MBVUNDZO 2
Tinakwanisa tani kudziwa Mulungu?
“Bukhu iyi ya Mwambo nee isafunika kubuluka pamulomo pako, usafunika kuileri mwakukhonda galuza masiku na masikati, toera utowezere mwadidi pyonsene pidalembwa mwenemu; natenepa unadzapembera mbucita pinthu mwandzeru.”
“Iwo apitiriza kuleri bukhu mwakugaluza, Mwambo wa Mulungu wandimomwene, aufokotoza mwadidi mbabvekesa mabvekero awo; natenepa, iwo aphedza anthu toera kubvesesa mphangwa zikhaleri iwo.”
“Wakutsandzaya ndi munthu anakhonda kufamba munjira za anyakuipa . . . , mbwenye iye asakomerwa na mwambo wa Yahova, pontho iye asaleri mwambo Wace mwakukhonda galuza masiku na masikati. . . . Pinthu pyonsene pinacita iye pinadzanfambira mwadidi.”
“Filipi athamanga nʼkhundu mwa ngolo, mbabva kuti iye akuleri mwakugaluza bukhu ya mprofeta Izaiya, mbambvundza: ‘Kodi musabvesesa pinaleri imwe?’ Iye antawira: ‘Ndinapibvesesa tani ndingasowa munthu toera kundifokotozera?’”
“Makhaliro ace akukhonda kuoneka, ninga mphambvu zace zakukhonda mala na pinapangiza kuti iye ndi Mulungu, pisaoneka pakweca kubulukira pa ndzidzi udacitwa dziko, thangwi pisapangizika kubulukira mu pinthu pidacita iye, natenepa iwo nkhabe mathangwi toera kukhonda kukhulupira Mulungu.”
“Nyerezera mwadidi pinthu pyenepi; ikha manyerezero ako onsene mu pinthu pyenepi, toera kuthambaruka kwako kuoneke pakweca kuna anthu onsene.”
“Tendeni tinyerezerane unango na ndzace, mbatiwangisana toera kupangiza ufuni na kuphata mabasa adidi, tikhonde kudjomba misonkhano.”
“Khala munthu nee ali na udziwisi wakukwana, mbapitirize kuuphemba kuna Mulungu, iye anadzaupaswa, thangwi Mulungu asapasa onsene mwakudzala manja, nee kusandika munthu.”