AMOSI
1 Mafala analonga pya Izraeli akuti Amosi,* mʼbodzi wa anyakufuya mabira wa ku Tekoa,+ aapangwa mʼmasomphenya mu ntsiku za Mambo Uziya+ wa ku Yuda na mu ntsiku za Yerobhoamu+ mwana wa Yowasi+ mambo wa Izraeli, pyaka piwiri mbacidzati kucitika citeketeke.+ 2 Iye alonga:
“Yahova anadzalira ninga nkhalamu mu Sioni,
Pontho iye anadzagaluza fala yace mu Yerusalemu.
Mbuto zakudyesera pifuyo za akumbizi zinadzauma,
Pontho tsanga inamera padzulu paphiri ya Karmelo, inadzauma.”+
3 “Ipi ndi pidalonga Yahova:
‘“Nakuti Dhamasku andisandukira mwakubwereza-bwereza,* ine nee ndinadzabwerera nduli,
Thangwi iwo apeya Jiliyadhi ninga pinacita munthu pakupeya tirigu na cakupeya naco ca utale.+
4 Natenepa ndinadzatumiza moto kuna nyumba ya Azaeli,+
Pontho moto unoyu unadzapisa nyumba zakuwanga za Bheni-Adhadhi.+
5 Ine ndinadzakhumula mipiringanyo ya misuwo mikulu ya ku Dhamasku;+
Ine ndinadzapha anthu a ku Bhikati-Aveni,
Pontho ndinadzapha ule anatonga* ku Bheti-Edheni;
Anthu a ku Sirya anadzaendeswa ku ubitcu ku Kiri,”+ alonga Yahova.’
6 Ipi ndi pidalonga Yahova:
‘“Nakuti Gaza+ andisandukira mwakubwereza-bwereza,* ine nee ndinadzabwerera nduli,
Thangwi iwo akwata nsoka onsene wa ale adaendeswa ku ubitcu+ mbaapereka mʼmanja mwa Edhomi.
7 Natenepa ine ndinadzatumiza moto kuna mpanda wa Gaza,+
Pontho moto unoyu unadzapisa nyumba zace zakuwanga.
8 Ine ndinadzapha anthu a ku Asidhodhe,+
Pontho ndinadzapha ule anatonga* ku Asikaloni;+
Ine ndinadzatcunyusa Ekroni,+
Pontho Afilisti anafuna kusala, anadzamala kufa,”+ adapilonga ndi Yahova Mbuya Wankulu Kakamwe.’
9 Ipi ndi pidalonga Yahova:
‘Nakuti Tiro+ andisandukira mwakubwereza-bwereza,* ine nee ndinadzabwerera nduli,
Thangwi iwo apereka nsoka onsene wa ale adaendeswa ku ubitcu kuna Edhomi,
Pontho thangwi iwo nee akumbuka cibverano ca ubale.+
10 Natenepa ine ndinadzatumiza moto kuna mpanda wa Tiro,
Pontho moto unoyu unadzapisa nyumba zace zakuwanga.’+
11 Ipi ndi pidalonga Yahova:
‘Nakuti Edhomi+ andisandukira mwakubwereza-bwereza,* ine nee ndinadzabwerera nduli,
Thangwi iye athamangisa mʼbale wace na supada,+
Pontho thangwi iye akhonda kumbvera ntsisi;
Thangwi ya ukali wace, iye asapitiriza kuakhwedzula-khwedzula,
Pontho iye asapitiriza kuipirwa nawo kwenda na kwenda.+
12 Natenepa ine ndinadzatumiza moto kuna Temani,+
Pontho moto unoyu unadzapisa nyumba zakuwanga za Bhozira.’+
13 Ipi ndi pidalonga Yahova:
‘“Nakuti Aamoni+ andisandukira mwakubwereza-bwereza,* ine nee ndinadzabwerera nduli,
Thangwi iwo apandula mimba za akazi akuti akhali na mimba a ku Jiliyadhi toera kuthimizira cisa cinakhala iwo.+
14 Natenepa ine ndinadzatumiza moto kuna Rabha,+
Pontho moto unoyu unadzapisa nyumba zace zakuwanga,
Na nʼkhuwo wa nkhondo pa ntsiku ya nkhondo,
Pontho na mphepo ikulu pa ntsiku ya condzi.
15 Mambo wawo anaenda ku ubitcu pabodzi na atsogoleri ace,”+ alonga Yahova.’
2 “Ipi ndi pidalonga Yahova,
‘“Nakuti Moabhe+ andisandukira mwakubwereza-bwereza,* ine nee ndinadzabwerera nduli,
Thangwi iye apisa magogodo a mambo wa ku Edhomi toera aacite ntoto.
2 Natenepa ndinadzatumiza moto kuna Moabhe,
Pontho moto unoyu unadzapisa nyumba zakuwanga za Keriyoti;+
Moabhe anadzafa mu ndzidzi wa uviyaviya,
Na mikhuwo ya nkhondo pabodzi na kulira kwa nyanga.+
3 Ine ndinadzabulusa ntongi* pakati pa Moabhe,
Pontho ndinadzapha iye pabodzi na atsogoleri ace onsene,”+ alonga Yahova.’
4 Ipi ndi pidalonga Yahova,
‘Nakuti Yuda+ andisandukira mwakubwereza-bwereza,* ine nee ndinadzabwerera nduli,
Thangwi iwo akhonda mwambo wa Yahova,
Pontho iwo nee akoya matongero ace;+
Mbwenye iwo apeuswa na uthambi ubodzi ene udapeusa ambuyawo.+
5 Natenepa ndinadzatumiza moto kuna Yuda,
Pontho iwo unadzapisa nyumba zakuwanga za ku Yerusalemu.’+
6 Ipi ndi pidalonga Yahova,
‘Nakuti Izraeli+ andisandukira mwakubwereza-bwereza,* ine nee ndinadzabwerera nduli,
Iwo agulisa munthu wakulungama toera akhale na parata,
Pontho agulisa munthu wakutcerenga toera akhale na masandalya mawiri.+
Baba na mwanace asapita mʼmabonde na ntsikana mʼbodzi ene,
Mbapswipisa dzina yanga yakucena.
8 Dhuzi na maguwa onsene a ntsembe,+ iwo asathasikamo nguwo zidaphatira iwo ninga cipanda;+
Iwo asagula vinyu na kobiri idapokosera iwo ale adacimwana kulipa kobiri yawo, pontho vinyu ineyi iwo asaimwa mʼmatemplo a alungu awo.’
9 ‘Mbwenye ndine adapha Aamori pamaso pawo,+
Akuti akhali akulapha kakamwe ninga miti ya sedhro, pontho amphambvu kakamwe ninga miti mikulu;
Ine ndafudza misapo yawo ndzulu pabodzi na mitcici yace ene.+
10 Ine ndakubulusani mu dziko ya Ejitu,+
Mbandikucitisani kufamba nʼthando mu pyaka 40,+
Toera mukwate ninga unthaka dziko ya Aamori.
11 Ine ndasankhula anango mwa ananu toera akhale aprofeta,+
Pontho anango mwa aphale anu toera akhale Anazireu.+
Simomwene tayu imwe mbumba ya Izraeli?’ alonga Yahova.
12 ‘Mbwenye imwe mwapasa vinyu Anazireu toera amwe,+
Pontho mwapanga aprofeta: “Lekani kulonga maprofesiya.”+
13 Natenepa ine ndinadzakunyedzani pa mbuto iri na imwe,
Ninga pinacita ngolo yakudzala na tirigu yakugwandwa kuna pinthu pinaponda iyo.
14 Munthu wakuthamanga kakamwe anadzasowa mbuto yakuthawira,+
Munthu wamphambvu nee anadzapitiriza na mphambvu zace,
Pontho nee nyankhondo mʼbodzi anadzakwanisa kupulumuka.
15 Munthu anakwewa uta nee anadzapitiriza pa mbuto yace,
Ale anathamanga mwakucimbiza kakamwe na miyendo yawo nee anadzathawa,
Munthu anafamba na kavalo nee anadzakwanisa kupulumuka.
16 Maseze munthu wamphambvu kakamwe pakati pa anyankhondo
Anadzathawa cipezipezi pa ntsiku ineyi,’+ alonga Yahova.”
3 “Imwe mbumba ya Izraeli, bveserani mafala adalonga Yahova thangwi ya imwe, thangwi ya dzindza yonsene idabulusa iye mu dziko ya Ejitu:
2 ‘Pakati pa madzindza onsene a pa dziko yapantsi adadziwa ine ndimwe basi.+
Na thangwi ineyi, ine ndinadzakutcunyusani thangwi ya madodo anu.+
3 Kodi anthu awiri anakwanisa kucita ulendo* pabodzi pene mbadzati kubverana?*
4 Kodi nkhalamu inakhuwa ntsanga mbidzati kuona nyama?
Kodi mwana wa nkhalamu asalira* pa mbuto idabisala iye mbadzati kuphata cinthu?
5 Kodi mbalame inamangika pa nsampha khala iwo nee wateyiwa?*
Kodi nsampha usafixuka khala nee wamanga cinthu?
6 Nyanga ingalizwa mu nzinda, kodi anthu nee asagopa?
Mu nzinda mungaoneka nyatwa, kodi si Yahova tayu adaicitisa?
7 Thangwi Mbuya Wankulu Kakamwe Yahova, nee asacita cinthu
Mbadzati kudziwisa pyenepi* kuna atumiki ace akuti ndi aprofeta.+
8 Nkhalamu yalira,+ mbani anafuna khonda gopa?
Yahova, Mbuya Wankulu Kakamwe alonga! Ndi mprofeta upi anafuna kupitiriza kukhala wakumatama?’+
9 Dziwisani ipi kuna ale anakhala nʼnyumba zakuwanga za Asidhodhe,
Pontho dziwisani ipi kuna ale anakhala nʼnyumba zakuwanga za mu dziko ya Ejitu.
Longani: “Gumanyikanani paphiri ya ku Samariya;+
Onani uviyaviya uli pakati pa nzinda unoyu,
Pontho kuberana kunacita anthu mu nzinda unoyu.+
10 Thangwi iwo nkhabe dziwa kucita pinthu pyadidi,” alonga Yahova,
“Ale adadzadza nyumba zawo zakuwanga na mpfuma zidagumana iwo thangwi ya uphanga.”’
11 Natenepa, Yahova Mbuya Wankulu Kakamwe alonga:
‘Nyamalwa anadzazungulira dziko ino,+
Iye anadzakupokosera mphambvu zako,
Pontho nyumba zako zakuwanga zinadzatapatwa.’+
12 Yahova alonga:
‘Aizraeli asakhala mʼmasofaa adidi ku Samariya, pontho asagona mʼmatalimba adacitwa ku Dhamasku,+
Mwa iwo ndi akucepa kakamwe anafuna kudzapulumuswa,
Ninga nkumbizi wakuti basi ene asakwanisa kupokosera miyendo miwiri, peno phindi ya khutu ya bira pamulomo wa nkhalamu.’
13 ‘Bveserani, pontho cenjezani dzindza ya Yakobe,’ adapilonga ndi Yahova, Mbuya Wankulu Kakamwe, Mulungu wa anyankhondo.
14 ‘Pa ntsiku inafuna ine kudzatcunyusa Aizraeli thangwi ya kundisandukira konsene kudacita iwo,+
Ine ndinadzatcunyusambo maguwa a ntsembe a ku Bheteli;+
Nyanga za maguwa a ntsembe zinadzagwandwa mbazigwa pantsi.+
15 Ine ndinadzagomola nyumba za ndzidzi wakutonthola na nyumba za ndzidzi wakupisa.’
‘Nyumba zidabalikiswa na nyanga za ndzou zinadzagomolwa,+
4 “Bveserani ipi, imwe ngʼombe zikazi za ku Bhasani
Zakuti ziri paphiri ya ku Samariya,+
Imwe akazi akuti musabera anthu akupwazika,+ mbamubvuya anthu akutcerenga,
Imwe akuti musapanga amunanu: ‘Tipaseni pyakumwa toera timwe!’
2 Yahova Mbuya Wankulu Kakamwe wakuti ndi wakucena, adumbira:
‘“Onani! Zinadzafika ntsiku zakuti imwe munadzamanikwa pa ngoloweko zakumanikira nyama,
Pontho anafuna kudzasala anadzamangwa na pimedzo.
3 Mʼbodzi na mʼbodzi wa imwe anadzabuluka na pa benga ya mpanda iri patsogolo pace;
Pontho imwe munadzathamangisirwa ku Arimoni,” alonga Yahova.’
4 ‘Bwerani ku Bheteli toera mudzacite madawo,+
Bwerani ku Jiligale toera mudzathimizire kucita madawo!+
Bweresani ntsembe zanu+ namacibese,
Pontho pa ntsiku yacitatu, perekani khundu yacikhumi ya pinthu piri na imwe.+
5 Pisani ntsembe yakupereka takhuta ya nkate wakucitwa na pyakutupisa;+
Khuwani toera kudziwisa pinthu pinapereka imwe mwakufuna!
Thangwi imwe mbumba ya Izraeli musakomerwa na kucita pyenepi,’ adapilonga ndi Yahova, Mbuya Wankulu Kakamwe.
6 ‘Mbwenye ine ndacitisa njala mʼmizinda yanu yonsene,
Pontho ndacitisa kuti mʼmanyumba mwanu monsene musowe cakudya;+
Mbwenye imwe nee mwatcunyuka mbamubwerera kuna ine,’+ alonga Yahova.
7 ‘Pontho ndacitisa kuti madzi akhonde kubvumba mʼmiyezi mitatu mbudzati kufika ndzidzi wa kubvuna;+
Ine ndikhacitisa kuti madzi abvumbe mu nzinda ubodzi, mbakhonda kubvumba mu nzinda unango.
Munda ubodzi ukhabvumbirwa,
Mbwenye munda unango wakuti nee ukhabvumbirwa, ukhauma.
8 Anthu a mʼmizinda miwiri peno mitatu akhaenda ku nzinda unango toera kamwa madzi,+
Ngakhale tenepo, nyota yawo nee ikhamala;
Mbwenye imwe nee mwabwerera kuna ine,’+ alonga Yahova.
9 ‘Ine ndinadzapha pyakudya pyanu na mphepo yakupisa na cikukuwe.+
Imwe mukhathimizira minda yanu ya mauva na ya mbeu zinango,
Mbwenye anyadzombe akhadya miti yanu ya misambvu na ya milivera;+
Ngakhale tenepo imwe nee mwabwerera kuna ine,’+ alonga Yahova.
10 ‘Ine ndakutumizirani muliri ninga udacitika ku Ejitu.+
Ine ndapha ananu amuna na supada,+ mbandikwata makavalo anu.+
Ine ndacitisa kuti mphuno zanu zibve kununkha kwa manungo a anyakufa mʼmisasa mwanu;+
Mbwenye imwe nee mwabwerera kuna ine,’ alonga Yahova.
11 ‘Ine ndakufudzani
Ninga pidacita ine na Sodhoma, na Gomora.+
Pontho imwe mukhali ninga nkhuni idabuluswa pa moto;
Mbwenye imwe nee mwabwerera kuna ine,’+ alonga Yahova.
12 Natenepa pyenepi ndipyo pinafuna kucita ine kuna iwe Izraeli.
Nakuti pyenepi ndipyo pinafuna kucita ine kuna iwe,
Khunganyika toera kugumanikana na Mulungu wako iwe Izraeli.
13 Onani! Ine ndine Ule adacita mapiri+ na mphepo;+
Ndisapanga anthu manyerezero anga,
Ine ndisacinja ceza cinaoneka namacibese kudza cidima,+
Pontho ine ndisaponda nthunda za pa dziko yapantsi;+
Ine ndine ntsogoleri wa anyankhondo akudzulu, dzina yanga ndi Yahova.”
5 “Imwe mbumba ya Izraeli, bveserani mafala awa analonga ine kuna imwe ninga nyimbo yaciliro:
2 ‘Agwa mwali Izraeli;
Iye akucimwana kulamuka.
Iye athawiwa mu dziko yace;
Nkhabepo munthu anafuna kumʼphedza toera kulamuka.’
3 “Thangwi ipi ndi pidalonga Yahova Mbuya Wankulu Kakamwe:
‘Nzinda unaenda kunkhondo na anyankhondo 1.000, unadzasala na anyankhondo 100;
Pontho ule unafuna kuenda kunkhondo na anyankhondo 100, unadzasala na anyankhondo khumi. Ndi pyenepi pinafuna kudzacitikira mbumba ya Izraeli.’+
4 “Ipi ndi pidalonga Yahova kuna mbumba ya Izraeli:
‘Ndisakeni toera mupitirize kukhala mʼmaso.+
5 Lekani kuenda ku Bheteli,+
Lekani kuenda ku Jiligale+ peno kupita na ku Bhersebha,+
Thangwi mwakukhonda penula, Jiligale inadzaendeswa ku ubitcu,+
Pontho Bheteli inadzafudzwa.*
6 Sakani Yahova toera mupitirize kukhala mʼmaso,+
Toera iye akhonde kufudza ana a Zuze ninga pinacita moto,
Akhonde kufudza Bheteli, mbapakhonda kuoneka munthu anafuna kuuthimisa.
7 Imwe mwacinja ulungami kudza pinthu pyakuwawa,
Pontho musaponya pantsi ulungami.+
8 Ule adacita nsoka wa nyenyezi za Kima* na nsoka wa nyenyezi za Kezili,*+
Ule anacitisa cidima cikulu kakamwe kudza ceza cinaoneka namacibese,
Ule anacitisa masikati kukhala masiku,+
Ule anagumanya madzi a mʼbara
Toera kuabvumbisa pa dziko yapantsi,+
Dzina yace ndi Yahova.
9 Iye anadzafudza mwakucimbiza anthu amphambvu,
Anadzafudza mbuto za citsidzikizo cakuwanga.
10 Iwo asaida ale anasandika pansuwo ukulu wa nzinda,
Pontho iwo asaida kakamwe ale analonga undimomwene.+
11 Nakuti imwe musakakamiza anthu akutcerenga toera akupaseni pinalima iwo thangwi ya minda idaabwerekesa imwe,
Mbamukwata ninga nsonkho pinthu pidalima iwo,+
Nee munadzapitiriza kukhala nʼnyumba za miyala yakusemwa zidamanga imwe,+
Pontho nee munadzamwa vinyu inafuna kubuluka mʼminda yanu yadidi ya miti ya mauva idatceka imwe.+
12 Thangwi ine ndisadziwa kuti imwe mwandisandukira mwakubwereza-bwereza,
Pontho ndisadziwa kuti madawo anu ndi makulu kakamwe;
Imwe musabvuya anthu akulungama,
Musatawira kudyekerwa,
Pontho musaponderera anyakutcerenga pansuwo ukulu wa nzinda.+
13 Natenepa, pa ndzidzi unoyu anthu audziwisi anadzamatama,
Thangwi unadzakhala ndzidzi wa nyatwa.+
Penepo Yahova Mulungu wa anyankhondo anadzakhala na imwe,
Ninga munalongera imwe kuti ali na imwe.+
15 Idani pinthu pyakuipa, pontho funani pinthu pyadidi,+
Citani pinthu pyakulungama pansuwo ukulu wa nzinda.+
Panango Yahova Mulungu wa anyankhondo,
Anadzabvera ntsisi ana a Zuze anafuna kudzapulumuka.’+
16 “Natenepa ipi ndi pidalonga Yahova Mulungu wa anyankhondo, Yahova alonga:
‘Mʼmbuto zonsene zapakweca anthu anadzalira,
Pontho mʼmiseu yonsene iwo anadzalonga: “Dzedze kuna ife!”
Iwo anadzacemera anyakulima toera adzalire,
Pontho anadzacemera anyakudziwa kulira paciliro toera adzalire mwakugaluza.’
17 ‘Mʼminda yonsene ya mauva munadzabveka kulira mwakugaluza;+
Thangwi ine ndinadzapita pakati panu,’ alonga Yahova.
18 ‘Dzedze kuna ale anafuna ntsiku ya Yahova!+
Kodi ntsiku ya Yahova inadzakhala tani kuna imwe?+
Inadzakhala ntsiku ya cidima, tayu ya ceza.+
19 Pa ntsiku ineyi pinthu pinadzakhala ninga munthu ali kuthawa nkhalamu mbagumanikana na ursu,*
Pontho wakuti angapita nʼnyumba mwace mbaphata pfufu, asalumwa na nyoka.
20 Kodi ntsiku ya Yahova nee inadzakhala ya cidima, tayu ya ceza?
Kodi nee inadzakhala ya cidima cikulu, mʼmbuto mwa ceza?
21 Ine ndisaida, ndisaipirwa na maphwando anu,+
Pontho nee ndisakomerwa na khwema ya ntsembe zinapereka imwe mʼmisonkhano yanu mikulu.
22 Ngakhale mupereke kuna ine ntsembe zakupiswa na ntsembe zinapereka imwe ninga miyoni,
Ine nee ndinakomerwa nazo;+
Pontho ine nee ndinadzakomerwa na ntsembe zanu zakukhazikisa ntendere za pinyama pyakununa.+
23 Lekani kundinyangula na nyimbo zanu;
Pontho nee ndisafuna kubva nyimbo zakuimbwa na pyakuimba napyo pyanu pya nkhambala.+
24 Ulungami mbuwewe ninga madzi,+
Pontho mbukhale ninga nkulo wakuti nkhabe kupwa.
25 Imwe mbumba ya Izraeli,
kodi imwe mwandibweresera ntsembe na miyoni,
Mu pyaka 40 pikhali imwe nʼthando?+
26 Cincino imwe munadzakwata mambo wanu Sakuti na Kaiwani,*
Madzimunthu adacita imwe a nyenyezi ya mulungu wanu,
27 Pontho ine ndinadzakuendesani ku ubitcu mu dziko yakutali kakamwe na ku Dhamasku,’+ adapilonga ndi ule wakuti dzina yace ndi Yahova Mulungu wa anyankhondo.”+
6 “Dzedze kuna ale anakhala mwakukhonda dzudzumika mu Sioni,
Kuna ale anaona kuti ndi akutsidzikizika kuphiri ya Samariya,+
Atsogoleri a dzindza yakubvekera,
Ale akuti asanyindirwa na mbumba ya Izraeli.
2 Ndokoni ku Kaline,
Buluka penepo ndokoni ku Amati Wankulu,+
Mungamala tcitirani ku Gati wa Afilisti, pontho onani:
Kodi iwo ndi adidi kakamwe kupiringana maumambo awa,*
Peno dziko yawo ndi ikulu kakamwe kupiringana yanu?
4 Iwo asagona mʼmatalimba akubalikiswa na nyanga za ndzou,+ pontho asatambalala mʼmasofaa,+
Iwo asadya mabira adidi na anangʼombe akununa;+
5 Iwo asanyerezera nyimbo toera kuziimba na arpa,*+
Pontho ninga Dhavidhi, iwo asasanya pyakuimba napyo;+
6 Iwo asaphatisira makhomitco makulu toera kumwa vinyu,+
Pontho asadzola mafuta akudhula kakamwe.
Mbwenye iwo nee asadzudzumika* na nyatwa ya mbumba ya Zuze.+
7 Natenepa, iwo anadzakhala akutoma kuenda ku ubitcu,+
Pontho maphwando a ale akhatambalala pa masofaa anadzamala.
8 ‘Yahova Mbuya Wankulu Kakamwe adumbira,’+ Yahova Mulungu wa anyankhondo alonga:
‘“Ine ndisaipirwa na kudzikuza kwa Yakobe,+
Ndisaida nyumba zace zakuwanga,+
Pontho ndinadzapereka nzinda unoyu kuna anyamalwa ace.+
9 “‘“Khala panyumba ibodzi pasala anthu khumi, iwo anadzafambo. 10 Mʼbale wa baba wa mʼbodzi wa ale adaphiwa anabwera kudzaabulusa mbaapisa mʼbodzi na mʼbodzi. Munjira ineyi, iye anadzabulusa magogodo awo nʼnyumba. Buluka penepo iye anadzabvundza ule anafuna kudzagumanika nkwartu: ‘Kodi uli na anthu anango mwenemu?’ Iye anadzatawira: ‘Nkhabe.’ Penepo iye anadzalonga: ‘Matama, thangwi uno nee ndi ndzidzi toera kulonga dzina ya Yahova.’”
11 Thangwi Yahova apereka ntemo,+
Pontho iye anadzagomola nyumba zikulu mbazikhala madembe,
Pontho anadzagomola nyumba zingʼono mbazisala magolongʼondo basi.+
12 Kodi makavalo asathamanga mʼmiyala,
Peno alipo analima na ngʼombe mʼmiyala?
Thangwi imwe mwacinja ulungami kudza muti wa venenu,
Pontho mwacinja nsapo wa ulungami kudza pinthu pyakuwawa.+
13 Imwe musakomerwa na pinthu pyakusowa basa,
Mbamulonga: “Kodi ife nee takhala amphambvu* thangwi yakuwangisira kwathu?”+
14 Natenepa, imwe mbumba ya Izraeli, ine ndinadzakubwereserani dzindza yakuti inadzakuidani,’+ adapilonga ndi Yahova Mulungu wa anyankhondo,
‘Pontho iyo inadzakupondererani bulukira ku Lebho-Amati*+ mpaka ku Gowa* ya Arabha.’”
7 Yahova Mbuya Wankulu Kakamwe andionesa masomphenya awa: Onani! Iye atumiza nsoka wa anyadzombe mu ndzidzi wakuti umera* wakumalisa ukhatoma kukula. Umera unoyu wabzwalwa pakumala kugwanda tsanga toera kupasa mambo. 2 Anyadzombe pidamala iwo kudya umera wa mu dziko ineyi, ine ndalonga: “Yahova Mbuya Wankulu Kakamwe, ndaphata miyendo, lekererani mbumba yanu!+ Kodi mbumba ya Yakobe inapulumuka tani?* Thangwi iyo ndi yakusowa mphambvu!”+
3 Natenepa Yahova acinja manyerezero ace.+ Yahova alonga: “Pyenepi nee pinadzacitika.”
4 Yahova Mbuya Wankulu Kakamwe andionesa pontho masomphenya awa: Onani! Yahova Mbuya Wankulu Kakamwe atonga kutcunyusa anthu na moto. Moto unoyu wagaka, mbuumisa madzi akuzika kakamwe, pontho wapisa khundu ibodzi ya dziko. 5 Buluka penepo ine ndalonga: “Yahova Mbuya Wankulu Kakamwe, ndaphata miyendo, lekani kucita pyenepi.+ Kodi mbumba ya Yakobe inapulumuka tani?* Thangwi iyo ndi yakusowa mphambvu!”+
6 Natenepa Yahova acinja manyerezero ace.+ Yahova Mbuya Wankulu Kakamwe alonga: “Pontho pyenepi nee pinadzacitika.”
7 Buluka penepo iye andionesa pontho masomphenya awa: Ine ndaona Yahova mbali dzololo pa mpanda wakuti mu ndzidzi ukhamangwa iwo aphatisira nkhambala yakundendemeza nayo, pontho mʼmanja mwace iye akhali na nkhambala yakundendemeza nayo. 8 Penepo Yahova andibvundza: “Amosi, ninji pinaona iwe?” Ine ndatawira: “Nkhambala yakundendemeza nayo.” Buluka penepo Yahova alonga: “Ndikuikha nkhambala yakundendemeza nayo pakati pa mbumba yanga ya Izraeli. Ine nkhabebve kudzaalekerera.+ 9 Mbuto zaulambiri za Izaki+ zinadzagomolwa, pontho matemplo a Aizraeli anadzafudzwa;+ ine ndinabwera kudzafudza banja ya Yerobhoamu na supada.”+
10 Amaziya nyantsembe wa ku Bheteli+ atumiza mphangwa izi kuna Yerobhoamu mambo+ wa Izraeli: “Amosi akukusandukirani mu Izraeli.+ Anthu nee akukomerwa na mafala analonga iye.+ 11 Mafala analonga Amosi ndi awa: ‘Yerobhoamu anadzaphiwa na supada, pontho mwakukhonda penula mbumba ya Izraeli inadzasiya dziko yawo, mbiendeswa ku ubitcu.’”+
12 Natenepa Amaziya apanga Amosi: “Iwe nyakuona masomphenya, buluka, thawira ku dziko ya Yuda, kasake cakudya cako* kweneko, pontho ndoko ukalonge kweneko maprofesiya ako.+ 13 Mbwenye leka longa pontho maprofesiya ako mu Bheteli,+ thangwi ndi mbuto yakupambulika ya mambo,+ pontho ndi templo* ya umambo.”
14 Penepo Amosi atawira Amaziya: “Ine nee ndikhali mprofeta peno mwana wa mprofeta; mbwenye ndikhali nkumbizi wa mabira,+ pontho ndikhatsalakana miti ya misambvu. 15 Mbwenye Yahova andicemera mu ndzidzi ukhatsalakana ine nkumbi wa mabira, pontho Yahova andipanga: ‘Ndoko kalonge maprofesiya kuna mbumba yanga ya Izraeli.’+ 16 Cincino bveserani mafala a Yahova: ‘Iwe usalonga: “Leka kulonga maprofesiya akuipa thangwi ya Izraeli,+ pontho leka kulonga mphangwa zakuipa+ thangwi ya ana a Izaki.” 17 Natenepa, ipi ndi pidalonga Yahova: “Nkazako anadzakhala puta wa mu nzinda, pontho anako amuna na akazi anadzaphiwa na supada. Anthu anadzaphatisira nkhambala yakupima nayo toera kugawana dziko yako, pontho iwe unadzafera mu dziko inango; mwakukhonda penula mbumba ya Izraeli inadzasiya dziko yawo mbiendeswa ku ubitcu.”’”+
8 Yahova Mbuya Wankulu Kakamwe andionesa masomphenya awa: Ine ndaona ntsengwa yakudzala na misapo ya ndzidzi wa malimwe. 2 Penepo iye andibvundza: “Amosi, ninji pinaona iwe?” Ine ndatawira: “Ndikuona ntsengwa ya misapo ya ndzidzi wa malimwe.” Buluka penepo Yahova andipanga: “Yafika ntsiku toera nditcunyuse mbumba yanga ya Izraeli. Ine nkhabebve kudzaalekerera.+ 3 ‘Pa ntsiku ineyi, nyimbo za mu templo zinadzacinja kudza mikhuwo yaciliro,’+ adapilonga ndi Yahova Mbuya Wankulu Kakamwe. ‘Manungo mazinji kakamwe a anthu akufa anadzakhala mʼmbuto zonsene,+ pontho kunadzakhala noo!’
4 Bveserani ipi, imwe anaponderera anthu akutcerenga
Na imwe anamalisa anthu akupfulika mu dziko ineyi,+
5 Imwe akuti musalonga: ‘Phwando yakukumbuka mwezi upswa inamala lini,+ toera ife tigulise pyakudya pyathu,
Pontho phwando yakukumbuka Sabudu+ inamala lini?
Toera ticepese pinthu pinapima na ife
Mbatitoma kudhulisa pinthu,
Pontho toera kubera anyakugula na mabhalansa authambi;+
6 Toera tikwanise kugula atcerengi na parata,
Kugula na masandalya mawiri ale anathabuka,+
Pontho toera kugulisa cakudya cakusowa basa.’
8 Na thangwi ineyi, dziko inadzatetemera,
Pontho anthu onsene anakhala mwenemo anadzatsukwala.+
Kodi dziko yonsene* nee inadzakhala ninga madzi akudzala a nkulo wa Nilo,
Pontho akuti anadzadzala mbapwa ninga nkulo wa Nilo wa ku Ejitu?’+
9 Yahova Mbuya Wankulu Kakamwe alonga: ‘Pa ntsiku ineyi
Ine ndinadzacitisa dzuwa kubira namasikati,
Pontho ine ndinadzacitisa cidima mu dziko ineyi dzuwa iri bvuu.+
10 Ndinadzacinja maphwando anu kudza kutsukwala,+
Pontho ndinadzacinja nyimbo zanu zonsene kudza nyimbo zaciliro
Ine ndinadzacitisa anthu onsene kubvala masakha, pontho ndinadzacitisa anthu onsene kucinga mpala;
Ine ndinaacitisa kuti atsukwale ninga aferwa na mwana mʼbodzi basi wamamuna akhali na iwo,
Pontho mamalisiro a ntsiku ineyi, anadzakhala akutsukwalisa kakamwe.’
11 Yahova Mbuya Wankulu Kakamwe alonga: ‘Onani! Ziri kufika ntsiku,
Zakuti ndinadzacitisa njala mu dziko,
Tayu njala yakufuna cakudya peno nyota yakufuna madzi,
Mbwenye njala na nyota yakufuna kubva mafala a Yahova.+
12 Iwo anadzandzendza-ndzendza kutomera ku bara iyi mpaka ku bara inango,
Pontho iwo anadzatomera kunkwiriro mpaka kumabulukiro a dzuwa
Iwo anadzafamba-famba mʼmbuto zonsene mbakasaka mafala a Yahova, mbwenye nee anadzaagumana.
13 Pa ntsiku ineyi, amiyali akubalika kuphatanizambo aphale,
Anadzakomoka thangwi ya nyota;
14 Ale anadumbira kuna alungu a ku Samariya+ mbalonga:
“Iwe Dhani!+ Tisadumbira mu dzina ya Mulungu wako wa mʼmaso”
Pontho: “Tisadumbira mu dzina ya nseu unaenda ku Bhersebha!”+
Iwo anadzagwa, mbwenye cipo anadzalamuka pontho.’”+
9 Ine ndaona Yahova+ akhali pa guwa ya ntsembe, pontho iye alonga: “Menya padzulu pa mizati toera pantsi payo patekenyeke. Igwande padzulu, pontho ine ndinadzapha na supada anthu anafuna kudzasala. Nee mʼbodzi wa iwo anadzathawa mbapulumuka.+
2 Iwo angakumba pantsi toera abisale Munthumbi,*
Djanja yanga inadzaabulusa mwenemo;
Pontho iwo angaenda kudzulu,
Ine ndinadzaatcitisako.
3 Pontho iwo angaenda kabisala padzulu paphiri ya Karmelo,
Kweneko ine ndinadzaasaka mbandiaphata.+
Iwo angabisala pantsi pa bara toera ndikhonde kuaona,
Ine ndinadzatuma nyoka toera ialume.
4 Iwo angakwatwa na anyamalwa awo mbaendeswa ku ubitcu,
Ine ndinadzapanga anthu kweneko toera aaphe na supada;+
Pontho ine ndinadzasaka njira zakuathabusa, tayu zakuacitira pyadidi.+
5 Yahova wa anyankhondo, Mbuya Wankulu Kakamwe Ndiye anakhuya dziko,
Natenepa iyo isatekenyeka,*+ pontho anthu onsene anakhala mwenemu anadzatsukwala;+
Dziko* yonsene inadzadzala ninga nkulo wa Nilo,
Pontho inadzapwa ninga nkulo wa Nilo wa ku Ejitu.+
6 ‘Ule wakuti amanga masikada ace mpaka kudzulu,
Pontho ule wakuti amanga nyumba yace padzulu pa dziko yapantsi;
Ule anagumanya madzi a mʼbara,
Toera kuabvumbisa pa dziko yapantsi,+
Dzina yace ndi Yahova.’+
7 Yahova alonga: ‘Imwe mbumba ya Izraeli, kodi imwe nee mwakhala ninga ana a Kusi kuna ine?’
‘Kodi ine nee ndabulusa Izraeli mu dziko ya Ejitu,+
8 ‘Onani! Ine Yahova Mbuya Wankulu Kakamwe, ndikuona umambo unacita madawo,
Pontho ine ndinadzafudza umambo unoyu pa dziko yapantsi.+
Mbwenye ine nee ndinapha dzindza yonsene ya Yakobe,’+ alonga Yahova.
9 ‘Onani! Ine ndiri kupereka ntemo,
Pontho ndinadzasukusa nyumba ya Izraeli pakati pa madzindza onsene,+
Ninga pinacita munthu pakusefa,
Pontho nee mwala ubodzi usagwa pantsi.
10 Anyakudawa onsene a mbumba yanga, anadzaphiwa na supada,
Ale analonga kuti: “Ife nee tinadzagwerwa na nyatwa, pontho nee inadzatifikira dhuzi.’”
11 ‘Pa ntsiku ineyi, ine ndinadzamanga nyumba idagwa ya Dhavidhi;+
Ine ndinadzasasanyira mbuto zidagomoka,
Pontho ine ndinadzasasanyira madembe a nyumba ineyi;
Ine ndinadzaimanga pontho mbikhala ninga mukhali iyo kalene,+
12 Ine ndinadzacita pyenepi toera mbumba yanga itonge Aedhomi ale akuti aciri mʼmaso,+
Pontho itonge madzindza onsene akuti asacemera dzina yanga,’ alonga Yahova, ule anacita pinthu pyenepi.
13 Yahova alonga: ‘Onani! Zinadzafika ntsiku,’
‘Zakuti nyakulima anadzapiringanwa na nyakukolola,
Pontho nyakukamula mauva anadzapiringanwa na nyakubzwala;+
Mʼmapiri munadzadjodja vinyu yakutapira,+
14 Ine ndinadzabweresa mbumba yanga ya Izraeli idaendeswa ku ubitcu,+
Iwo anadzamanga pontho mizinda idamala kufudzwa mbakhala mwenemo;+
Iwo anadzatceka miti ya mauva mbamwa vinyu yace,+
Pontho iwo anadzalima minda ya misapo mbadya misapo yace.’+
15 ‘Ine ndinadzaabzwala mu dziko yawo,
Pontho iwo nkhabe kudzadulwabve
Mu dziko idaapasa ine,’+ adapilonga ndi Yahova Mulungu wanu.”
Dzina ineyi isabveka “Kukhala Ntolo” peno “Kuthukula Ntolo.”
Fala na Fala: “Thangwi ya kundisandukira kudacita Dhamasku katatu, pontho kundisandukira kanai.”
Fala na Fala: “ule anaphatira ndodo.”
Fala na Fala: “Thangwi ya kundisandukira kudacita Gaza katatu, pontho kundisandukira kanai.”
Fala na Fala: “ule anaphatira ndodo.”
Fala na Fala: “Thangwi ya kundisandukira kudacita Tiro katatu, pontho kundisandukira kanai.”
Fala na Fala: “Thangwi ya kundisandukira kudacita Edhomi katatu, pontho kundisandukira kanai.”
Fala na Fala: “Thangwi ya kundisandukira kudacita Aamoni katatu, pontho kundisandukira kanai.”
Fala na Fala: “Thangwi ya kundisandukira kudacita Moabhe katatu, pontho kundisandukira kanai.”
Fala na Fala: “nyakutonga miseru.”
Fala na Fala: “Thangwi ya kundisandukira kudacita Yuda katatu, pontho kundisandukira kanai.”
Fala na Fala: “Thangwi ya kundisandukira kudacita Izraeli katatu, pontho kundisandukira kanai.”
Peno: “kufamba.”
Peno: “mbadzati kugumanikana toera kubverana?”
Peno: “asakhundzwa.”
Munjira inango: “khala nee pana ngʼambo?”
Peno: “cibisobiso cace.”
Munjira inango: “pontho nyumba zizinji.”
Munjira inango: “inadzakhala mbuto yakucitira pinthu pyakuipa.”
Panango ndi nyenyezi za Pleyadhe pa nsoka wa nyenyezi za Touro.
Panango ndi nsoka wa nyenyezi za Orioni.
Peno: “ditiringwe.”
Alungu anewa uwiri wawo ene, asaimirira planeta Saturno, yakuti ikhalambirwa ninga mulungu.
Pisaoneka kuti maumambo anewa ndi a Yuda na a Izraeli.
Peno: “cakuimba naco ca nkhambala.”
Fala na Fala: “nee abva kupha.”
Fala na Fala: “takwata nyanga toera zikhale zathu.”
Peno: “pansuwo wa Amati.”
Peno: “Uwadhi.” Onani Mabvekero a Mafala Anango.
Pyenepi pisabveka, mwezi wa Janeiro na Fevereiro.
Fala na Fala: “inalamuka tani?”
Fala na Fala: “inalamuka tani?”
Fala na Fala: “dya nkate wako.”
Fala na Fala: “nyumba.”
Peno “dziko yapantsi.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “isanyunguluka.”
Peno: “Dziko yapantsi.”
Fala na Fala “inadzamema.”