AJEU
1 Mu caka caciwiri ca utongi wa Mambo Dhariyo, mwezi wacitanthatu, pa ntsiku yakutoma ya mwezi, mprofeta Ajeu*+ atambira mphangwa za Yahova toera kupanga Zorobhabhele+ mwana wa Selatiyeli, ntongi wa ku Yuda na nyantsembe wankulu Yoswa, mwana wa Yeozadhaki. Iye alonga:
2 “Yahova wa anyankhondo alonga: ‘Mbumba iyi isalonga: “Udzati kufika ndzidzi toera kumanga* nyumba* ya Yahova.”’”+
3 Buluka penepo mprofeta Ajeu+ atambira pontho mafala awa a Yahova: 4 “Kodi uno ndi ndzidzi toera imwe mukhale nʼnyumba zakubalika, uku nyumba yanga yafudzika?+ 5 Cincino, Yahova wa anyankhondo alonga: ‘Nyerezerani mwadidi pinthu pinacita imwe. 6 Imwe musabzwala mbeu zizinji, mbwenye musabvuna pangʼono.+ Imwe musadya, mbwenye nee musakhuta. Imwe musamwa vinyu, mbwenye nee musakwana nayo. Imwe musabvala, mbwenye nkhabe kupisirwa. Ule anaphata basa, pinatambira iye asapiikha mʼbudu yakuphoka.’”
7 “Yahova wa anyankhondo alonga: ‘Nyerezerani mwadidi pinthu pinacita imwe.’
8 “‘Ndokoni kakwate miti kuphiri.+ Mangani nyumba yanga+ toera ine ndikomerwe nayo, pontho ndipaswe mbiri,’+ alonga Yahova.”
9 “‘Imwe mukhadikhira pinthu pizinji, mbwenye mwapaswa pangʼono; pontho pidabweresa imwe pinthu pyenepi nʼnyumba, ine ndapicitisa kuti pizambazike.+ Thangwi yanji?’ alonga Yahova wa anyankhondo. ‘Thangwi nyumba yanga yafudzika, mbwenye mʼbodzi na mʼbodzi wa imwe akudzudzumika na kutsalakana nyumba yace.+ 10 Natenepa, kudzulu nee kusagwisabve bume, pontho dziko yapantsi nee isabulusabve cakudya. 11 Ine ndacitisa kuti paoneke cilala pa dziko yapantsi, mʼmapiri, kuna pyakudya, kuna vinyu, mafuta, pinthu pinamera mʼmataka, kuna anthu, pifuyo na kuna pinthu pyonsene pinacita imwe na manja anu.’”
12 Zorobhabhele+ mwana wa Selatiyeli+ na nyantsembe wankulu Yoswa mwana wa Yeozadhaki,+ kuphatanizambo mbumba yonsene, abva mafala a Yahova Mulungu wawo na mafala a mprofeta Ajeu, thangwi Yahova Mulungu wawo akhadantuma; penepo mbumba yatoma kugopa Yahova.
13 Buluka penepo, Ajeu nyakupereka mphangwa wa Yahova, alonga mphangwa izi kuna mbumba toera kukwanirisa basa idapaswa iye na Yahova: “‘Ine ndiri na imweʼ+ alonga Yahova.”
14 Natenepa Yahova acitisa+ Zorobhabhele mwana wa Selatiyeli, ntongi wa ku Yuda,+ nyantsembe wankulu Yoswa,+ mwana wa Yeozadhaki na mbumba yonsene toera atome kuphata basa panyumba ya Yahova wa anyankhondo, Mulungu wawo.+ 15 Pyenepi pyacitika pa ntsiku 24 ya mwezi wacitanthatu wa caka caciwiri ca utongi wa Mambo Dhariyo.+
2 Pa ntsiku 21 ya mwezi wacinomwe, mprofeta Ajeu+ atambira mphangwa izi zakubuluka kuna Yahova: 2 “Ndaphata miyendo, bvundza Zorobhabhele+ mwana wa Selatiyeli, ntongi wa ku Yuda+ na nyantsembe wankulu Yoswa,+ mwana wa Yeozadhaki+ kuphatanizambo mbumba yonsene: 3 ‘Kodi pakati panu alipo adaona kubalika kukhali na nyumba* iyi pakutoma?+ Cincino musaiona tani? Nee yakhala ninga yakusowa basa tingailandanisa na kale?’+
4 “‘Mbwenye cincino khala wamphambvu Zorobhabhele’ alonga Yahova, ‘pontho khala wamphambvu nyantsembe wankulu Yoswa mwana wa Yeozadhaki,’
“‘Pontho khalani amphambvu imwe monsene, mbumba ya mu dziko ineyi+ mbamuphata basa,’ alonga Yahova.
“‘Thangwi ine ndiri na imwe,’+ alonga Yahova wa anyankhondo. 5 ‘Kumbukani pidakupikirani ine mu ndzidzi ukhabuluka imwe ku Ejitu,+ pontho nzimu wanga usapitiriza muna imwe.*+ Lekani kugopa.’”+
6 “Thangwi ipi ndi pidalonga Yahova wa anyankhondo: ‘Pontho mwakukhonda dembuka, ine ndinadzatekenyesa kudzulu, dziko yapantsi, bara na ntunda.’+
7 “‘Ndinadzatekenyesambo madzindza onsene, pontho pinthu pyakufunika kakamwe pya madzindza onsene pinadzapita nʼnyumba ineyi;+ ine ndinadzadza nyumba ineyi na mbiri,’+ alonga Yahova wa anyankhondo.
8 “‘Parata ndi yanga, pontho ouro ndi yanga,’ alonga Yahova wa anyankhondo.
9 “‘Mbiri inafuna kukhala na nyumba ineyi inadzakhala ikulu kakamwe kupiringana yakutoma,’+ alonga Yahova wa anyankhondo.
“‘Pontho ndinadzakhazikisa ntendere pa mbuto ineyi,’+ alonga Yahova wa anyankhondo.”
10 Pa ntsiku 24 ya mwezi wacipfemba wa caka caciwiri ca utongi wa Dhariyo, mprofeta Ajeu+ atambira mphangwa izi zakubuluka kuna Yahova: 11 “Ipi ndi pidalonga Yahova wa anyankhondo: ‘Ndaphata miyendo, bvundzisa anyantsembe kuti mwambo usalonganji:+ 12 “Munthu angakwata nyama yakuceneswa nʼkhandzwa mwace, pontho nguwo yace mbikhuya nkate, nsuzi, vinyu, mafuta peno ntundu unango wa cakudya, kodi pinthu pyenepi pinakhala pyakucena?”’”
Anyantsembe atawira: “Nkhabe!”
13 Penepo Ajeu aabvundza: “Khala munthu apswipisika thangwi yakukhuya manungo a munthu wakufa, buluka penepo mbakhuya cibodzi mwa cakudya ceneci, kodi cakudya ceneci cinakhala cakukhonda cena?”+
Anyantsembe atawira: “Ico cinakhala cakukhonda cena.”
14 Natenepa Ajeu alonga: “‘Mbumba iyi ndi tenepo, pontho dzindza iyi ndi tenepo pamaso panga,’ alonga Yahova, ‘pontho pinthu pyonsene pinacita iwo na manja awo ndi tenepo; pinthu pyonsene pinapereka iwo ndi pyakukhonda cena.’
15 “‘Mbwenye cincino, ndaphata miyendo, kutomera lero kuenda ntsogolo nyerezerani ipi: Ninji pikhacitika mbamudzati kukwata mwala mbamuikha padzulu pa unango mu templo ya Yahova?+ 16 Munthu angaenda pa mbuto inabubudirwa tirigu mbadikhira kuti anakwata pitundu 20, iye akhagumana pitundu 10 basi; pontho munthu angaenda pa mbuto yakukamulira mauva toera kakwata pitomba 50, iye akhagumana basi ene 20;+ 17 Ine ndacitisa kuti mabasa onsene a manja anu akhonde kufamba mwadidi thangwi ya mphepo yakupisa kakamwe, cikukuwe+ na matalala, mbwenye nee mʼbodzi wa imwe abwerera kuna ine,’ alonga Yahova.
18 “‘Ndaphata miyendo, bveserani mwadidi ipi kutomera lero kuenda ntsogolo, ntsiku 24 ya mwezi wacipfemba, ntsiku inatoma kuikhwa miyala pantsi toera kumanga templo ya Yahova;+ nyerezerani mwadidi ipi: 19 Kodi mbeu ziciripo mʼmbuto inakoyerwa izo?+ Muti wa mauva, muti wa nsambvu, muti wa romaa na muti wa milivera, iyo nee isabalabve misapo, si tenepo tayu? Mbwenye kutomera lero ine ndinadzakupasani nkhombo.’”+
20 Pa ntsiku 24 ya mwezi wacipfemba, Ajeu atambira paulendo waciwiri mafala awa akubuluka kuna Yahova:+ 21 “Panga Zorobhabhele ntongi wa ku Yuda: ‘Ine ndinadzasukusa kudzulu na dziko yapantsi.+ 22 Ine ndinadzakunda maumambo, pontho ndinadzabulusa mphambvu za maumambo a madzindza anango;+ pontho ine ndinadzafudza ngolo za nkhondo na ale adazikwira, makavalo na ale adaakwira anadzagwa, pontho iwo anadzaphana unango na ndzace na supada.’”+
23 “‘Pa ntsiku ineyi,’ alonga Yahova wa anyankhondo, ‘ine ndinadzakwata iwe ntumiki wanga Zorobhabhele+ mwana wa Selatiyeli,’+ alonga Yahova, ‘pontho ine ndinadzakucitisa kukhala ninga mphete yakufunika kakamwe, thangwi ine ndakusankhula,’ alonga Yahova wa anyankhondo.”
Dzina ineyi isabveka “Wakubalwa pa Phwando.”
Peno: “kumanga pontho.”
Peno: “templo.”
Peno: “templo.”
Munjira inango: “pontho nzimu wanga pikhali iwo pakati panu.”