Aphale Na Atsikana Anayetima Ninga Ceza
1 Yezu apanga anyakupfunzace: “Ndimwe cheza cha pantsi pano.” (Mat. 5:14, 16) Iwo mbadaonekera ninga nzinda wakukhala padzulu pa phiri mbuyetima na ceza ca dzuwa. Lero, aphale na atsikana azinji Acikristu ‘asayetima’ ninga ceza pa dziko yapantsi na makhaliro awo akulungama pabodzi na mphinga m’kupereka umboni.—Afil. 2:15; Mal. 3:18.
2 Ku Xikola: Kodi munapereka tani umboni ku xikola? Aphale na atsikana anango asaphatisira ntsonga zinapfunza iwo ninga mitombwe yakuledzeresa, kusanduka, na SIDA—zenezi ndi ntsonga zingasi basi. Mulongo mbodzi aphatisira basa idapaswa iye yakulonga pya uphanga towera kupereka umboni wa pya Umambo wa Mulungu ninga cidikhiro candimomwene ca anthu. Mpfunzisi akomerwa kakamwe na mphangwa zenezi zadidi, na pyenepi pyafungula njira towera kupereka umboni wakuthimizirika.
3 Njira inango yakuyetima ninga ceza ndi makhaliro anu, mabvaliro na makhunganyikiro anu akulinganira. (1 Akor. 4:9; 1 Tim. 2:9) Munaona anyakupfunza na apfunzisi kuti makhaliro anu ndi akusiyana, anango angafune kupfunza undimomwene ninga cakubwereswa na makhaliro anu adidi na pyenepi pisakupasani mwai wa kugawana na anango undimomwene wa Biblya. (1 Ped. 2:12; 3:1, 2) Kupangiza makhaliro aumulungu panango kungakhale kwakunensa, mbwenye Yahova anadzakupasani nkhombo zakuinjipa. (1 Ped. 3:16, 17; 4:14) Towera kucitisa anango kufuna mphangwa zadidi imwe mungakwanise kuleri mabukhu anabuluswa m’Biblya m’nzidzi wakupuma peno kuasiya pakweca.
4 Kusiya ceza canu kuyetima ku xikola kusawangisa cikhulupiro canu na kusakuphedzani kukhala wakurunkuma mwadidi ninga ntumiki wa Yahova. (Yer. 9:24) Pyenepi pisaphatambo basa ninga citsidzikizo. Mulongo mbodzi alonga: “Phindu ibodzi yakulonga pya cikhulupiro canga ndi yakuti anyakupfunza anzanga nkhabe yesera kundikakamiza towera kucita pinthu pyakuti nee pisabverana na pinalonga Biblya.”
5 Kuthimizira Utumiki: Njira inango yakuti aphale na atsikana azinji asayetima ninga ceza ndi kuthimizira utumiki wawo. Pakumala kupfunza mabukhu makulu, mbale mbodzi afuluka towera katumikira ku mbuto yakuti ikhali na kusowa kukulu kwa amwazi mphangwa a Umambo. Iye akhacita nkhundu ya mpingo ung’ono wakuti ukhali na nkulu mbodzi basi. Iye alembera xamwali wace: “Cincino ndiri wakutsanzaya kakamwe. Utumiki ndi wakukomeresa mwadidi kakamwe! Tisalonga cifupi na mphindi 20 pa nyumba ibodzi na ibodzi thangwi anthu asafuna kubva pyonsene pinalonga ife.” Iye athimizira: “Ndikhafuna kuti aphale na atsikana onsene acitembo cibodzibodzi na akomerwe na pinakomerwa na ine. Nkhabepo cinthu cadidi kupiringana kutumikira Yahova na pyonsene piri na ife.”
6 Tiri akurunkuma tani kuona imwe aphale na atsikana mbumuyetima ninga ceza ca dziko yapantsi! (1 Ates. 2:20) Munatumikira imwe Yahova na ntima wanu onsene, moyo, nzeru na mphambvu, munadzaphindula “ntsiku zino pinthu pyakuinjipibswa dzana . . . [mbamudzatambirambo] pa nthawi inafuna kudza, moyo wakukhonda mala.”—Mko. 10:29, 30; 12:30.
[Study Questions]
1. Kodi Biblya isapangiza kuti Akristu mbadadzaonekera tani, na mafala anewa asaphatisirwa tani kwa aphale na atsikana Acikristu lero?
2. Kodi ndi njira zipi zingasi zakuti mungakwanise kupereka umboni kwa apfunzisi na anzanu a ku xikola?
3. Kodi munakwanisa tani kuyetima ninga ceza ku xikola kubulukira ku makhaliro anu?
4. Kodi ndi api mangasi a maphindu a kupereka umboni ku xikola?
5. (a) Kodi aphale na atsikana anango asathimizira tani utumiki wawo? (b) Kodi pifuno pyanu pyauzimu ndi pipi?
6. Kodi musakomerwa na kuonanji kwa aphale na atsikana a m’mpingo mwanu?