YOELI
1 Yahova apanga Yoeli* mwana wa Petuweli toera kulonga mafala awa:
2 “Bveserani ipi, imwe atsogoleri a mbumba,
Pontho bveserani mwadidi, imwe monsene munakhala mu dziko ineyi.*
Kodi pinthu ninga pyenepi, pikhadacitika kale mu ntsiku zanu
Peno mu ntsiku za ambuyanu?+
3 Pangani pyenepi ananu,
Ananu asafunikambo kulonga pyenepi kuna anawo,
Pontho anawo asafunikambo kupanga ubalwi unafuna kudza.
4 Pinthu pidasiyiwa na nsoka wakutoma wa anyadzombe,* pinadzafudzwa na nsoka waciwiri wa anyadzombe akumburuka;+
Pinthu pinafuna kudzasiyiwa na anyadzombe akumburuka, pinadzadyiwa na anyadzombe angʼono akusowa manthenga;
Pinthu pinafuna kudzasiyiwa na anyadzombe angʼono akusowa manthenga, pinadzadyiwa na anyadzombe anango.+
5 Lamukani, imwe anyakuledzera,+ pontho lirani!
Khuwani, imwe monsene munamwa vinyu,
Thangwi vinyu yakutapira yabuluswa pamulomo panu.+
6 Thangwi dzindza yabwera mu dziko yanga, iyo ndi yamphambvu, pontho yakukhonda kulengeseka.+
Madzino awo ndi ninga a nkhalamu,+ pontho ntsaya zawo ndi ninga za nkhalamu.
7 Iwo asakaza muti wanga wa mauva, pontho acinja nsambvu wanga kudza citca,
Iwo abulusa makoko a miti ineyi mbaataya kutali,
Nthawi zace mbizisala zakusowa pinthu.
8 Lirani mbumba yanga, ninga pinacita mwali* wakuti abvala sakha
Mu ndzidzi unalira iye mamuna* wakuti akhafuna kunsemba.
9 Nkhabebve anabweresa ntsembe za pyakudya+ na ntsembe za pyakumwa+ panyumba ya Yahova;
Anyantsembe, atumiki a Yahova, ali kulira.
10 Munda wamala fudzwa, mataka ali kulira;+
Mbeu zamala fudzwa, nkhabebve vinyu ipswa, pontho mafuta amala.+
11 Anyakulima ali na manyadzo, anyakutsalakana minda ya mauva ali kulira,
Thangwi ya tirigu na sevadha;
Thangwi mʼmunda nkhabemobve pinthu toera kubvuna.
12 Muti wa mauva wauma,
Muti wa nsambvu wabunyala.
Muti wa romaa, wa ncindu na wa masau,
Miti yonsene ya mʼmunda yamala kuuma;+
Thangwi kutsandzaya pakati pa mbumba kwadzakhala kutsukwala.
Imwe atumiki a Mulungu wanga, pitani mu templo, pontho malani masiku amumphu uku mbamudabvala masakha;
Thangwi nkhabebve anabweresa ntsembe za pyakudya+ na ntsembe za pyakumwa+ panyumba ya Mulungu wanu.
14 Khunganyikani* toera mucite jejuu; dziwisani pya nsonkhano ukulu.+
Cemeresani atsogoleri a mbumba, pabodzi na anthu onsene anakhala mu dziko ineyi,
Toera abwere panyumba ya Yahova Mulungu wanu,+ mbakhuwa toera kuphemba ciphedzo ca Yahova.
15 Mama ine pano, ntsiku ikufika!
Ntsiku ya Yahova iri dhuzi,+
Pontho iyo inadzafika ninga ntsiku yakufudza ya Mulungu Wamphambvu Zonsene!
16 Kodi ife nee takwatirwa cakudya mbatikaona,
Pontho nee tabulusirwa kutsandzaya na kukomerwa nʼnyumba ya Mulungu wathu?
Pikwa pyamala kufudzwa, thangwi mbeu zauma.
18 Ngakhale pifuyo pisabulira!
Nkumbi wa ngʼombe usandzendza-ndzendza, thangwi iwo nkhabe thongwe toera kudya!
Pontho mikumbi ya mabira isathabuka thangwi ya madawo a mbumba.
19 Yahova, ine ndinadzakucemerani;+
Moto wamala kupisa thongwe ya nʼthando,
Pontho malirimi a moto amala kupisa miti yonsene ya mʼmunda.
20 Ngakhale pinyama pya ntsanga, pisadikhira ciphedzo canu,
Thangwi mikulo ya madzi yamala kuuma,
Pontho moto wamala kupisa thongwe ya nʼthando.”
2 “Lizani nyanga mu Sioni!+
Khuwani paphiri yanga yakucena kuti nkhondo ikubwera.
2 Ndi ntsiku ya cidima cikulu, ntsiku ya mitambo,+
Ndi ntsiku ya makole na cidima cikulu kakamwe,+
Ndi ninga pinacita ceza ca mʼbambakuca padzulu pa mapiri.
Pana dzindza ya anthu azinji, pontho amphambvu;+
Cipo kwaoneka kale dzindza ya anthu ninga anewa,
Pontho cipo kunadzaoneka pontho inango
Mu pyaka pyonsene pya ubalwi wantsogolo.
3 Kutsogolo kwawo kuna moto wakufudza,
Nduli mwawo iwo asapiswa na malirimi a moto.+
Kutsogolo kwawo kuna dziko ninga munda wa Edheni,+
Mbwenye nduli mwawo muna thando yakusowa pinthu,
Pontho nkhabepo cinafuna kupulumuka.
4 Iwo asaoneka ninga makavalo,
Kuthamanga kwawo ndi ninga makavalo ankhondo.+
5 Kunumpha kunacita iwo padzulu pa mapiri kusabveka ninga kulira kwa ngolo,+
Ninga malirimi a moto wakugaka wakuti ukupisa maudzu.
Iwo ndi ninga mbumba yamphambvu yakuti yamala kupakana toera kumenya nkhondo.+
6 Anthu anadzagopa pamaso pawo.
Anthu onsene anadzadzudzumika.
7 Iwo anathamangira anyamalwa ninga pinacita anyankhondo,
Iwo asakwira mpanda ninga pinacita anyankhondo,
Mʼbodzi na mʼbodzi asapitiriza pa mbuto yace,
Pontho onsene nkhabe peuka munjira zawo.
8 Iwo nee asagwinyana unango na ndzace;
Mʼbodzi na mʼbodzi asafamba munjira yace.
Munthu angagwa thangwi ya pida pya nkhondo,
Anango asapitiriza kuenda kutsogolo.
9 Iwo asapita mu nzinda, mbanumpha mpanda.
Asapita mʼmanyumba, mbapita na pa majanela ninga mambava.
10 Dziko isatetemera pamaso pawo, pontho kudzulu kusatekenyeka.
Dzuwa na mwezi pyathima,+
Pontho nyenyezi nee ziri kuyetimirabve.
11 Yahova anadzagaluza fala yace mu ndzidzi unatsogolera iye anyankhondo ace,+ thangwi nsoka wace wa anyankhondo ndi ukulu kakamwe.+
Thangwi Mulungu wakuti asakwanirisa mafala Ace ndi wamphambvu;
Thangwi ntsiku ya Yahova ndi ikulu, pontho ndi yakugopswa kakamwe.+
Mbani anakwanisa kuipirira?”+
12 Yahova alonga: “Na thangwi ineyi, ndzidzi mbuciripo, bwererani kuna ine na ntima wanu onsene,+
Citani jejuu,+ lirani, pontho bulirani.
13 Pandulani mitima yanu,+ tayu nguwo zanu,+
Pontho bwererani kuna Yahova Mulungu wanu,
Thangwi iye ndi wantsisi na wakukoma ntima,* wakupirira*+ na waufuni kakamwe,*+
Iye anacinja manyerezero ace mbakhonda kubweresa nyatwa.
14 Mbani anapidziwa khala iye anacinja manyerezero ace mbakubverani ntsisi,+
Pontho mbakupasani nkhombo,
Toera imwe mukwanise kupereka ntsembe za pyakudya na ntsembe za pyakumwa kuna Yahova Mulungu wanu?
15 Lizani nyanga mu Sioni!
Khunganyikani* toera mucite jejuu; dziwisani pya nsonkhano ukulu.+
16 Cemeresani anthu; citisani mpingo kukhala wakucena.+
Cemeresani amuna akugwesera; cemeresani anangʼono na akhombwani.+
Mankhadzi wamamuna na mankhadzi wankazi mbabuluke mʼmakwartu mwawo.
17 Anyantsembe, atumiki a Yahova mbalire
Nʼkhonde mwa guwa ya ntsembe+ mbalonga:
‘Yahova bverani ntsisi mbumba yanu;
Lekani kutawirisa kuti unthaka wanu upaswe manyadzo,
Mbamuasiya toera atongwe na anthu a madzindza anango.
Thangwi yanji mbumba zisafunika kulonga kuti: “Ali kupi Mulungu wawo?”’+
18 Penepo Yahova anadzatsidzikiza dziko yace mwaphinga,
Pontho anadzabvera ntsisi mbumba yace.+
19 Yahova anadzatawira mbumba yace:
‘Ine ndiri kukupasani cakudya, vinyu ipswa na mafuta,
Pontho imwe munadzakhuta mwadidi;+
Ine nee ndinadzakucitisanibve kukhala na manyadzo pakati pa anthu a madzindza anango.+
20 Ale anabulukira kunkwiriro ndinadzaathamangisa mbaenda kutali kakamwe na imwe;
Ndinadzaathamangisa mbaenda mu dziko yakusowa madzi na yakusowa anthu.
Anyankhondo awo akutsogolo, ndinadzaathamangisira kumabulukiro a dzuwa a bara,*
Pontho anyankhondo awo a nduli, ndinadzaathamangisira kumadokero a dzuwa a bara.*
Manungo awo akufa anadzanunkha,
Pontho kununkha kweneku kunadzabveka mʼmbuto zonsene mu dziko ineyi;+
Thangwi Ine ndinadzacita pinthu pyakudzumisa kakamwe.’
21 Iwe dziko, leka kugopa.
Komerwa, pontho tsandzaya, thangwi Yahova anadzacita pinthu pyakudzumisa kakamwe.
22 Imwe pinyama pya ntsanga, lekani kugopa,
Thangwi mbuto zakudyesera pifuyo za nʼthando zinadzamera thongwe,+
Pontho miti inadzabala misapo;+
Muti wa nsambvu na muti wa mauva unadzabala misapo mizinji kakamwe.+
23 Imwe ana a Sioni, tsandzayani, pontho komerwani thangwi ya pinthu pinafuna kudzacita Yahova Mulungu wanu;+
Thangwi iye anadzakubvumbisirani madzi akutoma ninga munafunikira iwo,
Pontho iye anadzakubvumbisirani madzi mazinji ninga pikhacita iye kale,+
Anadzakubvumbisirani madzi akutoma na madzi a pa caka.
24 Mbuwa* zinadzadzala na cakudya,
Mbuto zakukamulira mauva zinadzadzala na vinyu yakutapira, pontho mbuto zakukamulira mafuta zinadzadzala na mafuta.+
25 Ine ndinadzakubwezerani pyakudya pyonsene pidaluza imwe
Mu pyaka pidatumiza ine nsoka waciwiri wa anyadzombe akumburuka, anyadzombe angʼono akusowa manthenga, anyadzombe anango na nsoka wakutoma wa anyadzombe,
Akuti ndi nsoka ukulu wa anyankhondo adatumiza ine kuna imwe.+
26 Mwandimomwene imwe munadzadya mbamukhuta,+
Pontho munadzasimba dzina ya Yahova Mulungu wanu,+
Ule adacita pinthu pyakudzumisa toera kukuphedzani;
Mbumba yanga cipo inadzapaswa pontho manyadzo.+
27 Imwe munadzadziwa kuti ine ndiri pakati pa Aizraeli+
Pontho munadzadziwa kuti ine ndine Yahova Mulungu wanu,+ nkhabepo unango!
Mbumba yanga cipo inadzapaswa pontho manyadzo.
28 Buluka penepo ine ndinadzatsanulira nzimu wanga+ kuna anthu a mitundu yonsene,
Pontho ananu amuna na akazi anadzalonga ninga aprofeta,
Ankhalamba anu anadzaloteswa,
Pontho aphale anu anadzaona masomphenya.+
29 Pontho mu ntsiku zenezi ine ndinadzatsanulirambo nzimu wanga
Kuna atumiki anga amuna na akazi.
30 Ndinadzapangiza pinthu pyakudzumisa kudzulu na pa dziko yapantsi:
Ciropa, moto na makole a utci.+
31 Dzuwa inadzacinja kudza cidima, pontho mwezi unadzafuira ninga ciropa+
Mbidzati kufika ntsiku ya Yahova, yakuti ndi ikulu na yakugopswa kakamwe.+
32 Pontho onsene anacemera dzina ya Yahova, anadzapuluswa;+
Thangwi mu Sioni na mu Yerusalemu munadzakhala ale adapulumuka,+ ninga mudapilongera Yahova,
Anyakupulumuka anacemerwa na Yahova.”
3 “Onani! Mu ntsiku zenezi na mu ndzidzi unoyu,
Unafuna ine kusudzula ale adaendeswa ku ubitcu mbandiabweresa mu Yuda na mu Yerusalemu,+
2 Ine ndinadzagumanyambo madzindza onsene a anthu
Pontho ndinadzaabweresa nʼGowa ya Yosafate.*
Penepo ine ndinadzaatonga,+
Thangwi pidacita iwo kuna mbumba yanga na unthaka wanga Izraeli,
Thangwi iwo abalalisa mbumba yanga pakati pa madzindza,
Pontho iwo akhadagawana dziko yanga.+
3 Thangwi iwo acita pyakulotera toera kugawana mbumba yanga;+
Iwo akhagulisa mwana wamamuna toera kulipa nkazi wauputa,
Pontho akhagulisa mwana wankazi toera kugula vinyu mbamwa.
4 Iwe Tiro, Sidhoni na pisa pyonsene pya ku Filistiya,
Musafunanji kuna ine?
Pana cakuipa cidakucitirani ine toera mundibwezere?
Khala imwe mukundibwezera,
Ine ndinadzakubwezeranimbo mwakucimbiza kakamwe mwakubverana na pinthu pidandicitira imwe.+
5 Nakuti imwe mwakwata parata yanga na ouro yanga,+
Pontho mwakwata pinthu pyanga pyakufunika kakamwe mbamupiikha mʼmatemplo anu;
6 Pontho mwakwata anthu a ku Yuda na a ku Yerusalemu mbamuagulisa kuna Agerego,+
Toera kuaendesa kutali kakamwe na dziko yawo;
7 Cincino ine ndiri kucitisa mbumba yanga toera ibuluke ku mbuto idaagulisa imwe,+
Pontho ine ndinadzakubwezerani mwakubverana na pidacita imwe.
8 Ine ndinadzapereka* ananu amuna na ananu akazi mʼmanja mwa mbumba ya ku Yuda,+
Pontho iwo anadzaaperekambo* mʼmanja mwa amuna a ku Sabha, dzindza yakutali kakamwe;
Thangwi adalonga pyenepi ndine Yahova.
9 Dziwisani ipi pakati pa madzindza:+
Khunganyikani* toera kumenya nkhondo! Cemeresani amuna amphambvu!
Anyankhondo onsene mbafendedzere cifupi, mbaende patsogolo!+
10 Fulani* pyakulima napyo pyanu toera pikhale masupada, pontho fulani pyakusadza* napyo pyanu toera pikhale madipa.
Wakusowa mphambvu mbalonge: “Ndine wamphambvu.”
11 Imwe madzindza onsene anakhala dhuzi, gumanyikanani, bwerani, pontho phedzanani!’”+
Imwe Yahova citisani kuti anyankhondo anu amphambvu abwere pa mbuto ineyi.
12 Imwe anthu a madzindza anango, lamukani, pontho bwerani ku Gowa ya Yosafate;
Thangwi ine ndinadzakhala kweneko toera kutonga madzindza onsene anakhala cifupi.+
13 Pitisani sikeya thangwi wafika ndzidzi wakubvuna.
Bwerani mudzaponde-ponde thangwi mbuto yakukamulira mauva yadzala.+
Mbuto inagwera vinyu yakukamulwa yadzala, pontho ikutayikira, thangwi madawo a madzindza anewa ndi mazinji kakamwe.
14 Mwinji na mwinji wa anthu uli pa gowa yakutongera miseru,
Thangwi ntsiku ya Yahova iri dhuzi na pa gowa yakutongera miseru.+
15 Dzuwa na mwezi pinadzasiya kugaka,
Pontho nyenyezi nee zinadzayetimirabve.
16 Yahova anadzakhuwa ninga nkhalamu mu Sioni,
Iye anadzagaluza fala yace mu Yerusalemu.
Kudzulu na dziko yapantsi pinadzatekenyeka;
Mbwenye Yahova anadzakhala mbuto yakuthawira kuna mbumba yace,+
Mbuto yacitsidzikizo cakuwanga kuna mbumba ya Izraeli.
17 Pontho imwe munadzadziwa kuti ine ndine Yahova Mulungu wanu anakhala mu Sioni, phiri yanga yakucena.+
Yerusalemu inadzakhala mbuto yakucena,+
Pontho anthu a madzindza anango nee anadzapitabve na mwenemo.+
18 Pa ntsiku ineyi, mʼmapiri munadzadjodja vinyu yakutapira,+
Nthunda zinadzawewa nkaka,
Pontho mikulo yonsene ya ku Yuda inadzawewa madzi.
Panyumba ya Yahova panadzabuluka mphuno ya madzi,+
Pontho madzi anewa anadzathirira Gowa* ya Miti ya Mikexa.
19 Mbwenye Ejitu anadzakhala madembe,+
Pontho Edhomi anadzakhala thando yakusowa pinthu,+
Thangwi ya uphanga unacitirwa mbumba ya Yuda,+
Akuti mu dziko yawo apha anthu akusowa mulando.+
20 Mbwenye mu Yuda ndzidzi onsene munadzakhala anthu,
Pontho mu Yerusalemu munadzakhala anthu mu ubalwi na ubalwi.+
Dzina ineyi isabveka “Yahova Ndi Mulungu.”
Peno: “dziko yapantsi.”
Pa vesi ino, Mucihebheri alonga mitundu minai ya anyadzombe.
Peno: “ntsikana.”
Peno: “mankhadzi.”
Fala na Fala: “mangani ncuno mwanu.”
Peno: “mbamumenya panthimandzi panu.”
Fala na Fala: “Cenesekani.”
Munjira inango: “Masambvu akuuma.”
Peno: “Mbeu zafera mʼmafoxolo.”
Peno: “mu dziko yapantsi.”
Peno: “wadidi.”
Peno: “wakukhonda cimbiza kuipirwa.”
Peno: “wakudzala na ufuni; waufuni wakukhonda mala.”
Fala na Fala: “Cenesekani.”
Ineyi ndi Bara Yakufa.
Ineyi ndi Bara ya Medhiteraneo.
Peno: “Mbuto inabubudirwa pinthu.”
Dzina ineyi isabveka “Yahova Ndi Nyakutonga Miseru.”
Fala na Fala: “ndinadzagulisa.”
Fala na Fala: “anadzaagulisambo.”
Fala na Fala: “Cenesekani.”
Peno: “Sanduzani.”
Peno: “pyakusaira.”
Peno: “Uwadhi.”