MALAKIYA

1 Mphangwa zakubuluka kuna Mulungu:

Yahova aphatisira Malakiya* toera kulonga mafala awa kuna Izraeli:

2 Yahova alonga: “Ine ndapangiza ufuni kuna imwe mbumba.”+

Mbwenye imwe musalonga: “Mwapangiza tani ufuni wanu kuna ife?”

Yahova alonga: “Izau nee akhali mʼbale wace Yakobe?+ Mbwenye ine ndafuna Yakobe, 3 mbandiida Izau;+ ndacitisa mapiri ace kukhala akusowa anthu,+ pontho ndacitisa unthaka wace kukhala thando ya anambwa a ntsanga.”+

4 “Maseze Edhomi alonge: ‘Ife tafudzwa, mbwenye tinabwerera mbatimanga pontho madembe athu,’ ipi ndi pidalonga Yahova wa anyankhondo: ‘Iwo anadzamanga pontho, mbwenye ine ndinadzafudza; anthu anadzacemera mbuto ineyi “dziko ya uipi,” pontho iwo anadzacemerwa “mbumba idatongwa na Yahova kwenda na kwenda.”+ 5 Imwe munadzaona pyenepi na maso anu mbamulonga: “Mbasimbwe Yahova mu dziko ya Izraeli.”’”

6 “‘Mwana asalemedza babace,+ pontho nyabasa asalemedza mbuyace.+ Mphapo khala ine ndine baba, thangwi yanji imwe nkhabe kundilemedza?+ Pontho khala ine ndine mbuya, thangwi yanji imwe nkhabe kundigopa?’* Ine Yahova wa anyankhondo ndikupanga imwe anyantsembe akuti musapwaza dzina yanga.+

“‘Mbwenye imwe musalonga: “Tapwaza tani dzina yanu?”’

7 “‘Imwe mwaipswipisa thangwi yakubweresa cakudya* cakukhonda cena pa guwa yanga.’

“‘Pontho imwe musalonga: “Ife takupswipisani tani?”’

“‘Mwandipswipisa thangwi yakulonga: “Ife nee tisafunika kulemedza meza ya Yahova.”+ 8 Imwe mungapereka ntsembe ya cinyama cakukhonda ona musalonga: “Si pyakuipa tayu.” Pontho mungapereka ntsembe ya cinyama cakulamala peno ca kubva kupha, imwe musalonga: “Si pyakuipa tayu.”’”+

“Ndaphata miyendo, yeserani kukwata pinthu pyenepi mbamupipasa ntongi wanu. Kodi iye anakomerwa na imwe? Kodi iye anakubverani ntsisi?” alonga Yahova wa anyankhondo.

9 “Cincino ndaphata miyendo, dembeterani Mulungu toera atibvere ntsisi. Imwe mungapereka ntsembe ninga zenezi, kodi iye anazitawira, mbakomerwa na imwe?” alonga Yahova wa anyankhondo.

10 “Alipo mwa imwe wakuti asatawira kufunga misuwo*+ mwakukhonda kulipwa? Thangwi ngakhale kugasa moto pa guwa yanga ya ntsembe imwe nkhabe tawira mungakhonda kulipwa.+ Ine nkhabe kukomerwa na imwe,” alonga Yahova wa anyankhondo, “pontho ine nkhabe kukomerwa na miyoni inapereka imwe ninga ntsembe.”+

11 Yahova wa anyankhondo alonga: “Dzina yanga inadzakhala ikulu pakati pa madzindza kutomera kumabulukiro a dzuwa mpaka kumadokero a dzuwa.+ Mʼmbuto zonsene munadzaperekwa ntsembe zakupiswa na miyoni toera kupasa mbiri dzina yanga, ninga miyoni yadidi; thangwi dzina yanga inadzapaswa mbiri pakati pa madzindza.”+

12 “Mbwenye imwe musapswipisa dzina yanga*+ mungalonga: ‘Meza ya Yahova ndi yakupswipa, ntsembe zinaikhwa penepo na cakudya ndi pyakusowa basa.’+ 13 Pontho imwe musalonga: ‘Onani! Ndi pyakunetesa kakamwe!’ pontho imwe musapipwaza” alonga Yahova wa anyankhondo. “Imwe musabweresa pinyama pyakubiwa, pyakulamala na pyakubva kupha. Inde, musabweresa pinthu pyenepi ninga muoni! Kodi ine ndisafunika kupitambira?”+ alonga Yahova.

14 “Dzedze kuna munthu wakunyengeza, wakuti ali na cinyama cimuna cadidi pa nkumbi wace, mbwenye asacita pikiro mbapereka cinyama cakulamala ninga ntsembe kuna Yahova. Thangwi ine ndine Mambo wankulu,”+ alonga Yahova wa anyankhondo, “pontho dzina yanga inadzacitisa madzindza kugopa.”+

2 “Cincino, ine ndiri kupereka ntemo uyu kuna imwe anyantsembe.+ 2 Imwe mungakhonda kuubvera, pontho mungakhonda kupasa mbiri dzina yanga na ntima wanu onsene,” alonga Yahova wa anyankhondo, “Ine ndinakupasani dzedze,+ pontho ndinadzacinja nkhombo zanu kudza dzedze,+ inde, ndinadzacinja nkhombo zanu kudza dzedze thangwi nee musandibvera na ntima wanu onsene.”

3 “Onani! Ine ndinadzapha* mbeu zidabzwala imwe, thangwi ya pinthu pinacita imwe,+ pontho ndinadzakuwazirani kunkhope kwanu matubzwi a pinyama pinapereka imwe ninga ntsembe mʼmaphwando anu; pontho imwe munadzaponywa pabodzi na iwo.* 4 Natenepa imwe munadzadziwa kuti ndakupasani ntemo unoyu toera cibverano canga na Levi cipitirize kuphata basa,”+ alonga Yahova wa anyankhondo.

5 “Cibverano cidacita ine na iye capulumusa umaso wace, pontho cancitisa toera akhale na umaso wa ntendere. Thangwi ya nkhombo zenezi, iye akulumizika toera kundigopa.* Nakuti iye akhalemedza dzina yanga, iye nee akhacita pinthu pyakuti pikhanditsukwalisa. 6 Iye asapfundzisa mwambo wandimomwene,+ pontho cipo alonga mafala akuipa. Iye akakhala muntendere na ine,+ pontho aphedza anthu azinji toera asiye kucita pinthu pyakuipa. 7 Thangwi mulomo wa nyantsembe usafunika kukoya udziwisi, pontho anthu anadzaenda kuna iye toera kapfundziswa,*+ thangwi iye ndi nyakupereka mphangwa wa Yahova wa anyankhondo.

8 “Mbwenye imwe mwasiya kufamba munjira yadidi. Imwe mwacitisa* anthu azinji kusiya kubvera mwambo.+ Imwe mwafudza cibverano cidacita ine na Levi,”+ alonga Yahova wa anyankhondo. 9 “Natenepa ine ndinakucitisani toera mupwazwe, pontho mukhonde kulemedzwa pamaso pa mbumba yonsene, thangwi imwe nee mwatowezera njira zanga, mbwenye mwapangiza tsankhulo pakuphatisira mwambo.”+

10 “Kodi ife tonsene babathu si mʼbodzi ene tayu?+ Kodi adaticita si Mulungu mʼbodzi basi tayu? Mphapo thangwi yanji tisasandukirana unango na ndzace,+ mbatipswipisa cibverano cidacita ambuyathu? 11 Mbumba ya Yuda yacita pinthu mwakukhonda khulupirika, pontho yacita pinthu pyakunyanyasa mu Izraeli na mu Yerusalemu; iwo apswipisa kucena kwa* Yahova,+ kwakuti Iye asakufuna, pontho iwo asemba atsikana akuti asalambira alungu anango.+ 12 Yahova anadzapha mʼmisasa ya Yakobe anthu onsene anacita pyenepi, mwakukhonda tsalakana kuti ndi ani,* ngakhale iye apereke ntsembe ninga miyoni kuna Yahova wa anyankhondo.”+

13 “Pontho pana cinthu cinango* cinacita imwe, cakuti cisacitisa guwa ya Yahova kudzala na misozi, kulira na kubulira. Na thangwi ineyi, ntsembe zinapereka imwe ninga miyoni, iye nee asazitawira, pontho pinthu pyonsene pinapereka imwe, iye nee asakomerwa napyo.+ 14 Imwe musalonga: ‘Thangwi yanji?’ Thangwi Yahova ndi mboni pakati pa imwe na akazanu, mʼbodzi na mʼbodzi wa imwe acita pinthu mwakukhonda khulupirika kuna nkazi adasemba iye mbali mʼphale, maseze iye ndi xamwali wace, pontho nkazi adacita na iye cibverano.*+ 15 Mbwenye pana anango pakati panu akuti atonga toera kukhonda kucita pyenepi. Iwo akhonda kucita pyenepi thangwi akhafuna kukhala na ana akuti mwandimomwene ndi mbumba ya Mulungu.* Anthu anewa asapitiriza kucita pinthu mwakutsogolerwa na mphambvu ya Mulungu. Cincino, imwembo onani mwadidi piri mʼmitima yanu, pontho kulisani makhaliro adidi. Lekani kucita pinthu mwakukhonda kukhulupirika na akazi adasemba imwe mu uphale wanu. 16 Ine ndisaipirwa* kakamwe na munthu anakhonda nkazace,”+ alonga Yahova Mulungu wa Izraeli, “pontho ndisaipirwa na ule wakuti ali na mulando wakucita pinthu pyauphanga,” alonga Yahova wa anyankhondo. “Onani mwadidi pinthu piri mʼmitima yanu, pontho lekani kucita pinthu mwakukhonda kukhulupirika.+

17 “Imwe mwacitisa Yahova kuneta thangwi ya mafalanu.+ Mbwenye imwe musalonga: ‘Tancitisa tani kuneta?’ Imwe mwancitisa kuneta na mafala awa: ‘Anthu onsene anacita pinthu pyakuipa ndi adidi pamaso pa Yahova, pontho iye asakomerwa na anthu anewa,’+ peno musalonga: “Mulungu wa ulungami ali kupi?’”

3 “Ona! Ine ndiri kutumiza ntumiki wanga, pontho iye anadzandisasanyira njira.+ Penepo pene, Mbuya wandimomwene anasaka imwe anadzabwera mu templo yace;+ pontho ntumiki wa cibverano anakomerwa na imwe anadzabwera. Mwakukhonda penula, iye anadzabwera,” alonga Yahova wa anyankhondo.

2 “Mbani anafuna kupirira pa ntsiku yakubwera kwace, pontho mbani anakwanisa kukhala dzololo pakuonekera kwace? Thangwi iye anadzakhala ninga moto wa nyakunyungulusa utale, pontho ninga sabau+ yakufula nayo nguwo. 3 Pontho iye anadzakhala pantsi ninga nyakunyungulusa utale na nyakucenesa parata+ mbacenesa ana a Levi; iye anadzaacenesa ninga ouro, pontho ninga parata; mwandimomwene, kuna Yahova iwo anadzakhala ninga mbumba yakuti isapereka ntsembe ninga miyoni yaulungami. 4 Ntsembe zinapereka Yuda na Yerusalemu zinadzakhala zakutsandzayisa kakamwe kuna Yahova ninga pikhacita iwo mu ntsiku zakale.+

5 “Ine ndinadzabwera toera kudzakutongani, ndinadzabwera mwakucimbiza kakamwe toera kutcunyusa mangʼanga,+ anyakucita upombo, anyakudumbira mwauthambi,+ ale anabera nyabasa,+ ale anabera nzice* na mwana waumphawi*+ na onsene anakhonda kuphedza munthu wa dziko inango.+ Anthu anewa nee asandigopa,” alonga Yahova wa anyankhondo.

6 “Thangwi ine ndine Yahova; ine nkhabe cinja.*+ Pontho imwe ndimwe ana a Yakobe; ndi thangwi yace imwe mudzati kufudzwa. 7 Kutomera mu ntsiku za ambuyanu, imwe musapasira nkhodolo mitemo yanga mbamukhonda kuibvera.+ Bwererani kuna ine, ine ndinadzabwererambo kuna imwe,”+ alonga Yahova wa anyankhondo.

Mbwenye imwe musalonga: “Kodi tinabwerera tani kuna imwe?”

8 “Kodi munthu pyace anakwanisa kubera Mulungu? Mbwenye imwe musandibera.”

Pontho imwe musalonga: “Ife tisakuberani tani?”

“Imwe musandibera mungakhonda kubweresa khundu yacikhumi na pyakupereka. 9 Mwandimomwene imwe muli na dzedze* thangwi musandibera, inde, dzindza yonsene isandibera. 10 Bweresani khundu yacikhumi yonsene nʼnyumba yakukoyera pinthu+ toera nʼnyumba mwanga mukhale na cakudya;+ ndaphata miyendo, ndiyesereni munjira ineyi,” alonga Yahova wa anyankhondo, “toera muone khala ine nee ndinakufungulirani misuwo yakudzulu+ mbandikukhuthulirani nkhombo mpaka pakhonde kusoweka pinthu.”+

11 “Ndinadzasandika anyadzombe, pontho iwo nee anadzadyabve misapo ya mʼmunda mwanu, pontho minda yanu ya mauva nee inadzakhalabve yakusowa misapo,”+ alonga Yahova wa anyankhondo.

12 “Anthu a madzindza onsene anadzalonga kuti ndimwe akutsandzaya,+ thangwi imwe munadzakhala dziko yakutsandzayisa,” alonga Yahova wa anyankhondo.

13 “Mafala adalonga imwe kuna ine akhali amphambvu,” alonga Yahova.

Pontho imwe musalonga: “Ndi mafala api akuipa adalonga ife kuna imwe?”+

14 “Imwe musalonga: ‘Kutumikira Mulungu nkhwakusowa basa.+ Tinawinanji tingacita pinatipanga iye mbatikhala akutsukwala pamaso pa Yahova wa anyankhondo? 15 Cincino anthu akudzikuza tisaaona ninga akutsandzaya. Pontho anyakucita pyakuipa pinthu pisaafambira mwadidi.+ Iwo asayesera Mulungu, mbwenye nkhabe kutcunyuswa.’”

16 Pa ndzidzi unoyu, ale akhagopa Yahova akhalonga unango na ndzace, mʼbodzi na mʼbodzi akhalonga na xamwali wace, pontho Yahova akhapitiriza kubvesera mwadidi pikhalonga iwo. Bukhu yatoma kulembwa pamaso pace+ yakuti iri na madzina a ale anafunika kukumbukirwa akuti asagopa Yahova na ale ananyerezera dzina yace.+

17 “Iwo anadzakhala anthu anga+ pa ntsiku inafuna ine kudzaasankhula toera akhale mbumba yanga yakupambulika,”*+ alonga Yahova wa anyankhondo. “Ine ndinadzaabvera ntsisi ninga ntsisi zinapangiza baba kuna mwanace anambvera.+ 18 Imwe munadzaona pontho kusiyana pakati pa munthu wakulungama na munthu wakucita pyakuipa,+ pakati pa ule anatumikira Mulungu na ule anakhonda kuntumikira.”

4 “Onani! Iri kufika ntsiku yakupisa ninga forno,+ ntsiku yakuti anthu onsene akudzikuza na onsene anacita pyakuipa anadzakhala ninga mapesi. Mwandimomwene iwo anadzafudzwa pa ntsiku ineyi inabwera, pontho nkhabe ntcitci peno nthawi inafuna kudzasala,” alonga Yahova wa anyankhondo. 2 “Mbwenye imwe akuti musalemedza* dzina yanga, inadzagaka kuna imwe dzuwa yakuti isabweresa ulungami, pontho ceza cace cinadzakuwangisani; pontho imwe munadzanumpha-numpha ninga anangʼombe acimuna akununa.”

3 “Imwe munadzaponda-ponda anyakucita pyakuipa, thangwi iwo anadzakhala ninga pfumbi pantsi pa manyalo anu pa ntsiku inafuna ine kudzacita pinthu,” alonga Yahova wa anyankhondo.

4 “Kumbukani Mwambo wa ntumiki wanga Mose, matongero na mitemo idapereka ine ku Orebhi toera Aizraeli onsene aibvere.+

5 “Onani! Ine ndinatuma mprofeta Eliya kuna imwe,+ mbidzati kufika ntsiku ikulu na yakugopswa ya Yahova.+ 6 Iye anadzacitisa mitima ya ababa kukhala ninga ya ana,+ pontho anadzacitisa mitima ya ana kukhala ninga ya ababa,* toera ine ndikhonde kubwera kudzaphekesa dziko yapantsi mbandiifudza.”

(Malemba adalembwa Mucihebheri na Ciaramaki amalira pano.Malemba anatowera alembwa Mucigerego)