NSOLO WA REVISTA | KODI SATHANI ALIPODI?
Tisafunika Kugopa Sathani?
Monóxido ya carbono isanentsa toera kuidzindikira. Iyo nkhabe kore pontho nkhabe nunkha, mbwenye inakwanisa kupha munthu. Panango, azinji mwa anthu anafa thangwi ya venenu ndi thangwi ya monóxido ya carbono. Mbwenye nkhabe funika kugopa mwakupiringana midida. Pana njira toera kuidzindikira na kutsidzikiza umaso wanu. Anthu azinji asaikha cingalingali mbatowezera macenjezo aco onsene.
Ninga monóxido ya carbono, anthu nkhabe kwanisa kuona Sathani, mbwenye iye ndi wakugopswa kakamwe. Ngakhale tenepo, Mulungu nee asatisiya tekhene mwakusowa ciphedzo. Mungatowezera njira zinatowerera za ciphedzo cinapereka Mulungu, nee musafunika kugopa Sathani.
Ufulu wakusankhula. Pa Tyago 4:7 tisaleri: ‘Nyindirani Mulungu, mbwenye khondani Dyabo, penepo iye anadzathauka kwa imwe.’ Ngakhale kuti Sathani ndi wamphambvu, iye nkhabe kwanisa kukukakamizani toera kucita pinthu pinakhonda imwe funa. Imwe muli na ufulu wakusankhula. Pa 1 Pedro 5:9 Bhibhlya isalonga: ‘Khalani na cikhulupiro cakuwanga, mbamucokesa Dyabo na phinga.’ Kumbukani kuti Sathani asiya Yezu pidamala iye kukhonda mwakukwana mayesero ace matatu. (Mateo 4:11) Imwe munakwanisambo kusankhula kukhonda mayesero a Sathani.
Uxamwali na Mulungu. Lemba ya Tyago 4:8 isatiwangisa toera ‘kufendedzera Mulungu.’ Yahova asaticemera ekhene toera kucita uxamwali wapantima na iye. Munacita tani pyenepi? Njira yadidi kakamwe yakutoma nayo ndi kupfundza pizinji thangwi ya iye kubulukira m’Bhibhlya. (Jwau 17:3) Pinafuna imwe kupfundza thangwi ya Yahova pinakukulumizani toera kunfuna. Ufuni unoyu unadzakukulumizani toera kucita pinafuna iye. (1 Jwau 5:3) Munafendedzera imwe cifupi Babanu wakudzulu, kodi iye anadzacitanji? Lemba ya Tyago isapitiriza: “Mulungu anadzakufendezeranimbo.”
Pikiro ya citsidzikizo. Lemba ya Misangani 18:10 isalonga: ‘Dzina ya Yahova ndi mpanda wakuwanga. Munthu wa ulinganiri anathamangira mwenemu mbabvunulirwa.’ Mbwenye pyenepi nee pisabveka kuti dzina ya Mulungu ndi ninga cinthu cakupasa ncena wadidi. Mbuto mwace, pyenepi pisabveka kuti ale ananyindira mbalemedza dzina ya Mulungu, anakwanisa kuphemba citsidzikizo cace ndzidzi onsene.
Citsandzo ca anthu adaphedzeka. Lemba ya Machitiro 19:19 isatipanga pinthu pyakuwangisa thangwi ya anthu akhadamala kwene kutawira Cikristu ku Efeso: ‘Anango azinji akhadacita pya ung’anga abwerambo na mabukhu awo, mbaapisa pamaso pa anthu onsene. Ntengo wa mabukhu ale ukhali duzi na kobiri za prata pikwi makumaxanu.’ a Akristu anewa afudza pinthu pyonsene pikhacita khundu ya kukhulupira mizimu, mwakukhonda tsalakana ntengo wapyo. Citsandzo ceneci cinakwanisa kutiphedza kakamwe lero. Dziko ino yadzala na pya ung’anga na pyakukhulupira mizimu. Ngakhale pinthu pya mizimu pinaona ife ninga si pyakugopswa tayu, pinakwanisa kucemera mademonyo. Mphyadidi kakamwe kukhala kutali na pinthu pyenepi mu umaso wanu, mwakukhonda tsalakana khala mphyakunentsa kucita pyenepi.—Deuteronomyo 18:10-12.
Rogelio adalongwa mu nsolo wakutoma wa revista ino, mu pyaka 50 pyakutoma pya umaso wace nee akhatawira kuti Sathani alipo. Mbwenye iye adzadinga maonero ace. Thangwi yanji? Iye alonga: “Ukhali ulendo wakutoma mu umaso wanga kukhala na Bhibhlya. Cidziwiso ca Malemba candicitisa kutawira kuti Dyabo alipo. Cidziwiso cibodzi cene cincino cisanditsidzikiza toera kucalira kugwa m’manyengerero ace.”
Musafuna kuona ntsiku yakuti Sathani nee anadzaonekabve? Imwe munakwanisa! Bhibhlya isapikira ndzidzi wakuti Dyabo, ule ananyengeza anthu azinji lero ‘anadzaponywa n’djenje ya moto na safuli.’ (Apokalipse 20:10) Inde, moto wandimomwene na safuli nkhabe kwanisa kupisa munthu wauzimu wakukhonda kuoneka. Natenepa, djenje ya moto isaimirira kufudzwa kwa Sathani kwenda na kwenda. Sathani nkhabe kudzaonekabve. Unoyu unadzakhala ndzidzi wakutsandzayisa kakamwe!
Mbwenye mu ndzidzi uno, pitirizani kupfundza pyonsene pinakwanisa imwe thangwi ya Yahova na njira zace.b Nyerezerani kukhala pa ndzidzi wakuti mwandimomwene anthu anadzakwanisa kulonga: “Sathani nee alipo!”
[Pidzindikiro pyapantsi]
a Khala kobiri ineyi ya prata ikhali ya madenaryo a ku Roma, ntengo onsene mbudakhala ntsama ya kobiri ikhafuna kutambira anyabasa akukwana 50.000 pa ntsiku!
b Toera kudziwa pizinji thangwi ya Sathani na pya kukhulupira mizimu, onani nsolo 10 wa bukhu Kodi Mwandimomwene Biblya Isapfunzisanji? Phembani Mboni za Yahova toera akupaseni kopya ibodzi. Munakwanisa kuileri mu Interneti pa www.jw.org.
[Ntsonga ikulu pa tsamba 6]
“Cidziwiso ca Malemba candicitisa kutawira kuti Dyabo alipo. Cidziwiso cibodzi cene cincino cisanditsidzikiza toera kucalira kugwa m’manyengerero ace.”