BHIBHLYA ISACINJA UMASO WA ANTHU

Pikiro ya paradizu pa dziko yapantsi yacinja umaso wanga!

Pyalongwa Na Ivars Vigulis

CAKA CAKUBALWA: 1974

DZIKO YAKUBALWA: LETONYA

MBIRI YACE: NGOZWI YAKUCITA KHUNDU M’MAPIKA A MIDUDUDU

UMASO WANGA WAKALE: Ndabalwa mu cisa ca Riga, nzinda ukulu wa Letonya. Ine na m’bale wanga wankazi takuzwa na mai wathu. Ngakhale kuti mai ndi wa uphemberi wa Katolika, ife tikhaenda ku gereja basi ene pa ntsiku za mafiriyadu a mauphemberi. Ndzidzi onsene ndikhakhulupira mphambvu zikulu zakupiringana za munthu, mbwenye ninga mphale ndikhadzudzumika na pifuno pinango pizinji.

Pidakula ine, mai wanga adzindikira kuti ine ndiri na maluso akugudjula pinthu na kupisasanya pontho. Thangwi ya pinthu pizinji pikhali n’nyumba pyakuti mbandidapigudjula, ndzidzi onsene iwo akhagopa kundisiya ndekhene panyumba. Natenepa, iwo andipasa bokosi ya mafaramentu, kwakuti ndikhakomerwa kugudjula pinthu mbandipisasanya pontho. Mwapang’ono pang’ono, cifuno ceneci cadzaphatana na cifuno cinango cakufuna n’dududu. Mai wanga andilembesa ku mapika a midududu akhacemerwa Zelta Mopēds (The Golden Moped). Ndatoma mapika na midududu ming’ono, pontho mukupita kwa ndzidzi na midududu mikulu.

Ndapfundza mwakucimbiza, pontho mwakukhonda dembuka ndakhala wakupembera kakamwe m’mapika anewa akugoswa. M’maulendo matatu ndawina m’mapika akuthamangisana na midududu mu Letonya, pontho m’maulendo mawiri ndawina mapika ku Estados Bálticos.

BHIBHLYA YACINJA TANI UMASO WANGA: Cifupi na kumala kwa basa yanga ya mapika, mankhadzi wanga, Evija (wakuti mukupita kwa ndzidzi adzakhala nkazi wanga) apita n’cibverano na Mboni za Yahova. Iye agumana mabukhu anango a Mboni za Yahova, akuti akhali na mbuto toera kulemba na kuphemba pfundziro ya Bhibhlya. Iye alemba pa mbuto ineyi mbatumiza. Mwakukhonda dembuka, alongo awiri aenda kacedza na Evija, mbatoma kupfundza Bhibhlya. Pyenepi pikhali pyadidi kuna ine, mbwenye pa ndzidzi unoyu nee ndikhafuna pyauphemberi.

Mukupita kwa ndzidzi, Mboni za Yahova zandiphemba kuti ndigumanikembo pa pfundziro ya Evija toera kubvesera. Ndatawira phembo yawo, pontho ndakomerwa kakamwe na pidabva ine. Cinthu cibodzi cidakhuya kakamwe ntima wanga cikhali pikiro ya Bhibhlya inalonga pya paradizu pa dziko yapantsi. Mwacitsandzo, iwo andipangiza mphangwa pa Masalmo 37:10, isalonga kuti: “Thimize pang’ono anyakuipa [anadzafudzwa]; ungasaka kunakhala iwo, hunaaonabve tayu. Mbwenye anyakupfulika anakhala na dziko, mbakomerwa na ntendere ukulu kakamwe.” Mwandimomwene pikiro ineyi yandikhuya.

Kufuna kwanga pinthu pyauzimu kwapitiriza kukula. Ndatoma kudzindikira kuti pipfundziso pizinji pya mauphemberi mphyaunthawatawa. Mwakusiyana na pyenepi, pipfundziso pya Bhibhlya pyandikhuya kakamwe thangwi pikhali pyandimomwene na pyakubveka mwadidi.

Mukhapitiriza ine kupfundza Bhibhlya, ndadziwa kuti Yahova asapasa ntengo ukulu umaso, pontho umaso ndi wakufunika kakamwe kuna iye. (Sal. 36:9) Pyenepi pyakhuya kakamwe mapika akhacita ine, nee ndikhafunabve kuikha umaso wanga pa ngozwi. Mbuto mwace, ndikhafuna kuphatisira umaso wanga toera kupasa mbiri Yahova. Na thangwi ineyi, mbiri na kutsandzaya thangwi ya mapika a midududu nee pikhalibve pyakufunika kwa ine.

Mu caka 1996, ndaenda ku nsonkhano wa dziko yonsene yapantsi wa Mboni za Yahova mu nzinda wa Tallinn ku Estoniya, cifupi na mbuto ikhacitira ine mapika kazinji kene. Pa nsonkhano ndaona anthu akubuluka ku madziko akusiyana-siyana mbakhala pabodzi mwakubverana na mwantendere. Mwacitsandzo, mu ndzidzi wakuti mulongo m’bodzi ataikirwa na pasta yace, ndanyerezera kuti cipo mbadaiona pontho. Mwakukhonda dembuka, mulongo unango agumana pasta ineyi mbapasa mwanaciro na pinthu pyonsene pikhali mu pasta. Ndakhala wakudzumatirwa kakamwe! Cincino ndadziwa kuti Mboni za Yahova zisaphatisiradi midida yapadzulu ya Bhibhlya. Ine na Evija tapitiriza kuthambaruka m’mapfundziro athu, pontho mu caka 1997 tabatizwa ninga Mboni za Yahova.

NDAPHINDULA KAKAMWE: Axamwali anga anango afa thangwi yakuthamangisa kwawo midududu mbakhonda kutsalakana umaso. Kubulukira mu kupfundza Bhibhlya, ndadzabvesesa kuti ndisafunika kucita pinthu kuna Nyakupasa umaso, Yahova. Kubvesesa kweneku kwapulumusa umaso wanga.

Ine na Evija takhala na mwai wakutumikira pyaka pinai m’basa ya ndzidzi onsene pa ofesi ya filiali ya Mboni za Yahova ku Riga. Cincino tisatsandzaya mu kukuza mwana wathu wankazi, Alise, na kumphedza toera kukulisa ufuni wace na Yahova. Pontho, ndiri na mwai wakuphatisira ntsiku ibodzi pa sumana pa ofesi yakuthumburuzira mabukhu toera kusasanya miotokala na pinthu pinango pyakugudjuka. Pisanditsandzayisa kakamwe kuphatisira mwadidi maluso anga adakhala na ine mu uwana wanga! Mwandimomwene, ndisapitiriza kugudjula pinthu mbandipisasanya pontho.

Ine pabodzi na banja yanga tisakomerwa kakamwe na mwai wakupereka umboni unalonga pya Mulungu m’bodzi basi wandimomwene. Ndisapereka takhuta thangwi ya pinthu pidapfundza ine m’Bhibhlya. Mwandimomwene, pikiro ya paradizu pa dziko yapantsi yacinja umaso wanga!

[Ntsonga ikulu pa tsamba 31]

Ndadzabvesesa kuti ndisafunika kucita pinthu kuna Nyakupasa umaso