Pfunziro 8
Umaso Wa Banja Unakomeresa Mulungu
Kodi mamuna ali na ciimiriro canji m’banja? (1)
Kodi mamuna asafunika kutsalakana tani nkazace (2)
Kodi ndi mabasa api ali na baba? (3)
Kodi nkazi ali na ciimiriro canji m’banja? (4)
Kodi Mulungu asafunanji kwa anyakubala na kwa ana? (5)
Kodi maonero a Biblya ndi api mu kulonga pya kulekana na kumwalana? (6, 7)
1. Biblya isalonga kuti mamuna ndi nsolo wa banjace. (1 Akorinto 11:3, Chiverano Chachinchino) Mamuna asafunika kukhala na nkazi m’bodzi basi. Iwo asafunika kumanga banja mwakulinganira mwakubverana na mwambo.—1 Timoti 3:2; Tito 3:1.
2. Mamuna asafunika kuti afune nkazace ninga munazifunira iye. Iye asafunika kutsalakana nkazace ninga munatsalakanira Yezu atowereri ace. Mu njira yonsene, mamuna nkhabe funika kumenya peno kuvuya nkazace. Mbuto mwace, mamuna asafunika kutsalakana nkazace na kumulemedza.—Akolose 3:19; 1 Pedro 3:7.
3. Baba asafunika kuphata basa mwakuwanga towera atsalakane banjace. Asafunika kuipasa cakudya, cakubvala na nyumba yakukhala nkazace na anace. Baba asafunikambo kutsalakana pyakufuna pyauzimu pya banjace. (1 Timoti 5:8) Iye asatsogolera mu kuphedza banjace towera ipfunze pya Mulungu na pifuniro Pyace.—Deuteronomyo 6:4-9; Aefesi 6:4.
4. Nkazi asafunika kukhala mphedzi wadidi wa mamunace. (Genesi 2:18) Iye asafunika kuphedza mamunace mu kupfunzisa na mu kulanga anawo. (Misangani 1:8) Yahova asafuna kuti nkazi atsalakane banjace mwakufuna. (Misangani 31:10, 15, 26, 27; Tito 2:4, 5) Iye asafunika kukhala na cilemedzo cikulu kwa mamunace.—Aefesi 5:22, 23, 33.
5. Mulungu asafuna kuti ana abvere anyakubalawo. (Aefesi 6:1-3) Iye asadikhira anyakubala kuti apfunzise na alange anawo. Anyakubala asafunika kubvunga nzidzi na anawo, kupfunza nawo Biblya, kutsalakana pyakufuna pyawo pyauzimu na mabvero awo. (Deuteronomyo 11:18, 19; Misangani 22:6, 15) Anyakubala nkhabe funika kulanga anawo mwausumankha peno mwaukali.—Akolose 3:21.
6. Khala anthu adamanga banja ali na nyatwa yakukhonda kubverana unango na nzace, iwo asafunika kuwangisira kuphatisira uphungu wa Biblya. Biblya isatidembetera kuti tikhale akufunana na akulekererana. (Akolose 3:12-14) Mafala a Mulungu nkhabe kutawirisa kumwalana ninga njira ya kumalisa miseru ming’ono. Mbwenye nkazi angakwanise kusankhula kusiya mamunace khala (1) iye asakhonderatu kutsalakana banjace, (2) iye ndi wausumankha kakamwe kwakuti asaikha ungumi na umaso wace pangozwi, peno (3) upingizi wace ukulu usancimwanisa kulambira Yahova.—1 Akorinto 7:12, 13.
7. Anyakumanga banja asafunika kukhala akukhulupirika kwa unango na nzace. Kucita upombo ndi kudawira Mulungu na nzanu wa m’banja. (Ahebere 13:4) Kupita m’mabonde kunja kwa banja ndiko basi phata ya Malemba inatawirisa kumwalana na kumanga banja ipswa. (Mateo 19:6-9; Aroma 7:2, 3) Yahova asaipirwa anthu angamwalana mwakusowa phata ya Malemba na kumanga banja na munthu unango.—Malakiya 2:14-16.
[Foto pa tsamba 17]
Mulungu asadikhira kuti anyakubala apfunzise na alange anawo
[Foto pa tsamba 17]
Baba wakufuna asatsalakana pyakufuna pyakumanungo na pyauzimu pya banjace