TSAMBA YAKUTOMA YA JUWAU

1 Ife tiri kukulemberani thangwi ya ule wakuti akhalipo kubulukira pakutoma, ule anabweresa mafala akupasa umaso, wakuti ife tambvesera, ule wakuti ife tamuona na maso athu, tamuonesesa mbatimʼphata na manjathu,+ 2 (inde, umaso wapangizwa kuna ife, ife tauona, pontho tisapereka umboni thangwi ya iwo,+ mbatikudziwisani umaso wakukhonda mala+ udabuluka kuna Baba, wakuti wapangizwa kuna ife), 3 ife tisakudziwisanimbo pidaona ife na pidabva ife, toera imwe+ mukhalembo akuphatana na ife. Pontho ife tiri akuphatana na Baba pabodzi na Mwanace, Yezu Kristu.+ 4 Ife tisakulemberani pinthu pyenepi toera kutsandzaya kuli na ife tonsene kukhale kwakukwana.

5 Izi ndi mphangwa zidabva ife kuna iye zakuti ife tisakudziwisani: Mulungu ndi ceza,+ pontho mwa iye nkhabe cidima, nee pangʼono pene. 6 Ife tingalonga kuti: “Tiri akuphatana na iye,” mbwenye mbatipitiriza kufamba ncidima, tiri kulonga uthambi, pontho nee tisacita pinthu mwakubverana na undimomwene.+ 7 Mbwenye khala ife tiri kufamba mu ceza ninga iye wakuti ali mu ceza, ife tiri akuphatana unango na ndzace, pontho ciropa ca Yezu wakuti ndi Mwanace, cisaticenesa mʼmadawo onsene.+

8 Tingalonga kuti: “Ife nkhabe madawo,” tikunyengezeka tekhene,+ pontho undimomwene nee uli muna ife. 9 Tingabweka madawo athu, iye ndi wakukhulupirika na wakulungama toera kutilekerera madawo athu, mbaticenesa mu pinthu pyonsene pyakuipa.+ 10 Tingalonga kuti: “Ife nkhabe kucita madawo,” tisacitisa Mulungu kukhala nyauthambi, pontho mafalace nee ali muna ife.

2 Ananga akufunika, ine ndiri kukulemberani pinthu ipi toera mukhonde kucita madawo. Mbwenye munthu angacita madawo, ife tiri na mʼphedzi,* Yezu Kristu+ munthu wakulungama+ wakuti ali pabodzi na Baba. 2 Iye ndi ntsembe+ yakuphimbira madawo athu,*+ tayu athu basi, mbwenye madawo a anthu pa dziko yonsene.+ 3 Tingapitiriza kubvera matongero ace, pinaoneka pakweca kuti ife tisandziwa. 4 Ule analonga kuti: “Ine ndisandziwa,” mbwenye mbakhonda kubvera matongero ace, munthu unoyu ndi nyauthambi, pontho muntima mwace nkhabemo undimomwene.* 5 Mbwenye munthu anabvera fala yace, asapangiza pakweca kuti mwandimomwene iye asafuna Mulungu.+ Na thangwi ineyi, ife tisadziwa kuti tiri akuphatana na iye.+ 6 Ule analonga kuti asapitiriza kukhala wakuphatana na iye, asafunika kupitiriza kufamba ninga mudafambira iye.*+

7 Abale akufunika, ine nee ndisakulemberani matongero mapswa, mbwenye ndi akale, akuti imwe muli nawo bulukira pakutoma.+ Matongero anewa akale ndi mafala adabva imwe. 8 Mbwenye ine ndiri kukulemberani matongero mapswa, akuti iye aatoweza, pontho imwe mwaatowezambo, thangwi cidima ciri kupita, pontho ceza candimomwene ciri kuyetimira.+

9 Munthu analonga kuti ali mu ceza mbwenye mbaida+ mʼbale wace, aciri ncidima.+ 10 Ule anafuna mʼbale wace asapitiriza mu ceza,+ pontho mwa iye nkhabe mwala wakugwegwedusa. 11 Mbwenye ule anaida mʼbale wace ali ncidima, pontho akufamba ncidima,+ iye nkhabe dziwa kunaenda iye,+ thangwi cidima cafunga maso ace.

12 Ananga akufunika, ine ndiri kukulemberani thangwi imwe mwalekererwa madawo anu thangwi ya dzina yace.+ 13 Ababa, ine ndiri kukulemberani thangwi imwe musadziwa ule wakuti alipo kubulukira pakutoma. Imwe aphale, ine ndiri kukulemberani thangwi imwe mwakunda Nyakuipa.+ Imwe anangʼono, ine ndiri kukulemberani thangwi imwe musadziwa Baba.+ 14 Ababa, ine ndiri kukulemberani thangwi imwe musadziwa ule wakuti alipo kubulukira pakutoma. Imwe aphale, ine ndiri kukulemberani thangwi ndimwe akuwanga,+ mafala a Mulungu asapitiriza muna imwe,+ pontho imwe mwakunda Nyakuipa.+

15 Lekani kufuna dziko nee pinthu piri mu dziko.+ Khala munthu asafuna dziko, ufuni wa Baba nee uli muna iye;+ 16 thangwi pinthu pyonsene piri mu dziko, ninga pinthu pinasirirwa na manungo,+ pinthu pinasirirwa na maso+ na kugaya thangwi ya pinthu piri na munthu mu umaso wace, nee pisabuluka kuna Baba, mbwenye pisabuluka ku dziko. 17 Kusiyapo pyenepi, dziko iri kupita pabodzi na pifuno pyayo,+ mbwenye munthu anacita pinafuna Mulungu anapitiriza kukhala kwenda na kwenda.+

18 Ananga akufunika, uno ndi ndzidzi wakumalisa, ninga mudabva imwe kuti anadzabwera nyamalwa wa Kristu,+ cincino alipo azinji akuti ndi anyamalwa a Kristu.+ Na thangwi ineyi, ife tisadziwa kuti uno ndi ndzidzi wakumalisa. 19 Iwo abuluka pakati pathu, mbwenye nee akhali a mu nsoka wathu;+ thangwi mbadakhala a mu nsoka wathu, iwo mbadapitiriza kukhala pabodzi na ife. Mbwenye iwo abuluka toera pioneke pakweca kuti si onsene tayu akuti ndi a mu nsoka wathu.+ 20 Imwe mwadzodzwa na Wakucena,+ pontho monsene muli na cidziwiso. 21 Ine ndiri kukulemberani, tayu thangwi imwe nkhabe dziwa undimomwene,+ mbwenye thangwi imwe musaudziwa, pontho thangwi nkhabepo uthambi unabuluka mu undimomwene.+

22 Kodi nyauthambi mbani? Ndi ule anakhonda kuti Yezu ndi Kristu.+ Unoyu ndi nyamalwa wa Kristu,+ ule anakhonda Baba na Mwana. 23 Munthu ule anakhonda Mwana nee ndi wakutawirika kuna Baba.+ Mbwenye ule analonga kuti asakhulupira Mwana,+ asakhalambo wakutawirika kuna Baba.+ 24 Mbwenye kwa imwe, pire pidabva imwe kubulukira pakutoma pisafunika kupitiriza muna imwe.+ Pire pidabva imwe kubulukira pakutoma pingapitiriza muna imwe, imwembo munadzapitiriza kukhala akuphatana na Mwana, mbamukhalambo akuphatana na Baba. 25 Kusiyapo pyenepi, iye atipikira umaso wakukhonda mala.+

26 Ine ndakulemberani pinthu pyenepi thangwi anango asayesera kukupeusani. 27 Mbwenye imwe, Mulungu akudzodzani na nzimu wace,+ pontho nzimu unoyu usapitiriza muna imwe, natenepa nee pisafunika kuti munthu unango akupfundziseni. Kudzodzwa kwanu na nzimu ndi kwandimomwene, nee ndi kwauthambi, pontho iwo usakupfundzisani pinthu pyonsene.+ Natenepa, pitirizani kukhala akuphatana na iye ninga mudapfundziswa imwe na nzimu unoyu.+ 28 Mphapo ananga akufunika, pitirizani kukhala akuphatana na iye, toera iye angadzapangizwa, tikwanise kulonga na cinyindiro,+ pontho toera mu ndzidzi wakuonekera kwace, tikhonde kubuluka pamaso pace thangwi yakukhala na manyadzo. 29 Khala imwe musadziwa kuti iye ndi wakulungama, musadziwambo kuti munthu anacita pinthu pyakulungama abalwa kubulukira mwa iye.+

3 Onani ufuni ukulu udapangiza Baba kuna ife,+ mpaka ife kucemerwa ana a Mulungu!+ Ife ndifedi anace. Na thangwi ineyi, dziko* nkhabe kutidziwa,+ thangwi iyo nee yafika pakudziwa Mulungu.+ 2 Abale akufunika, cincino ife ndife ana a Mulungu,+ mbwenye mpaka pano pidzati kupangizwa kuti tinadzakhala ani.+ Ife tisadziwa kuti tinadzakhala ninga iye, thangwi iye angadzapangizwa tinadzamuona kuti iye akhala tani. 3 Anthu onsene akuti ali na cidikhiro ceneci mwa iye, asaceneseka okhene,+ thangwi iye ndi wakucena.

4 Munthu anacita madawo, akucitambo pinthu pyakukhonda kubverana na mwambo; pontho madawo ndi kukhonda kubvera mwambo. 5 Imwe musadziwambo kuti iye abwera* toera kubulusa madawo athu,+ pontho mwa iye nkhabe madawo. 6 Munthu anapitiriza kukhala wakuphatana na iye nkhabe kucita madawo;+ ule anacita madawo nee amuona, pontho nee afika pakundziwa. 7 Ananga akufunika, lekani kunyengezwa nee na munthu mʼbodzi; ule anacita pinthu pyakulungama ndi wakulungama, ninga Yezu ndi wakulungama. 8 Munthu anacita madawo ali kukhundu ya* Dyabo, thangwi Dyabo asacita madawo kubulukira padatoma iye.*+ Na thangwi ineyi, Mwana wa Mulungu abwera toera kufudza* mabasa a Dyabo.+

9 Munthu wakuti ndi mwana wa Mulungu nkhabe kucita madawo,+ thangwi mbeu* Yace isapitiriza muna munthu unoyu, pontho iye nee anacita madawo thangwi iye ndi mwana wa Mulungu.+ 10 Ana a Mulungu na ana a Dyabo asapangizika pakweca munjira iyi: Munthu anakhonda kucita pinthu pyakulungama na ule anakhonda kufuna mʼbale wace,+ nee ali kukhundu ya Mulungu. 11 Thangwi mphangwa zidabva imwe kubulukira pakutoma ndi izi: Tisafunika kufunana unango na ndzace;+ 12 nee tisafunika kukhala ninga Kaini, mwana wa Nyakuipa wakuti apha mʼbale wace.+ Thangwi yanji iye amupha? Thangwi mabasace akhali akuipa,+ mbwenye a mʼbale wace akhali akulungama.+

13 Abale, lekani kudzudzumika kuti thangwi yanji dziko isakuidani.+ 14 Ife tisadziwa kuti tikhadafa, mbwenye cincino tiri mʼmaso+ thangwi tisafuna abale.+ Ule anakhonda kufuna abale asapitiriza kukhala wakufa.+ 15 Munthu anaida mʼbale wace ndi nyakupha munthu,*+ pontho imwe musadziwa kuti ule anapha munthu nkhabe kudzatambira umaso wakukhonda mala.+ 16 Ife tisadziwa ufuni kubulukira munjira iyi: Iye apereka umaso wace thangwi ya ife,+ ifembo tisafunika kupereka umaso wathu thangwi ya abale athu.+ 17 Munthu angakhala na pinthu pyakukwana toera kutsalakana napyo umaso wace, mbaona kuti mʼbale wace asafuna ciphedzo, mbwenye mbakhonda kumbvera ntsisi, kodi munthu unoyu anakwanisa tani kulonga kuti iye asafuna Mulungu?*+ 18 Ananga akufunika, ife tisafunika kufunana, tayu na mafala basi peno na lirimi,+ mbwenye tisafunika kupangiza ufuni wandimomwene+ kubulukira mu pinthu pinacita ife.+

19 Munjira ineyi, ife tinadzadziwa kuti tiri na undimomwene, pontho tinadzakhurudza mitima yathu pamaso pace 20 mu pinthu pyonsene pyakuti mitima yathu inakwanisa kutikonesa, thangwi Mulungu ndi nkulu kupiringana mitima yathu, pontho iye asadziwa pinthu pyonsene.+ 21 Abale akufunika, khala mitima yathu nkhabe kutikonesa, tinakwanisa kulonga na Mulungu mwakusudzuka;+ 22 iye asatipasa pinthu pyonsene pinaphemba ife,+ thangwi tisabvera matongero ace, pontho tisacita pinthu pinakomerwa na iye. 23 Mwandimomwene, matongero ace ndi awa: Ife tikhulupire dzina ya Mwanace, Yezu Kristu;+ pontho tifunane unango na ndzace,+ mwakubverana na matongero adatipasa iye. 24 Kusiyapo pyenepi, munthu anabvera matongero ace asapitiriza kukhala wakuphatana na iye, iyembo asakhala wakuphatana na munthu unoyu.+ Pontho kubulukira mu nzimu udatipasa iye, tisadziwa kuti iye asapitiriza kukhala wakuphatana na ife.+

4 Abale akufunika, lekani kukhulupira pipfundziso* pyonsene pinaoneka ninga pyabuluka kuna Mulungu,+ mbwenye dingani pipfundziso* pyenepi toera muone khala pyabulukadi kuna Mulungu,+ thangwi aprofeta azinji authambi abalalika pa dziko.+

2 Imwe munakwanisa kudziwa khala cipfundziso cisabuluka kuna Mulungu munjira iyi: Cipfundziso consene cinapangiza pakweca kuti Yezu Kristu abwera ninga munthu, cisabuluka kuna Mulungu.+ 3 Mbwenye cipfundziso consene cinalonga kuti Yezu nee abwera ninga munthu, nee cisabuluka kuna Mulungu.+ Kusiyapo pyenepi, ceneci ndi cipfundziso ca nyamalwa wa Kristu cidabva imwe kuti mbacidabwera,+ cincino camwazika pa dziko.+

4 Ananga akufunika, imwe muli kukhundu ya Mulungu, pontho mwakunda aprofeta authambi,+ thangwi ule wakuti ali wakuphatana na imwe+ ndi nkulu kupiringana ule wakuti ali wakuphatana na dziko.+ 5 Iwo ali kukhundu ya dziko,+ na thangwi ineyi, iwo asalonga pinthu pyakuti pisabverana na dziko, pontho dziko isaabvesera.+ 6 Ife tiri kukhundu ya Mulungu. Munthu anadziwa Mulungu, asatibvesera;+ munthu wakuti nee ali kukhundu ya Mulungu, nkhabe kutibvesera.+ Munjira ineyi, tisakwanisa kudzindikira* khala cipfundziso ndi candimomwene peno ndi cauthambi.+

7 Abale akufunika, tendeni tipitirize kufunana unango na ndzace,+ thangwi ufuni usabuluka kuna Mulungu; ule anafuna ndzace, ndi mwana wa Mulungu, pontho iye asadziwa Mulungu.+ 8 Munthu anakhonda kufuna ndzace, nkhabe kudziwa Mulungu, thangwi Mulungu ndi ufuni.*+ 9 Mulungu apangiza ufuni wace kuna ife munjira iyi: Mulungu atuma Mwanace mʼbodzi ekha+ pa dziko yapantsi, toera kubulukira mwa iye, ife tikwanise kuwina umaso.+ 10 Munjira ineyi, ufuni usabveka kuti: Sife tayu adafuna Mulungu, mbwenye ndiye adatifuna, mbatumiza Mwanace ninga ntsembe+ yakuphimbira madawo athu.*+

11 Abale akufunika, khala Mulungu atifuna munjira ineyi, ifembo tisafunika kufunana unango na ndzace.+ 12 Nkhabepo munthu adaona Mulungu.+ Tingapitiriza kufunana unango na ndzace, Mulungu anapitiriza kukhala na ife, pontho tinakwanisa kupangiza mwakukwana ufuni wace.+ 13 Munjira ineyi, ife tisadziwa kuti tisapitiriza kukhala akuphatana na iye, pontho iye ali wakuphatana na ife, thangwi iye atipasa nzimu wace. 14 Kusiyapo pyenepi, ife ene tisapereka umboni wakuti Baba atuma Mwanace ninga mpulumusi wa dziko.+ 15 Munthu analonga pakweca kuti Yezu ndi Mwana wa Mulungu,+ Mulungu asapitiriza kukhala wakuphatana na munthu unoyu, iyembo asakhala wakuphatana na Mulungu.+ 16 Ife tisadziwa, pontho tisakhulupira kuti Mulungu asatifuna.+

Mulungu ndi ufuni,+ munthu anapitiriza kupangiza ufuni, asapitiriza kukhala wakuphatana na Mulungu, pontho Mulungu asapitirizambo kukhala wakuphatana na iye.+ 17 Munjira ineyi, ufuni usapangizwa mwakukwana kuna ife, toera tikwanise kulonga mwakusudzuka*+ pa ntsiku yakutongwa, thangwi mu dziko ino, ifembo tiri ninga iye. 18 Munthu anafuna Mulungu nkhabe kugopa,+ mbwenye ufuni wandimomwene usamalisa* kugopa, thangwi kugopa kusatipingiza. Mwandimomwene, munthu wakugopa adzati kukhala na ufuni wakukwana.+ 19 Ife tisafuna thangwi ndiye adatoma kutifuna.+

20 Munthu angalonga: “Ine ndisafuna Mulungu,” mbwenye mbaida mʼbale wace, iye ndi nyauthambi.+ Thangwi ule anakhonda kufuna mʼbale wace anaona iye,+ anacimwana kufuna Mulungu, wakuti iye nkhabe kumuona.+ 21 Pontho iye atipasa matongero awa: Ule anafuna Mulungu, asafunikambo kufuna mʼbale wace.+

5 Ule anakhulupira kuti Yezu ndi Kristu, ndi mwana wa Mulungu,+ pontho ule anafuna Baba, asafunambo anace. 2 Munjira ineyi, ife tisadziwa kuti tisafuna ana a Mulungu,+ khala ife tisafuna Mulungu mbatibvera matongero ace. 3 Thangwi kufuna Mulungu ndi* kubvera matongero ace; pontho matongero ace+ nee ndi akulemera,*+ 4 thangwi munthu wakuti ndi mwana wa Mulungu asakunda dziko.+ Pontho cinthu cidatiphedza toera kukunda dziko ndi cikhulupiro cathu.+

5 Mbani anakwanisa kukunda dziko?+ Kodi si ule tayu anakhulupira kuti Yezu ndi Mwana wa Mulungu?+ 6 Unoyu ndi Yezu Kristu adabwera na madzi pabodzi na ciropa; iye nee abwera na madzi basi,+ mbwenye abwera na madzi pabodzi na ciropa.+ Pontho nzimu wakucena usapereka umboni,+ thangwi nzimu wakucena ndi undimomwene. 7 Thangwi pana pinthu pitatu pinapereka umboni: 8 Nzimu wakucena,+ madzi+ na ciropa;+ pontho pinthu pyenepi pitatu, pisapereka umboni wakubverana.

9 Umboni wa Mulungu ndi ukulu kakamwe kupiringana umboni wa anthu, wakuti ife tisautawira. Thangwi uyu ndi umboni wa Mulungu: Umboni udapereka iye thangwi ya Mwanace. 10 Munthu anakhulupira Mwana wa Mulungu ali na umboni muntima mwace. Munthu anakhonda kukhulupira Mulungu, asaona Mulungu ninga nyauthambi,+ thangwi iye nee asakhulupira umboni udapereka Mulungu thangwi ya Mwanace. 11 Umboni ndi uyu: Mulungu atipasa umaso wakukhonda mala,+ pontho umaso unoyu uli muna Mwanace.+ 12 Ule ali na Mwana, ali nawo umaso unoyu; ule wakuti nkhabe Mwana wa Mulungu, nee ali nawo umaso unoyu.+

13 Ine ndisakulemberani pinthu pyenepi, toera imwe adakhulupira dzina ya Mwana wa Mulungu,+ mudziwe kuti muli na umaso wakukhonda mala.+ 14 Pontho ici ndi cinyindiro ciri na ife kuna iye:+ Tingaphemba cinthu mwakubverana na pinafuna iye, iye asatibvesera.+ 15 Khala tisadziwa kuti iye asatibvesera tingaphemba cinthu consene, ife tisadziwambo kuti tinadzatambira pinthu pinaphemba ife, thangwi tisapiphemba kuna iye.+

16 Khala munthu aona mʼbale wace mbakacita madawo akuti nee athema kuphiwa thangwi ya madawo anewa, iye anaphemba, pontho Mulungu anadzampasa umaso;+ inde, kwa ale anacita madawo anapangiza kuti nee athema kuphiwa. Alipo madawo anapangiza kuti munthu athema kuphiwa.+ Nee ndiri kulonga kuti iye asafunika kucita phembero thangwi ya madawo anewa. 17 Macitiro onsene akuti nkhabe kubverana na ulungami ndi madawo.+ Mbwenye alipo madawo akuti nkhabe kucitisa kuti munthu aphiwe.

18 Ife tisadziwa kuti munthu wakuti ndi mwana wa Mulungu nkhabe kucita madawo, mbwenye ule* adabalwa na Mulungu asamuonera, na thangwi ineyi, Nyakuipa nkhabe kwanisa kumʼphata.+ 19 Ife tisadziwa kuti ndife anthu a Mulungu, mbwenye dziko yonsene iri mʼmanja mwa Nyakuipa.+ 20 Mbwenye ife tisadziwa kuti Mwana wa Mulungu abwera,+ mbatipasa luso yakubvesesa toera tikwanise kukhala na cidziwiso ca Mulungu wandimomwene.+ Pontho kubulukira mwa Mwanace, Yezu Kristu, ife tiri akuphatana na iye. Inde, unoyu ndi Mulungu wandimomwene na nyakupasa umaso wakukhonda mala.+ 21 Ananga akufunika, calirani madzimunthu.*+