Pfunziro 8

Kodi Anyamalwa A Mulungu Mbani?

Nyamalwa wankulu wa Mulungu ndi Satana Diyabu. Iye ndi cakusasanywa ca uzimu cidasandukira Yahova. Satana asapitiriza na kumenyana na Mulungu natenepa asabweresa nyatwa zakuinjipa kwa anthu onsene. Satana ndi wakuipa. Iye ndi waunthawatawa na wakupha.—Jwau 8:44.

Pyakusasanywa pinango pya uzimu pyagumanyikana na Satana m’kusandukira kwace Mulungu. Bibilya isaathula kuti madimoni. Sawasawa ninga Satana, madimoni ndi anyamalwa a anthu onsene. Asakomerwa na kuphekesa anthu. (Mateo 9:32, 33; 12:22) Yahova anadzafudza Satana na madimoni ace mwa kwenda na kwenda. Iwo asalirwa na nzidzi pang’ono basi wakupitiriza na kuthabusa anthu.—Apokalipse 12:12.

Mungafuna kukhala xamwali wa Mulungu, lekani kucita pinafuna Satana kuti mucite. Satana na madimoni ace asaida Yahova. Iwo ndi anyamalwa a Yahova natenepa asafuna kuti imwe mukhalembo nyamalwa wa Mulungu. Musafunika kusankhula kuti mbani anafunemwe kukomeresa—Satana peno Yahova. Mungafuna khala na umaso wakukhaliratu, musafunika kusankhula kucita cifuno ca Mulungu. Satana ali na misampha na njira zizinji towera kunyengerera anthu. Anthu akuinjipa asanyengererwa na iye.—Apokalipse 12:9.