Wafika ‘Nzidzi Wakutonga Miseru’

CHIDZIWISO, bukhu yakumalisa ya Bibilya, isatipanga kuti anju anamburuka pakati pa kudzulu ali na ‘mphangwa zadidi za kwenda na kwenda, towera azibvekese.’ Iye asalonga mwakugaluza: “Goperani Mulungu mbamusimba ukulu wache! Thangwi wafika ndzidzi unatonga iye miseru ya anthu.” (Chidziwiso 14:6, 7) ‘Nzidzi unoyu wakutonga miseru’ usaphataniza kubvekesa na kutonga miseru kwaumulungu. Kutonga kweneku kusabwera ninga madromero a ‘ntsiku zakumalisa’ zinakhala ife cincino.—2 Timoti 3:1, CC.

‘Nzidzi wakutonga miseru’ ndi mphangwa zadidi kwa ale anafuna kulungama. M’nzidzi unoyu Mulungu anadzabweresa cisudzulo kwa atumiki ace, ale anacerengeswa na makhaliro ano apinthu a uphanga na kusowa kufuna.

Cincino, ‘nzidzi wakutonga miseru’ mbusati kufudza makhaliro ano akuipa apinthu, tiri kudembeterwa: “Goperani Mulungu mbamusimba ukulu wache!” Kodi musacita pyenepi? Ipi ndi pizinji kupiringana kulonga, “Ine ndisakhulupira Mulungu.” (Mateyu 7:21-23; Yakobo 2:19, 20) Kugopa kwandimomwene Mulungu kusafunika kuticitisa kuti timulemedze. Kusafunika kuticitisa kucalira uipi. (Misanje 8:13) Kusafunika kutiphedza kufuna pinthu pyadidi na kuida pinthu pyakuipa. (Amosi 5:14, 15) Khala tisalemedza Mulungu, tinadzambvesera mwacidikhodikho. Ife nkhabe kudzakhala akudzudzumika kakamwe na pinthu pinango mpaka kucimwana kuleri nzidzi onsene, Mafala ace, Bibilya. Tinadzanyindira iye midzidzi yonsene na ntima wathu onsene. (Masalimo 62:8; Misanje 3:5, 6) Ale anamulemedzadi asadzindikira kuti iye, ninga Nciti wa kudzulu na dziko yapantsi, ndiye Mambo Wakudzulu na Pantsi, na iwo asangonjera kwa iye mwakufuna ninga Mambo wa umaso wawo. Khala tisadziwa kuti tisafunika kuteya makutu kakamwe ku pinthu pyenepi, tendeni tipicite mwakukhonda dembuka.

Nzidzi unoyu wakutonga miseru udalonga anju usadziwikambo ninga “ntsiku ya Yahova.” “Ntsiku” ineyi yagwera Yerusalemu wakale m’607 A.E.C. thangwi anthu a kweneko hadakoya macenjezo adaapasa Yahova kubulukira ku aprofeta ace tayu. Thangwi ya kunyerezera kuti ntsiku ya Yahova iciri kutali, iwo aenda kutsogolo na kuikha umaso wawo pangobzi. Yahova akhadaacenjeza: “Iri duzi, na ikucimbiza kakamwe.” (Zefania 1:14) ‘Ntsiku inango ya Yahova’ yagwera Babiloni wakale m’539 A.E.C. (Yesaya 13:1, 6) Thangwi yakunyindira malinga na milungu yawo, Ababiloni hadabvera macenjezo a aprofeta a Yahova tayu. Mbwenye namasiku mabodzi basi, Babiloni wankulu akundwa na Amedi na Apersiya.

Kodi lero tikuyang’anisana nanji? Na ‘ntsiku inango ya Yahova’ yakuti inadzafika konsene kwene. (2 Pedru 3:11-14) Kutonga miseru kwaumulungu kwa “Babiloni [Wankulu]” kwamala kulongwa kale. Mwakubverana na Chidziwiso 14:8, anju ali kulonga: “Babiloni [Wankulu] agwa!” Ipi pyacitika. Iye nkhabe kudzakhondesabve alambiri a Yahova. Ubvundi na kupipitisa kwace m’nkhondo kwamala kudziwiswa konsene kwene. Cincino kufudzwa kwace kwakumalisa kuli duzi. Na thangwi ineyi, Bibilya iri kudembetera anthu konsene kwene: “Lamukani, . . . siyani [Babiloni Wankulu]! Lekani kudawa tayu pabodzi na iye, towera mukhonde kuona nyatwa zinadzagwera iye! Thangwi Mulungu hadaduwala pyakuipa pyache tayu. Madawo ache awazika kufikira kudzulu!”—Chidziwiso 18:4, 5.

Kodi Babiloni Wankulu ndi ninji? Ndi makhaliro a uphemberi wa dziko yonsene yapantsi wakuti uli na maonekero akulandana na Babiloni wakale. (Chidziwiso, kapitulu 17 na 18) Dingani kulandana kungasi:

• Anyantsembe a Babiloni wakale akhadapipitisa kakamwe m’pinthu pya ndale ya dziko. Ipi ndi sawasawa na uphemberi uzinji lero.

• Kazinji kene anyantsembe a Babiloni aendesa kutsogolo nkhondo ya dziko. Kazinji kene uphemberi wa ntsiku zino usatsogolera ale anapasa nkhombo anyankhondo munaenda madziko kunkhondo.

• Pipfunziso na mabasa a Babiloni wakale pyapitisa dziko m’ulukwali ukulu kakamwe. Munapeusa atsogoleri a uphemberi midida ya Bibilya ya makhaliro adidi lero, ulukwali usakula pakati pa atsogoleri a uphemberi pabodzi na ale anatsogolerwa na iwo. Pyathema kuoniwambo kuti Chidziwiso cisafokotoza Babiloni Wankulu ninga hule thangwi iye asacita ulukwali na dziko na makhaliro ace a ndale.

• Bibilya isalongambo kuti Babiloni Wankulu ali “kudya upfumi.” M’Babiloni wakale, cigawiko ca templo cikhali na zunde ikulu, na anyantsembe adzakhala akulu m’mabasa a malonda. Lero, kusiyapo mbuto zakulambira, Babiloni Wankulu ndi mwanaciro wa mabasa makulu a malonda. Pipfunziso na mafiriyadu ace pisabweresa mpfuma ikulu kwa iye na kwa anyamalonda anango.

• Kuphatisira adzimunthu, masalapita na ufiti pikhali pyakudzoloereka m’Babiloni wakale, sawasawa ninga piri m’mbuto zizinji lero. Kufa kukhaoniwa ninga njira ya kuenda ku ntundu unango wa umaso. Babiloni akhadadzala na matemplo na mbuto zakuphembera towera kulemedza milungu yace, mbwenye Ababiloni akhapingiza alambiri a Yahova. Babiloni Wankulu asadziwika na pidzoloero na mabasa mabodzi ene.

M’midzidzi yakale, Yahova acitisa madziko a mphambvu m’ndale na m’nkhondo kulanga ale akhapitiriza na kukhonda kubvera iye pabodzi na cifuno cace. Natenepa, Samariya afudzwa na Aasirya m’740 A.E.C. Yerusalemu afudzwa na Ababiloni m’607 A.E.C. na Aroma m’70 E.C. Babiloni afudzwambo na Amedi na Apersiya m’539 A.E.C. M’ntsiku zathu, Bibilya isalongeratu kuti mautongi a ndale, ninga cirombo, anadzapomokera “hule” na anadzansiya cipezipezi, mbaikha makhaliro ace ene pakweca. Iwo anadzamfudziratu.—Chidziwiso 17:16, Tradução do Novo Mundo.

Kodi mautongi a dziko anadzacitadi pyenepi? Bibilya isalonga kuti ‘Mulungu anadzaikha pyenepi m’mitima mwawo.’ (Chidziwiso 17:17) Pinadzacitika m’njira yakucimbiza, yakudzidzimusa na yakupha ntima, tayu yakuoneka mwanyapantsi peno yakucitika pang’onopang’ono.

Kodi imwe musafunika kucitanji? Pibvunzeni: ‘Kodi ndisapitiriza na kuphata cigawiko ca uphemberi cakuipiswa na pipfunziso na mabasa pyakuti pisacidzindikirisa ninga nkhundu ya Babiloni Wankulu?’ Ngakhale kuti imwe simwe ciwalo caco, mungakwanise kupibvunza: ‘Kodi ndisatawirisa kuti nzimu waco undikhuye?’ Nzimu wa ntundu upi? Nzimu wakutawirisa makhaliro akuipa, wakufuna mpfuma zakumanungo na kupitsanzayisa mbuto mwakufuna Mulungu, peno kukhonda bvera mwanyakhomo (ngakhale m’pinthu pyakuoneka ninga ping’ono) Mafala a Yahova. Nyerezerani mwacidikhodikho ntawiro wanu.

Towera titawirike kwa Yahova, mphyakufunika kuti m’mabasa athu pabodzi na pifuno pya ntima wathu tipangize kuti mwandimomwene ife nkhabe cita khundu ya Babiloni Wankulu. Nkhabe nzidzi wakudembuka. M’kuticenjeza kuti kumala kunadzafika mwakudzidzimusa, Bibilya isalonga: “Sawasawa nzinda ukulu wa Babiloni unaponywa pantsi na mphambvu zonsene. Nkhabe munthu anauona pontho!”—Chidziwiso 18:21.

Mbwenye kunadzacitika pinango. M’khundu inango ya ‘nzidzi unoyu wakutonga miseru,’ Yahova Mulungu anadzatonga miseru na makhaliro a ndale ya dziko yonsene yapantsi, atongi awo na ale onsene anakhonda tsalakana kuthema kwa utongi wa Yahova Mulungu kubulukira ku Umambo wace wakudzulu udaikhwa m’manja mwa Yezu Kristu. (Chidziwiso 13:1, 2; 19:19-21) Masomphenya aciprofeta akulembwa pa Danyeli 2:20-45 asafokotoza utongi wa ndale kubulukira ku nzidzi wa Babiloni wakale mpaka nzidzi uno ninga dzimunthu ikulu yakucitwa na ndalama, siliva, nkuwa, utale na dongo. Profesiya yalongeratu pya ntsiku zathu: “Mulungu wakudzulu anadzaikha umambo wakuti cipo unadzafudzwa.” Pontho, Bibilya isalonga thangwi ya pire pinafuna kudzacita Umambo unoyu nkati mwa ‘nzidzi wakutonga miseru’ wa Yahova: “Iwo unadzanyedza mbumalisa maumambo awa onsene [akucitwa na anthu], na iwo ene unadzakhala m’nzidzi okhonda mala.”—Danyeli 2:44.

Bibilya isacenjeza alambiri andimomwene kuti akhonde ‘kufuna pyonsene pinapasa dziko’—njira ya umaso inakuliswa na dziko iyi yakuthawikira Mulungu wandimomwene. (1 Juwau 2:15-17) Kodi pinatonga imwe kucita pabodzi na mabasa anu pisapangiza kuti musaphedza mwakukwana Umambo wa Mulungu? Kodi musauikhadi pa mbuto yakutoma m’umaso wanu?—Mateyu 6:33; Juwau 17:16-18.

[Bokosi pa tsamba 14]

Kodi Kumala Kunadzafika Lini?

“Mwanamunthu anabwera ndzidzi unakhonda imwe kundikhira.”—Mateyu 24:44.

“Khalani akulindira thangwi imwe nkhabe dziwa ntsiku na nzidzi.”—Mateyu 25:13, NM.

“Nee anadzadembuka tayu.”—Habakuku 2:3.

[Bokosi pa tsamba 14]

Kodi Kudziwa Ntsiku Yakumalisa Mbukudacinja Umaso Wanu?

Khala musadziwadi kuti kutonga miseru kwaumulungu kunafuna kudza nee kunadzafika nkati mwa piaka pyakucepa kutsogolo, kodi pyenepi mbipidacinja makhaliro a umaso wanu? Khala kumala kwa makhaliro awa akale kwadembuka kupiringana nzidzi ukhadikhira imwe, kodi mwatawirisa kuti pyenepi pikudembukiseni m’kutumikira kwanu Yahova?—Aheberi 10:36-38.

Kukhonda dziwa nzidzi wakumala kusatipasa mwai wa kupangiza kuti tisatumikira Mulungu na ntima wakucena. Ale anadziwa Yahova asapidziwa kuti kupangiza phinga m’nzidzi wakucepa duzi kakamwe na kumala kwa makhaliro awa nkhabe kudzakomeresa Mulungu, ule anaona piri nkati mwa ntima.—Yeremia 17:10; Aheberi 4:13.

Ale anafunadi Yahova asamuikha nzidzi onsene pa mbuto yakutoma. Akristu andimomwene angakwanise kucita basa ya dziko ninga anthu anango. Mbwenye cifuno cawo ndi kugumana pinthu pyakumanungo pyakukwana na pyakuthimizira pang’ono towera kugawana na anango, tayu kukhala akupfuma. (Aefesu 4:28; 1 Timoti 6:7-12) Iwombo asatsanzaya na masenzekero na kucinja mabasa awo m’nzidzi wakucepa, mbwenye iwo asacita pyenepi towera kupuma, tayu kusangazira basi pinacita anthu onsene. (Marki 6:31; Aroma 12:2) Ninga Yezu Kristu, iwo asakomerwa na kucita cifuno ca Mulungu.—Masalimo 37:4; 40:8.

Akristu andimomwene asafuna kukhala maso na kutumikira Yahova kwenda na kwenda. Cidikhiro ceneci ciciri cakufunika maseze asafunika kudikhira m’nzidzi wakulapha pang’ono kupiringana ule ukadikhira iwo.

[Bokosi/Foto pa tsamba 15]

Cinthu Ca Utongi Ukulu

Kuti tidziwe thangwi yanji Mulungu asatawirisa kunenseka kukulu kakamwe, tisafunika kudziwa cinthu ca utongi ukulu. Kodi utongi ukulu ndi ninji? Ndi ukulu wa mphambvu.

Thangwi Yahova ndi Nciti, iye athema kutonga dziko yapantsi na onsene anakhala mwenemo. Mbwenye Bibilya isafokotoza kuti pakutoma kwa mbiri ya anthu utongi ukulu wa Yahova wapomokerwa. Satana Diyabu alonga kuti Yahova akhakhondesa pinthu, kuti Iye alonga unthawatawa kwa anyakubala athu akutoma thangwi ya pinthu pyakuti mbipidacitika iwo mbadasiya mwambo wa Mulungu mbacita pinthu m’njira yawo, na kuti mbukudakhaladi mwadidi kupitonga okhene mwakukhonda funa Mulungu.—Genesi, kapitulu 2 na 3.

Mulungu mbadafudza anyakupanduka ale m’nzidzi uneulene, pyenepi mbipidapangiza mphambvu yace, mbwenye nee mbipidamalisa cinthu cire cidasoswa. Mbuto mwakufudza anyakupanduka ale m’nzidzi uneule, Yahova atawirisa maanju na anthu kuona phindu ya upanduki. Maseze kutawirisa kweneko kusaphataniza pinenso, kwatipasa mwai wakuti tikwanise kubalwa.

Maseze pyamupha ntima, mwakufuna Yahova acita masasanyiro towera anthu ale anambvera pabodzi na kukhulupira ntsembe yakuombola ya Mwanace akwanise kusudzulwa ku madawo na pyakubwereswa pyace na kukhala maso m’Paradizu. Pingafunika, pyenepi pingakwanise kucitwa m’njira ya kulamusa kwa akufa.

Kusiya nzidzi kuti umalise cinthu ceneci kusapasambo atumiki a Mulungu mwai wakupangiza kuti iwo angakwanise kutawira kufuna kwa Mulungu na kupangiza umumphu wawo kwa Yahova pantsi pa makhaliro onsene. Kumalisa cinthu ca utongi ukulu waumulungu, pabodzi na pinango pyakuphatana na umumphu wa anthu, mphyakufunika towera mwambo na kudzulu na pantsi pilemedzwe mwakuthema. Mbuto mwa pyenepi, nkhabe kudzakhalapo ntendere wandimomwene.a

[Cidzindikiro capantsi]

[Foto]

Makhaliro a dziko yonsene a utongi wa ndale anadzamaliswa