Iye ‘Adziwa Njira’

GUY HOLLIS PIERCE, m’bodzi wa Mathubo Akutonga a Mboni za Yahova, amalisa basa yace pa dziko yapantsi n’Cipiri ntsiku 18 ya Murope ya caka 2014. Iye akhali na pyaka 79 pyakubalwa mudakwanirisa iye cidikhiro cace cakukhala m’bodzi wa abale a Kristu akulamuswa muli akufa.​—Aheb. 2:10-12; 1 Ped. 3:18.

Guy Pierce abalwa mu nzinda wa Auburn ku California E.U.A., pa ntsiku 6 ya Bingu ya caka 1934. Iye abatizwa mu caka 1955. Amanga banja na nkazace wakufunika, Penny mu caka 1977 mbakuza ana. Maluso ace ninga nyakubala amphedza toera kupangiza makhaliro ninga a baba. Mpaka mu caka 1982 iye na Penny akhatumikira ninga apainiya, mu caka 1986 iye atoma kutumikira ninga muyang’aniri wa cisa ku Estados Unidos mbamala pyaka 11.

Mu caka 1997, Guy Pierce na Penny atoma kutumikira ku Beteli ya ku Estados Unidos. M’bale Pierce aphata basa mu Ofesi ya Basa. Mu caka 1998 iye akhazikiswa ninga nyakuphedza wa Komiti ya Mathubo Akutonga Yakuyang’anira Atumiki. Kukhazikiswa kwa M’bale Pierce ninga m’bodzi wa Mathubo Akutonga kwadziwiswa pa nsonkhano wa caka wa Associação Torre de Vigia de Bíblias e Tratados de Pensilvânia udacitwa pa ntsiku 2 ya Malandalupya ya caka 1999. Mu pyaka pyacincino, iye atumikira mu komiti Yakuyang’anira Atumiki, Yakuyang’anira Basa Yakulemba, Yakuyang’anira Mabukhu, na ya Abveranisi.

Anthu a mbuto na a makhaliro akusiyana-siyana akhali akusudzuka toera kucedza na M’bale Pierce thangwi ya kumwetulira kwace kwaufuni na makhaliro ace akusekesa. Mbwenye makhaliro akutsandzayisa kakamwe adancitisa kukhala wakufunika kwa anango ndi ufuni wace, kucepeseka kwace, kulemedza kwace mitemo na midida yakulungama, na cikhulupiro cace cakuwanga kwa Yahova. Kwa M’bale Guy Pierce, kukwanirisika kwa mapikiro a Yahova kukhali ninga cinyindiro cakubuluka kwa dzuwa namacibese mwakukhonda phonya, pontho iye akhafuna kulonga pya cikhulupiro ceneci kwa anthu a madziko onsene.

M’bale Pierce atumikira Yahova mwakukhonda neta, iye akhabesera kakamwe, kazinji kene mbaphata basa mpaka namasiku kakamwe. Maulendo akhacita iye toera kuwangisa abale na alongo Acikristu, kwanfikisa m’mbuto zizinji pa dziko, maseze akhali wakuphatika kakamwe na mabasa, iye akhali na ndzidzi toera kucedza na munthu onsene wa banja ya Beteli na anango akhasaka uxamwali, ciphedzo, na uphungu wace. Ngakhale mudapita pyaka pizinji, abale na alongo akhapitiriza kukumbukira khodzo yace, uxamwali wace, na ciwangiso ca Bhibhlya cikhapereka iye.

M’bale wathu na xamwali wathu wakufunika asapitiriza kukumbukirwa na nkazace, anace atanthatu, kuphatanizambo adzukulu na adzukulukuluwe. Iye ali na ana auzimu akukhonda lengeseka. Nkhani yaciriro ca M’bale Pierce yacitwa na Mark Sanderson, m’bodzi wa Mathubo Akutonga ku Beteli ya Brooklyn n’Sabudu ntsiku 22 ya Murope ya caka 2014. Mwa pinthu pidafokotoza iye, alonga pya cidikhiro cakuenda kudzulu ca M’bale Pierce, mbaleri mafala a Yezu akuti: ‘N’nyumba mwa Babanga muna mbuto zizinji. . . . Ine ndiri kuenda kakusasanyirani mbuto yakukhala, ndingamala ndinadzabwera pontho, toera mukhalembo kunakhala ine. Imwe musadziwa kale njira ya kuenda kunaenda ine.’​—Jwau 14:2-4.

Mwandimomwene, tinadzakhala na citsuwo kakamwe na M’bale Pierce. Mbwenye tisakomerwa thangwi iye ‘adziwa njira’ ya kuenda ku mbuto yakukhala ‘kwenda na kwenda.’