Kubwerezera Kwa Xikola Ya Utumiki Wa Mulungu
Mabvunzo akutowerera anadzadingwa pa kubwerezera kwapamulomo pa Xikola Ya Utumiki Wa Mulungu nkati mwa sumana inatoma pa 24 ya nthanda ya Bwinja ya 2006. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana ya 6 ya nthanda ya Murope mpaka sumana ya 24 ya nthanda ya Bwinja ya 2006. [Cidzindikiro: Pangasoweka mithonyeso peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]
LUSO YA KULONGA
1. Munapfunzisa ife, thangwi yanji tisafunika kupuma munacinja ife nyerezero, mbwenye ndi ninji cingakwanise kuticimwanisa kucita pyenepi? [2, be tsa. 98 ndima 2-3] Tingapuma tisapasa abveseri mwai wa kunyerezera, kucinja nzeru zawo na kudzindikira kuti tacinja nyerezero ikhalonga ife. Kupuma kusacitisa kuti ntsonga zikulu zigomezerwe, zibveseswe na zikumbukirwe. Thangwi ibodzi inacitisa akambi nkhani anango kuthamanga kubuluka pa ntsonga ibodzi kuenda pa inango mokhonda puma ndi kufuna kulonga pinthu pizinji.
2. Thangwi yanji kupuma ndi kwakufunika munapereka ife umboni kwa anango? [3, be tsa. 99 ndima 5–tsa. 100 ndima 3] Kupuma kusalungamisa luso yathu ya kulonga na kusaphindulisa utumiki wathu. Kusacitisa mwanaciro nyumba kulonga manyerezero ace, akuti asamuwangisa kunyerezera. Kuphatisira kwathu mwanzeru kupuma kungakwanise kucitisa munthu kulonga piri m’ntima mwace, natenepa mbitikwanisa kumphedza mwadidi. (Mis. 20:5)
3. Thangwi yanji kugomezera mwadidi nyerezero ndi kwakufunika munakamba ife nkhani, na tinakwanisa tani kugomezera mwadidi nyerezero? [4, be tsa. 101 ndima 1-5, bokosi] Munagomezera ife mwadidi ntsonga na mafala akufunika, tisacitisa abveseri athu kuteya makutu munayesera ife kuatundusa na kuawangisa kucita pinthu. Tingakwanise kugomezera ntsonga m’kugaluza fala yathu, m’kupangiza mphambvu ikulu ya mabvero, m’kukhonda thamanga pakulonga, m’kupuma, m’kuphatisira majesto, maonekero a nkhope na kucinja malongero athu. Towera kugomezera mwadidi nyerezero, tisafunika kubvesesa mwadidi mphangwa zinafuna ife kulonga na kukhala akufunisisa kuti abveseri athu akoye na aphatisire pinabva iwo. (Neh. 8:8)
4. Kodi tinakwanisa tani kugomezera ntsonga zakufunika munaleri ife pa mwinji? [6, be tsa. 105 ndima 1-6] Mbitisati kutoma kuleri tisafunika kukhala na ntsonga zakufunika m’manyerezero. Pyenepi pinadzatiphedza kudziwa kuti ndi ntsonga zipi zinafunika kugomezerwa. Munaleri ife mabukhu mwakugaluza pa pfunziro ya Biblya peno pa nsonkhano, tisafunika kugomezera ntawiro na ntsonga zinabverana na misolo ing’ono yakupswipa.
5. Thangwi yanji kugaluza mwadidi fala ndi kwakufunika munapfunzisa ife, na tinakwanisa tani kudziwa khala tisafunika kugaluza peno kuthowesa fala? [7, be tsa. 107-8] Khala anango nkhabe kutibva mwadidi, manyerezero awo angakwanise kunyerezera pinango na ntengo wa pinalonga ife ungakwanise kuluzika. Natenepa tinacimwana kucitisa abveseri athu kucita pinthu mwakubverana na pinabva iwo. Makhaliro a abveseri ndi cipangizo cadidi towera kuona khala mafala athu akubveka mwadidi peno nkhabe. Tingaona kuti abveseri athu nee ali kubva mwadidi pinalonga ife, tisafunika kugaluza fala yathu. Kuinjipa na makhaliro a abveseri athu na pyakudzudzumisa pinango ninga dzumbi pingakwanise kutonga khala tisafunika kugaluza peno kuthowesa fala.
NKHANI N.° 1
6. Kodi alandana tani makhaliro a Akristu lero na makhaliro a Estere na Mordekai, na tinakwanisa tani kusangizira citsanzo cawo? [1, si tsa. 94 ndima 17] Ninga Estere na Mordekai, Akristu lero ali pantsi pa “anyapidzo” m’dziko yakuipa na asawangisira kukhala anthu akubvera mwambo, ‘mbapasa Sezari pyache, mbapasambo Mulungu pyache Mulungu.’ (Arom. 13:1; Luka 20:25; Estere 1:1; 2:5, 7, 8, 21-23) Mbwenye Akristu asafunika kudzindikira kuti kubvera atongi a dziko kuli na madire kungalandaniswa na cifuno ca Mulungu, tenepa ninga Mordekai apangiza m’kukhonda bvera ntemo wa mambo wa kugodamira Amani wa ku Agage. (Estere 3:1-4; 5:9) Pingafunika, Akristu angakwanisembo kusaka kusudzuka ku nyatwa mwakubverana na mwambo. (Estere 4:6-8; Mach. 25:11)
7. Kodi Salomoni akhafuna kulonganji mudalonga iye kuti ‘pyonsene mphyapezi ninga kuthamangira mphepo’? (Koel. [Mlal.] 2:11) [3, w04 15/10 tsa. 4 ndima 3-4] M’nyerezero ineyi, Salomoni akhalonga pya umaso unaikha pa mbuto yakutoma pyakutsanzayisa na kugumanyiza pinthu pyonsene pyakumanungo pinapereka dziko m’njira yaunyama. Salomoni amanga zinyumba na akakhala na minda ya maluwa, matapada, mabitcu, pifuyo, parata, na ndalama. Iye akhalimbo na anyakuimba. Mbwenye, pyenepi nee pikhali pya ntengo wakukhaliratu tayu pontho nee pikhampasa nyerezero ya kutsanzaya kwa kwenda na kwenda. (Koel. 2:1-10) Pakumalisira iye aona kuti kutsanzaya kwa kwenda na kwenda kusabwereswa na kusaka pinthu pyauzimu. (Koel. 12:13)
8. Kodi tinakwanisa tani kukulisa kufuna Mulungu? (Mko. 12:30) [5, w04 1/3 tsa. 19-21] Tingakwanise kukulisa kufuna Mulungu m’kuthimizira kundziwa kwathu na kudziwa cifuniro cace kubulukira ku pfunziro ya Mafalace, Biblya. Tingakwanisembo kunyerezera mabasa ace na kuona kuti tinaphatisira tani pinapfunza ife. (Sal. 77:6, 11, 12) Kukumbuka pinthu pyadidi pinaticitikira munatumikira ife Yahova na maphindu adidi anabwera thangwi ya kucita pinthu m’njira ineyi kungakwanisembo kuwangisa kunfuna kwathu. (Mis. 3:5, 6)
9. Kodi pali na kusiyana kwanji pakati pa kufunika kwa pinthu pyauzimu na pyakumanungo? [6, w04 15/10 tsa. 5-7] Kusaka pinthu pyauzimu kusatsogolera ku utsanzayi na nkhombo zakukhonda mala, mbwenye kufuna pfuma kusatsogolera ku utsanzayi wa nzidzi wakucepa mbukubweresa kufa. (Mis. 11:4; Mat. 5:3; 2 Akor. 4:18) Kazinji kene kufuna mpfuma kusacitisa anthu kusaka uthambaruki, ciimiriro na mphambvu kubulukira m’njira zakukhonda dziwika peno zakukhondaona ntima, mbwenye kusaka pifuno pyauzimu kusacitisa munthu kukhala na nyerezero yakufuna kupasa mbuto mwa kutambira basi. (Iza. 48:18; 1 Tim. 6:9, 10)
10. Kodi ndi ninji cingakwanise kutiphedza kubvesera pa misonkhano ya cisa na ya gawo mokhonda dzudzumisika? [7, be tsa. 15-16] Cinthu cibodzi cakufunika kakamwe ndi kugona mwadidi namasiku towera tikwanise kubvesera. Tisafunika kukoya mwadidi nsolo wa ntsiku m’manyerezero, kuona nsolo wa khundu ibodzi na ibodzi ya ndandanda, na kuyesera kunyerezera mwanyapantsi pinafuna kulongwa m’nkhani zenezi. Kulemba ntsonga kungakwanisembo kutiphedza kudziwa cifuno ca nkhani na kuikha manyerezero athu ku ndandanda.
KULERI BIBLYA KWA SUMANA NA SUMANA
11. Thangwi yanji Amani aphimbirwa nkhope? (Estere 7:8) Amani hadaphimbira nkhope yace thangwi ya manyadzo peno kutcinyuka tayu. Anyabasa a thando yakutonga miseru aphimbira nkhope yace, panango towera kumpasa manyadzo peno kuntonga. Panango ineyi ikhali thanyo yakutoma towera kutonga munthu kufa. [1, w86 15/3 tsa. 25]
12. Kodi ndi cakucitwa cauzimu ca ntundu wanji cidatsogolera manyerezero a Elifaze? (Yobe 4:15, 16) [2, w05 15/9 tsa. 26 ndima 2] Malongero akupokanya a Elifaze asapangiza kuti mwandimomwene cakucitwa cauzimu ceneci nee cikhali cibodzi ca aanju akulungama a Mulungu tayu. (Yobe 4:17, 18) Elifaze akhatongwa na cakucitwa cauzimu cakuipa. Mafalace akhapangiza manyerezero akusiyana na aumulungu. Mbidakhala kuti si tenepo tayu, thangwi yanji Yahova mbadasandika Elifaze na axamwali ace awiri thangwi yakulonga uthambi? (Yobe 42:7)
13. Kodi mafala a Yobe anagumanika pa Yobe 7:9, 10 na Yobe 10:21 asapangiza kuti iye nee akhakhulupira kulamuka muli akufa? Nkhabe. Mafala a Yobe anagumanika pa mavesi anewa asalonga pya tsogolo yace yapaduzi. Panango mabvekero mabodzi ndi akuti mbidakhala kuti Yobe afa, nee munthu mbodzi wa m’nzidzi wace mbadamuona pontho. M’maonero awo, iye mbadakhala pontho maso tayu nee kukhala pontho na cidziwiso mpaka nzidzi wakuikhwa wa Mulungu. Panango Yobe akhafunambo kulonga kuti nee munthu mbodzi angakwanise kubuluka m’Sheole na mphambvu yace ene. Mafala anagumanika pa Yobe 14:13-15 asapangiza mwapakweca kuti Yobe akhakhulupira kulamuka muli akufa kwa ntsogolo. [3, w06 15/3 “A Palavra de Jeová É Viva—Destaques do livro de Jó”]
14. Kodi Yobe akhafuna longanji na mafala akuti ‘ndapulumuka na khanda ya m’mano mwanga’? (Yobe 19:20, NM) Pisaoneka kuti nee pasafunika tayu kuwangisira kufokotoza mafala a Yobe kubulukira ku udzindikiri udacita asiyentista cincino na ciphedzo ca microscópios (mitcini ya kuona nayo pinthu ping’ono kakamwe). (it-3 tsa. 219) M’kulonga kuti iye apulumuka na khanda ya cinthu cakuoneka ninga cakusowa khanda, panango Yobe akhalonga kuti iye hadapulumuka na cinthu tayu. [5, w06 15/3 “A Palavra de Jeová É Viva—Destaques do livro de Jó”]
15. Kodi Yobe akhalonganji na mafala akuti: ‘Nkhabe kudzasiya umumphu wanga,’ na tingakwanise kupfunzanji mwa pyenepi? (Yobe 27:5, NM) Yobe basi mbadakwanisa kusiya umumphu wace thangwi umumphu usanyindira kufuna kwa munthu Mulungu. Natenepa, tisafunika kukulisa kufuna kakamwe Yahova towera tikoye umumphu wathu. [6, w06 15/3 “A Palavra de Jeová É Viva—Destaques do livro de Jó”]