toera kuthukula napyo meza. 16 Pidamala iye, akwata ouro yadidi kakamwe mbacita pyombo pya pameza: Mbale, ndiko, mabasiya na makhomitco makulu akuti mbadaphatisirwa toera kupereka ntsembe za pyakumwa.+

17 Buluka penepo, iye acita cakuikhira nyale+ ca ouro yadidi kakamwe, acicita na ouro yakumenywa na martelo.* Iye acitambo tsinde ya cakuikhira nyale, muti wace, ndiko zace, mphindo zace na maluwa ace, pyonsene pikhali cinthu cibodzi cene.+ 18 Pamuti wa cakuikhira nyale pakhali na nthawi zitanthatu: Uku nthawi zitatu, uku nthawi zitatu. 19 Kukhundu ibodzi, nthawi ibodzi na ibodzi ikhali na ndiko zitatu zakulandana na maluwa a amendwa, mphindo na maluwa pikhatowererana, ici nduli, cinango patsogolo; nthawi ibodzi na ibodzi ya kukhundu inango, ikhali na ndiko zitatu zakulandana na maluwa a amendwa, mphindo na maluwa pikhatowererana, ici nduli, cinango patsogolo. Nthawi zitanthatu za cakuikhira nyale zikhali tenepo. 20 Muti wa cakuikhira nyale ukhali na ndiko zinai zakulandana na maluwa a amendwa, mphindo na maluwa pikhatowererana, ici nduli, cinango patsogolo. 21 Pantsi pa nthawi ziwiri zakutoma za cakuikhira nyale pakhali na mphindo ibodzi, mphindo inango ikhali pantsi pa nthawi ziwiri za pakati, mphindo inango ikhali pantsi pa nthawi ziwiri zakumalisa; nthawi zitanthatu za cakuikhira nyale zacitwa tenepo. 22 Mphindo, nthawi na cakuikhira nyale consene pikhali cinthu cibodzi cene cakucitwa na ouro yadidi kakamwe yakumenywa na martelo.* 23 Buluka penepo iye akwata ouro yadidi kakamwe mbacita nyale zinomwe,+ pyakuthimisa napyo na pyakugasa napyo nyale. 24 Iye aphatisira talento* ibodzi ya ouro yadidi kakamwe mbacita cakuikhira nyale na pyombo pyenepi pyonsene.

25 Pidamala iye, acita guwa ya matabwa a nkexa toera kupisirapo insenso.+ Makhundu manai a guwa akhali na midida ibodzi ene, khono ibodzi ya ulaphi, khono ibodzi ya ugugumi na makhono mawiri a cengo. Nyanga na guwa pikhali cinthu cibodzi cene.+ 26 Iye aikhwaza ouro yadidi kakamwe padzulu, mʼmakhundu onsene na nyanga zene, mbaikha cakubalikisa naco ca ouro nʼkhundu mwa guwa. 27 Iye acita mphete ziwiri za ouro mʼmakhundu mawiri ene pantsi pa pinthu pyakubalikisa, toera kupitisa mwenemu pimiti pyakuthukula napyo guwa ya ntsembe. 28 Buluka penepo, iye acita pimiti pya matabwa a nkexa mbapikhwaza ouro. 29 Iye acitambo mafuta akuceneswa toera kudzodza nawo+ na insenso yadidi kakamwe yakununkhira+ idacitwa mwaluso.

38 Iye acita guwa ya ntsembe ya matabwa a nkexa toera kuperekapo ntsembe zakupiswa. Ikhali na makhundu manai a midida ibodzi ene, makhono* maxanu aulaphi, makhono maxanu augugumi, na makhono matatu a cengo.+ 2 Iye acita nyanga mu nkhomo zinai za guwa. Nyanga na guwa pikhali cinthu cibodzi cene. Buluka penepo iye aikhwaza nkuwa.+ 3 Pidamala iye, acita pyombo pyonsene pya guwa ya ntsembe, pyakubulusa napyo dotha, mafoxolo, mabasiya, magarfu na pyakuikhira makala a moto. Pyombo pyonsene pya pa guwa iye apicita na nkuwa. 4 Iye acitambo cinthu ca nkuwa cakulandana na sefa pa guwa ya ntsembe, mbaciikha pantsi pa cakubalikisa naco cifupi na pakati pa guwa. 5 Iye acita mphete zinai mbaziikha mu nkhomo zinai za guwa, cifupi na pa cinthu cakulandana na sefa, toera kuikhamo pimiti pyakuthukula napyo guwa. 6 Buluka penepo, iye acita pimiti pya matabwa a nkexa, mbapikhwaza nkuwa. 7 Iye aikha pimiti pyenepi mu mphete mʼmakhundu mawiri ene a guwa toera kuthukula napyo guwa. Iye acita guwa ineyi ya matabwa ninga bokosi yakusowa pinthu.

8 Iye acitambo basiya ya nkuwa+ na cinthu ca nkuwa toera kuikhirapo basiya ineyi; toera kucita pyenepi iye aphatisira masupeyu a nkuwa a misoka ya akazi adasankhulwa toera kutumikira pa tabhernakulo.*

9 Buluka penepo iye acita thando+ ya* tabhernakulo. Kukhundu yakunterero kwa tabhernakulo iye aikha mpanda wa nguwo zadidi kakamwe zakulukwa, wa makhono 100* aulaphi.+ 10 Mpanda ukhali na mizati 20 na matsinde 20 a nkuwa akuti akhali na mabenga, pyakumanikira nguwo pyakuti pikhali pa mizati, pontho pyakuphataniza napyo* pikhali pya parata. 11 Kukhundu yakunkwiriro kwa tabhernakulo kukhali mpanda wa nguwo, wa makhono 100 aulaphi. Kukhali na mizati 20 na matsinde 20 a nkuwa akuti akhali na mabenga. Pyakumanikira nguwo pyakuti pikhali pa mizati na pyakuphataniza napyo* pikhali pya parata. 12 Mbwenye kumadokero a dzuwa, mpanda wa nguwo ukhali wa makhono 50 augugumi. Kukhali na mizati khumi na matsinde khumi akuti akhali na mabenga, pyakumanikira nguwo pyakuti pikhali pa mizati na pyakuphataniza napyo* pikhali pya parata. 13 Kumabulukiro a dzuwa, mpanda wa nguwo ukhali na makhono 50 augugumi. 14 Kukhundu yamadyo ya nsuwo ukulu, mpanda wa nguwo ukhali wa makhono 15 na mizati mitatu pabodzi na matsinde matatu akuti ali na mabenga. 15 Kukhundu yabzwere ya nsuwo ukulu, mpanda wa nguwo ukhali wa makhono 15 na mizati mitatu pabodzi na matsinde matatu akuti akhali na mabenga. 16 Nguwo zonsene za mpanda wa thando ya tabhernakulo zikhali zadidi kakamwe zakulukwa. 17 Matsinde akuti akhali na mabenga toera kuikha mizati akhali a nkuwa, pyakumanikira nguwo pyakuti pikhali pa mizati na pyakuphataniza napyo pikhali pya parata, pontho padzulu pa mizati pakhadakhwazwa ouro. Mizati yonsene ya mpanda wa thando+ ikhali na pyakuphataniza napyo* pya parata.

18 Pansuwo ukulu wa mpanda wa thando ya tabhernakulo, pakhali nguwo ikulu* yakulukwa na usalu wa bhurumu, maweya a mabira adakhwazwa pinthu pyakufuirira, usalu wakufuira kakamwe na nguwo yadidi kakamwe yakulukwa. Ikhali na makhono 20 aulaphi na makhono maxanu a cengo; nguwo ya pansuwo na nguwo ya mpanda+ zikhali na cengo cibodzi cene. 19 Mizati yace minai na matsinde ace manai akuti akhali na mabenga akhali a nkuwa. Pyakumanikira nguwo* na pyakuphataniza napyo pikhali pya parata, padzulu pa mizati ineyi pakhadakhwazwa parata. 20 Ntciri zonsene za tabhernakulo na za nʼkhundu mwa thando zikhali za nkuwa.+

21 Ipi ndi pinthu pyonsene pidaphatisirwa toera kumanga tabhernakulo, yakuti ndi tabhernakulo ikhali na Bokosi ya Umboni.+ Pinthu pyenepi pyalengeswa thangwi Mose ndiye adalonga pyenepi, basa ineyi yacitwa na Alevi,+ mukutsogolerwa na Itamari+ mwana wa nyantsembe Aroni. 22 Bhezaleli+ mwana wa Uri, ndzukulu* wa Huri wa dzindza ya Yuda, acita pinthu pyonsene pidalonga Yahova kuna Mose. 23 Bhezaleli akhali pabodzi na Oliabhe+ mwana wa Aisamaki wa dzindza ya Dhani. Oliabhe akhali mesiri, pontho akhali na luso yakulemba kuti pinthu pinacitwa tani, iye akhakwanisa kuluka nguwo za usalu wa bhurumu, maweya a mabira adakhwazwa pinthu pyakufuirira, usalu wakufuira kakamwe na nguwo zadidi kakamwe.

24 Ouro yonsene idaphatisirwa mʼbasa yakumanga tabhernakulo, ikhali ouro idaperekwa ninga ntsembe:+ Matalento* 29 na masiklo* 730, mwakubverana na nʼdida wa siklo inaphatisirwa pa tabhernakulo.* 25 Parata idabweresa anthu adalemberwa pakati pa mbumba ikhali matalento 100 na masiklo 1.775 mwakubverana na nʼdida wa siklo inaphatisirwa pa tabhernakulo.* 26 Hafu ya siklo idapereka mʼbodzi na mʼbodzi wa ale adalemberwa, ikhali hafu ya siklo mwakubverana na nʼdida unaphatisirwa pa tabhernakulo.* Amuna adalemberwa akuti akhali na pyaka 20 peno apiringana pyaka pyenepi,+ akhali 603.550.+

27 Matsinde a maaro a tabhernakulo na matsinde a cifupi na pa nguwo ikulu, onsene akhali matalento 100 a parata. Matsinde 100 akhalemera matalento 100, pyenepi pisabveka kuti tsinde+ ibodzi ikhalemera talento ibodzi. 28 Iye akwata masiklo 1.775 a parata mbacita pyakumanikira nguwo pyakuti pikhali pa mizati, padzulu pa mizati ineyi, iye akhwaza parata, mbaiphataniza.

29 Nkuwa udaperekwa ninga ntsembe ukhali matalento 70 na masiklo 2.400. 30 Iye akwata nkuwa unoyu mbacita matsinde a pansuwo wa tabhernakulo,* acitambo guwa ya nkuwa toera kuperekapo ntsembe na cinthu cace ca nkuwa cakulandana na sefa, na pyombo pyonsene pya pa guwa ya ntsembe, 31 matsinde a mpanda wa thando ya tabhernakulo, matsinde a pansuwo wa mpanda wa thando, ntciri zonsene za tabhernakulo na ntciri+ zonsene za nʼkhundu mwa tabhernakulo.

39 Iwo akwata usalu wa bhurumu, maweya a mabira akukhwazwa pinthu pyakufuirira,+ usalu wakufuira kakamwe, mbacita nguwo zakulukwa mwadidi zakuti mbazidaphatisirwa pa tabhernakulo. Iwo acita nguwo za unyantsembe toera kupasa Aroni+ ninga mudalongera Yahova kuna Mose.

2 Iye acita efodhi+ yakulukwa na ouro, usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo zadidi kakamwe. 3 Iwo anyungulusa ouro mbacita pinkhambala, apigwanda toera apiluke pabodzi na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe pabodzi na nguwo zadidi kakamwe, mbacita kupisonera. 4 Iwo acita mithambo ya efodhi mbipita na mʼmapewa, mithambo ineyi ikhaphataniza khundu ya kunduli na yakutsogolo. 5 Iye acita sintu yakulukwa yakuti mbidakhala pa efodhi toera efodhi ipitirize pa mbuto payo,+ sintu ineyi yacitwa na pinthu pibodzi pyene: Ouro, usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo zadidi kakamwe zakulukwa mwakubverana na pidalonga Yahova kuna Mose.

6 Buluka penepo, iwo aikha miyala ya oniksi mu mphampha zingʼono za ouro mbalemba madzina a ana a Izraeli pa miyala ineyi, ninga munalembwa pidzindikiro pa selo.+ 7 Iye aiikha mʼmithambo ya efodhi inapita na mʼmapewa toera kukumbuka ana a Izraeli,+ ninga mudalonga Yahova kuna Mose. 8 Buluka penepo, iye acita nguwo ya paditi+ yakulandana na efodhi. Nguwo ineyi ailuka na ouro, usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe na nguwo zadidi kakamwe.+ 9 Nguwo ya paditi ingafunywa na pakati ikhali na makhundu manai a midida ibodzi ene: Nyakatanga mʼbodzi wa ulaphi, nyakatanga* mʼbodzi wa ugugumi. 10 Pa nguwo ineyi, iwo aikha mizera minai ya miyala ya ntengo ukulu. Nzera wakutoma ukhali wa miyala ya rubhi, topazyo na ejimeradha. 11 Nzera waciwiri ukhali wa miyala ya turkeza, safira na jaspe. 12 Nzera wacitatu ukhali wa miyala ya lesemu,* agata na ametista. 13 Nzera wacinai ukhali wa miyala ya krizolito, oniksi na jadhe. Miyala ineyi yaikhwa mu mphampha zingʼono za ouro. 14 Miyala ineyi ikhali 12 mwakubverana na ana 12 a Izraeli. Madzina anewa akhadalembwa ninga munaikhwa cidzindikiro pa selo, dzina ibodzi na ibodzi ikhaimirira madzindza 12.

15 Buluka penepo, iwo acita nkhambala zakulukwa za ouro yadidi ninga nkufu, mbaziikha pa nguwo ya paditi.+ 16 Iwo acitambo mphampha ziwiri zingʼono za ouro na mphete ziwiri za ouro, mphete zenezi aziikha kunkhomo ziwiri za nguwo ya paditi. 17 Pidamala iwo, apitisa nkhambala ziwiri za ouro mu mphete ziwiri za ouro kunkhomo ziwiri za nguwo ya paditi. 18 Iwo apitisa nkhomo ziwiri za nkhambala mu mphampha ziwiri, mbazimangirira mʼmapewa pa mithambo ya efodhi kukhundu yakutsogolo. 19 Buluka penepo, iwo acita mphete ziwiri za ouro mbaziikha mu nkhomo ziwiri za nguwo ya paditi, kukhundu yankati, cifupi na efodhi.+ 20 Pidamala iwo, acita mphete zinango ziwiri za ouro mbaziikha kunja kwa efodhi, pantsi pa mithambo miwiri inapita na mʼmapewa, cifupi na panaphatana iyo, padzulu pa sintu yakulukwa. 21 Pakumalisa, iwo akwata mithambo ya bhurumu mbamanga mphete za pa nguwo ya paditi na mphete za pa efodhi, toera nguwo ya paditi ipitirize pa mbuto yace, padzulu pa sintu yakulukwa, ninga mudalongera Yahova kuna Mose.

22 Penepo iye acita tunika yakusowa mikono ya efodhi, yonsene ikhali ya usalu wa bhurumu.+ 23 Khosi ya tunika ineyi ikhali pakati, ikhali ninga khosi ya nguwo inabvala nyankhondo. Nʼkhundu mwa khosi ineyi mukhadasonerwa nguwo yakulukwa, toera ikhonde kupanduka. 24 Buluka penepo, iwo acita pyakubalikisa napyo pyakulandana na misapo ya romaa mbaikha kukhundu yapantsi pa tunika, iwo apicita na usalu wa bhurumu, maweya a mabira akukhwazwa pinthu pyakufuirira, usalu wakufuira kakamwe, pyonsene apiluka pabodzi pene. 25 Pontho acitambo pingalingali pya ouro yadidi mbapiikha pakati pa pyakubalikisa napyo pyakulandana na misapo ya romaa, ici nduli, cinango patsogolo, kukhundu yapantsi ya tunika yakusowa mikono; 26 iwo aikha cingalingali ca ouro na cakubalikisa naco cakulandana na nsapo wa romaa, ici nduli, cinango patsogolo, kukhundu yapantsi ya tunika yakusowa mikono. Nguwo ineyi mbidaphatisirwa mʼbasa ya unyantsembe, ninga mukhadalongera Yahova kuna Mose.

27 Pontho iwo acita matunika a nguwo zadidi toera kuzipasa Aroni na anace,+ nguwo zenezi acita kuziluka, 28 iwo acita nguwo zadidi kakamwe*+ toera Aroni na anace aphimbire nazo misolo+ yawo, pontho acitambo makabudula+ a nguwo zadidi zakulukwa, 29 mithambo yakulukwa na nguwo yadidi kakamwe, usalu wa bhurumu, maweya a mabira akukhwazwa pinthu pyakufuirira, na usalu wakufuira kakamwe ninga mudalongera Yahova kuna Mose.

30 Pakumalisa, iwo acita lezi yakuyetimira ya ouro yadidi kakamwe, yakuti ndi cidzindikiro cakucena cakuperekeka kuna Mulungu. Pa lezi ineyi, iwo alembapo mafala awa ninga munalemberwa cidzindikiro pa selo: “Yahova ndi wakucena.”*+ 31 Lezi ineyi iwo aimangirira pa nguwo ya munsolo na nkhambala yakulukwa na usalu wa bhurumu ninga mudalongera Yahova kuna Mose.

32 Natenepa iwo acita pinthu pyonsene pya pa tabhernakulo; pontho Aizraeli acita pyonsene pidalonga Yahova kuna Mose.+ Iwo acita sawasawa ninga mudapangwa iwo.

33 Buluka penepo, iwo abweresa kuna Mose pinthu pyonsene pya tabhernakulo,+ kuphatanizambo nguwo zakuphimbira nazo tabhernakulo+ na pyombo pyonsene: Pyakuphataniza napyo,+ maaro,+ pimiti,*+ mizati na matsinde+ akuti akhali na mabenga; 34 nthembe za mabira zakukhwazwa pinthu pyakufuirira+ toera kuphimbira nazo, nthembe za foka toera kuphimbira nazo, nguwo ikulu yakugawa nayo;+ 35 Bokosi ya Umboni, pimiti pyace+ na mphampha;+ 36 meza, pyombo pyonsene+ pya pameza na mikate ya ntsembe;* 37 cakuikhira nyale ca ouro yadidi, nyale zace,+ mizera ya nyale, pyombo pyace pyonsene+ na mafuta akugasa nawo nyale;+ 38 guwa+ ya ouro, mafuta akudzodza nawo,+ insenso yakununkhira,+ nguwo ikulu*+ toera kuikha pansuwo wa tabhernakulo; 39 guwa ya nkuwa,+ cinthu cace ca nkuwa cakulandana na sefa, pimiti pyace+ na pyombo pyace pyonsene,+ basiya na cakuikhira basiya ineyi;+ 40 nguwo zikulu toera kucita nazo mpanda wa thando,* mizati* na matsinde ace+ akuti akhali na mabenga; nguwo ikulu*+ ya pansuwo ukulu wa thando; nkhambala zace, pyakuphataniza napyo+ na pyombo pyonsene toera kuphatisirwa mʼbasa ya pa tabhernakulo, yakuti ndi nsasa wa nsonkhano; 41 nguwo zakulukwa mwadidi zakuti mbazidabvalwa toera kutumikira pa tabhernakulo, nguwo za unyantsembe toera kupasa Aroni+ na nguwo za anace toera atumikire ninga anyantsembe.

42 Aizraeli acita pinthu pyonsene mwakubverana na pidalonga Yahova kuna Mose.+ 43 Mose adinga pinthu pyonsene pidacita iwo, mbaona kuti iwo apicita sawasawa ninga pidalonga Yahova; penepo Mose aapasa nkhombo.

40 Buluka penepo, Yahova apanga Mose: 2 “Pa ntsiku yakutoma ya mwezi wakutoma, usafunika kumanga tabhernakulo, yakuti ndi nsasa wa nsonkhano.+ 3 Ikha mwenemu Bokosi ya Umboni,+ mbufunga kukhundu ineyi na nguwo ikulu.*+ 4 Usafunikambo kuikha mwenemu meza,+ mbusasanyira mwadidi pinthu pinafuna kukhala padzulu pameza, pontho ikha mwenemu cakuikhira nyale+ na nyale zace.+ 5 Ungamala ikha guwa ya ouro inafuna kupisirwa insenso,+ guwa ineyi isafunika kukhala kutsogolo kwa Bokosi ya Umboni, pontho ikha nguwo ikulu* pansuwo wa tabhernakulo.+

6 “Usafunika kuikha guwa yakupisirapo ntsembe+ kutsogolo kwa nsuwo wa tabhernakulo, yakuti ndi nsasa wa nsonkhano, 7 pontho ikha basiya pakati pa tabhernakulo na guwa ya ntsembe, mbuikha madzi mʼbasiya ineyi.+ 8 Buluka penepo, limirisa mpanda wa thando+ nʼkhundu mwa tabhernakulo mbumanika nguwo ikulu*+ pansuwo wa thando. 9 Buluka penepo, kwata mafuta akudzodza nawo,+ mbudzodza tabhernakulo na pinthu pyonsene piri mwenemu,+ pontho cenesa tabhernakulo na pyombo pyace pyonsene, toera iyo ikhale yakucena. 10 Usafunika kudzodza guwa yakupisirapo ntsembe na pyombo pyace pyonsene, pontho uicenese toera ikhale guwa yakucena kakamwe.+ 11 Pontho usafunika kudzodza basiya na cakuikhira basiya mbuicenesa.

12 “Buluka penepo, bweresa Aroni na anace dhuzi na pansuwo wa nsasa wa nsonkhano, mbuapanga toera asambe.+ 13 Pontho usafunika kubvazika Aroni nguwo za unyantsembe,+ undzodze,+ mbuncenesa toera anditumikire ninga nyantsembe. 14 Ungamala, bweresa anace mbuabvazika matunika.+ 15 Usafunika kuadzodza ninga mudadzodza iwe pai wawo,+ natenepa iwo anadzanditumikira ninga anyantsembe. Kudzodzwa kweneku kunadzaapasa basa yakutumikira ninga anyantsembe ndzidzi onsene, kwenda na kwenda mʼmadzindza mwawo.”+

16 Mose acita pinthu pyonsene mwakubverana na pidapangwa iye na Yahova.+ Iye acita sawasawa ninga mudapangwa iye.

17 Pa ntsiku yakutoma ya mwezi wakutoma wa caka caciwiri, tabhernakulo ikhadamala kulimiriswa.*+ 18 Mose pidalimirisa iye tabhernakulo, aikha pantsi matsinde+ akuti ali na mabenga, aikha maaro,+ pontho aikha pimiti+ mbalimirisa mizati.* 19 Mose afuthula nguwo zakuphimbira nazo+ mʼmaaro a tabhernakulo mbaikha nguwo zakuphimbira nazo+ padzulu pa tabhernakulo mwakubverana na pidampanga Yahova.

20 Buluka penepo akwata matabwa a miyala akuti akhali na Umboni+ mbaaikha mʼBokosi,+ aikha pimiti+ mu mphete za Bokosi, mbaikha mphampha+ padzulu pa Bokosi.+ 21 Mose akwata Bokosi mbaiikha mu tabhernakulo, aikhambo nguwo ikulu+ yakugawa nayo, mbafunga kukhundu ikhali na Bokosi ya Umboni+ mwakubverana na pidampanga Yahova.

22 Buluka penepo, iye aikha meza+ mu nsasa wa nsonkhano kukhundu yakunkwiriro ya tabhernakulo, kunja kwa nguwo ikulu yakugawa nayo, 23 pontho Mose apaka mikate+ padzulu pa meza, pamaso pa Yahova, mwakubverana na pidampanga Yahova.

24 Iye aikha cakuikhira nyale+ mu nsasa wa nsonkhano kutsogolo kwa meza, kukhundu yakunterero* kwa tabhernakulo. 25 Mose agasa nyale+ pamaso pa Yahova, mwakubverana na pidampanga Yahova.

26 Buluka penepo, iye aikha guwa ya ouro+ mu nsasa wa nsonkhano cifupi na nguwo ikulu yakugawa nayo, 27 toera kupisirapo+ insenso yakununkhira,+ mwakubverana na pidalonga Yahova kuna Mose.

28 Buluka penepo, iye aikha nguwo ikulu*+ pansuwo wa tabhernakulo.

29 Iye aikha guwa yakupisira ntsembe+ pansuwo wa tabhernakulo, yakuti ndi nsasa wa nsonkhano, toera kuperekapo ntsembe zakupiswa+ na ntsembe za pyakudya, mwakubverana na pidalonga Yahova kuna Mose.

30 Pidamala iye, aikha basiya pakati pa tabhernakulo na guwa ya ntsembe, mbaikha madzi mʼbasiya ineyi toera anyantsembe asambe+ manja awo na miyendo yawo. 31 Mose, Aroni na anace asamba manja awo, mbatsuka miyendo yawo mʼbasiya ineyi. 32 Ndzidzi onsene ukhapita iwo mu tabhernakulo, peno ukhafendedzera iwo guwa ya ntsembe, akhasamba+ manja awo mbatsuka miyendo yawo, mwakubverana na pidalonga Yahova kuna Mose.

33 Pakumalisa, iye alimirisa mpanda+ nʼkhundu mwa tabhernakulo na guwa ya ntsembe, mbaikha nguwo ikulu* pansuwo wa mpanda+ wa tabhernakulo.

Natenepa Mose amala kucita pinthu pyonsene. 34 Buluka penepo, khole yatcita mbitoma kuphimbira nsasa wa nsonkhano, pontho ceza ca mbiri ya Yahova cadzala mu tabhernakulo.+ 35 Mose nee akhakwanisa kupita mu nsasa wa nsonkhano, thangwi khole ikhapitiriza padzulu pa nsasa, pontho ceza ca mbiri ya Yahova cikhadadzala mu tabhernakulo.+36 Mu ndzidzi ukhakwira khole padzulu pa tabhernakulo, Aizraeli akhafudza misasa yawo mbaenda pa mbuto inango, iwo acita pyenepi pa nsindzo ubodzi na ubodzi wa ulendo wawo.+ 37 Mbwenye khole ingakhonda kukwira, iwo nee akhafudza misasa yawo toera kubuluka, mpaka pa ntsiku ikhakwira iyo.+ 38 Pa nsindzo ubodzi na ubodzi wa ulendo wawo,+ mbumba yonsene ya Izraeli ikhakwanisa kuona kuti khole ya Yahova ikhali padzulu pa tabhernakulo na masikati, mbwenye namasiku moto ukakhala padzulu tabhernakulo.