Mafala Akutoma

“DAUDA anakhala mu nzinda wa Sera Leoa alonga: “Ndakula mu cisa cing’ono ca mabulukiro a dzuwa a Sera Leoa. Pikhakhala ine m’phale, anyakubalanga na banja ibodzi akanirana munda. Onsene akhalonga kuti munda unoyu ndi wawo. Toera kutonga nseru unoyu, iwo acemera ng’anga wamamuna. Pidafika ng’anga unoyu, apasa supeyu m’bodzi mwa amuna anewa, buluka penepo am’phimbira na nguwo yakucena. Mwakukhonda dembuka mamuna adaphimbirwa atoma kudzadzamira mbabuluka kaluma. Mu ndzidzi ukhayang’ana iye pa supeyu alonga: ‘Ndikuona mamuna wakukalamba akubwera! Iye abvala nguwo zakucena. Ndi wakulapha, ali na imbvi, pontho akufamba kotakota.’

“Iye akhalonga pya yavu wanga! Buluka penepo, iye akhagopa kakamwe mbakhuwa: ‘Khala imwe nkhabe khulupira pinalonga ine, bwerani mudzaone mwekha!’ Mbwenye, nee m’bodzi wa ife akhali na cipapo toera kunfendedzera! Toera kumatamisa mamuna unoyu, ng’anga amuwazira ntombwe ukhali na iye mu nsupa yace.

“Mu ndzidzi ukhalonga iye na mamuna akhadaphatira supeyu, ‘yavu’ alonga kuti munda ndi wathu. Iye alonga kuti yavu wankazi asafunika kulima munda mwakukhonda gopa. Banja inango yatawira kutongwa kweneko kwa nseru. Nseru unoyu wadzamala.”

Pinthu pyenepi pisacitika kazinji Kumadokero a dzuwa a ku Afrika. Kweneko, ninga m’makhundu anango a dziko yapantsi, anthu azinji asakhulupira kuti munthu angafa asaenda ku mbuto ya mizimu. Asakhulupirambo kuti mizimu ineyi isakwanisa kuona pyonsene pinacitika, pontho inakwanisa kuthabusa anthu. Kodi pyenepi mphyandimomwene? Anyakufa ali masodi? Khala nkhabe, kodi mbani anasangizira kuti ndi mizimu ya anthu akufa? Kudziwa matawiro andimomwene a mibvundzo ineyi kunatiphedza toera kugumana umaso peno kufa.