Kubwerezera Kwa Xikola Ya Utumiki Wa Mulungu
Mabvunzo akutowerera anadzadingwa pa kubwerezera kwapamulomo pa Xikola Ya Utumiki Wa Mulungu nkati mwa sumana inatoma pa 27 ya nthanda ya Madzalo ya 2006. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana ya 2 ya nthanda ya Thongwe mpaka sumana ya 27 ya nthanda ya Madzalo ya 2006. [Cidzindikiro: Pangasoweka mithonyeso peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]
LUSO YA KULONGA
1. Kodi ndi m’njira zipi Xikola Ya Utumiki Wa Mulungu isatiphedza ‘kupereka kuna Mulungu ntsembe ya kunsimba na kubvekesa mbiri ya dzina yace’? (Aheb. 3:15) [1, be tsa. 5 ndima 3–tsa. 6 ndima 1] Xikola isatipangiza njira yakuphatisira mwadidi ntukwa wakulonga udapaswa ife na Mulungu. Cipfunziso cinatambira ife cisatiphedza kusakulira luso yadidi ninga kubvesera na kukumbuka, kupfunza, kudinga, kuyang’anisisa na kupamba, kuceza, kutawira mabvunzo, na kulemba manyerezero athu. Nakuti phata ya xikola ineyi ndi Biblya, tisapfunzambo kunyerezera pinanyerezera Mulungu.
2. Thangwi yanji tisafunika kuwangisira kuleri mwakulinganira? [2, be tsa. 83 ndima 1–tsa. 84 ndima 1] Kuleri mwakulinganira ndi khundu yakufunika ya kulonga cidziwiso candimomwene ca Biblya, pina ninga Mboni za Yahova, tisafuna kucita mwadidi kupitawirira kweneku. (1 Tim. 2:4) Nakuti Mafala a Mulungu “mba a moyo kakamwe, mbakuchita pinabveka awo [‘anamphambvu,’ Mphangwa Zadidi]” na ana cidziwiso cakufunika cinatsogolera ku umaso okhonda mala, cifuno cathu cisafunika kukhala ca kuleri mwadidi mwakubverana na pinakwanisa ife. (Aheb. 4:12; Sal. 119:140; Yer. 26:2)
3. Munalonga ife na kupfunzisa, thangwi yanji kulonga mwakubveka mwadidi ndi kwakufunika kakamwe? [4, be tsa. 86 ndima 1-6] Tingakhonda longa mwakubveka mwadidi, pizinji pinalonga ife pingakwanise kuluzika. Mwakuthimizira, anthu hanadzakulumizika tayu kucita pinthu khala mafala athu mbakukhonda dzindikirika peno mbakukhonda bveka. (1 Akor. 14:8, 9) Tingalonga mwakucimbiza kakamwe, kugumanyiza mafala pabodzi, kunumpha mapindi a mafala, peno kugwanda malemba akumalisa a mafala, pyenepi pinadzadodomesa cipfunziso cathu.
4. Thangwi yanji kulonga mwakutowezeka ndi kwakufunika, na ndi pinthu pipi pinafunika kunyerezerwa? [6, be tsa. 89 ndima 1–tsa. 90 ndima 3, bokosi] Kulonga mwadidi kusalemedza mphangwa za Umambo zinamwaza ife. Kusacitisa kuti abveseri aikhe manyerezero awo ku undimomwene wa Biblya unaapangiza ife mbuto mwa kuyang’ana madodo m’kulonga kwathu. Kusasanyira kulonga kwathu kusaphataniza (1) kuphatisira mwadidi fala towera kubvekesa mafala, (2) kubvekesa mwadidi phindi ya fala inafuna kugomezerwa na (3) kutsalakana mwadidi pidzindikiro pya malembero.
5. Kodi ndi pinthu pipi pinatiphedza kulonga mokhonda dodoma pa kuceza? [9, be tsa. 94 ndima 4-5, bokosi] Tinadzakhala akulonga mokhonda dodoma tingawangisira kakamwe kuthimizira mafala anadziwa ife m’kuphatisira disionaryo towera kuona mafala acilendo. Tinalonga mokhonda dodoma tingatoma nyerezera mbatisati kulonga. Tisafunika kupfunza kutoma nyerezera pinafuna ife kulonga na buluka penepo tilonge mafraze amumphu mokhonda bwerezera-bwerezera na kulimira m’mbuto zokhonda funika.
NKHANI N.° 1
6. Kodi 2 Pya dziko ya Israele [Mbiri] 36:17-23 asapangiza tani kunyindirika kwa profesiya ya Biblya? [2, si tsa. 84 ndima 35] Mafala a Esdra anagumanika pa 2 Pya dziko ya Israele 36:21 asapangiza kuti pidalongeratu Yeremiya pa Yeremiya 25:12 na 29:10 (Tradução do Novo Mundo) pyacitika. Mwakuthimizira, mafala a Esdra asapangiza kuti piaka 70 pya kufudzwa pisalengeswa kubulukira pa nzidzi ‘udakwatwa anthu onsene adasala mbaenda ku Babilonya’ pa “nthanda yachinomwe” ya caka ca 607 A.E.C. mpaka kubwerera kwa Ayuda ku mudzi kwawo pa “nthanda yachinomwe” ya caka ca 537 A.E.C. (2 Am. 25:25, 26; Esd. 3:1)
7. Kodi ndi kutowererana kupi kwa pyakucitika kudacitisa kuti Ayuda akwanise kubwerera ku mudzi kwawo m’caka ca 537 A.E.C. towera akamange papswa nyumba ya Yahova? [3, si tsa. 85 ndima 1-3] Babilonya afudzwa m’caka ca 539 A.E.C. na Siro wa ku Persya, ‘ntongi [‘nkumbizi,’ NM ]’ na ‘nyakusankhulwa [‘nyakudzodzwa,’ NM ]’ wa Yahova. (Iza. 44:28; 45:1) M’kukhonda matongero a Babilonya akuti cipo akhasudzula anyakumangwa ace, Siro aikha ntemo wakuti Ayuda abwerere ku Yerusalemu.
8. Kodi bukhu ya Esdra isapangiza tani kuti Yahova ndi Mulungu wandimomwene na isawangisa tani cinyindiro kwa iye? [4, si tsa. 87 ndima 14, 18] Bukhu ya Esdra isagomezera undendemeri okhonda dodoma wa mafala aciprofesiya a Yahova adalongwa na Yeremiya thangwi ya kufudzwa na kumangwa papswa kwa Yerusalemu. (Yer. 29:10, NM ) Isapangiza kuti Yahova akwanirisa mafalace m’nzidzi udalongerwatu. Kubwerera kwa Ayuda ku mudzi kwawo kwawangisa cidikhiro cakuti m’nzidzi wakuthema Yahova mbadabweresa Mambo wace wakupikirwa m’nzera wa Davide. (2 Sam. 7:12, 13)
9. Thangwi yanji “chaka chamakumawiri cha utongi wa Artaksersi” ndi cakufunika m’pyakucitika pya Biblya? (Neh. 2:1, 5, 6, 11, 17, 18) [5, si tsa. 88 ndima 2, 5] Caka ceneci (455 A.E.C.) ca kumangwa papswa kwa Yerusalemu na malinga ace ndi nzidzi wakufunika mwakubverana na kudza kwa Mesiya. Piaka makumatanthatu na pipfemba kanomwe, peno piaka 483, pidatoma m’caka ca 455 A.E.C. mbipidaenda mpaka caka ca 29 E.C., caka cidadzodzwa Yezu. (Dan. 9:24-27; Luka 3:1-3, 23)
10. Thangwi yanji Nehemiya ndi citsanzo cadidi kwa anzakazi a Mulungu lero? [8, si tsa. 90 ndima 16-17] Kuperekeka kwaumulungu kukhali pa mbuto yakutoma m’umaso wa Nehemiya. Iye akhatawira kusiya ciimiriro capadzulu m’dziko thangwi ya mwai wa basa ya Mulungu. (Neh. 2:17, 18) Iye akhatowerera mwacipapo pinthu pyakulungama ngakhale pakuthimbana na ngobzi. (Neh. 4:8 [4:14, NM ]) Iye hadaphatisira ciimiriro cace ku phindu yace tayu. Iye akhondesa kusaka mpfuma. (Neh. 5:14) Iye apangiza cifuno ca kuwangisa cikhulupiro ca alambiri a Yahova na, pabodzi na Esdra, awangisira kufokotozera mbumba Mafala a Mulungu mwapakweca. (Neh. 8:8, 9)
KULERI BIBLYA KWA SUMANA NA SUMANA
11. Kodi Ayuda akhali na Urimi na Tumimi, wakuti ukhaphatisirwa pa kuphemba ntawiro kwa Yahova, mudabwerera iwo ku dziko kwawo kubulukira ku ubitcu? (Esdra 2:61-63) Malemba nkhabe longa pyakuphatisira Urimi na Tumimi m’nzidzi uneule peno kutsogolo kwace. Mwakubverana na mwambo Waciyuda, Urimi na Tumimi pyatayika mudafudzwa nyumba ya Mulungu m’caka ca 607 A.E.C. [3, w06 15/1 “A Palavra de Jeová é Viva—Destaques do livro de Esdras”; w86 15/1 tsa. 8]
12. Thangwi yanji Ayuda azinji m’Babilonya anyinyirika kubwerera ku Yerusalemu pabodzi na Esdra? (Esdra 7:28–8:20) Kubwerera ku Yerusalemu kukhabveka kutoma umaso upswa pantsi pa makhaliro angobzi na akukhonda khazikika. Yerusalemu wa ntsiku zenezire nee akhali na pinthu pyakumanungo pyakutundusa Ayuda akuti panango akhathambaruka ku Babilonya. Pontho, ulendo wakubwerera ukhali wangobzi. Ale adabwerera akhafunika kukhala na cikhulupiro cakuwanga kwa Yahova, kukhala na phinga ya ulambiri wandimomwene na cipapo towera kufuluka. [4, w06 15/1 “A Palavra de Jeová é Viva—Destaques do livro de Esdras”; it-2 tsa. 13 ndima 6]
13. Kodi basa yakumanga malinga mbidacitwa tani na dzanja ibodzi basi? (Neh. 4:11, 12 [4:17, 18, NM]) Anyakuthuka mitolo mbadakwanisa kuiphatirira pa misolo peno pa mapewa pawo na dzanja ibodzi mokhonda nensa ‘mbakaphatira cida na dzanja inango.’ Anyakumanga akuti akhafuna manja mawiri towera kucita basa ‘akhali na talasada nchuno.’ Iwo akhali dzololo towera kumenya nkhondo pakukutirwa na anyamalwa awo. [5, w06 1/2 “A Palavra de Jeová é Viva—Destaques do livro de Neemias”; w86 15/2 tsa. 25]
14. Nakuti kazinji kene matsamba acibisobiso akhaikhwa m’budu yakufungwa, thangwi yanji Sambalate atumizira Nehemiya ‘tsamba yakufungulwa’? (Neh. 6:5) Panango Sambalate akhafuna kuikha pakweca upambiziri waunthawatawa ukhali m’tsamba ineire yakufungulwa. Panango akhanyerezera kuti pyenepi mbipidacitisa Nehemiya kuipirwa kakamwe mpaka kusiya basa yakumanga towera abvunulirike. Peno Sambalate akhanyerezera kuti mphangwa za m’tsamba mbizidagopesambo Ayuda mbasiya basa yawo yonsene. Nehemiya akhonda kuthuswa na apitiriza na basa idapaswa iye na Mulungu mokhonda dzudzumika. [6, w06 1/2 “A Palavra de Jeová é Viva—Destaques do livro de Neemias”; it-1 tsa. 453 ndima 11]
15. Kusiyapo ‘kusandika’ Ayuda akuti nee akhacita basa yawo, ninga mudasandika iye atsogoleri na akulu, kodi ndi midida ipi inango yakusandika idaphatisira Nehemiya? (Neh. 13:25, 28) Nehemiya ‘aaonesa nyatwa,’ nkhubveka kuti iye aatcululira matongero anagumanika m’Mwambo wa Mulungu. Anango ‘aamenya,’ panango m’kuphemba kuti akwapulwe mwakubverana na ntemo wa mwambo. Ninga cidzindikiro ca nzimu wakuipirwa, iye ‘aadula tsisi.’ Iye athamangisambo ndzukulu wa Nyantsembe Wankulu Elyakibu wakuti akhadasemba mwana wankazi wa Sambalate, wa ku Horoni. [8, w06 1/2 “A Palavra de Jeová é Viva—Destaques do livro de Neemias”; it-3 tsa. 76 ndima 9]