ZAKARIYA
1 Pa mwezi wacisere wa caka caciwiri ca utongi wa Dhariyo,+ mprofeta Zakariya*+ mwana wa Bherekiya, mwana wa Idho atambira mphangwa izi zakubuluka kuna Yahova: 2 “Yahova aipirwa kakamwe na ababanu.+
3 “Apange tenepa: ‘Ipi ndi pidalonga Yahova wa anyankhondo: “‘Bwererani kuna ine,’ alonga Yahova wa anyankhondo, ‘ine ndinabwererambo kuna imwe,’+ alonga Yahova wa anyankhondo.”’
4 “‘Lekani kukhala ninga ababanu, akuti aprofeta akale aapanga: “Ipi ndi pidalonga Yahova wa anyankhondo: ‘Ndaphata miyendo, siyani makhaliro anu akuipa na macitiro anu akuipa.’”’+
“‘Mbwenye iwo nee andibvesera, pontho nee abvera mafala anga,’+ alonga Yahova.
5 “‘Ali kupi ababanu cincino? Pontho aprofeta akhala mʼmaso kwenda na kwenda? 6 Ine ndapanga ababanu mitemo ikhafunika iwo kutowezera. Ine ndatuma atumiki anga akuti ndi aprofeta toera kuacenjeza pinthu pinafuna kudzaacitikira angakhonda kubvera mitemo ineyi. Pyenepi pyonsene pyacitika kuna iwo, si tenepo tayu?’+ Natenepa iwo abwerera kuna ine mbalonga: ‘Yahova wa anyankhondo acita kuna ife pikhanyerezera iye mwakubverana na makhaliro athu na macitiro athu.’”+
7 Pa ntsiku 24 ya mwezi wa 11, wakuti ndi mwezi wa Sebhati,* mu caka caciwiri ca utongi wa Dhariyo,+ mprofeta Zakariya mwana wa Bherekiya, mwana wa Idho atambira mphangwa izi zakubuluka kuna Yahova: 8 “Ine ndaona masomphenya namasiku. Mʼmasomphenya anewa, ndaona munthu adakwira kavalo yakufuira, pontho iye akhali dzololo pakati pa miti ya murta yakuti ikhali nʼgowa; nduli mwace mukhali na makavalo akufuira, akufuirira na akucena.”
9 Natenepa ine ndabvundza: “Mbuyanga, anewa mbani?”
Anju akhalonga na ine atawira: “Ine ndinakupanga kuti anewa mbani.”
10 Buluka penepo, munthu akhadalimira pakati pa miti ya murta alonga: “Anewa ndi ale adatumwa na Yahova toera kufamba-famba mu dziko ineyi.” 11 Pontho iwo apanga anju wa Yahova wakuti akhali pakati pa miti ya murta: “Ife tazungulira dziko, mbwenye taona kuti dziko yonsene iri muntendere, pontho nkhabe uviyaviya.”+
12 Na thangwi ineyi, anju wa Yahova alonga: “Imwe Yahova wa anyankhondo, mpaka lini munasiya kubvera ntsisi Yerusalemu na mizinda ya ku Yuda+ yakuti mukhadaikhonda mu pyaka 70?”+
13 Yahova atawira anju akhalonga na ine na mafala adidi na acibalangazo. 14 Buluka penepo anju akhalonga na ine andipanga: “Dziwisa ipi: ‘Yahova wa anyankhondo alonga: “Ine ndinadzatsidzikiza Yerusalemu na Sioni, inde, ine ndinadzaatsidzikiza na ntima wanga onsene.+ 15 Ine ndiri wakuipirwa, wakuipirwa kakamwe na madzindza ananyerezera kuti ali akutsidzikizika,+ thangwi pidaipirwa ine pangʼono basi+ na mbumba yanga, madzindza anewa athimizira kakamwe nyatwa ya mbumba yanga.”’+
16 “Natenepa, ipi ndi pidalonga Yahova: ‘“Ine ndinadzabvera pontho ntsisi Yerusalemu,+ nyumba yanga inadzamangwa pontho mu nzinda unoyu,”+ alonga Yahova wa anyankhondo, pontho Yerusalemu anadzapimwa na nkhambala yakupima nayo.”’+
17 “Dziwisa pontho ipi: ‘Yahova wa anyankhondo alonga tenepa: “Mizinda yanga inadzadzala pontho na pinthu pyadidi; pontho ine Yahova ndinadzabalangaza pontho Sioni+ mbandisankhula pontho Yerusalemu.”’”+
18 Buluka penepo ndayangʼana kudzulu mbandiona nyanga zinai.+ 19 Penepo ndabvundza anju akhalonga na ine: “Nyanga zenezi zisaimiriranji?” Iye atawira: “Nyanga zenezi zisaimirira mphambvu idabalalisa Yuda,+ Izraeli+ na Yerusalemu.”+
20 Buluka penepo Yahova andipangiza amesiri anai. 21 Ine ndabvundza: “Amesiri awa abwera kudzacitanji?”
Iye alonga: “Izi ndi nyanga zidabalalisa Yuda mpaka mbasoweka munthu toera kumenyana nazo. Amesiri anewa anadzabwera kudzazigopesa, toera kufudza nyanga za madzindza akuti akhadalamusa nyanga zawo toera kufudza dziko ya Yuda na kubalalisa anthu anakhala mwenemo.”
2 Ine ndayangʼana kudzulu mbandiona munthu ali na nkhambala yakupima nayo+ mʼmanja mwace. 2 Natenepa ine ndambvundza: “Uli kuenda kupi?”
Iye anditawira: “Ndiri kuenda kapima Yerusalemu toera kuona ugugumi wace na ulaphi wace.”+
3 Buluka penepo, anju akhalonga na ine abuluka mbaenda, pontho abwera anju unango toera kudzaonana na iye. 4 Anju unoyu alonga kuna anju ndzace: “Thamanga toera ukapange mʼphale ule kuti: ‘“Nakuti anthu anadzanjipa, pontho mu Yerusalemu munadzakhala na pifuyo pizinji,+ anthu anafuna kudzakhala mwenemo nee anadzamanga mipanda.+ 5 Pontho ine,” alonga Yahova, “ndinadzakhala ninga mpanda wa moto wakuazungulira,+ pontho mbiri yanga inadzakhala pakati pa Yerusalemu.”’”+
6 “Bwerani! Bwerani! Bulukani ku dziko yakunkwiriro,”+ alonga Yahova.
“Thangwi ine ndinadzabalalisa anthu ako mʼmakhundu onsene,”*+ alonga Yahova.
7 “Bwera Sioni! Thawa, iwe anakhala na mwana wankazi wa Bhabhilonya.+ 8 Pidamala Yahova wa anyankhondo kupaswa mbiri, iye andituma kuna madzindza ale adatapata pinthu pyanu, pontho ipi ndi pidalonga iye:+ ‘Ule anakukhuyani akudzokonya nʼdiso mwanga.*+ 9 Thangwi ine ndinadzalamusa nkono wanga toera kuathusa, pontho anyabasa awo akale anadzatapata pinthu pyawo.+ Penepo imwe munadzadziwadi kuti ine ndatumwa na Yahova wa anyankhondo.
10 “Khuwa mwakutsandzaya iwe mwana wankazi wa Sioni,+ thangwi ine ndiri kubwera,+ pontho ndinadzakhala pabodzi na iwe,”+ alonga Yahova. 11 “Pa ntsiku ineyi, madzindza mazinji anadzabwera kuna ine Yahova,+ iwo anadzakhala mbumba yanga, pontho ine ndinadzakhala pakati pawo.” Penepo imwe munadzadziwa kuti Yahova wa anyankhondo andituma kuna imwe. 12 Yahova anadzakwata Yuda ninga khundu ya unthaka wace mu dziko yakucena, iye mbasankhula pontho Yerusalemu.+ 13 Anthu onsene mbamatame pamaso pa Yahova, thangwi iye ali kubwera kubulukira pa mbuto yakucena inakhala iye toera kudzacita pinthu.
3 Iye andipangiza nyantsembe wankulu Yoswa+ wakuti akhadalimira pamaso pa anju wa Yahova, penepo Sathani+ akhali dzololo kunkono wamadyo wa Yoswa toera kumpingiza. 2 Buluka penepo, anju wa Yahova apanga Sathani: “Yahova mbakusandike iwe Sathani,+ inde, Yahova adasankhula Yerusalemu+ mbakusandike! Kodi unoyu nee ndi Yoswa phindi ya muti idabuluswa mwakucimbiza pa moto?”
3 Mu ndzidzi unoyu Yoswa akhadabvala nguwo zakunyanyasa mbalimira kutsogolo kwa anju. 4 Anju apanga ale akhali dzololo patsogolo pace: “Nʼduleni nguwo zace zakunyanyasa.” Buluka penepo iye ampanga: “Ona, ine ndamalisa mulando ukhali na iwe, pontho iwe unadzabvazikwa nguwo zadidi kakamwe.”+
5 Buluka penepo, ine ndalonga: “Muikheni munsolo mwace nguwo yakufulwa mwadidi yakuphimbira nayo nsolo.”*+ Penepo iwo aikha munsolo mwace nguwo yakuphimbira nayo munsolo yakufulwa mwadidi, mbambvazika nguwo zadidi kakamwe; pontho anju wa Yahova akhadalimira dhuzi na penepo. 6 Anju wa Yahova apanga Yoswa: 7 “Ipi ndi pidalonga Yahova wa anyankhondo: ‘Ungafamba munjira zanga mbubvera mitemo yanga, iwe unadzatonga mbumba yanga,+ mbutsalakana nyumba yanga, pontho mwakukhonda penula, ine ndinadzakupasa ufulu toera kufika pamaso panga pabodzi na awa adalimira pano.’
8 “‘Ndaphata miyendo, bvesera iwe nyantsembe wankulu Yoswa, iwe pabodzi na anyantsembe anakhala patsogolo pako, thangwi amuna anewa ndi cidzindikiro kuna ine; ine ndinabweresa ntumiki wanga+ anacemerwa Nthawi Ipswa!+ 9 Onani mwala udaikha ine pamaso pa Yoswa! Pamwala unoyu ubodzi basi pana maso manomwe; pontho pamwala unoyu ndinalembapo mafala,’ alonga Yahova wa anyankhondo, ‘pontho pa ntsiku ibodzi basi, ndinabulusa mulando wa dziko ineyi.’+
10 “‘Pa ntsiku ineyi,’ alonga Yahova wa anyankhondo, ‘mʼbodzi na mʼbodzi wa imwe anadzacemera ndzace toera abwere pantsi pamuti wace wa mauva na pantsi pamuti wace wa nsambvu.’”+
4 Anju akhalonga na ine abwera pontho, mbandilamusa ninga pinacitwa kuna munthu wakuti akugona. 2 Buluka penepo iye andibvundza: “Ninji pinaona iwe?”
Natenepa ine ndatawira: “Ndiri kuona cakuikhira nyale cakuti cacitwa na ouro,+ padzulu paco pana tijela. Cakuikhira nyale ceneci ciri na nyale zinomwe,+ inde, zinomwe, pontho nyale zenezi zakuti ziri padzulu pa cakuikhira nyale, ziri na matubu manomwe. 3 Nʼkhundu mwa cakuikhira nyale ceneci, muli na miti miwiri ya milivera,+ ubodzi uli kukhundu yamadyo ya tijela, unango uli kukhundu yabzwere.”
4 Buluka penepo ine ndabvundza anju akhalonga na ine: “Mbuyanga, pinthu pyenepi pisabvekanji?” 5 Natenepa, anju akhalonga na ine andibvundza: “Kodi iwe nkhabe dziwa mabvekero a pinthu pyenepi?”
Ine ndatawira: “Nkhabe mbuyanga.”
6 Buluka penepo iye andipanga: “Awa ndi mafala a Yahova kuna Zorobhabhele: ‘“Pinthu pyenepi pyonsene nee pinadzacitika na mphambvu ya nsoka wa anyankhondo, nee na mphambvu za anthu,+ mbwenye na nzimu wanga,”+ alonga Yahova wa anyankhondo. 7 Ndiwe ani iwe phiri ikulu? Pamaso pa Zorobhabhele+ iwe unadzakhala mbuto yakuzwerera.+ Iye anadzabweresa mwala wapadzulu, pontho anthu anadzakhuwa: “Wabalika kakamwe! Wabalika kakamwe!”’”
8 Ndatambira pontho mafala a Yahova mbalonga: 9 “Manja a Zorobhabhele ndiwo adatoma kuikha miyala ya nyumba ineyi,+ pontho manja ace ndiwo anadzafuna kuimalisa.+ Iwe unadzadziwa kuti Yahova wa anyankhondo ndiye adandituma kuna imwe. 10 Kodi alipo asafunika kupwaza ntsiku yakutoma na pinthu pyakucepa?*+ Thangwi iwo anadzatsandzaya, pontho anadzaona nkhambala yakundendemeza nayo* mʼmanja mwa Zorobhabhele. Manomwe awa ndi maso a Yahova, akuti asaona pa dziko yonsene yapantsi.”+
11 Buluka penepo ine ndambvundza: “Kodi miti iyi miwiri ya milivera, yakuti ubodzi uli kukhundu yamadyo, unango uli kukhundu yabzwere ya cakuikhira nyale, isabvekanji?”+ 12 Ine ndambvundza pontho: “Zisaimiriranji nthawi* ziwiri za milivera zakuti zisadjodjesa nʼtijela mafuta akulandana na ouro, akuti asabuluka na mʼmatubu mawiri a ouro?”
13 Natenepa iye andibvundza: “Kodi iwe nkhabe kudziwa mabvekero a pinthu pyenepi?”
Ine ndatawira: “Nkhabe mbuyanga.”
14 Iye alonga: “Anewa ndi anyakudzodzwa awiri akuti alimira nʼkhundu mwa Mbuya wa pa dziko yonsene yapantsi.”+
5 Ine ndayangʼana pontho kudzulu mbandiona mpukutu* wakuti ukhaphepheruka. 2 Iye andibvundza: “Ninji pinaona iwe?”
Ine ndatawira: “Ine ndikuona mpukutu ukuphepheruka wakuti uli na makhono* 20 aulaphi na makhono 10 augugumi.”
3 Buluka penepo iye andipanga: “Iyi ndi dzedze yakuti iri kuenda pa dziko yonsene yapantsi, thangwi onsene ale anaba,+ ninga pidalembwa kukhundu ibodzi ya mpukutu, nee asatcunyuswa; pontho onsene ale anadumbira mwauthambi,+ ninga pidalembwa kukhundu inango ya mpukutu, nee asatcunyuswa. 4 ‘Ndine adatumiza dzedze ineyi,’ alonga Yahova wa anyankhondo, ‘pontho iyo inadzapita nʼnyumba mwa mbava na nʼnyumba mwa ule anadumbira mwauthambi mu dzina yanga; pontho iyo inapita nʼnyumba zenezi, mbifudza matabwa na miyala ya nyumba zenezi.’”
5 Buluka penepo, anju akhalonga na ine abwera dhuzi na pana ine mbandipanga: “Ndaphata miyendo, yangʼana ndzulu, pontho ona pinacitika.”
6 Natenepa ine ndabvundza: “Ninji ceneci?”
Iye anditawira: “Cinaona iwe ici ndi citundu ca efa.”* Iye apitiriza kulonga: “Anewa ndi maonekero a anthu anacita pyakuipa pa dziko yonsene yapantsi.” 7 Pontho ine ndaona kuti mphampha yakubulungika ya ntobve ikhadafungulwa, pontho nkati mwa citundu ceneci mukhali na nkazi wakuti akhali nawa. 8 Natenepa iye alonga: “Nkazi unoyu asaimirira Uipi.” Penepo iye apfinyirira nkazi unoyu ncitundu ca efa, mbafunga mwamphambvu citundu na mphampha yakulemera ya ntobve.
9 Buluka penepo ndayangʼana kudzulu mbandiona akazi awiri mbakabwera, pontho iwo akhamburuka na mphepo. Iwo akhali na maphapido ninga a soliri, pontho iwo akwata citundu mbamburuka naco kudzulu.* 10 Natenepa ine ndabvundza anju akhalonga na ine: “Kodi iwo akuenda naco kupi citundu ca efa?”
11 Iye atawira: “Ali kuenda naco ku dziko ya Sineari*+ toera kamʼmangira nyumba yace kweneko; pontho nyumba ineyi ingamala kumangwa, nkazi unoyu anaikhwa mwenemu pa mbuto yace yakuthema.”
6 Buluka penepo, ndayangʼana pontho kudzulu mbandiona ngolo zinai za nkhondo zikhabwera na pakati pa mapiri mawiri, mapiri anewa akhali a nkuwa. 2 Ngolo yakutoma ikhakweyiwa na makavalo akufuira, ngolo yaciwiri ikhakweyiwa na makavalo akupswipa.+ 3 Ngolo yacitatu ikhakweyiwa na makavalo akucena, pontho ngolo yacinai ikhakweyiwa na makavalo a madamba-madamba na a matobo-tobo.+
4 Ndabvundza anju akhalonga na ine: “Mbuyanga, ngolo zenezi za nkhondo zisaimiriranji?”
5 Anju anditawira: “Ngolo zenezi zisaimirira mphambvu zinai+ zakudzulu zakuti zisabuluka pakumala kupaswa mbuto pamaso pa Mbuya wa pa dziko yonsene yapantsi.+ 6 Ngolo ikhakweyiwa na makavalo akupswipa iri kuenda ku dziko yakunkwiriro;+ ire ikhakweyiwa na makavalo akucena iri kuenda mpaka kuntunda unango wa bara; ngolo ikhakweyiwa na makavalo a madamba-madamba iri kuenda ku dziko yakunterero. 7 Makavalo a matobo-tobo akhafuna kakamwe kufamba-famba mu dziko ineyi.” Buluka penepo iye alonga: “Ndokoni, zungulirani dziko ineyi.” Natenepa, iwo atoma kuzungulira dziko ineyi.
8 Buluka penepo, iye andicemera mbalonga: “Ona, pidaenda makavalo ku dziko yakunkwiriro, ukali wa Yahova wathowa.”
9 Ndatambira pontho mphangwa za Yahova mbalonga: 10 “Tambira pinthu pidabweresa Eldhai, Tobhiya na Yedhaya, pidapaswa iwo na anthu akuti ali ku ubitcu, pontho pa ntsiku ineyi usafunika kuenda kunyumba kwa Yosiya mwana wa Sofoniya, pabodzi na anthu awa adabuluka ku Bhabhilonya. 11 Tambira parata na ouro mbucita nayo nthimba,* mbuiikha munsolo mwa nyantsembe wankulu Yoswa+ mwana wa Yeozadhaki. 12 Pontho mpange:
“‘Ipi ndi pidalonga Yahova wa anyankhondo: “Ali pano munthu wakuti dzina yace ndi Nthawi Ipswa.+ Iye anadzaphukira pa mbuto yace, pontho anadzamanga templo ya Yahova.+ 13 Ndiye anafuna kudzamanga templo ya Yahova, pontho ndiye anafuna kudzatambira cilemedzo, iye anadzakhala pa mpando wace waumambo,+ mbakhala mambo na nyantsembe, pontho cifuniro ca pidzo pyenepi piwiri ndi kukhazikisa ntendere. 14 Nthimba* ya umambo inadzakhala mu templo ya Yahova toera kukumbuka Elemi, Tobhiya, Yedhaya+ na Eni mwana wa Sofoniya. 15 Pontho ale anakhala kutali anadzabwera toera kuphedzera kumangwa kwa templo ya Yahova.” Imwe munadzadziwa kuti Yahova wa anyankhondo ndiye adandituma toera ndibwere kuna imwe. Pyenepi pinacitikadi imwe mungabvera fala ya Yahova Mulungu wanu.’”
7 Mu caka cacinai ca utongi wa Mambo Dhariyo, Zakariya+ atambira mphangwa zidabuluka kuna Yahova pa ntsiku yacinai ya mwezi wacipfemba, wakuti ndi mwezi wa Kisleu.* 2 Mbumba ya ku Bheteli yatuma Sarezeri na Rejemu-Meleki pabodzi na amuna akhali na iye, toera aende kadembetera Yahova kuti aabvere ntsisi, 3 mbabvundza anyantsembe a panyumba* ya Yahova wa anyankhondo na aprofeta: “Kodi ine ndisafunika kulira pa mwezi wacixanu,+ mbandicita jejuu, ninga pinacita ine mu pyaka pizinji kakamwe?”
4 Ine ndatambira pontho mphangwa izi zidabuluka kuna Yahova wa anyankhondo: 5 “Panga mbumba yonsene ya mu dziko na anyantsembe: ‘Pikhacita imwe jejuu mbamulira pa mwezi wacixanu na mwezi wacinomwe+ mu pyaka 70,+ kodi jejuu ineyi mukhaicitiradi ine? 6 Pontho mu ndzidzi ukhadya imwe mbamumwa, kodi nee mukhadya mbamumwa toera kukomereseka mwekhene? 7 Kodi imwe nee mukhafunika kubvera mafala a Yahova adalonga iye kubulukira kuna aprofeta akale,+ mu ndzidzi wakuti nzinda wa Yerusalemu na mizinda idauzungulira ikakhaliwa muntendere, pontho mu ndzidzi wakuti Nejebhu na Sefela akakhaliwa na anthu?’”
8 Zakariya atambira pontho mphangwa izi zidabuluka kuna Yahova: 9 “Ipi ndi pidalonga Yahova wa anyankhondo: ‘Phatisirani ulungami wandimomwene pakutonga miseru,+ pontho tsalakananani unango na ndzace mwaufuni+ na mwantsisi. 10 Lekani kubera nkazi wanzice peno mwana waumphawi,*+ munthu wa dziko inango+ peno munthu wakutcerenga;+ pontho lekani kunyerezera muntima mwanu kucitirana pyakuipa kuna unango na ndzace.’+ 11 Mbwenye iwo akhonda kubvera,+ pontho andipasira nkhodolo,+ mbafunga makutu awo toera akhonde kubva.+ 12 Iwo aumisa mitima yawo ninga mwala,+ mbakhonda kubvera mwambo na mafala a Yahova wa anyankhondo adapereka iye na nzimu wace kubulukira kuna aprofeta akale.+ Na thangwi ineyi, Yahova wa anyankhondo aipirwa kakamwe.”+
13 “‘Nakuti iwo nee akhandibvesera mu ndzidzi ukhaacemera ine,*+ natenepa ine nee ndikhaabveserambo mu ndzidzi ukhandicemera iwo,’+ alonga Yahova wa anyankhondo. 14 ‘Ine ndaabalalisa na condzi, mbaenda mʼmadzindza onsene akuti iwo nee akhaadziwa,+ pontho dziko yadzakhala madembe pidabuluka iwo, nee mʼbodzi akhaenda mbabwerera na mwenemu;+ thangwi iwo acinja dziko yadidi kudza mbuto yakugopswa.’”
8 Ine ndatambira pontho mphangwa izi zidabuluka kuna Yahova wa anyankhondo: 2 “Ipi ndi pidalonga Yahova wa anyankhondo: ‘Ine ndatonga kutsidzikiza Sioni, inde, ine ndinadzantsidzikiza na ntima wanga onsene.’”+
3 “Ipi ndi pidalonga Yahova: ‘Ine ndinabwerera pontho ku Sioni+ mbandikhala mu Yerusalemu;+ Yerusalemu anadzacemerwa nzinda wandimomwene,*+ pontho phiri ya Yahova wa anyankhondo, inadzacemerwa phiri yakucena.’”+
4 “Ipi ndi pidalonga Yahova wa anyankhondo: ‘Amuna na akazi akugwesera, anatoma pontho kuenda kakhala mʼmbuto zinagumanyikana anthu mu Yerusalemu, mʼbodzi na mʼbodzi anakwata ndodo yace mʼmanja thangwi yakugwesera.*+ 5 Pontho mbuto zinagumanyikana anthu mu nzinda, zinadzadzala na aphale na atsikana mbakasendzeka.’”+
6 “Ipi ndi pidalonga Yahova wa anyankhondo: ‘Maseze mu ntsiku zenezi pioneke ninga ndi pyakunentsa kakamwe kuna mbumba iyi idasala, kodi pinakhalambo pyakunentsa kakamwe kuna ine?’ alonga Yahova wa anyankhondo.”
7 “Ipi ndi pidalonga Yahova wa anyankhondo: ‘Ndinabulusa mbumba yanga ku dziko yakumabulukiro a dzuwa na ya kumadokero a dzuwa.+ 8 Ine ndinadzaabweresa pontho mbakhala mu Yerusalemu;+ iwo anadzakhala mbumba yanga, pontho ine ndinadzakhala Mulungu wawo mu undimomwene*+ na mu ulungami.’”
9 “Ipi ndi pidalonga Yahova wa anyankhondo: ‘Wangisani manja anu,*+ imwe akuti cincino muli kubva mafala analonga aprofeta,+ mafala mabodzi ene adalongwa pa ntsiku idaikhwa miyala yakutoma ya nyumba ya Yahova wa anyankhondo, toera templo imangwe. 10 Thangwi ndzidzi unoyu mbudzati kufika, anthu na pinyama pyene nee pikhalipo;+ pontho thangwi ya nyamalwa, anthu nee akhabuluka peno kupita mwakutsidzikizika, pontho ndatawirisa kuti anthu aidane unango na ndzace.’
11 “‘Mbwenye cincino nee ndinatsalakana anthu adasala a mbumba iyi ninga mukhaatsalakanira ine kale,’+ alonga Yahova wa anyankhondo. 12 ‘Thangwi inadzabzwalwa mbeu ya ntendere; muti wa mauva unadzabala misapo yace, dziko inadzabala misapo yace,+ kudzulu kunadzacitisa kuti bume ioneke, pontho ndinadzacitisa kuti anthu adasala a mbumba ineyi atambire pinthu pyenepi pyonsene.+ 13 Imwe dzindza ya Yuda na ya Izraeli, nakuti imwe mukhapaswa dzedze pakati pa madzindza,+ natenepa ine ndinadzakupulumusani mbamukhala nkhombo.+ Lekani kugopa!+ Pontho wangisani manja anu.’*+
14 “Thangwi ipi ndi pidalonga Yahova wa anyankhondo: ‘“Nakuti ine ndikhafuna kukutcunyusani thangwi ya kunditsukwalisa kudacita ambuyanu,” alonga Yahova wa anyankhondo, “pontho ine nee ndasandikika thangwi ya pyenepi,+ 15 mbwenye cincino ndatonga kucitira pinthu pyadidi Yerusalemu na dzindza ya Yuda.+ Lekani kugopa!”’+
16 “‘Ipi ndi pinafunika imwe kucita: Longani undimomwene kuna unango na ndzace, tongani miseru yanu mʼmisuwo mikulu mwakubverana na undimomwene,+ pontho tongani munjira yakuti inabweresa ntendere.+ 17 Lekani kunyerezera muntima mwanu kucitirana pyakuipa unango na ndzace,+ pontho lekani kukomerwa na kudumbira mwauthambi;+ thangwi ine ndisaida pinthu pyenepi pyonsene,’+ alonga Yahova.”
18 Ine ndatambira pontho mafala awa a Yahova wa anyankhondo: 19 “Ipi ndi pidalonga Yahova wa anyankhondo: ‘Jejuu ya mwezi wacinai,+ jejuu ya mwezi wacixanu,+ jejuu ya mwezi wacinomwe+ na jejuu ya mwezi wacikhumi+ inadzakhala midzidzi ya kukomerwa na kutsandzaya kuna dzindza ya Yuda, maphwando akutsandzayisa.+ Natenepa funani undimomwene na ntendere.’
20 “Ipi ndi pidalonga Yahova wa anyankhondo: ‘Inadzafika ntsiku yakuti mbumba na anthu anakhala mʼmizinda mizinji anadzabwera; 21 pontho ale anakhala mu nzinda ubodzi anadzaenda kuna ale anakhala mu nzinda unango mbalonga: “Tendeni tikaphembe kubverwa ntsisi na Yahova, pontho tikasake Yahova wa anyankhondo. Ife tinaendambo.”+ 22 Pontho mbumba zizinji na madzindza amphambvu anadzabwera kudzasaka Yahova wa anyankhondo ku Yerusalemu,+ mbaphemba kubverwa ntsisi na Yahova.’
23 “Ipi ndi pidalonga Yahova wa anyankhondo: ‘Mu ntsiku zenezi, amuna khumi a pilongero pya madzindza onsene,+ anadzaphata mwakuwanga nguwo ya* Muyuda* mʼbodzi, mbalonga: “Tisafuna kuenda pabodzi na imwe,+ thangwi tabva kuti Mulungu ali na imwe.”’”+
9 Mphangwa zidabuluka kuna Mulungu:
“Mafala a Yahova analonga pya kutongwa kwa dziko ya Adhraki
Na kutongwa kwa dziko ya Dhamasku,+
Thangwi maso a Yahova asayangʼana anthu onsene,+
Pontho asayangʼana madzindza onsene a Izraeli.
2 Mafala anewa asalongambo pya kutongwa kwa Amati+ wakuti asacita madire na iye,
Pontho asalonga pya kutongwa kwa Tiro+ na Sidhoni+ akuti asanyerezera kuti ndi audziwisi kakamwe.+
3 Tiro amanga mpanda toera kutsidzikizika.
Iye agumanya parata izinji ninga pfumbi,
Pontho agumanya ouro izinji ninga matope a nʼnjira.+
4 Onani! Yahova anadzankwatira pinthu piri na iye,
Iye anadzapha anyankhondo a Tiro mbakhala ninga aponywa mʼbara;*+
Pontho iye anadzapiswa na moto.+
5 Asikaloni anadzaona pyenepi mbagopa;
Gaza anadzadzudzumika kakamwe,
Kuphatanizambo Ekroni thangwi akhanyindira iye anadzapaswa manyadzo.
Gaza nee anadzakhalabve na mambo,
Pontho mu Asikaloni nee munadzakhalabve anthu.+
6 Mwana wa dzindza inango anadzakhala mu Asidhodhe,
Pontho ine ndinadzamalisa kudzikuza kwa Afilisti.+
7 Ine ndinadzabulusa ciropa nkanwa mwace,
Pontho ndinadzabulusa cakudya cakunyanyasa ciri mʼmano mwace,
Iye anadzasiyiwa toera akhale wa Mulungu wathu;
Pontho iye anadzakhala ninga ntsogoleri wa dzindza ku Yuda,+
Anthu a ku Ekroni anadzakhala ninga Ayebusi.+
8 Ndinadzamanga nsasa kunja kwa nyumba yanga toera kuionera,+
Natenepa, nkhabepo anafuna kudzapita, pontho nkhabepo anafuna kudzabuluka;
Pontho nyakuponderera* nkhabe kudzapitabve na mwenemo,+
Thangwi ine ndaona pyenepi* na maso anga.
9 Tsandzaya kakamwe iwe mwana wankazi wa Sioni.
Khuwa mwakutsandzaya, iwe mwana wankazi wa Yerusalemu.
Ona! Mambo wako ali kubwera kuna iwe.+
Iye ndi wakulungama, pontho ali kubweresa cipulumuso,
Ndi wakucepeseka,+ pontho ali kubwera pa buru,
Pa buru imuna ingʼono, mwanaburu wankazi.+
10 Ine ndinadzabulusa ngolo za nkhondo mu Efraimu,
Pontho ndinadzabulusa makavalo mu Yerusalemu.
Mauta akumenya nawo nkhondo anadzabuluswa.
Iye anadzadziwisa madzindza anango pya ntendere;+
Utongi wace unadzatoma kukhundu ibodzi ya bara mpaka kukhundu inango,
Pontho kutomera kukhundu ibodzi ya Nkulo* mpaka kunkhomo kwa dziko yapantsi.+
11 Iwe nkazi, thangwi ya ciropa ca cibverano cidacita iwe na ine,
Ndinadzabulusa anyakaidi ako nʼdjenje yakusowa madzi.+
12 Imwe anyakaidi akuti muli na cidikhiro, bwererani ku mbuto ya citsidzikizo cakuwanga.+
Lero ine ndiri kukupanga:
‘Iwe nkazi, ine ndinadzakupasa nkhombo kawiri.+
13 Ine ndinadzakunga* Yuda ninga uta wanga.
Pswimo ya uta unoyu inadzakhala Efraimu,
Pontho ine ndinadzalamusa anako iwe Sioni,
Toera amenyane na anako iwe Gresya,
Pontho ndinadzakucitisa iwe Sioni kukhala ninga supada ya nyankhondo.’
14 Yahova anadzapangiza pakweca kuti ali pabodzi na mbumba yace,
Pontho pswimo yace inadzaponywa ninga njazi.
Yahova Mbuya Wankulu Kakamwe anadzaliza nyanga,+
Pontho iye anadzaenda kamenyana na anyamalwa ace ninga pyondzi pya kunterero.
15 Yahova wa anyankhondo anadzaatsidzikiza,
Pontho iwo anadzakunda anyamalwa awo mbaponda-ponda miyala inaponyerwa iwo.+
Iwo anadzakomerwa mbakhuwa ninga amwa vinyu;
Iwo anadzakhala ninga matijela akudzala na vinyu,
Pontho anadzadzala ninga ciropa cinakhuthulwa kunkhomo kwa guwa ya ntsembe.+
16 Pa ntsiku ineyi Yahova Mulungu wawo anadzaapulumusa,
Ninga nkumbizi wakuti asapulumusa mabira ace;+
Thangwi iwo anadzayetimira mu dziko yace ninga miyala yakufunika kakamwe inayetimira pa nthimba.+
17 Udidi wace ndi ukulu kakamwe,+
Pontho kubalika kwace ndi kukulu!
Cakudya na vinyu ipswa pinadzacitisa aphale
Na amiyali kukhala amphambvu.”+
10 Phembani Yahova toera akubvumbisireni madzi mu ndzidzi wa malimwe.
Ndi Yahova anacitisa mitambo toera madzi abvumbe,
Ndiye anabvumbisira anthu madzi mazinji,+
Mbameresa cakudya kuna onsene.
2 Madzimunthu* a panyumba asalonga uthambi;
Pontho anyakulotera asaona masomphenya authambi.
Iwo asalonga ndoto zakusowa basa,
Pontho cibalangazo cinapereka iwo ndi cakusowa basa.
Ndi thangwi yace anthu anandzendza-ndzendza ninga mabira.
Iwo anadzathabuka thangwi yakusowa nkumbizi.
3 Ine ndaipirwa kakamwe na akumbizi,
Pontho ine ndinadzatcunyusa atsogoleri akuti asaponderera,*
Thangwi Yahova wa anyankhondo atoma pontho kutsalakana nkumbi wace wa mabira,+ dzindza ya Yuda.
Pontho iye aacitisa kukhala ninga kavalo yamphambvu kakamwe ku nkhondo.
4 Mwa iye munadzabuluka ntsogoleri,
Mwa iye munadzabuluka ntongi toera kumʼphedzera,
Mwa iye munadzabuluka mauta a anyankhondo;
Mwa iye munadzabuluka ayangʼaniri* onsene, anthu anewa onsene anadzabuluka muna iye.
5 Iwo anadzakhala ninga anyankhondo,
Akuti asaponda matope munjira zakuenda ku nkhondo.
Iwo anadzamenya nkhondo thangwi Yahova ali na iwo;+
Pontho ale anafamba na makavalo anadzapaswa manyadzo.+
6 Ine ndinadzacitisa dzindza ya Yuda kukhala ikulu,
Pontho ndinadzapulumusa dzindza ya Zuze.+
Ine ndinaabweresa pontho mu dziko yawo,
Thangwi ine ndinadzaabvera ntsisi;+
Pontho iwo anadzakhala ninga cipo ndaakhonda;+
Thangwi ine ndine Yahova Mulungu wawo, pontho ndinadzaatawira.
7 Ale anakhala ku Efraimu anadzakhala ninga anyankhondo amphambvu,
Pontho mitima yawo inadzatsandzaya ninga amwa vinyu.+
Anawo anadzaona pyenepi mbakomerwa;
Iwo anadzakomerwa thangwi ya Yahova.+
8 ‘Ine ndinadzaliza ciruzwi* mbandiagumanya;
Ine ndinadzaapulumusa+ mbadzakhala azinji,
Pontho iwo anadzapitiriza kuthimizirika.
9 Maseze ine ndiawaze ninga mbeu pakati pa mbumba,
Iwo anadzandikumbuka uku mbali mʼmbuto zakutali;
Iwo pabodzi na anawo anadzapaswa mphambvu zipswa mbabwerera.
10 Ine ndinadzaabulusa ku Ejitu mbabwerera ku dziko yawo,
Pontho ndinadzaagumanya kubulukira ku Asirya;+
Ine ndinadzaakwata mbandiaendesa ku dziko ya Jiliyadhi+ na ya Libhano,
Pontho mʼmadziko anewa nee munadzakhala na mbuto yakukwana toera iwo akhale.+
11 Bara ingaafungira njira yawo
Ine ndinadzapita pakati payo mbandimenya mabimbi ace+
Ine ndinadzapwesa madzi onsene a Nilo.
12 Ine Yahova ndinadzaacitisa kuti akhale amphambvu,+
Pontho iwo anadzacita pinthu pyakuti pisapasa mbiri dzina yanga,’+ alonga Yahova.”
11 “Iwe Libhano, fungula misuwo yako,
Toera moto upise masedhro ako.
2 Iwe junipero tsukwala thangwi wagwa muti wa sedhro;
Miti mikulu yafudzwa!
Tsukwalani imwe miti mikulu ya ku Bhasani,
Thangwi wafudzwa nsitu wakupata!
3 Bveserani! Akumbizi ali kulira,
Thangwi mbiri yawo yamala,
Bveserani! Nkhalamu zingʼono ziri kulira,
Thangwi nsitu wakupata wa nʼkhundu-nʼkhundu mwa Yordani wafudzwa.
4 “Ipi ndi pidalonga Yahova Mulungu wanga: ‘Kumbiza nkumbi wa mabira unafuna kuphiwa,+ 5 wakuti ale anaagula asaapha+ mbakhonda kukhala na nseru. Pontho ale anaagulisa+ asalonga: “Mbasimbwe Yahova, thangwi ndinakhala wakupfuma.” Pontho akumbizi awo nee asaabvera ntsisi.’+
6 “‘Thangwi ine nee ndinadzabverabve ntsisi anthu anakhala mu dziko ino’ alonga Yahova. ‘Ndinadzacitisa kuti mʼbodzi na mʼbodzi apondererane na ndzace, pontho apondererwe na mambo wace; iwo anadzafudza dziko iyi, pontho nee ndinadzaapulumusa mʼmanja mwawo.’”
7 Natenepa, imwe anthu anathabuswa mu nkumbi unoyu wa mabira,+ thangwi ya imwe, ine ndatoma kukumbiza nkumbi wa mabira akhafuna kuphiwa. Natenepa ndakwata ndodo ziwiri. Ibodzi ndaicemera Udidi, inango ndaicemera Kubverana,+ mbanditoma kukumbiza nkumbi unoyu wa mabira. 8 Pa mwezi ubodzi basi, ine ndabulusa akumbizi atatu thangwi nee ndakwanisabve kuapirira, pontho iwo akhaipirwa na ine. 9 Ine ndalonga: “Nee ndinapitiriza kukukumbizani. Ule anafuna kufa, mbafe; ule anafuna kuphiwa, mbaphiwe. Pontho ale anafuna kusala mbadyane unango na ndzace.” 10 Natenepa ine ndakwata ndodo yanga inacemerwa Udidi,+ ndaigwanda-gwanda, mbandimalisa cibverano cidacita ine na mbumba zonsene. 11 Natenepa cibverano ceneci camaliswa pa ntsiku ineyi, pontho anyakupondererwa a mu nkumbi unoyu akuti akhaona pikhacita ine, adzindikira kuti anewa akhali mafala a Yahova.
12 Buluka penepo ine ndaapanga: “Khala ndi pyakuthema kuna imwe, ndilipeni; mbwenye mungaona kuti si pyakuthema tayu, lekani kundilipa.” Iwo andilipa, andipasa kobiri 30 za parata.+
13 Penepo Yahova andipanga: “Kodi iwo asanyerezera kuti anakwanisa kundigula na kobiri ineyi basi? Koya kobiri ineyi mʼmbuto inakoyerwa mpfuma nʼnyumba mwanga.”+ Penepo ndakwata kobiri 30 za parata, mbandiziponya mʼmbuto inakoyerwa mpfuma panyumba ya Yahova.+
14 Buluka penepo ndagwanda-gwanda ndodo yanga yaciwiri inacemerwa Kubverana,+ mbandimalisa ubale pakati pa Yuda na Izraeli.+
15 Pontho Yahova andipanga: “Cincino, kwata pinthu pya nkumbizi wakusowa basa.+ 16 Thangwi ndinadzacitisa kuti mu dziko ineyi muoneke nkumbizi unango. Iye nee anadzatsalakana mabira akuti ali kufa;+ iye nee anadzasaka mabira mangʼono peno kuwangisa ale adaphekeka,+ pontho nee anadzadyesa ale akuti ali mwadidi. Mʼmbuto mwace, iye anadzadya mabira akununa,+ pontho anadzabulusa nyondo zawo.+
17 Dzedze kuna nkumbizi wanga wakusowa basa+ wakuti asasiya nkumbi wa mabira!+
Supada inadzagwanda nkono wace na diso yace yamadyo.
Nkono wace unadzaumiratu,
Pontho diso yace yamadyo nee inadzaonabve.”*
12 Mphangwa zakubuluka kuna Mulungu:
“Awa ndi mafala a Yahova thangwi ya Izraeli,” alonga Yahova,
Ule adafuthula kudzulu,+
Ule adalikhisa dziko yapantsi,+
Pontho ule adacita nzimu* wakuti uli muna munthu.
2 “Ine ndinadzacitisa Yerusalemu kukhala khomitco* ya vinyu yakuti inadzacitisa anthu onsene adanzungulira kudzedzereka; pontho Yuda na Yerusalemu anadzazungulirwa.+ 3 Pa ntsiku ineyi, ine ndinadzacitisa Yerusalemu kukhala mwala wakulemera kuna anthu onsene. Onsene anafuna kulamusa mwala unoyu anadzaphekeka kakamwe;+ pontho madzindza onsene anadzagumanyikana toera kumenyana na mwala unoyu.+ 4 Pa ntsiku ineyi,” alonga Yahova, “ine ndinadzacitisa makavalo kugopa kakamwe, pontho ale adaakwira anadzakhala anyansala. Ine ndinadzapitiriza kuyangʼana dzindza ya Yuda, mbwenye makavalo onsene a anthu a madzindza anango ndinadzaacitisa toera akhonde kuona. 5 Pontho atsogoleri a ku Yuda anadzalonga mʼmitima yawo: ‘Anthu anakhala mu Yerusalemu ndiwo anatipasa mphambvu zinabuluka kuna Mulungu wawo Yahova wa anyankhondo.’+ 6 Pa ntsiku ineyi, ine ndinadzacitisa atsogoleri a ku Yuda kukhala ninga moto pakati pa miti, pontho iwo anadzakhala ninga phindi ya moto wakugaka pakati pa misumbu ya tirigu.+ Iwo anadzapisa mbumba zonsene zidaazungulira kunkono wamadyo na kunkono wabzwere;+ anthu a mu Yerusalemu anadzapitiriza kukhala pa mbuto yawo, inde mu Yerusalemu.+
7 “Mbwenye pakutoma Yahova anadzapulumusa misasa ya Yuda, toera kubalika kwa dzindza ya Dhavidhi na kubalika kwa ale anakhala mu Yerusalemu kukhonde kukhala kukulu kakamwe kupiringana kubalika kwa Yuda. 8 Pa ntsiku ineyi, Yahova anadzatsidzikiza ale anakhala mu Yerusalemu;+ pa ntsiku ineyi, ule anafuna kudzagwegweduka* pakati pawo anadzakhala ninga Dhavidhi; pontho dzindza ya Dhavidhi inadzaatsogolera ninga Mulungu, ninga anju wa Yahova.+ 9 Pontho pa ntsiku ineyi, ine ndinadzafudzadi madzindza onsene anafuna kudzamenyana na Yerusalemu.+
10 “Ine ndinadzatsanulira nzimu wanga kuna dzindza ya Dhavidhi na kuna ale anakhala mu Yerusalemu; pontho iwo anadzacita maphembero akudembetera kuna ine. Iwo anadzayangʼana munthu adalasa iwo,+ mbamulira ninga pinacita iwo angaferwa na mwana wawo mʼbodzi basi wamamuna; pontho iwo anadzamulira kakamwe ninga pinacita iwo angaferwa na mwana wawo wamamuna wakutoma. 11 Pa ntsiku ineyi, anthu anadzalira kakamwe mu Yerusalemu, ninga pidacita iwo ku Adhadhrimoni ku Gowa ya Mejidho.+ 12 Pontho anthu a dziko ineyi anadzalira mwakugaluza, banja ibodzi na ibodzi inadzalira payokha; banja ya dzindza ya Dhavidhi inadzalira payokha, pontho akazi a banja ineyi anadzalira paokha; banja ya dzindza ya Natani+ inadzalira payokha, pontho akazi a banja ineyi anadzalira paokha; 13 banja ya dzindza ya Levi+ inadzalira payokha, pontho akazi a banja ineyi anadzalira paokha; banja ya dzindza ya Simei+ inadzalira payokha, pontho akazi a banja ineyi anadzalira paokha; 14 mabanja onsene anafuna kudzasala, ibodzi na ibodzi inadzalira payokha, pontho akazi a mabanja anewa anadzalira paokha.
13 “Pa ntsiku ineyi unadzakumbwa ncera toera dzindza ya Dhavidhi na anthu anakhala mu Yerusalemu acenese madawo awo na macitiro awo akunyanyasa.+
2 “Pa ntsiku ineyi,” alonga Yahova wa anyankhondo, “ine ndinadzafudza madzimunthu onsene mu dziko ineyi,+ pontho iwo nee anadzakumbukirwabve; ndinadzabulusa aprofeta+ na ale anacitisa anango kucita pyakuipa pamaso pa Mulungu mu dziko ineyi. 3 Munthu angalonga pontho maprofesiya, pai wace na mai wace, ale adamʼbala anadzampanga: ‘Iwe nee unapitiriza kukhala mʼmaso, thangwi walonga uthambi mu dzina ya Yahova.’ Pontho pai wace na mai wace, ale adamʼbala, anadzamulasa thangwi yakulonga maprofesiya.+
4 “Pa ntsiku ineyi, aprofeta onsene anadzakhala na manyadzo thangwi ya masomphenya adakhala na iwo pakulonga maprofesiya; pontho iwo nee anadzabvala nguwo* yakucitwa na uweya+ toera kunyengeza anango. 5 Pontho mʼbodzi na mʼbodzi wa iwo anadzalonga: ‘Ine nee ndine mprofeta. Basa yanga ndi yakulima, thangwi alipo adandigula ninga bitcu pikhali ine mʼphale.’ 6 Munthu angabvundza mʼbodzi wa iwo: ‘Pironda piri mʼmapewa mwako wacitikanji?’ Iye anadzatawira: ‘Ndaphekeswa kunyumba kwa axamwali anga.’”*
7 “Iwe supada, lamuka, ndoko kamenye nkumbizi wanga,+
Ndoko kamenye munthu wakuti ndi ndzanga,” alonga Yahova wa anyankhondo.
“Ndoko kaphe nkumbizi,+ penepo mabira anadzabalalika;+
Pontho ndinadzasandika ale akuti ndi akupwazika.”
8 “Pontho mu dziko ineyi yonsene,” alonga Yahova,
“Pa anthu atatu, awiri anadzaphiwa;
Mʼbodzi basi ndiye anafuna kudzasala.
9 Pontho anewa anafuna kudzasala ndinadzaapitisa na pa moto;
Ine ndinadzaacenesa, ninga munaceneswa parata ingaikhwa pa moto,
Pontho ndinadzaasungula ninga munasungulwa ouro.+
Iwo anadzacemera dzina yanga,
Pontho ine ndinadzaatawira.
Ine ndinadzalonga: ‘Iwo ndi mbumba yanga,’+
Pontho iwo anadzalonga: ‘Yahova ndi Mulungu wathu.’”
14 “Onani! Ntsiku ikufika, ntsiku ya Yahova, ntsiku yakuti pinthu pyanu* pinadzagawiwa pakati panu ninga pinthu pyakutapatwa. 2 Ine ndinadzagumanya madzindza onsene toera kumenyana na Yerusalemu; nzinda unadzakwatwa, manyumba anadzatapatwa, pontho akazi anadzapitwa mʼmabonde mwakukakamizwa.* Hafu ya mbumba ya mu nzinda inadzaendeswa ku ubitcu, mbwenye ale anafuna kusala anadzaphiwa mu nzinda unoyu.
3 “Yahova anadzabuluka toera kuenda kamenyana na madzindza anewa+ ninga pinacita iye pa ntsiku ya nkhondo.+ 4 Pa ntsiku ineyi, miyendo yace inadzalimira Paphiri ya Milivera,+ yakuti iri dhuzi na kumabulukiro a dzuwa a Yerusalemu; pontho Phiri ya Milivera inadzagawiwa pakati, kutomera kumabulukiro a dzuwa mpaka kumadokero a dzuwa,* pakati pace mbapakhala gowa ikulu; khundu ibodzi ya phiri ineyi inadzafendedzera kunkwiriro, pontho khundu inango inadzafendedzera kunterero. 5 Imwe munadzathawa mpaka pa gowa ya mapiri anga, thangwi gowa ineyi ya mapiri inadzafika mpaka ku Azeli. Imwe munadzathawa ninga pidacita imwe mu ndzidzi udathawa imwe citeketeke mu ntsiku za Uziya Mambo wa ku Yuda.+ Pontho Yahova Mulungu wanga anadzabwera pabodzi na akucena onsene.+
6 “Pa ntsiku ineyi nee panadzaoneka ceza,+ pontho pinthu pinadzauma thangwi ya kutonthola. 7 Ntsiku ineyi inadzakhala ntsiku ibodzi basi yakuti inadzadziwika ninga ntsiku ya Yahova.+ Nkhabe kudzaoneka kusiyana pakati pa masiku na masikati; ngakhale mu ndzidzi unadoka dzuwa, ceza cinadzapitiriza kuoneka. 8 Pa ntsiku ineyi, mu Yerusalemu+ munadzawewa madzi akupasa umaso.+ Khundu ibodzi ya madzi anewa anadzaenda mʼbara yakumabulukiro a dzuwa,*+ khundu inango anadzaenda mʼbara ya kumadokero a dzuwa.*+ Pyenepi pinadzacitika mu ndzidzi wa khoni na mu ndzidzi wa malimwe. 9 Pontho Yahova anadzakhala Mambo pa dziko yonsene yapantsi.+ Pa ntsiku ineyi, anthu onsene anadzalambira Yahova basi,+ pontho dzina yace inadzakhala ibodzi basi.+
10 “Dziko yonsene, kutomera ku Jebha+ mpaka ku Rimoni+ kunterero kwa Yerusalemu, kunadzakhala ninga ku Arabha;+ Yerusalemu anadzaikhwa padzulu pa mbuto yace,+ pontho anthu anadzakhala mwenemo, kutomera Pansuwo Ukulu wa Bhenjamini+ mpaka Pansuwo Ukulu Wakutoma, buluka penepo mpaka Pansuwo Ukulu wa Pankhomo; kutomera Panyumba ya Ndzulu ya Ananeli,+ mpaka pa mbuto zakukamulira mauva za Mambo. 11 Pontho anthu anadzakhala mu nzinda unoyu; nzinda unoyu nee unadzatongwabve toera kufudzwa,+ pontho anthu anafuna kukhala mu Yerusalemu anadzakhala mwakutsidzikizika.+
12 “Uyu ndi muliri unafuna kubweresa Yahova kuna mbumba zonsene zinamenyana na Yerusalemu:+ Manungo awo anadzabvunda iwo mbaciri mʼmaso, maso awo anadzabvunda mbali mʼmbuto zawo, pontho malirimi awo anadzabvunda uku mbali nkanwa mwawo.
13 “Pa ntsiku ineyi, Yahova anadzacitisa uviyaviya ukulu kakamwe pakati pawo; mʼbodzi na mʼbodzi wa iwo anadzaphata djanja ya ndzace, pontho iwo anadzamenyana unango na ndzace.+ 14 Yuda anadzamenyambo nkhondo mu Yerusalemu, pontho mpfuma za madzindza anango onsene a dhuzi na Yerusalemu zinadzagumanywa, ouro izinji, parata izinji na nguwo zizinji.+
15 “Muliri ubodzi ene unadzagwerambo makavalo, maburu mangʼono, makamelo, maburu makulu na pifuyo pyonsene piri mʼmisasa ya anyamalwa.
16 “Anthu anafuna kupulumuka mʼmadzindza onsene anabwera kudzamenyana na Yerusalemu, pyaka pyonsene+ anadzaenda ku Yerusalemu toera kalambira Mambo, Yahova wa anyankhondo,+ pontho anadzaenda kacita Phwando ya Misasa.*+ 17 Mbwenye mʼmabanja a pa dziko yapantsi mungagumanika munthu wakukhonda kuenda ku Yerusalemu kagodamira Mambo, Yahova wa anyankhondo, madzi nee anadzabvumba.+ 18 Pontho, anthu a ku Ejitu angakhonda kubwera mu nzinda unoyu, mu dziko mwawo nee munadzabvumba madzi. Iwo anadzagwerwa na muliri wakuti Yahova anadzaubweresa kuna madzindza a anthu akuti nee anaenda kacita Phwando ya Misasa. 19 Uku ndi kutcunyuswa kunafuna kucitwa Ejitu thangwi ya madawo ace, pontho thangwi ya madawo a madzindza onsene anafuna khonda kuenda kacita Phwando ya Misasa.
20 “Pa ntsiku ineyi, mafala akuti: ‘Yahova ndi wakucena!’+ anadzalembwa mʼmabhande a makavalo. Pontho mapanela+ a panyumba ya Yahova anadzakhala akucena ninga matijela+ a paguwa ya ntsembe. 21 Mapanela onsene a mu Yerusalemu na a mu Yuda, anadzakhala akucena, pontho anadzakhala a Yahova wa anyankhondo. Onsene anafuna kudzapereka ntsembe anadzabwera, mbaphikira anango mwa mapanela anewa. Pa ntsiku ineyi, nʼnyumba ya Yahova wa anyankhondo, nee munadzaonekabve munthu wa ku Kanani.”*+
Dzina ineyi isabveka “Yahova Akumbuka.”
Onani Apendise B15.
Fala na Fala: “ninga mphepo zinai zakudzulu.”
Peno: “mboni ya diso yanga.”
Peno: “dhunku; turbhante.”
Peno: “pingʼono?”
Fala na Fala: “mwala, ntobve.”
Zenezi ndi nthawi zakudzala na misapo.
Peno: “bukhu.”
Khono ibodzi ndi masentimetru 44 na hafu. Onani Apendise B14.
Fala na Fala: “efa,” unoyu ndi ntanga peno citundu cinaphatisirwa ninga efa wakupima naye. Combo cibodzi ca efa cikhapita malitru 22. Onani Apendise B14.
Fala na Fala: “pakati pa dziko yapantsi na kudzulu.”
Dzina ineyi isabveka Bhabhilonya.
Peno: “nthimba ikulu.”
Peno: “Nthimba ikulu.”
Onani Apendise B15.
Peno: “templo.”
Peno: “mwana adaferwa na pai wace.”
Fala na Fala: “iye.”
Peno: “wakukhulupirika.”
Fala na Fala: “thangwi yakunjipa kwa ntsiku.”
Peno: “mwakukhulupirika.”
Peno: “Khalani acipapo.”
Peno: “Khalani acipapo.”
Peno: “pimbverere pya.”
Fala na Fala: “mamuna Waciyuda.”
Munjira inango: “anadzapha anyankhondo ace mʼbara.”
Peno: “nyakupereka basa.”
Pyenepi pisapangiza kuti ndi nyatwa zinatamba mbumba yace.
Unoyu ndi Nkulo wa Eufrate.
Fala na Fala: “ndinadzaponda.”
Peno: “Alungu a panyumba.” Fala na Fala: “Aterafi.”
Fala na Fala: “mabokho.”
Peno: “anyakupereka basa.”
Peno: “ciruzu.”
Fala na Fala: “ndodo.”
Fala na Fala: “inadzaona nkhungwi.”
Peno: “mphambvu ya umaso.”
Peno: “tijela.”
Peno: “wakusowa mphambvu kakamwe.”
Peno: “nguwo yaciuprofeta.”
Peno: “ale akuti asandifuna.”
Pinthu pyenepi ndi nzinda unalongwa pa vesi 2.
Peno: “anadzakhwipwa.”
Fala na Fala: “mpaka ku bara.”
Ineyi ndi Bara Yakufa.
Ineyi ndi Bara ya Medhiteraneo.
Peno: “Makumbi.”
Munjira inango: “nyamalonda.”