Pfunziro 4

Kodi Dyabo Mbani?

Sathani Dyabo—kodi iye abuluka kupi? (1, 2)

Kodi Sathani asapeusa tani anthu? (3-7)

Thangwi yanji musafunika kuthunda Dyabo? (7)

1. Fala yakuti “dyabo” isabveka kuti ndi munthu analonga uthambi wakuipa kwa munthu unango. “Sathani” isabveka kuti ndi nyamalwa peno mpingizi. Anewa ndi mafala anaphatisirwa kwa nyamalwa wankulu wa Mulungu. Pakutoma, iye akhali anju waungwiro kudzulu na Mulungu. Mbwenye, patsogolo pace iye akhanyerezera kakamwe pya iye ene na akhafuna ulambiri wakuti wathema kupaswa Mulungu.—Mateo 4:8-10.

2. Anju unoyu, Sathani, alonga na Eva mukuphatisira nyoka. Mu kumpanga uthambi, iye acitisa Eva kukhonda bvera Mulungu. Mukucita tenepo, Sathani athimbana na cinacemerwa “utongi ukulu” wa Mulungu, peno ciimiriro cace ninga Wakudzuludzulu. Sathani apokanya khala Mulungu asatonga mu njira yadidi na mwakubverana na pyakufuna pya anthu Ace peno nkhabe. Sathani apokanya pontho khala anthu anapitiriza kukhala akukhulupirika kwa Mulungu. Mukucita tenepo, Sathani acitika ekhene kukhala nyamalwa wa Mulungu. Ndi thangwi yace iye adzacemerwa Sathani Dyabo.—Genesi 3:1-5; Yobe 1:8-11; Apokalipse 12:9.

3. Sathani asayesera kunyengeta anthu kuti amulambire. (2 Akorinto 11:3, 14) Njira ibodzi inaphatisira iye towera kupeusa nayo anthu ndi uphemberi waunthawatawa. Uphemberi ungapfunzisa uthambi thangwi ya Mulungu, mwandimomwene iwo ukucita cifuniro ca Sathani. (Jwau 8:44) Anthu akuti ndi piwalo pya uphemberi waunthawatawa angakwanise kukhulupiradi kuti akulambira Mulungu wandimomwene. Mbwenye mwandimomwene iwo akutumikira Sathani. Iye ndi ‘mulungu wa dziko ino.’—2 Akorinto 4:4.

4. Kukhulupira mizimu ndi njira inango inaphatisira Sathani towera kucitisa anthu kukhala pantsi pa utongi wace. Iwo angakwanise kuphatisira mizimu towera kuatsidzikiza, towera kuphekesa anango, towera kulongeratu pya ntsogolo, peno towera kucita pirengo. Sathani ndi mphambvu yakuipa inacitisa mabasa anewa onsene. Towera kukomeresa Mulungu, ife nkhabe funika kucita khundu mu kukhulupira mizimu.—Deuteronomyo 18:10-12; Machitiro 19:18, 19.

5. Pontho Sathani asapeusa anthu mu kuphatisira kuzikuza kakamwe kwa dzinza na kulambira pigawiko pya ndale. Anango asanyerezera kuti dzinza peno ntundu wawo wa khanda ndi wakufunika kakamwe kupiringana anango. Mbwenye unoyu ndi uthambi. (Machitiro 10:34, 35) Anango asaikha cinyindiro cawo ku pigawiko pya ndale towera kumalisa nyatwa za anthu. Mukucita tenepa, iwo akupwaza Umambo wa Mulungu. Iwo ndiwo basi unafuna kumalisa nyatwa zathu.—Danyele 2:44.

6. Njira inango inaphatisira Sathani towera kupeusa anthu ndi kuayesera na pifuno pyakuipa. Yahova asatipanga kuti ticalire mabasa akuipa thangwi iye asadziwa kuti iwo angakwanise kutiphekesa. (Agalata 6:7, 8) Anthu anango angafune kuti muphatane nawo m’pyakucita pyenepi. Mbwenye kumbukani kuti mwandimomwene ndi Sathani anafuna kuti imwe mucite pinthu pyenepi.—1 Akorinto 6:9, 10; 15:33.

7. Sathani angakwanise kuphatisira ntcingo peno mpingizo towera kukusiyisani kutumikira Yahova. Anthu anango anafuna imwe angakwanise kukhala akuipirwa kakamwe thangwi ya kupfunza kwanu Biblya. Anango angakwanise kukusingirirani. Mbwenye mbani adakupasani umaso? Sathani asafuna kukuthusani towera musiye kupfunza pya Yahova. Lekani kutawirisa Sathani kuwina! (Mateo 10:34-39; 1 Pedro 5:8, 9) Mu kuthunda Dyabo, mungakwanise kukomeresa Yahova na kupangiza kuti mukuphedza utongi Wace ukulu.—Misangani 27:11.

[Mafoto pa tsamba 9]

Uphemberi waunthawatawa, kukhulupira mizimu, na kuzikuza kwa madzinza kusapeusa anthu

[Foto pa tsamba 9]

Khondani Sathani mukupitiriza kupfunza pya Yahova