Ciphedzo Cakugumanika Mokhonda Nensa
1 Anna, mulongo wakuti mamunace si Mboni tayu, na wakukhala na basa yakukhonda kumpasa nzidzi, anenserwa towera kugumanika pa misonkhano Yacikristu mokhonda phonya, kucita khundu m’kumwaza mphangwa na kupfunza Mafala a Mulungu. Maseze akhapitiriza kufuna Yahova, iye alimira kumwaza mphangwa. Mwakukomeresa, iye atambira ciphedzo cauzimu cakubulukira kwa akulu ampingo akutsalakana.
2 Kutambira ciphedzo cauzimu cinaperekwa kubulukira ku mpingo Wacikristu kusapangiza cinyindiro kwa Yahova. M’kusangizira citsalakano cakufuna ca Yezu Kristu, akulu ampingo asasaka miyai ya kupasa ciwangiso na ciphedzo cakuphata basa kwa anthu anathimbana na nyatwa zauzimu. (1 Ates. 5:14) Kazinji kene, kusimba na kulonga basi mafala akuwangisa akubulukira m’Malemba pingakhale pyakukwana. Kutoma kucita pinthu towera kuphedza anthu anagumanika m’nzidzi wakucepa m’makhaliro akufewa ndi basa yakucitwa na Akristu onsene, tayu na akulu ampingo basi. Mwakukhonda penula mbodzi na mbodzi wa ife aona undimomwene wa mphambvu wa ‘mafala adidi akulongwa pa nzidzi wakufunika.’—Mis. 25:11; Iza. 35:3, 4.
3 Kutoma Kucita Pinthu: Kupangiza kutsalakana kwakufuna kwa ale anafuna ciphedzo kusatiphemba kutoma kucita pinthu, kupangiza kubvera ntsisi na kukhala akhakama. Mudadziwa Jonatani makhaliro akutsukwalisa a Davide, iye “aenda kweneko [ku Horesa] kaonana naye mbampasa chipapo.” (1 Sam. 23:15, 16) Phedzani anango m’njira yantsisi. Mafala akukulumizwa na citsalakano candimomwene ali na maphindu adidi kakamwe. Mwakuthimizira, Yezu alonga nsangani wapakweca unapangiza kufunika kwa kuwangisira na cifuno cadidi towera kuwina pontho mbale peno mulongo wauzimu. (Luka 15:4) Kukhala na cifuno cikulu ca kuphedza munthu unango kunadzatikulumiza kupirira m’kumpasa ciphedzo ngakhale kuti kuenda kwace kutsogolo ndi ninga kwa nyakatendewa.
4 Ndi kwakuwangisa tani kutoma kucita pinthu towera kucemerera anango, ninga ale ali pa pfunziro yathu ya bukhu, kuti aende na ife m’utumiki! Munaphedza ife nzakazi nzathu wa Yahova kuti apitirize na utumiki, tingakwanise kubanza mwai towera kumuwangisa. Midzidzi ineyi yakutsanzayisa inabvunga ife pabodzi m’basa ya Yahova isawangisa kakamwe ale anafuna kuwina pontho uzimu wawo.
5 Masasanyiro Akufuna: Adasiya kumwaza mphangwa peno kugumanyikana na mpingo m’nzidzi ungasi panango angafune ciphedzo cakuthimizirika towera kuwangisa cikhulupiro cawo. Panango pinafuna iwo ndi kucitirwa pfunziro ya Biblya m’kuphatisira bukhu yakuti Adore o Único Deus Verdadeiro, Achegue-se a Jeová, peno Kodi Mwandimomwene Biblya Isapfunzisanji? Nakuti munthu unoyu ndi wakubatizwa, kazinji kene pfunziro nee isafunika kupitiriza m’nzidzi wakulapha tayu. Nsoka Wakuyang’anira Basa m’Mpingo usafunika kukhala maso towera kuona kuti mbani angakwanise kuphindula na masasanyiro anewa.—Onani Perguntas Respondidas m’Nosso Ministério do Reino wa Novembro de 1998 na wa Novembro de 2000.
6 Anna, adalongwa pa ndima yakutoma, atawira na ntima onsene ciphedzo cidaperekwa na akulu ampingo cakuti acitirwe pfunziro ya Biblya na mulongo wakukola mwauzimu. Pfunziro yace yacitwa kanai basi towera kumphedza kufendedzera pontho duzi kwa Yahova. Iye atoma pontho kugumanika pa misonkhano yampingo na akhala pontho na cifuno ca kukuza Yahova Mulungu pakweca. Mulongo unoyu wakukola mwauzimu amphedzambo m’utumiki m’kuenda na iye ku mapfunziro ace a Biblya mpaka Anna kukhala wakuwanga towera kuenda kamwaza mphangwa nyumba na nyumba. Anna akhafuna ciphedzo cantsisi towera kubwerera pontho m’mabasa ace auzimu!
7 Kuwangisa anthu anafuna ciphedzo kusabweresa nkhombo kwa onsene. Ule anaphedzwa asakomerwa na mwai wa kufendedzera duzi kwa Yahova na kucita khundu m’mabasa a gulu Yace. Akulu ampingo asakomerwa m’kuona kuenda kutsogolo kweneku kwauzimu. (Luka 15:5, 6) Piwalo pya mpingo pisakhala na uxamwali wakuphatana munapangiza iwo kufunana unango na nzace. (Akol. 3:12-14) Tiri na mathangwi adidi tani a kusangizira Yahova, ciphedzo cinagumanika mokhonda nensa!—Aef. 5:1.
[Study Questions]
1. Kodi ndi ninji cinafewesa anthu anango mwauzimu?
2. Kodi ndi m’njira ipi Akristu onsene angakwanise kukhala ciphedzo cinagumanika mokhonda nensa?
3, 4. Kodi ndi ninji pinaphatanizwa m’kuphedza anango, na tinakwanisa tani kucita pyenepi?
5. M’makhaliro anango, kodi akulu ampingo angakwanise kupereka ciphedzo canji?
6. Kodi mulongo unango awina tani pontho mphambvu yauzimu?
7. Kodi ndi maphindu api anabwereswa m’kuphedza kwathu anango mwauzimu?