Dyabo Ayesera Yezu

Pidamala Yezu kubatizwa, nzimu wakucena wancitisa kuenda n’thando. Iye nee adya cinthu mu ntsiku 40, natenepa akhali na njala kakamwe. Buluka penepo, Dyabo abwera dzayesera Yezu mbampanga: ‘Khala ndiwedi Mwana wa Mulungu, panga miyala iyi toera isanduke kudza mikate.’ Mbwenye Yezu antawira mukuphatisira Malemba. Iye alonga: ‘Pyalembwa kuti munthu nee asakhala m’maso na cakudya basi. Mbwenye asafunika kubvera mafala onsene anabuluka pamulomo wa Yahova.’

Buluka penepo, Dyabo ayesera pontho Yezu kaciwiri: ‘Khala ndiwedi Mwana wa Mulungu, numpha buluka padzulu pa templo. Thangwi pyalembwa kuti Mulungu anadzatuma aanju ace toera kukugampha.’ Mbwenye Yezu aphatisira pontho Malemba mbantawira: ‘Pyalembwa kuti nee usafunika kuyesera Yahova.’

Buluka penepo, Sathani ayesera Yezu kacitatu. Iye apangiza Yezu maumambo onsene a dziko na mpfuma na mbiri yawo mbalonga: ‘Ndinakupasa maumambo onsene awa na mbiri yawo ungandilambira kabodzi basi.’ Mbwenye Yezu antawira: ‘Coka Sathani! Thangwi pyalembwa kuti usafunika kulambira basi ene Yahova.’

Natenepa, Dyabo abuluka mbaenda. Aanju abwera mbapasa Yezu cakudya. Buluka penepo, Yezu atoma kumwaza mphangwa zadidi za Umambo. Ineyi ndi basa idadzera iye pa dziko yapantsi. Anthu akhakomerwa na pinthu pikhapfundzisa Yezu. Na thangwi ineyi, iwo akhantowera konsene kukhaenda iye.