Kukalamba Munjira Yadidi

KODI musapibva tani munganyerezera pya kukalamba? Anthu azinji asadzudzumika, kupswipa ntima, ngakhale kugopa. Pyenepi pisacitika thangwi kukalamba kusatowererwa na pinthu ninga kufewa manungo, kunyerezera mwakucepa na mautenda akukhonda mala.

Mwandimomwene, anthu asasiyana kakamwe mu ndzidzi unakalamba iwo. Anango asakalamba na ungumi wadidi, manungo na manyerezero adidi. Kuthambaruka kwa ukondzi kusaphedza anango kutsalakana mautenda akukhonda mala. Ninga maphindu, m’madziko anango anthu azinji asakhala maso na ungumi wadidi mu ndzidzi uzinji.

Ngakhale kuti mukuthimbana na pinentso pyakukalamba peno nkhabe, anthu azinji asafuna kukalamba munjira yadidi. Kodi pinakwanisika tani pyenepi? Mwandimomwene, pyenepi pisanyindira maonero athu, pifuno pyathu na maluso athu toera kudzolowera makhaliro mapswa mu umaso. Toera kutiphedza kucita pyenepi, tendeni tidinge midida mingasi yakuphata basa ya Bhibhlya.

KHALANI WAKUCEPESEKA: ‘Anyakucepeseka anapaswa udziwisi.’ (Misangani 11:2) Mafala akuti ‘anyakucepeseka’ anakwanisa kuphatisirwa kuna ankhalamba onsene akuti asadzindikira kuti nee anakwanisa kucita pinthu pyonsene pikhacita iwo kale, natenepa nkhabe funika kuakhonda peno kuapwaza. Charles wa ku Brazil wa pyaka 93 alonga: “Ungakhala pyaka pizinji, usakalamba. Nkhabe njira inango toera kubwerera pontho mphale peno ntsikana.”

Natenepa, kukhala akucepeseka nee pisabveka kukhala na maonero akuphonyeka, ninga akuti “Ndakalamba pontho ine nkhabebve basa.” Maonero anewa anakwanisa kufewesa phinga ya munthu onsene. Bukhu ya Misangani 24:10 isalonga: ‘Ungafewa pa ntsiku ya nyatwa, mphambvu zako zisacepa.’ Kusiyapo pyenepi, munthu wakucepeseka asapangiza udziwisi, mbakhala na maonero adidi mukucita pyonsene pinakwanisa iye.

Corrado wa ku Italya wa pyaka 77 alonga mwakulinganira kuti: “Mungatekenya motokala, mu ndzidzi unakwira imwe pa nthunda musacinja magiya toera motori ukhonde thima.” Inde, pisafunika kucita macinjo mu ndzidzi unakalamba munthu. Corrado na nkazace akulisa maonero adidi thangwi ya mabasa apanyumba, mbatowezera ndandanda yakuti isaaphedza toera kukhonda neta kakamwe pakumala kwa ntsiku. Marian wa ku Brazil wa pyaka 81 acepesambo mabasa ace mu ndzidzi unakalamba iye. Iye alonga: “Ndapfundza kukhonda cita pinthu mwakucimbiza. Pakucita basa ndisapuma pang’ono pingafunika. Ndisakhala pantsi toera kuleri peno kubvesera nyimbo. Ndapfundza kudzindikira kuti nee ndinakwanisa kucita pinthu pikhacita ine kale.”

KHALANI NA MAONERO AKULINGANIRA: ‘Akazi akhale na pyakubvala pyakuthema, pyakulemedzeka na andzeru zadidi.’ (1 Timoti 2:9) Fala yakuti ‘pyakubvala pyakuthema’ isabveka kukhala akulinganira na andzeru zadidi. Barbara wa ku Kanada wa pyaka 74 alonga: “Ndisayesera kukhala wakucena. Nee ndisafuna kukhala wakupswipa na maonero akuphonyeka thangwi ndine nkhalamba.” Fern wa ku Brazil wa pyaka 91 alonga: “Ndisagula nguwo zipswa toera kundicitisa kupibva mwadidi.” Ndiye tani amuna akukalamba? Antônio wa ku Brazil wa pyaka 73 alonga: “Ndisayesera kucita pinakwanisa ine toera kukhala ninga mphale, kubvala nguwo zakucena na zipswa.” Mukulonga pya unyai wa munthu paekha, iye athimiza: “Ndisasamba na kucinga ndebvu ntsiku zonsene.”

Munjira inango, mphyakufunika kucalira kudzudzumika kakamwe na maonekero anu mpaka kucimwana kupangiza ‘ndzeru zadidi.’ Bok-im wa ku Koreya Wakubangwe wa pyaka 69 ali na maonero akulinganira thangwi ya pyakubvala. Iye alonga: “Ndisadziwa mwadidi kuti nee ndisafunika kubvala nguwo zinango zikhabvala ine mbandiri ntsikana.”

KHALANI NA MAONERO ADIDI: ‘Nyakutcerenga, ntsiku zonsene kuli iye ntsakuthabuka, thangwi kusekera ndi cidzindikiro ca phwando yakukhonda kumala.’ (Misangani 15:15) Munakalamba imwe, panango munathimbana na mabvero akuphonyeka munganyerezera ndzidzi ukhakhala imwe na mphambvu za uphale peno utsikana na pinthu pikhakwanisa imwe kucita. Muli na mathangwi adidi. Mbwenye, wangisirani toera mukhonde kukundwa na mabvero anewa akuphonyeka. Kunyerezera pya nduli kunakwanisa kukufewesani manungo mu pinthu pinakwanisa imwe kucita. Joseph wa ku Kanada wa pyaka 79 asanyerezera mwadidi: “Ndisayesera kukomerwa kucita pinthu pinakwanisa ine, pontho nee ndisatsukwala ndingacimwana kucita pinthu pikhacita ine kale.”

Kuleri na kupfundza pinakwanisambo kukucitisani kupibva mwadidi mbamukhala na maonero mapswa. Natenepa, citani pyonsene pinakwanisa imwe toera kukhala na miyai ya kuleri na kupfundza pinthu pipswa. Ernesto wa ku Filipina wa pyaka 74 asaenda ku bibliyoteka toera kasaka mabukhu akufunika toera kuleri. Iye alonga, “Ndisapitiriza kutsandzaya na kucita maulendo mbuto mwakukhala panyumba mbandileri.” Lennart wa ku Suesya wa pyaka 75 acitambo basa yakunentsa kakamwe yakupfundza cilongero cipswa.

KHALANI WAKUPASA MWAKUDZALA MANJA: ‘Pasani anthu pinthu, tenepa munadzapaswambo.’ (Luka 6:38) Khalani na nsambo wakugawana ndzidzi wanu na pinthu pyanu na anango. Pyenepi pinakucitisani kukhala wakutsandzaya. Hosa wa ku Brazil wa pyaka 85 asawangisira kakamwe kuphedza anango mwakukhonda tsalakana ungumi wace wakunentsa. Iye alonga: “Ndisamenyera ntokodzi axamwali akuti ali kuduwala peno ali akufewa manungo na kualembera matsamba. M’midzidzi inango ndisaatumizira miyoni. Pontho ndisakomerwa na kuphika cakudya peno sopa toera kupasa anyakuduwala.”

Tingakhala akupasa mwakudzala manja, tisacitisambo anango kukhala akupasa. Jan wa ku Suesya wa pyaka 66 alonga: “Mungapangiza ufuni kwa anango, iwo anakufunanimbo na kukutsalakanani.” Inde, munthu wakupasa mwakudzala manja asakulisa makhaliro adidi, pontho anango asapereka takhuta mwakutsandzaya.

KHALANI WAUXAMWALI: ‘Munthu anafuna kusiyana na xamwali wace anasaka mathangwi, mbaipirwa na kulangiwa.’ (Misangani 18:1) Maseze pana midzidzi yakuti munafuna kukhala mwekha, calirani nsambo wakukhala panu mwekha. Innocent wa ku Nigeria wa pyaka 72, asakomerwa kukhala pabodzi na axamwali ace. “Ndisakomerwa kucedza na anthu a mathunga onsene.” Börje wa ku Suesya wa pyaka 85 alonga: “Ndisawangisira kakamwe kucedza na aphale na atsikana. Mphambvu zawo zisandicitisa kupibva ninga mphale, makamaka mu ntima.” M’midzidzi inango cemerani axamwali kunyumba kwanu. Han-sik wa ku Koreya Wakubangwe wa pyaka 72 alonga: “Ine na nkazanga tisakomerwa kucemera axamwali a mathunga onsene​—anyakugwesera na anag’ono​—toera kucedza peno kudya pabodzi.”

Anthu auxamwali asacedza. Mbwenye nakuti kucedza kusaphataniza kubvesera, musafunika kukhala nyakubvesera wadidi. Pangizani citsalakano kwa anango. Helena wa ku Mosambiki wa pyaka 71 alonga: “Ndiri na makhaliro auxamwali pontho ndisatsalakana anango mwacilemedzo. Ndisabvesera pinalonga iwo toera kudziwa pinanyerezera iwo na pinafuna iwo.” José wa ku Brazil wa pyaka 73 alonga: “Anthu asakomerwa angacedza na anyakubvesera adidi​—ale anabvera andzawo ntsisi na kupangiza citsalakano, ale anasimba andzawo mu ndzidzi wakuthema na akutsandzayisa anango.”

Munacedza imwe, mafala anu asafunika ‘kudzipa ninga aikhwa munyu.’ (Akolose 4:6) Khalani wakunyerezera mwadidi na wakuwangisa anango.

KHALANI WAKUPEREKA TAKHUTA: “Perekanimbo takhuta.” (Akolose 3:15) Mungatambira ciphedzo, perekani takhuta. Malongero akupereka takhuta asaphedza toera kukulisa uxamwali wadidi. Marie-Paule wa ku Kanada wa pyaka 74 alonga: “Ine na mamunanga tafuluka panyumba ikulu mbitienda panyumba ing’ono. Tikhali na axamwali azinji akuti akhatiphedza. Ife nee mbatidakwanisa kupereka kwace takhuta. Taalembera matsamba akupereka takhuta na kucemera anango mwa iwo toera kudzadya nawo pabodzi. Jae-won wa ku Koreya Wakubangwe wa pyaka 76, apereka takhuta kakamwe thangwi ya ciphedzo cidatambira iye toera kufika ku Nyumba ya Umambo. Iye alonga: “Ndikupereka takhuta kakamwe na ciphedzo ici consene cakuti candicitisa kupereka kobiri pang’ono toera kugula mafuta a motokala. Midzidzi inango ndisakhunganya miyoni yakucepa mbandilemba tsamba yakupereka takhuta.”

Kusiyapo pyonsene, perekani takhuta thangwi ya umaso. Mambo wandzeru Salomoni alonga, ‘Mwanambwa wa maso ngwadidi kupita nkhalamu yakufa.’ (Koelete 9:4) Inde, kukhala na maonero adidi pabodzi na cifuno ca kudzolowera umaso upswa, pinatiphedza kukalamba munjira yadidi.